Kōrā in Bujen ro ilo Jemdoon eo ippān Anij
Erom juon kōrā in bujen eo ilo jemdoon eo ippān Anij ej ewi kilepān im em̧m̧an eo an leddik ro nejin Anij kar iien otemjej kōkkajiiriri, tōl, im jerbal in karejar.
Ij kam̧m̧oolol kōn kōjeraam̧m̧an eo n̄an kōnono n̄an kom̧, leddik in bujen ro nejin Anij. Joten in, jibadbad eo aō ej n̄an kōketak kom̧ ilo jerbal in jipan̄ eo eļap me kar kūr kōm n̄ane. Aaet, aolep leddik ro nejin Anij rej ron̄jake ainikiō raar bōk juon kūr jān Irooj Jisōs Kraist.
Kūr eo ami ekar ijjino ke kar likūt kom̧ ilo mour wabanban in, ilo juon jikin im iien kar kāālete n̄an kom̧ jān juon Anij eo me eweeppān an jeļā kajjiemi im iakwe kom̧ āinwōt leddik eo Nejin. Ilo laļ eo an jetōb, Eaar jeļā kom̧ im kar katakin kom̧ im kar likūt kom̧ ijo enaaj kar wōr ami iien em̧m̧an, ejeja ilo bwebwenato an laļ in, n̄an kar kajjitōk n̄an deļo̧n̄ ilo juon jikin peptaij. Ijo, kom̧ naaj kar ron̄jake naan kein kar kōnono kaki jān juon rikarejeran Jisōs Kraist kar kūri: “Bwe em̧ōj an Jisōs Kraist kōmālim eō, ij peptaij eok ilo etan Jemān, im Nejin, im Jetōb Kwōjarjar. Amen.”1
Ke kom̧ kar ato jān dān eo, kom̧ kar bōk bar juon kūr n̄an jerbal. Āinwōt juon leddik bujen kāāl nejin Anij, kom̧ kar kōm̧m̧ane juon kallim̧ur im kar bōk juon jerbal ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ko̧m kar bujen ippān Anij n̄an bōk ioomi make etan Jisōs Kraist, n̄an kōjparok kien ko An, im n̄an jerbal n̄an E.
N̄an kajjojo me rej kōm̧m̧ani bujen kein, jerbal in jipan̄ eo me Irooj ej kūr ļeo ak lio n̄an kōm̧m̧ane naaj kanooj karbōb n̄an armej jab in. Leddik im ļaddik in bujen ro nejin Anij, mekarta, aolep rej kwaļo̧k juon kūr aorōk im kōlan̄lōn̄. Ej n̄an jerbal n̄an ro jet n̄an E.
Ekōnono n̄an kōrā ro, Būreejtōn Russell M. Nelson eaar leļo̧k juon naan ilo tukadu in aiboojoj kōn kūr eo an Irooj n̄an kom̧ n̄an kobaļo̧k Ippān ilo jerbal eo An. Būreejtōn Nelson ekar kōmeļeļeik kūr eo am̧ ilo wāween: “Irooj eaar ba, ‘Jerbal eo aō im aiboojoj eo aō [ej] n̄an kakūrm̧ool jab wabanban im mour indeeo an armej.‘ (Moses 1:39.) Kōn menin leddik-rikaļoor eo Nejin em̧ool emaron̄ ba, ‘Jerbal im aiboojoj eo aō ej n̄an jipan̄ ro aō jitōn bōro tōpar kōttōpar in lan̄ eo.’
“N̄an jipan̄ bar juon armej tōpar kōjatdikdik in aiboojoj in aļ eo an juon ej m̧ōttan mijen eo ekwojarjar an kōrā. Āinwōt juon jinen, rūkaki, ak rinaajdik Armej Rekwojarjar, liin ej jipan̄ jelet mour ko an ro jet. Ilo m̧ōttā ippān Anij, mijen eo an ekwojarjar ej n̄an jipan̄ jetōb ko mour im jetōb ko erom utiej tata. En̄in ej jon̄o̧k in mour eo an. Ej juon men eutiej, ekōkajoorļo̧k, im eutiej tata.”2
Kom̧ij jab maron̄ jeļā n̄āāt, ak ewi aitokan iien eo, mijen eo ami make enaaj pedped ioon jerbal in jipan̄ eo ilo kūr ko āinwōt m̧am̧a, ritōl, ak sister in jerbal in jipan̄. Irooj, kōnke kōn iakwe eo An, ejjab letok n̄an kōj kāālet eo kōn iien, aitokan, ak karōkan jerbal ko ad. Bōtaap kom̧ij jeļā jān jeje ko rekwojarjar im rikanaan ro remour bwe aolep jerbal kein renaaj itok, n̄e ejjab ilo mour in ak ilo eo juon, n̄an aolep leddik ro nejin Anij. Im aolepāer rej m̧aanjabpopo n̄an mour indeeo ilo iakwe baam̧le ko—”eo eļap tata iaan aolep menin letok ko an Anij.”3
Kom̧ naaj lo̧ļe n̄an leļo̧k aolep kijejeto ko n̄an m̧aanjabpopo kiiō kōn ļōmņak kōn jem̧ļo̧k eo. Jerbal eo ej kōm̧m̧an an pidodoļo̧k kōnke kajjojo iaan jerbal kein ebōk ļap in ejja m̧aanjabpopo eo.
