Pangrikep a Sarita

Ni Presidente Russell M. Nelson

Ti bukod a pannakaikari ket agkasapulan iti naan-anay a panagbalbaliw ti panunot ken puso tapno ad-adda pay nga agbalin a kas iti Apo.

Patpatgek a kakabsatko, bayat ti panangigibustayo iti daytoy napnuan pakasaritaan a komperensia, agyamankami iti Apo kadagiti makaparegta a mensahe ken musika a nangitandudo kadatayo. Pudno a naespirituan a nagpennektayo.

Ammotayo a ti naisubli nga ebanghelio ni Jesucristo ket mangyegto iti namnama ken rag-o kadagiti tao a dumngeg ken mangipangagto iti dokrinana. Kasta met nga ammomi nga agbalin ti tunggal pagtaengan a pudno a santuario ti pammati, a mabalin a pagindegan ti talna, ayat, ken ti Espiritu ti Apo.

Pudno unay, ti nasantuan a templo ti kapatgan a paset ti Pannakaisubli. Napateg dagiti sagrado nga ordinansa ken katulagan iti panangisagana kadagiti tao a nakasaganan a mangpasangbay iti Mangisalakan iti Maikadua a Yaayna. Iti agdama addaantayon iti 166 a naidatonen a templo, ken ad-adu pay ti mabangon.

Maangayto ti maysa nga open house sakbay ti pannakaidaton ti tunggal kabarbaro ken natarimaan a templo. Adu a gagayyem a ditayo kapada iti relihion ti makiramanto kadagiti panaglibot kadagita a templo ket masursurodanto ti maysa a banag maipapan kadagiti bendision iti templo. Ken sumagmamano kadagita a sangaili ti agkalikagumto a mangammo iti ad-adu pay. Sumagmamano ti sipupudno nga agsaludsod no kasano a maikarida kadagiti bendision ti templo.

Kas miembro ti Simbaan, kasapulan a nakasaganatayo a mangsungbat kadagiti saludsodda. Mabalintayo nga ilawlawag a dagiti bendision iti templo ket sidadaan a magun-od ti siasino man ken ti amin a tao a mangisagananto iti bagbagida. Ngem sakbay a makastrekda iti maysa a naidatonen a templo, nasken a maikarida. Kayat ti Apo a makiranud ti amin nga annakna kadagiti agnanayon a bendision a magun-od iti templona. Inturongna no ania ti nasken nga aramiden ti tunggal tao tapno maikari a sumrek iti nasantuan a balayna.

Ti maysa a nasayaat a lugar a pangirugiantayo iti kasta a gundaway a panangisuro ket ti panangikaso kadagiti balikas a naikitikit iti ruar ti templo: “Holiness to the Lord: The House of the Lord.” Naparegtanatayo ti mensahe ni Presidente Henry B. Eyring ita ken ti adu a dadduma pay nga agbalin a nasansantuan. Maysa a nasantuan a lugar ti tunggal templo; ikarigatan ti tunggal patron iti templo nga agbalin a nasansantuan.

Mainaig iti bukod a kinasanto ti amin a naidawat a kasapulan a sumrek iti templo. Tapno maamiris dayta a panagsagana, maaddanto iti dua nga interbyu ti tunggal tao nga agtarigagay a mangsagrap kadagiti bendision ti templo: umuna iti maysa a bishop, mammagbaga iti bishopric, wenno branch president; maikadua iti maysa a stake president wenno mission president wenno maysa kadagiti mammagbagana. Kadagita nga interbyu, madamagto dagiti sumagmamano a saludsod.

Itay kallabes a na-edit ti sumagmamano kadagita a saludsod tapno nalawlawag. Kayatko nga irebyu dagitoy ita para kadakayo:

Adda kadi pammatim ken pammaneknekmo iti Dios, ti Agnanayon nga Ama; iti Anakna, ni Jesucristo; ken iti Espiritu Santo?
Adda kadi pammaneknekmo iti Pannubbot ni Jesucristo ken iti akemna a kas Mangisalakan ken Mannubbotmo?
Adda kadi pammaneknekmo iti Pannakaisubli ti ebanghelio ni Jesucristo?
Kankanunongam kadi ti Presidente ti Ti Simbaan ni Jesucristo dagiti Santo iti Ud-udina nga Aldaw a kas propeta, mammadto, ken mammaltiing ken kas agmaymaysa a tao iti daga nga agik-ikut ken addaan iti karbengan a mangaramat iti amin a tulbek ti priesthood?

Kankanunongam kadi dagiti miembro ti Umuna a Panguluen ken ti Korum dagiti Sangapulo-ket-dua nga Apostol kas propeta, mammadto, ken mammaltiing?

