Faamalolosi o Tatou Maso Faaleagaga
E pei lava o le faitau ma le aoao e uiga i maso e lē lava lea e fausia ai maso, e faapena foi o le faitau ma le aoao e uiga i le faatuatua e aunoa ma se faatinoga faaopoopo e lē lava lea e fausia ai le faatuatua.
Ou te faafetai lava mo le faamanuiaga o le mauaina o se tino faitino, o se meaalofa ofoofogia lea mai lo tatou Tama Faalelagi. E silia ma le 600 maso i o tatou tino.1 O le tele o maso e manaomia ai le faamalositino ina ia i ai i se tulaga lelei e faatino ai a tatou gaoioiga i aso taitasi. E mafai ona tatou faaaluina le tele o taumafaiga faalemafaufau e faitau ma aoao ai e uiga i o tatou maso, ae afai tatou te manatu o le faia o lenei mea o le a tatou malolosi atu ai, o le a tatou lē fiafia la. E na o le pau le mea e tuputupu a’e ai o tatou maso pe a tatou faaaogaina i latou.
Ua ou iloa o meaalofa faaleagaga e faapena foi o latou uiga. E manaomia foi ona faamalositino ina ia tuputupu a’e ai. O le meaalofa faaleagaga o le faatuatua, mo se faataitaiga, e le na o se lagona po o se uiga; o se mataupu faavae o le faatinoga lea e masani ona faaali mai i tusitusiga paia e fesootai i le veape faamalositino.2 E pei lava o le faitau ma le aoao e uiga i maso e lē lava lea e fausia ai maso, e faapena foi o le faitau ma le aoao e uiga i le faatuatua e aunoa ma se faatinoga faaopoopo e lē lava lea e fausia ai le faatuatua.
Ina ua 16 o’u tausaga, sa sau i le fale i se tasi aso, lo’u uso matua, o Ivan, na 22 tausaga i lena taimi, ma faamatala mai i le aiga ni nai talafou. Sa ia filifili e papatiso i Le Ekalesia a Iesu Keriso o le Au Paia o Aso e Gata Ai. Sa tilotilo atu ma le lē mautonu o matou matua ia te ia, ma ou te manatua lo’u le malamalama atoa i le mea na tupu. O se tausaga pe ā mulimuli ane, sa ia tuuina mai ai nisi talafou faate’ia: na ia filifili e auauna atu o se faifeautalai o le Ekalesia, o lona uiga o le a matou lē toe vaai ia te ia mo le lua tausaga. Sa le’i fiafia o’u matua i lenei tala; ae peitai, sa ou vaaia ia te ia se naunautaiga manino lea na faateleina ai lo’u faamemelo mo ia ma le faaiuga na ia faia.
I masina mulimuli ane, a o auauna atu Ivan i lana misiona, sa ou maua le avanoa e fuafua ai se tafaoga ma nisi o uo aoga. Sa matou mananao e faamanatu le faaiuina o o matou tausaga i le aoga maualuga ma faaalu ni nai aso i le matafaga.
Sa ou tusia se tusi i lo’u uso faifeautalai, e ta’u i ai la’u fuafuaga o se tafaoga i le taumafanafana. Sa ia tusi mai o le nuu sa ia tala’i ai e ui atu ai i lo’u nofoaga faamoemoeina. Sa ou filifili o se manatu lelei le afe i ai e asi o ia. Faatoa ou iloaina lava mulimuli ane e le tatau i aiga ona asia ia faifeautalai.
Sa ou faia fetuunaiga uma. Ou te manatua le saofai i luga o le pasi ma mafaufau i mea manaia uma o le a ma faia faatasi ma Ivan i lena aso la matagofie. O le a fai se ma mālū o le taeao, talatalanoa, taaalo i le oneone, faala—oka se manaia o le taimi o le a ma mauaina!
Ina ua taunuu le pasi i le fale faatalipasi, sa ou vaai o tutu mai Ivan i autafa o se isi alii talavou, e ofutino papae ma fusiua uma i laua. Sa ou oso ese mai le pasi, sa ma feopoai, ma sa ia faailoa mai lana soa. E aunoa ma le faamaumauina o se isi minute, sa ou ta’uina i lo’u uso a’u fuafuaga mo le aso, ae na lilo i manatu mea ua faatulagaina e Ivan. Sa ia tilotilo mai ia te a’u, ataata, ma fai mai, “Ioe! Ae, e tatau ona faia ni nai feau muamua. E te fia sau ma i ma’ua? Sa ou ioe i ai, ma mafaufau o le a lava le ma taimi ma te fiafia mulimuli ai i le matafaga.
I lena aso, mo le silia ma le 10 itula, sa ou savalia magaala o lena aai ma lo’u uso ma lana soa. Sa ou ataata atu i tagata i le aso atoa. Sa ou feiloai i tagata ou te lei vaai muamua i ai i lo’u olaga. Sa matou talanoa i tagata uma, tu’itu’i i faitotoa o tagata e le masani ai, ma asiasi i tagata na aoaoina e lo’u uso ma lana soa.
I se tasi o na asiasiga, sa aoao atu e lo’u uso ma lana soa e uiga ia Iesu Keriso ma le ata o le faaolataga. Na faafuasei lava ona taofi Ivan ma tilotilo mai ia te a’u. I lo’u te’i, sa ia talosaga mai ma le faaaloalo ia te a’u e faasoa atu o’u manatu e uiga i mea o loo aoaoina. Na filemu le potu, ma sa tilotilo uma mai tagata ia te a’u. Faatasi ai ma ni nai faigata, sa i’u ina ou mauaina ni upu ma faasoa atu o’u lagona e uiga i le Faaola. Ou te le iloaina pe na sa’o pe sese mea na ou faasoaina atu. E le’i faasa’oa lava a’u e lo’u uso; i se isi itu, sa ia faafetai mai ia te a’u mo le faasoaina atu o o’u manatu ma lagona.