Jen jino kōn jerbal eo n̄an erom juon sister in jerbal in karejar. Mekarta ewōr ippam̧ jerbal eo āinwōt juon 10 iiō dettan leddik nejin ilo juon baam̧ļe eo me em̧ōj an eo jemen mej, ak āinwōt juon būreejtōn an Doulul eo an Kōrā ro eo ijo jikin kiiō epaak ekar jorrāān jān kijeek, ak n̄e kwoj pād ilo aujpitōl kamomo jān juon m̧wijm̧wij—ewōr am̧ iien n̄an kakūrm̧ool kūr eo am̧ jān Irooj n̄an erom leddik in jerbal in karejar eo Nejin.
Jekjek kein rej waļo̧k āinwōt jerbal in karejar ko relukkuun oktak. Bōtaap rej aolep menin aikuji m̧aanjabpopo eo an juon bōro eo ekajoor, iakwe, im tōmak eo ejjab mijak bwe Irooj ej letok ejjeļo̧k ijjitōn̄ ijello̧kin Ej kōpooj juon iaļ, im juon ikdeelel n̄an etal im n̄an kōm̧m̧ane n̄an E.4
Kōnke ekar pojak, leddik eo 10 iiō-dettan ej likūt pein ipeļaakin eo jinen emej ļeo pāleen im kar jar n̄an jeļā ekōjkan an jipan̄ baam̧le eo an. Im ej wōnm̧aanļo̧k wōt im jar.
Būreejtōn eo an Doulul eo an Kōrā ro eaar m̧aanjabpopo n̄an jerbal in karejar m̧okta jān kijeek eo kar jab kōtmene kake ilo eria eo an. Ekar itok n̄an jeļā im iakwe armej ro. An tōmak ilo Jisōs Kraist ekad eddōkļo̧k ilo iiō ko jān an kar bōk uwaak ko n̄an jar ko an n̄an Irooj n̄an jipan̄ e ilo jerbal in jipan̄ ko reddik n̄an E. Kōnke kōn m̧aanjabpopo eo jān etto, liin eaar pojak im kijooror n̄an karōk sister ro an n̄an jerbal in karejar n̄an armej ro im baam̧ļe ko rej liāājļo̧ļ.
Juon sister ej kamomo ilo juon aujpitōļ jān juon m̧wijm̧wij ekar pojak n̄an jerbal in karejar n̄an rinan̄inmej ro jet m̧ōttan. Liin eaar joļo̧k iien an mour n̄an jerbal in karejar ilo etan Irooj n̄an aolep ruwaimejet ro āinwōt eļan̄n̄e ļeo ak lio ej juon riturin ak m̧ōttan. Ke eaar en̄jake ilo būruwōn kūr eo n̄an jerbal in karejar ilo aujpitōļ eo, liin eaar jerbal n̄an ro jet ilo lukkuun peran im kōn juon iakwe em̧m̧an jon̄an rinan̄inmej ro jet raar jino kōjatdikdik eban m̧ōkaj an ājmour.
Ilo ejja wāween in wōt me kom̧ij m̧aanjabpopo n̄an jerbal in karejar, kom̧ij maron̄ im aikuj pojak n̄an kūr eo ami n̄an erom juon ritōl n̄an Irooj n̄e ej itok. Enaaj bōk tōmak ilo Jisōs Kraist, pedped ioon iakwe eo aorōk n̄an ami kōn jeje ko rekwojarjar, n̄an tōl armej ro im n̄an katakin naan eo An ilo ejjeļo̧k mijak. Innām kom̧ naaj pojak n̄an bōk Jetōb Kwojarjar eo āinwōt eo m̧ōttami iien otemjej. Kom̧ naaj ellowetak n̄an ba, “Inaaj,” n̄e rikakpilōklōk eo ami ilo būreejtōnji eo an Doulul eo an Jiron̄ ro ej ba, “Sister Alvarez enan̄inmej rainin. Won eo enaaj katakin kūlaaj eo an?”
