Makebisi ya Nsuka

Na Mokambi Russell M. Nelson

Bolongobani ya moto esengaka mbongwana mobimba ya makanisi mpe motema kozala mingi lokola Nkolo.

Bandeko na ngai balingami mibali mpe basi, lokola tokimi na nsuka ya likita na biso ya momesano, totondi Nkolo mpo na bofuli bansango mpe miziki oyo esepelisi biso. Tosepeli mpenza na feti ya molimo.

Toyebi nsango malamu ezongisama ya Yesu Klisto ekomema elikia mpe esengo na bato oyo bakoyoka mpe kosalela malongi na Ye. Toyebi lisusu ete libota moko na moko ekoki kokoma eseki ya bondimi, esika oyo kimia, bolingo, mpe Molimo ya Nkolo ekoki kofanda.

Ya solo, eteni ya ntina mingi koleka ya Bozongisi ezali tempelo esantu. Makuli na yango ya bule mpe mayokani ezali ntina koleka mpo na bolengeli bato oyo bamilengeli mpo na koyamba Mobikisi na Boyei na Ye ya Mibale. Sikawa tozali na batempelo 166 ekulisama, mpe ebele ezali koya.

Milulu ya botali ndako ekosalama liboso ya bobulisi tempelo ya sika to kokomisa sika tempelo moko na moko ya sika. Baninga ebele ya boyambi na biso te bakozala kati ya batempelo oyo moto namoto na ngonga na ye mpe bakoyekola eloko moko na ntina ya mapamboli ya tempelo. Mpe basusu ya batali oyo bakozala na bolingi ya koyeba ebele. Basusu bakotuna mpenza lolenge nini bakoki kolongobana mpo na mapamboli ya tempelo.

Lokola bandimi ya Eklezia, tosengeli kolengelama mpo na koyanola mituna na bango. Tokoki kolimbola ete mapamboli ya tempelo ezali mpo na moto kani mpe bato nyonso oyo bakomilengela bango moko. Kasi yambo bakoka kokota na tempelo ebulisama, basengeli kolongisama. Nkolo alingaka bana na Ye nyonso bazwa mapamboli ya seko kati ya tempelo na Ye. Akambaki oyo moto na moto asengeli kosala mpo na kolongobana na kokota na ndako na Ye esantu.

Esika malamu mpo na kobanda libaku ya liteya ya lolenge oyo ezali kotia bokebi na maloba oyo ekomami libanda ya tempelo: “Bosantu epai ya Nkolo; Ndako ya Nkolo.” Nsango ya Mokambi Eyring lelo mpe ebele ya misusu efuli biso tokoma bule koleka. Tempelo moko na moko ezali esika ya bule; mosali makuli moko na moko ya tempelo alukaka kokoma bule koleka.

Masengami nyonso mpo na kokota tempelo ekangani na bosantu ya moto ye moko. Mpo na kososola bomilengeli wana, moto moko na moko oyo alingi kosepela na mapamboli ya tempelo akozala na bosololi mibale: ya yambo na episikopo, mopesi toli ya episikopo, to mokambi ya etape; ya mibale na mokambi ya likonzi to ya misio to moko ya bapesi toli na ye. Na babosololi oyo, mituna ebele ekotunama.

Ndambo ya mituna oyo ewuti kokomama kala te mpo na pole. Nalingi natangela bino yango sikawa:

Ozali na bondimi na mpe litatoli ya Nzambe, Tata ya Seko; Mwana na Ye, Yesu Klisto; mpe ya Molimo Mosantu?
Ozali na litatoli ya Bomikabi ya Klisto mpe ya mosala na Ye lokola Mobikisi mpe Mosikoli na yo?
Ozali na litatoli ya Bozongisi ya nsango malamu ya Yesu Klisto?
Osungaka Mokambi ya Eklezia ya Yesu Klisto ya Basantu ba Mikolo mya Nsuka lokola profeta, momoni, mpe mobimisi mpe lokola moto bobele moko na mabele oyo azali na mpe apesami ndingisa ya kosalela bafungola nyonso ya bonganganzambe?

Osungaka bato ba Bokambi ya Yambo mpe ba Lisanga Likoki ya Bapostolo Zomi na Babale lokola baprofeta, bamoni, mpe babimisi?