Kankanunongam kadi dagiti dadduma pay a General Authority ken dagiti lokal a lider ti Simbaan?
Kinuna ti Apo nga amin a banag ket “aramiden a nadalus” iti imatangna (Doktrina ken Katulagan 42:41).

Ikarkarigatam kadi nga aramiden a nadalus ti panunot ken galadmo?

Tungtungpalem kadi ti linteg ti kinadalus ti dayaw?
Sursurotem kadi dagiti pannursuro ti Simbaan ni Jesucristo iti tignaymo iti pribado ken publiko kadagiti miembro ti pamiliam ken kadagiti dadduma?
Supsuportaram wenno itantandudom kadi dagiti ania man a pannursuro, kannawidan, wenno doktrina a maisupiat kadagiti maisursuro iti Ti Simbaan ni Jesucristo dagiti Santo ti Ud-udina nga Aldaw?
Ikarkarigatam kadi a mangpatalinaed a nasantuan iti aldaw ti Sabbath, iti pagtaengan ken iti simbaan; dumardar-ayka kadagiti mitingmo; agsagsagana ken maikarika a makiranud iti sakramento; ken agbibiagka a maitunos kadagiti paglintegan ken bilin ti ebanghelio?
Ikarkarigatam kadi ti agbalin a napudno iti amin nga ar-aramidem?
Agbaybayadka kadi iti naan-anay nga apagkapullo?
Maawatam ken tungtungpalem kadi ti Word of Wisdom?
Adda kadi obligasionmo iti pinansial wenno dadduma pay nga obligasion iti sigud nga asawam wenno kadagiti annakmo?

No adda, maipatpatungpalmo kadi dagita nga obligasion iti agdama?
Tungtungpalem kadi dagiti katulagan nga inaramidmo iti templo, agraman ti panagkawes iti temple garment kas naisuro iti endowment?
Adda kadi dagiti nadagsen a basol iti biagmo a nasken a marisut kadagiti awtoridad ti priesthood kas paset ti panagbabawim?
Ibilbilangmo kadi ti bagim a maikari a sumrek iti balay ti Apo ken makiraman kadagiti ordinansa iti templo?

Inton bigat, maipatulodto dagitoy narebisa a saludsod para iti temple recommend kadagiti lider ti Simbaan iti intero a lubong.

Mainayon iti napudno a panangsungbatda kadagitoy a saludsod, maawatan a ti tunggal nataengan a temple patron ket agkawesto iti sagrado a garment ti priesthood iti uneg ti gagangay a kawesda. Daytoy ti simbolo ti maysa a naespirituan a panagkumit iti uneg a mangikarigatan iti inaldaw nga agbalin nga ad-adda a kas iti Apo. Daytoy pay ti mangipalagip kadatayo nga agtalinaed a napudno iti inaldaw kadagiti katulagan a naaramid ken ti magna iti dana ti katulagan iti tunggal aldaw iti nangatngato ken nasansantuan a wagas.

Ita, iti apagkanito laeng, kayatko ti agsarita kadagiti agtutubo. Allukoyendakayo nga agbalin a maikari kadagiti limited-use temple recommend. Damagendanto laeng kadakayo dagiti saludsod a mayannatup kadakayo iti panagsaganayo para kadagiti ordinansa ti panagbuniag ken kumpirmasion para kadagiti pimmusayen. Agyamankami unay para iti pannakaikariyo ken ti kinatallugodyo a makiraman iti dayta sagrado nga aramid iti templo. Agyamankami kadakayo!

Ti bukod a pannakaikari tapno makastrek iti balay ti Apo ket agkasapulan iti adu a bukod a naespirituan a panagsagana. Ngem babaen iti tulong ti Apo, awan ti imposible. Iti sumagmamano nga aspeto, nalaklaka ti mangbangon iti maysa a templo ngem iti mangisagana kadagiti tao para iti maysa a templo. Agkasapulan ti bukod a pannakaikari iti naan-anay a panagbalbaliw iti panunot ken puso tapno agbalin nga ad-adda a kas iti Apo, agbalin a napudno a makipagili, agbalin a nasaysayaat a pagwadan, ken agbalin a nasansantuan a tao.

