Magtuon kay Jesucristo

Ni Elder Kim B. Clark

Ng Pitumpu

Kung magtutuon tayo kay Jesucristo, tutulungan Niya tayong ipamuhay ang ating mga tipan at matupad nang husto ang ating tungkulin bilang mga elder sa Israel.

Habang naglalakad si Jesus sa isang kalsada malapit sa Capernaum¹ kasama ang isang malaking grupo ng tao na nakapaligid sa Kanya, isang babaeng may matinding sakit sa loob ng 12 taon ang umabot at humipo sa laylayan ng Kanyang damit. Kaagad siyang gumaling.²

Itinala ng mga banal na kasulatan na si Jesus, nababatid “na may umalis na [kapangyarihan] sa [Kanya],”³ “ay pagdaka’y pumihit sa karamihan”⁴ at “lumingap … upang makita siya na gumawa ng bagay na ito.”⁵ “Nang makita ng babae na siya’y hindi nalingid,”⁶ siya ay “nagpatirapa sa harap niya, at sinabi sa kaniya ang buong katotohanan.”⁷

At sinabi ni Jesus sa kanya, “Anak, pinagaling ka ng iyong pananampalataya; yumaon kang payapa.”⁸

Iniligtas ni Jesucristo ang babae. Siya ay pisikal na pinagaling, subalit nang lumingon sa kanya si Jesus, ipinahayag niya ang pananampalataya niya sa Kanya at pinagaling ang Niya ang kanyang puso.⁹ Kinausap Niya ang babae nang may pagmamahal, tiniyak ang Kanyang pagsang-ayon, at binasbasan siya ng Kanyang kapayapaan.¹⁰

Mga kapatid, bilang mga maytaglay ng banal na priesthood, tayo ay kalahok sa gawain ng kaligtasan. Noong nakaraang taon ay tuwirang ipinatong ng Panginoon ang pamumuno sa gawaing ito sa mga balikat ng mga elder sa Israel.¹¹ Mayroon tayong isang inspiradong atas mula sa Panginoon—kasamang nakikipagtulungan sa ating mga kapatid na babae, dapat tayong maglingkod sa isang mas sagradong paraan, pabilisin ang pagtitipon sa Israel sa parehong panig ng tabing, itatag ang mga tahanan natin bilang mga kanlungan ng pananampalataya at pag-aaral ng ebanghelyo, at ihanda ang daigdig para sa Ikalawang Pagparito ni Jesucristo.¹²

Tulad sa lahat ng bagay, ipinakita sa atin ng Tagapagligtas ang paraan: tayo ay dapat magtuon at maglingkod kay Jesucristo tulad ng Kanyang pagtuon at pagsunod sa Kanyang Ama.¹³ Ganito sinabi ng Tagapagligtas kay Propetang Joseph ang paraan:

“Isaalang-alang ako sa bawat pag-iisip; huwag mag-alinlangan, huwag matakot.

“Masdan ang sugat na tumagos sa aking tagiliran, at gayon din ang bakas ng mga pako sa aking mga kamay at paa; maging matapat, sundin ang aking mga kautusan, at inyong mamamana ang kaharian ng langit.”¹⁴

Bago ang buhay na ito, ipinangako ni Jesus sa Kanyang Ama na gagawin Niya ang kalooban ng Kanyang Ama at magiging ating Tagapagligtas at Manunubos. Nang itanong ng Kanyang Ama, “Sino ang isusugo ko?”¹⁵ Sumagot si Jesus:

“Narito ako, isugo ako.”¹⁶

“Ama, masusunod ang inyong kalooban, at ang kaluwalhatian ay mapasainyo magpasawalang hanggan.”¹⁷

Sa Kanyang buong buhay sa lupa ay isinabuhay ni Jesus ang pangakong iyon. Itinuro Niya ang doktrina ng Kanyang Ama nang may pagpapakumbaba, pagkamaamo, at pagmamahal at ginawa Niya ang gawain ng Ama gamit ang kapangyarihan at awtoridad ng Kanyang Ama na ibinigay sa Kanya.¹⁸