I le aluga o na taimi na ma faatasi ai, sa lei faaaluina e lo’u uso ma lana soa se minute e tasi e aoao faapitoa mai ai se lesona ia te a’u, ae sa ou maua se malamalama sili atu nai lo talanoaga uma ua mavae sa ou faia ma ia. Sa ou molimauina le suia o foliga a o mauaina e tagata le malamalama faaleagaga i o latou olaga. Sa ou vaai i le ala na maua ai e nisi o i latou le faamoemoe i savali, ma sa ou aoaoina le auala e auauna atu ai i isi ma faagalo a’u lava ma o’u lava manaoga. Sa ou faia le mea na aoao mai e le Faaola: “Ai se tasi e fia mulimuli mai ia te a’u, aua ne’i usiusitai o ia ia te ia.”3
O le toe tepa i tua, ua ou iloa ai sa tuputupu ae lo’u faatuatua i lena aso aua sa tuuina mai e lo’u uso ia te a’u le avanoa e faatino ai. Sa ou faaaogaina a o matou faitau i tusitusiga paia, saili tagata e aoao atu, molimau atu, auauna atu i isi, ma faaauau ai pea. Ma te le’i taeele faala lava i lena aso, peitai sa taele lo’u loto i le malamalama mai le lagi. Ou te le’i vaai lava i se oneone se tasi mai le matafaga, peitai sa ou lagona le tuputupu ae o lo’u faatuatua e pei o se tamai fatu o le sinapi.4 Ou te le’i faaaluina le aso la o se turisi, ae sa ou maua ni aafiaga matagofie, ma le leiloaina, sa ou avea ma se faifeautalai—e aunoa ma le avea ma se tagata o le Ekalesia!
Avanoa e Faamalosia ai Maso Faaleagaga
Faafetai i le Toefuataiga o le talalelei, ua mafai ai ona tatou malamalama i le auala e fesoasoani mai ai lo tatou Tama Faalelagi e atiae a tatou meaalofa faaleagaga. E foliga mai o le a Ia tuuina mai ia i tatou avanoa e atiae ai na meaalofa nai lo le na o le tuuina mai o i latou ia i tatou e aunoa ma se taumafaiga faaleagaga ma faaletino. Afai tatou te ogatusa ma Lona Agaga, o le a tatou aoao ia iloa na avanoa ona galue loa lea i ai.
Afai tatou te saili le onosai atili, atonu tatou te iloa ai e manaomia ona tatou faataitaia a o faatalitali mo se tali. Afai tatou te mananao ia alolofa atili i o tatou tuaoi, e mafai ona tatou faafaileleina e ala i le saofai i autafa o se tagata fou i le lotu. E faapena foi le faatuatua; pe a oo mai le masalosalo i o tatou mafaufau, o le faalagolago i folafolaga a le Alii o le a manaomia e agai ai i luma. O lenei auala ua tatou faaaogaina ai maso faaleagaga ma atiinaeina i latou i ni punavai o le malosi i o tatou olaga.
Atonu o le a le faigofie i le amataga, ma e mafai foi ona avea ma se luitau tele. O afioga a le Alii, e ala mai le perofeta o Moronae, e faatatau ia i tatou i aso nei: “Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma [maua pe faatino le] faatuatua … ia te au, ona ou faia lea o mea vaivai ia avea ma mea malolosi ia te i latou.”5
Ou te faafetai mo lo’u uso o Ivan, o le sa le gata ina faasoa mai le talalelei ia te a’u ae sa ia valaaulia a’u ia ola ai ma iloa o’u vaivaiga. Sa ia fesoasoani mai ia te a’u ia talia le valaaulia a le Matai: “Sau, mulimuli mai ia te a’u”6—ia savali e pei ona savalia e le Faaola, saili e pei ona sailia e le Faaola, ma alofa e pei ona alofa mai le Faaola ia i tatou. I masina mulimuli ane, i le mavae ai o lo’u aafiaga faafaifeautalai, sa ou filifili ai e papatiso ma auauna atu i sa’u lava misiona.
Se’i o tatou taliaina le valaaulia a Peresitene Russell M. Nelson ma o mai ma le loto i ai i le Faaola7 e ala i le faailoaina o na maso o loo manaomia tele se faagaoioiga faaleagaga ma amata ona faaaogaina i latou. O se tuuga umi ma mamao lenei, o se malafoni, ae le o se tuuga saoasaoa, ia aua la ne’i galo na gaoioiga faaleagaga itiiti ae faifaisoo lea o le a faamalosia ai na maso taua faaleagaga. Afai tatou te mananao e faateleina lo tatou faatuatua, ona tatou faia lea o mea e manaomia ai le faatuatua.
Ou te tuu atu la’u molimau o i tatou o fanau a se Tama Faalelagi alofa. E alofa Lona Alo o Iesu Keriso ia i tatou. Na afio mai o Ia i lenei lalolagi e faaali mai ia i tatou le ala ma ofofua mai Lona soifua e aumai ai ia i tatou le faamoemoe. Ua valaaulia i tatou e le Faaola e mulimuli i Lana faataitaiga atoatoa, ia faaaoga lo tatou faatuatua ia te Ia ma Lana Togiola, ma ia faalautele atu meaalofa uma faaleagaga ua faamanuiaina ai i tatou. O Ia o le Ala. O la’u molimau lea i le suafa o Iesu Keriso, amene.