Paneknekak a ti kasta a panagsagana a trabaho ket mangisangbay iti adu bendision para iti daytoy a biag ken dagiti di mapagduaduaan a bendision iti biag nga umay, agraman ti panagtultuloy ti pamiliayo iti unos ti kinaagnanayon “iti kasasaad a dinto pulos agressat a ragsak.”¹

Ita kayatko nga ilawlawag ti sabali pay a topiko: dagiti plano iti umay a tawen. Iti tiempo ti panagsusulbod iti tawen 2020, eksakto a 200 a tawen manipud idi napadasan ni Joseph Smith ti parmata nga ammotayo a ti Umuna a Parmata. Nagparang ti Dios Ama ken ti Patpatgenna nga Anak, ni Jesucristo, ken ni Joseph, maysa nga agtutubo nga agtawen iti 14. Dayta a pasamak ti tanda ti nangrugian ti Pannakaisubli ti ebanghelio ni Jesucristo iti pakabuklanna, kas naipadto iti Nasantuan a Biblia.²

Kalpasanna dimteng dagiti agsasaruno nga isasarungkar manipud kadagiti nailangitan a mensahero, a pakairamanan ni Moroni, ni Juan Bautista, ken dagiti nagkauna nga Apostol a da Pedro, Santiago, ken Juan. Simmaruno dagiti dadduma, a pakairamanan da Moises, Elias, ken Elijah. Nangyeg ti tunggal maysa iti nadiosan nga awtoridad a mangbendision manen kadagiti annak ti Dios iti daga.

Namilagruan pay nga inawattayo ti Libro ni Mormon: Mainayon a Pammaneknek ken ni Jesucristo, maysa a nasantuan a kasuratan a kadua ti Nasantuan a Biblia. Dagiti paltiing a naipablaak iti Doktrina ken Katulagan ken Perlas a Kapatgan ti nangpaddakkel pay iti pannakaawattayo kadagiti bilin ti Dios ken ti agnanayon a kinapudno.

Naisublin dagiti tulbek ken saad [office] ti priesthood, agraman dagiti saad ti Apostol, Pitupulo, patriarch, high priest, elder, bishop, priest, teacher, ken deacon. Ken dagiti babbai a mangipatpateg iti Apo ket situtured nga agserbi iti Relief Society, Primary, Young Women, Sunday School, ken dadduma pay a takem iti Simbaan—amin a napateg a paset ti Pannakaisubli ti ebanghelio ni Jesucristo iti pakabuklanna.

Iti kasta, mapusganto ti tawen a 2020 kas dua a siglo (bicentennial) a tawen. Ti sapasap a komperensia iti sumuno nga Abril ket maigiddiatto kadagiti napalabas a komperensia. Iti sumaruno nga innem a bulan, namnamaek nga agsaganto ti tunggal miembro ken tunggal pamilia para iti naidumduma a komperensia a mangrambak kadagiti mismo a pundasion ti naisubli nga ebanghelio.

Mabalin a kayatmo a rugian ti panagsaganam babaen iti panangbasa manen iti pakaammuan ni Joseph Smith iti Umuna a Parmata kas naisurat iti Perlas a Kapatgan. Ti kurso nga adalen para iti sumaruno a tawen iti Umaykayo, Sumurot Kaniak ket ti Libro ni Mormon. Mabalin a kayatmo nga utoben dagiti napapateg a saludsod kas iti, “Kasano ngata a maiduma ti biagko no ti pannakaammo a nagun-odko manipud iti Libro ni Mormon ket kellaat a napukaw?” wenno “Kasano a nakaipaay iti pakaidumaan kaniak ken dagiti ipatpategko dagiti simmaruno a pasamak iti Umuna a Parmata?” Kasta met, nga addaan kadagiti video ti Libro ni Mormon a mabalin a sidadaan a magun-od itan, mabalinmo nga itipon ida iti bukod ken sangapamiliaan a panagadalyo.

Piliem dagiti bukodmo a saludsod. Aramidem ti bukodmo a plano. Igamermo ti bagim iti nadayag a lawag ti Pannakaisubli. Bayat ti panangaramidmo, saanto laeng a nakallalagip ti sapasap a komperensia iti sumuno nga Abril; saanto a malipatan daytoy.

Ita, iti panangigibus, ibatik kadakayo ti ayatko ken pammendisionko nga agbalin a naragragsak ken nasansantuan ti tunggal maysa kadakayo iti panaglabas ti tunggal aldaw. Kasta met, a namnamaenyo koma nga agtultuloy ti paltiing iti Simbaan ken agtultuloyto babaen ti panangiturong ti Apo agingga “ti pannakatungpal dagiti panggep ti Dios, ket kunanto ti Naindaklan a Jehova nalpasen ti aramid.”³

Bendisionankayo, kas pammatalged ti panagayatko kadakayo, nga addaan iti pammaneknekko a sibibiag ti Dios! Ni Jesus ti Cristo! Daytoy ti Simbaanna ket datayo dagiti taona. Iti sagrado a nagan ni Jesucristo, amen.