Ibinigay ni Jesus ang Kanyang puso sa Kanyang Ama. Sabi niya:

“Ako’y umiibig sa Ama.”¹⁹

“Ginagawa kong lagi ang mga bagay na sa kaniya’y nakalulugod.”²⁰

“Bumaba ako … hindi upang gawin ko ang aking sariling kalooban, kundi ang kalooban ng [Ama na] nagsugo sa akin.”²¹

Sa Kanyang pagdurusa sa Getsemani, “Gayon ma’y huwag mangyari ang aking kalooban, kundi ang iyo.”²²

Noong inatasan ng Panginoon ang mga elder ng Israel na “isaalang-alang ako sa bawat pag-iisip” at “masdan ang sugat” sa Kanyang nabuhay na mag-uling katawan, ito ay pagtawag sa kanila na talikuran ang kasalanan at ang daigdig at bumaling sa Kanya at mahalin at sundin Siya. Ito ay isang pagtawag na ituro ang Kanyang doktrina at gawin ang Kanyang gawain ayon sa Kanyang paraan. Ito, samakatwid, ay isang pagtawag na lubos na magtiwala sa Kanya, isuko ang ating kalooban at ibigay ang ating mga puso sa Kanya, at maging katulad Niya sa pamamagitan ng Kanyang mapagtubos na kapangyarihan.²³

Mga kapatid, kung magtutuon tayo kay Jesucristo, babasbasan Niya tayo upang maging Kanyang mga elder sa Israel—mapagpakumbaba, maamo, mababa ang loob, puspos ng Kanyang pagmamahal.²⁴ At dadalhin natin ang kagalakan at mga pagpapala ng Kanyang ebanghelyo at Kanyang Simbahan sa ating mga pamilya at ating mga kapatid sa magkabilang panig ng tabing.

Inatas sa atin ni Pangulong Russell M. Nelson na magtuon lamang kay Jesucristo sa paraang ito: “Hindi madali o otomatiko ang maging gayon kalakas na mga disipulo. Kailangan tayong magtuon [nang nakatrangka] sa Tagapagligtas at sa Kanyang ebanghelyo. Kailangang mag-isip nang husto sa pagsisikap na magtuon sa Kanya sa bawat pag-iisip. Nguni’t kapag ginawa natin ito, mawawala ang ating mga pagdududa at takot.”²⁵

Ang trangka ay isang napakagandang salita. Ang ibig sabihin nito ay nakaugnay nang mabuti, upang magdikit at kumapit nang lubusan.²⁶ Tinatrangka natin ang ating tuon kay Jesucristo at sa Kanyang ebanghelyo sa pamamagitan ng pagsasabuhay sa ating mga tipan.

Kapag isinasabuhay natin ang ating mga tipan, iniimpluwensyahan ng mga ito ang lahat ng bagay na sinasabi at ginagawa natin. Namumuhay tayo ayon sa tipan²⁷ na puno ng mga payak na gawain ng pananampalataya araw-araw na nakatuon kay Jesucristo: pananalangin mula sa puso sa pangalan Niya, nagpapakabusog sa Kanyang salita, bumabaling sa Kanya upang pagsisihan ang ating mga kasalanan, sinusunod ang Kanyang mga kautusan, nakikibahagi sa sakramento at pinapanatiling banal ang Kanyang Sabbath, sumasamba sa Kanyang banal na templo na kasindalas ng makakayanan natin, at ginagamit ang Kanyang banal na priesthood upang paglingkuran ang mga anak ng Diyos.