Osungaka Bakonzi Banene basusu mpe bakambi ya Eklezia ya mboka?
Nkolo alobaki ete makambo nyonso esengeli “kosalema na bopeto” liboso na Ye (Doctrine et Alliances 42:41).

Olukaka bopeto ya bomoto na makanisi na yo mpe bizaleli?

Otosaka mobeko ya bopeto?
Olandaka mateya ya Eklezia ya Yesu Klisto na ezalela na yo ya bonkuku mpe na miso ya bato bansoo mpe ya bato ya libota na yo mpe basusu?
Osungaka to otombolaka mateya, mimesano, to malongi songolo oyo ekeseni na oyo ya Eklezia ya Yesu Klisto ya Basantu ba Mikolo mya Nsuka te?
Olukaka kobatela mokolo ya Saba ezala esantu, nyonso mibale na ndako mpe na eklezia; kokende makita; kolemilengela mpo na mpe kolia elambo na bolongobani; mpe kozala na bomoi engebene na mibeko mpe mitindo ya nsango malamu?
Olukaka kozala sembo na makambo nyonso osalaka?
Ofutaka moko na zomi na yo ya mobimba?
Ososolaka mpe otosaka Liloba ya Bwanya?
Opesaka mosolo to masengeli mosusu na mwasi to mobali moko ya kala to na bana?

Soki iyo, okokisaka masengami wana?
Obatelaka mayokani oyo osalaki na tempelo, mpe lisusu olataka garma ya tempelo lokola eteyami na dotasio?
Ezali na masumu songolo na bomoi na yo oyo osengelaki kobongisa na bakambi ya bonganganzambe lokola eteni boyamboli na yo?
Ozali komimona yo moko lokola olongobani mpo na kokota na ndako ya Nkolo mpe kozala na makuli ya tempelo?

Lobi, mituna oyo etangami ya tempelo ekopesama na bakambi nyonso ya Eklezia na mokili mobimba.

Na kobakisa na boyanoli na bango ya mituna oyo na lolenge ya sembo, esosolami ete mosali makuli ya mokolo moko na moko akolata garma ya bonganganzambe na nse ya bilamba na bango. Oyo ezali elembo ya bomipesi ya kati mpo na koluka mokolo na mokolo kokoma mingi lokola Nkolo. Ekundolisaka biso lisusu totikala na bondimi na mayokani tosalaka mokolo na mokolo mpe kotambola na nzela ya boyokani mokolo nyonso na lolenge moko ya likolo koleka mpe esantu koleka.

Sikawa, mpo na kaka mwa ngonga, nalingi nalobela bilenge na biso. Tolendisaka bino bolongobana mpo na mikanda ya tempelo ya bosaleli ya ndelo. Bokutunama bobele mituna oyo etali bino na bolengeli na bino mpo na makuli ya libatisi mpe nkotisa ya bozwili. Tozali na matondi mpenza mpo na bolongobani mpe bolingi na bino ya kosala mosala wana ya bule ya tempelo. Totondi bino botondi!

Bolongobani ya moto mpo na kokota na ndako ya Nkolo esengaka bomilengeli ya molimo ya moto ye moko. Kasi elongo na lisungi ya Nkolo, eloko moko te ekozala mpasi. Na ndenge mosusu, ezali pete kotonga tempelo koleka kolengela bato moko oyo balengelama mpo na tempelo. Bolongobani ya moto esengaka mbongwana mobimba ya makanisi mpe motema kozala mingi lokola Nkolo, kozala moto ya sembo, kozala ndakisa malamu koleka, mpe kozala mosantu.