Ebōk ejja m̧aanjabpopo eo wōt n̄an raan eo eaiboojoj n̄e Irooj ej kūr kom̧ n̄an juon jerbal āinwōt juon m̧am̧a. Bōtaab enaaj barāinwōt bōk em̧ool juon būruwōn iakwe eļapļo̧k jān ami kar aikuj m̧oktaļo̧k. Enaaj bōk tōmak ilo Jisōs Kraist eļapļo̧k jān ta eo ekar pād ilo būruwōmi m̧okta. Im enaaj bōk juon kakkōk n̄an jar kōn kareel, tōl, im kaenōm̧m̧an an Jetōb Kwojarjar eļapļo̧k jān ta eo kom̧ maron̄ kar en̄jake aaet ekar maron̄.
Kom̧ maron̄ kajjitōk ekōjkan an juon armej jān jabdewōt iien maron̄ jeļā ta eo m̧am̧a ro raikuji. Ej juon kajjitōk em̧m̧an. Em̧m̧aan ro rejjab maron̄ jeļā aolep men, bōtaab jemaron̄ ekkatak jet katak ko jān revelesōn jān Anij. Im jemaron̄ barāinwōt ekkatak eļap jān watwat, n̄e jej bōk iien eo em̧m̧an n̄an kappukōt Jetōb eo n̄an jipan̄ kōj meļeļe ta eo jej watwate.
Ilakkar watwate Kathleen Johnson Eyring ium̧win 57 iiō ko kōm kar m̧are. Liin ej jinen emen ļaddik ro im ruo leddik ro. N̄an tōre in, liin ekar bōk kūr eo n̄an erom juon jinen eo eļap kilaan eļapļo̧k jān buki ro uwaan baam̧ļe eo an make im buki elōn̄ļo̧k ro kar kōm̧m̧ane n̄an er āinwōt rej baam̧le kōn juon iakwe āinwōt an juon m̧am̧a.
Kom̧ij ke keememej kōmeļeļe ekanooj in jetjet an Būreejtōn Nelson kōn mijen eo ekwojarjar an juon kōrā—ekoba mijen in m̧am̧a eo an: “Āinwōt m̧am̧a, rūkaki, ak lale Armej eo Ekwojarjar, ej kareel mour n̄an jekjek eo an kōjatdikdik ko an. Ilo m̧ōttā ippān Anij, mijen eo an ekwojarjar ej n̄an jipan̄ jetōb ko mour im jetōb ko erom utiej tata. En̄in ej jo̧n̄o̧k in kōm̧anm̧an eo an.”5
Jān ta eo ijeļā, lio pāleō, Kathleen, ekar ļoor eddo jab in, kar leļo̧k n̄an leddik ro nejin Jemed. M̧ōttan eo aorōk ej waļo̧k n̄an n̄a aikuj naan ko “ej kareel mour n̄an jekjek eo an kōjatdikdik ko an … Ilo m̧ōttā ippān Anij.” Ejjab kōjerbal kipel. Ej kareel. Im ewōr ippān juon kōttōpar edepakpak n̄an kōjatdikdik ko an, im n̄an eo me eaar kajjieon̄ kareel ro eaar iakwe im kōkkajiiriri er. Kōttōpar eo an edepakpak eaar gospel eo an Jisōs Kraist—āinwōt aō maron̄ loe kōn watwate ilo jar ium̧win iiō ko.
Erom juon kōrā in bujen ilo m̧ōttā ippān Anij ej ewi kilepān im em̧m̧an eo an leddik ro nejin Anij kar iien otemjej kōkkajiiriri, tōl, im jerbal in karejar, jerbal ilo jabdewōt wāween im jikin Eaar kōpooje n̄an er. Ij kallim̧ur bwe kom̧ naaj lo lan̄lōn̄ ilo em̧m̧akūt eo ami n̄an kapijuknen eo ami ilan̄ ilo ami jepļaakļo̧k n̄an Ippān āinwōt juon leddik in kōjparok-bujen nejin Anij.
Ij kam̧ool bwe Anij Jemed emour im iakwe kom̧. Enaaj uwaake jar ko ami. Eo Nejin Jitōn Bōro ej tōl, ilo aolep tipdikin, Kabun̄ eo an Jisōs Kraist im Armej ro Rekwojarjar ilo Raan-ko Āliktata. Būreejtōn Russell M. Nelson ej rikanaan eo An emour. Im Josep Smith eaar lo im eaar ekōnono ippān Anij Jemen im Jisōs Kraist, ilo bukin wōjke ko ilo Palmyra, New York. Ijeļā bwe em̧ool. Ij barāinwōt kam̧ool bwe Jisōs Kraist eo ej am̧ Rilo̧mo̧o̧r, Ej iakwe eok. Im jān Pinmuur eo An, komaron̄ in erreo im wanlōn̄ļo̧k n̄an kūr ko routiej im kwojarjar ļo̧k ko renaaj iwōj n̄an eok. Ij kam̧ool ilo etan ekwojarjar Jisōs Kraist, amen.