Binubukas ng mga gawaing ito ng dedikasyon sa tipan ang ating mga puso at isipan sa mapagtubos na kapangyarihan ng Tagapagligtas at nagpapabanal na impluwensya ng Espiritu Santo. Nang taludtod sa taludtod, binabago ng Tagapagligtas ang ating pinakakatauhan, at mas lumalalim ang ating pagbabalik-loob sa Kanya at nabubuhay ang ating mga tipan sa ating mga puso.²⁸

Ang mga pangakong ginagawa natin sa ating Ama sa Langit ay nagiging matitibay na pangako, ang ating pinakamalalalim na paghahangad. Ang mga pangako sa atin ng Ama sa Langit ay pinupuspos tayo ng pagpapasalamat at kagalakan.²⁹ Ang ating mga tipan ay hindi na mga batas na dapat nating sundin at nagiging mga minamahal na alituntuning nagbibigay-inspirasyon at pumapatnubay sa atin at itinatrangka ang tuon natin kay Jesucristo.³⁰

Ang mga gawaing ito ng dedikasyon ay para sa lahat, sa mga bata at matatanda. Kayong mga kabataang lalaki na taglay ang Aaronic Priesthood, lahat ng bagay na sinabi ko ngayong gabi ay naaangkop sa inyo. Pinasasalamatan ko ang Diyos para sa inyo. Dahil sa inyo ay nakagagawa ng mga sagradong ordenansa at mga tipan ang milyun-milyong mga Banal sa mga Huling Araw kada linggo. Kapag kayo ay naghahanda, nagbabasbas, o nagpapasa ng sakramento; nagmi-minister; nagbibinyag sa templo; nag-aanyaya ng kaibigan sa aktibidad; o nagliligtas sa isang miyembro ng inyong korum, ginagawa ninyo ang gawain ng kaligtasan. Magagawa rin ninyong magtuon kay Jesucristo at ipamuhay ang inyong mga tipan araw-araw. Ipinapangako ko sa inyo na kapag ginawa ninyo iyon, kayo ay magiging mga pinagkakatiwalaang tagapaglingkod ng Panginoon ngayon at, sa darating na panahon ay magigiting na elder sa Israel.

Mga kapatid, alam ko na ang lahat ng ito ay maaaring tila napakahirap. Subalit mangyaring tandaan ang mga salitang ito ng Tagapagligtas: “Hindi ako nagiisa, sapagka’t ang Ama ay sumasa akin.”³¹ Ganoon din tayo. Hindi tayo nag-iisa. Mahal tayo ng Panginoong Jesucristo at ng ating Ama sa Langit, at napasasaatin Sila.³² Dahil nagtuon si Jesus sa Kanyang Ama at kinumpleto ang dakilang nagbabayad-salang sakripisyo, makatutuon tayo kay Jesucristo nang may katiyakang tutulungan Niya tayo.

Walang perpekto sa atin. Kung minsan ay walang pagbabago sa atin. Tayo ay nagagambala o humihina ang loob. Nadarapa tayo. Subalit kung nagtutuon tayo kay Jesucristo nang may nagsisising puso, itataas Niya tayo, iaangat Niya tayo, lilinisin ang kasalanan natin, patatawarin tayo, at paghihilumin ang ating puso. Siya ay matiyaga at mabait; ang Kanyang mapagtubos na pagmamahal ay hindi nagwawakas at hindi nabibigo.³³ Tutulungan Niya tayong ipamuhay ang ating mga tipan at matupad ang ating tungkulin bilang mga elder sa Israel.

At pagpapalain tayo ng Ama ng lahat ng bagay na kinakailangan upang matupad ang Kanyang mga layunin—“[mga] bagay … maging sa langit at sa lupa, ang buhay at ang liwanag, ang Espiritu at ang kapangyarihan, ipinadala sa pamamagitan ng kalooban ng Ama sa pamamagitan ni Jesucristo, na kanyang Anak.”³⁴

Kapag ang banal na liwanag at kapangyarihan ay dumadaloy sa ating mga buhay, tatlong mahihimalang bagay ang nangyayari:

Una, makakakita tayo! Sa pamamagitan ng paghahayag ay magsisimula tayong makakita na tulad ng pagkakita ni Jesus sa babae: lampas sa panlabas na itsura patungo sa puso.³⁵ Sa pagtingin natin tulad ng pagtingin ni Jesus, pagpapalain Niya tayo na mahalin ang mga pinaglilingkuran natin gamit ang Kanyang pagmamahal. Gamit ang tulong na ito, ang mga pinaglilingkuran natin ay makikita ang Tagapagligtas at madarama ang Kanyang pagmamahal.³⁶