Natatoli ete bolengeli ya mosala ya boye ememaka mapamboli ebele na bomoi mpe mapamboli ebele na bomoi oyo ezali koya lobi, mpe lisusu bokobi ya bosangani ya libota na yo na boseko nyonso “na lolenge ya esengo ezanga nsuka.”¹

Sikawa nalingi nalobela liteya mosusu: miango mpo na mobu oyo ezali koya. Na eleko ya mopepe ya mobu 2020, ekozala bokokisi ya mibu 200 uta Joseph Smith amonaki bomilakisi ya Nzambe epai ya moto oyo toyebi lokola Limonisi ya Yambo. Nzambe Tata mpe Mwana na Ye ya Bolingo, Yesu Klisto, bamimonisaki epai ya Joseph, elenge ya mibu 14. Molulu esalaki bobandisi ya Bozongisi nsango malamu ya Yesu Klisto kati ya bofuluki na yango, lokola elobamaki mpenza na kati ya Biblia Esantu.²

Nsima ekomaki bokobi ya botali uta batindami ya lola, mpe lisusu Moroni, Yoane Mobatisi, mpe Bapostolo ya ebandeli Petelo, Yakobo, mpe Yoane. Basusu balandaki, mpe lisusu Mose, Elia, mpe Eliya. Moko na moko amemaki likoki ya bonzambe mpo na kopambola bana ya Nzambe na mabele lisusu.

Na lolenge ya bikamwisi, tozwaki mpe Buku ya Mormon: Litatoli Mosusu ya Yesu Klisto, monginga ya makomi ya Biblia Esantu. Mabimisi oyo ebimisamaki na kati ya Malongi mpe Mayokani mpe Liyaka ya Ntalo Monene yango mpe epesi nkita monene na bososoli na biso ya mitindo ya Nzambe mpe bsolo ya seko.

Bafungola mpe misala ya bonganganzambe ezongisamaki, mpe lisusu misala Apostolo, Ntuku nsambo, nkoko, nganganzambe monene, mpaka, nganganzambe, mpe diakona. Mpe mwasi oyo alingaka Nkolo asungaka na bompikiliki na Lingomba ya Lisungi, Eteyelo ya bana, Bilenge Basi, Eteyelo ya Eyenga, mpe na mbiangi misusu ya Eklezia—biteni nyonso ya ntina ya Bozongisi nsango malamu ya Yesu Klisto na bofuluki na yango.

Na yango, mobu 2020 ekozala lokola mobu ya nkama mibale. Likita linene ya Sanza ya minei oyo ezali koya ekokesena na makita nyonso esalema liboso. Na basanza motoba oyo ezali koya, naliki ete mondimi nyonso mpe libota nyonso ekomilengela mpo na likita ya kafukafu oyo tokosepela mpenza na nsango malamu ezongisama.

Bokoki kosepela kobanda bolengeli na bino na kotangaka lisolo malamu ya Joseph Smith ya Limonisi ya Yambo lokola ekomami na Liyaka ya Ntalo Monene. Bokobi na biso ya koyekola mpo na mobu oyo ezali koya kati ya Yaka, Landa Ngai ezali Buku ya Mormon. Bokoki kosepela komanyola mituna ya ntina lokola, “Lolenge nini bomoi na ngai ekoki kozala ya kokesana soki boyebi oyo nazwi uta na Buku ya Mormon elongolamaki na mbalakaka?” to “Lolenge nini makambo oyo elandaki Limonisi ya Yambo esalaki bokeseni mpo na ngai mpe balingami na ngai?” Lisusu, elongo na bavideo ya Buku ya Mormon sikawa ezali, okoki kosepela kokotisa yango na kati ya boyekoli na yo moko mpe ya libota.

Pona mituna na yo moko. Pona mwango na yo moko. Mikotisa yo moko kati ya pole ya nkembo ya Bozongisi. Lokola osali bongo, likita linene oyo ezali koya ya Sanza ya minei ekozala te kaka ya bokundoli, kasi ekozala ya kobosana te.

Sikawa na kosukisa, natikeli bino bolingo na ngai mpe lipamboli na ngai, ete moko na moko kati na bino akoka kozala na esengo mpe santu elongo na mikolo nyonso. Na ntango oyo, bozala na kondima ete emoniseli ezali kokoba na Eklezia mpe ekokoba na nse ya bokambi ya Nkolo kino kino “bantina ya Nzambe ekokokisama, mpe Yehova Monene akoloba mosala esalemi.”³

Napamboli bino, napesi bolingo na ngai epai na bino, na litatoli ete Nzambe azali na bomoi! Yesu azali Klisto! Oyo ezali Eklezia na Ye mpe tozali bato ba Ye.” Na nkombo ya bule ya Yesu Klisto, amene.