Pangalawa, magkakaroon tayo ng kapangyarihan ng priesthood! Tayo ay mayroong awtoridad at kapangyarihang kumilos sa pangalan ni Jesucristo upang “[pagpalain], [gabayan], [protektahan], at [palakasin ang] ibang tao” at magdala ng mga himala sa mga minamahal natin at ingatan ang ating mga kasal at mag-anak.³⁷

Pangatlo, makakasama natin si Jesucristo! Kung saan tayo pupunta, pupunta Siya. Kapag nagtuturo tayo, nagtuturo Siya. Kapag nang-aalo tayo, nang-aalo Siya. Kapag nagbabasbas tayo, nagbabasbas Siya.³⁸

Mga kapatid, hindi ba’t may dahilan upang magsaya tayo? Mayroon! Taglay natin ang banal na priesthood ng Diyos. Sa pagtutuon natin kay Jesucristo, pamumuhay sa ating mga tipan, at pagtatrangka ng ating tuon sa Kanya, nakikiisa tayo sa ating mga kapatid na babae at naglilingkod sa mas banal na paraan, tinitipon ang ikinalat na Israel sa bawat panig ng tabing, pinalalakas at ibinubuklod ang ating mga pamilya, at inihahanda ang daigdig para sa Ikalawang Pagparito ng Panginoong Jesucristo. Mangyayari ito. Pinatototohanan ko ito.

Isinasara ko ito nang may panalangin mula sa aking puso, na lahat tayo, bawat isa, ay magtutuon kay Jesucristo sa bawat pag-iisip. Huwag mag-alinlangan. Huwag matakot. Sa pangalan ni Jesucristo, amen.

Mga Tala

1. Isinaad ni James E. Talmage na si Jesus ay “malapit sa Capernaum” noong mangyari ang pagpapagaling (tingnan sa Jesus the Christ [1916], 313).

2. Tingnan sa Lucas 8:43–44; tingnan din sa Mateo 9:20–21; Marcos 5:25–29.

3. Lucas 8:46.

4. Marcos 5:30.

5. Marcos 5:32.

6. Lucas 8:47.

7. Marcos 5:33.

8. Lucas 8:48.

9. Isinulat ni James E. Talmage na mas mahalaga sa babae kaysa sa pisikal na pagpapagaling ang katiyakang iginawad ng Tagapagligtas ang hangarin ng kanyang puso, at na tinanggap Niya ang kanyang pananampalataya.(tingnan sa Jesus the Christ, 318). Pisikal at espirituwal siyang pinagaling ni Jesus at ibinukas sa kanya ang landas patungong kaligtasan.

10. Nakatutulong na malaman na si Jairo, isang tagapamahala ng sinagoga, ay kasama ni Jesus nang mangyari ang pagpapagaling. Si Jesus ay papunta sa tahanan ni Jairo kung saan ibabangon Niya ang anak na babae ni Jairo mula sa kamatayan. Ang babaeng pinagaling ni Jesus ay maaaring pinalayas mula sa sinagoga dahil sa kanyang karamdaman. Nang pinagaling siya ni Jesus, nilinaw din Niya sa lahat ng naroroon, pati na kay Jairo, na siya ay isang minamahal na anak, isang babaeng nananampalataya, at buo sa katawan at espiritu.

11. Tingnan sa D. Todd Christofferson, “Ang Elders Quorum,” (Liahona, Mayo 2018, 55–58) para sa pagtalakay sa mga pagsasaayos sa pagbuo ng isang Melchizedek Priesthood quorum sa isang ward. Ang layunin ng pagbabagong iyon ay inilarawan sa paraang ito sa Mga Bagay na Madalas Itanong na bahagi ng Ministering website: “Ang pagkakaroon ng isang korum ng Melchizedek Priesthood sa ward ay pinagkakaisa ang mga mayhawak ng priesthood na maisakatuparan ang lahat ng aspeto ng gawain ng kaligtasan, kabilang ang temple at family history work na dating pinamamahalaan ng mga high priest group leader” (“This Is Ministering: Mga Bagay na Madalas Itanong,” 8, ChurchofJesusChrist.org/ministering).

    Sa mga sumunod na pagbabago, inilagay ang ward mission leader at ang bagong temple and family history leader ng ward sa ilalim ng patnubay ng panguluhan ng elders quorum. Dahil nasa ilalim na ng kanilang patnubay ang ministering sa mga pamilya, inilagay ng mga pagbabagong ito sa mga elders quorum ang pamumuno sa gawain ng kaligtasan, katulong ang mga Relief Society. Siyempre, hawak ng bishop ang mga susi sa gawain ng kaligtasan sa ward, subalit iniaatas niya ang responsibilidad at awtoridad para sa gawain sa pangulo ng elders quorum upang mabigyan ang bishop ng mas maraming oras para sa kanyang pamilya, pagpapalakas sa kabataan, at paglilingkod bilang hukom sa Israel.

12. Tingnan sa Russell M. Nelson, “Magpatuloy Tayo,” Liahona, Mayo 2018, 118–19; Russell M. Nelson, “Pagiging Kapuri-puring mga Banal sa mga Huling Araw,” Liahona, Nob. 2018, 113–14; Quentin L. Cook, “Malalim at Tumatagal na Pagbabalik-loob sa Ama sa Langit at sa Panginoong Jesucristo,” Liahona, Nob. 2018, 8–12.

13. Ipinadala ng Ama sa daigdig si Jesucristo (tingnan sa Juan 17:18).

14. Doktrina at mga Tipan 6:36–37.

15. Abraham 3:27.

16. Abraham 3:27.

17. Moises 4:2.

18. Maraming reperensya sa mga banal na kasulatan na nagtatala sa mga pahayag ni Jesus tungkol sa paggawa sa gawain ng Kanyang Ama at pagtuturo sa doktrina ng Kanyang Ama. Tingnan, halimbawa, sa Juan 5:19 (ginagawa ni Jesus ang nakita Niya na ginagawa ng Ama); Juan 5:36 (binigyan ng Ama ang Kanyang Anak ng gawain); Juan 8:26 (itinuro ni Jesus ang natanggap Niya mula sa Kanyang Ama); Juan 14:28 (ipinahayag ni Jesus, “ang Ama ay lalong dakila kay sa akin”); 3 Nephi 11:32 (ang doktrina Niya ay ang doktrinang ibinigay sa Kanya ng Kanyang Ama).

19. Juan 14:31.

20. Juan 8:29.

21. Juan 6:38; tingnan din sa Juan 5:30.

22. Lucas 22:42.

23. Ang salitang isaalang-alang sa talatang ito (tingnan sa Doktrina at mga Tipan 6:36–37) ay may mga kahulugan na nauugnay sa pagtawag ng Panginoon: humarap sa (o bumaling sa); ibigay ang atensyon sa; iasa sa; hanapin ang; maghintay nang may pag-asa; ang pag-iisip bilang ang resulta; umasa o mag-asam (tingnan ang merriam-webster.com, “look”).

24. Tingnan sa Doktrina at mga Tipan 121:41–42. Ang mga katangiang tulad ng kay Cristo na nabanggit sa banal na kasulatan ay mga kaloob ng Espiritu na dumarating sa pamamagitan ng awa at biyaya ni Jesucristo. Ito ang nagdudulot na maging Kanyang mga elder ang mga elder sa Israel.

25. Russell M. Nelson, “Paghugot ng Lakas kay Jesucristo sa Ating Buhay,” Liahona, Mayo 2017, 41.

26. Tingnan sa merriam-webster.com, “rivet.”

27. Para sa pagtalakay tungkol sa konsepto ng pamumuhay ayon sa tipan, tingnan sa Donald L. Hallstrom, “Living a Covenant Life,” Ensign, Hunyo 2013, 46–49. Ang artikulong ito ay mula sa mas mahabang mensaheng ibinigay sa BYU–Idaho noong Mayo 2011. Para sa mas mahabang bersyon, tingnan ang Donald L. Hallstrom, “A Covenant Life” (debosyonal sa Brigham Young University–Idaho, Mayo 10, 2011), byui.edu.

28. Tingnan ang Jeremias 31:31–33, kung saan ipinahayag ng Panginoon na Siya ay gagawa ng isang bagong tipan sa sambahayan ni Israel na nakasulat sa kanilang puso. Ang imahe ng mga tipan na nakasulat sa ating mga puso, o mga tipan na pumupukaw sa ating mga puso, ay natatagpuan din sa mga isinulat ni Pablo (tingnan sa II Mga Taga Corinto 3:3; Sa Mga Hebreo 8:10). Para sa pagtalakay tungkol sa pagbabalik-loob at sa puso, tingnan sa David A. Bednar, “Nagbalik-loob sa Panginoon,” Liahona, Nob. 2012, 106–9.

29. Ipinahahayag nang napakaganda ng panalangin sa sakramento para sa tinapay ang katangian ng ating pantipang ugnayan sa ating Ama sa Langit. Sa plano ng kaligtasan ng Ama, gumagawa tayo ng mga tipan sa ating Ama sa Langit, subalit ang mga layunin ng mga tipan ay natutupad at nagiging karapat-dapat tayo sa mga pagpapalang ipinangako sa pamamagitan ng Panginoong Jesucristo; Siya ang Tagapamagitan. Sa ordenansa ng sakramento, ipinapakita natin sa Ama (na nagdudulot na magkaroon uli ng tipan sa Kanya) na handa tayong taglayin sa ating mga sarili ang pangalan ni Jesucristo, palagi Siyang alalahanin, at sundin ang Kanyang mga kautusan, upang maaaring mapasaatin palagi ang Kanyang Espiritu (ang Espiritu Santo).

    Ang mga kaloob sa mga pangako ng Ama ay dumarating sa pamamagitan ng mapagtubos at nakapagpapalakas na kapangyarihan ni Jesucristo. Halimbawa, tulad ng itinuro ni Pangulong Russell M. Nelson, si Jesucristo “ang pinagmumulan ng lahat ng kagalakan” (tingnan sa Kagalakan at Espirituwal na Kaligtasan,” Liahona, Nob. 2016, 82). Sa gayon, ang pagtatrangka ng ating tuon kay Jesucristo ay nagdadala ng kagalakan sa ating mga buhay anuman ang mga sitwasyon natin.

30. Nailarawan ni Pangulong Ezra Taft Benson ang epekto ng pagbabagong ito sa ugali at tuon nang sinabi niya, “Kapag ang pagsunod ay hindi na nakaiirita at naging hangarin natin, sa sandaling iyon ay pagkakalooban tayo ng Diyos ng kapangyarihan” (sa Donald L. Staheli, “Obedience—Life’s Great Challenge,” Ensign, Mayo 1998, 82).

31. Juan 16:32.

32. Para sa karagdagang pagtalakay tungkol sa katotohanan ng pagmamalasakit, interes, pagmamahal, at pakikilahok ng Ama at ng Anak sa ating mga buhay, tingnan sa Jeffrey R. Holland, “Ang Kadakilaan ng Diyos,” Liahona, Nob. 2003, 70–73; Henry B. Eyring, “Lumakad Kang Kasama Ko,” Liahona, Mayo 2017, 82–85. Tingnan din sa Mateo 18:20; 28:20; Doktrina at mga TipaN 6:32; 29:5; 38:7; 61:36; 84:88.

33. Tingnan sa Mga Taga Roma 8:35–39; I Mga Taga Corinto 13:1–8; Moroni 7:46–47.

34. Doktrina at mga Tipan 50:27. Pansinin na ibinibigay ng Panginoon sa bawat isa na naordenan at ipinadala ang pangakong ito na hinggil sa, at itinatakda sa pamamagitan ng, partikular na tungkuling ipinagkaloob sa kanya:

    “Siya rin ang itinalaga na maging pinakadakila, bagaman siya ang kaliit-liitan at ang tagapaglingkod ng lahat.

    “Dahil dito, siya ang nagmamay-ari ng lahat ng bagay; sapagkat lahat ng bagay ay nasasailalim niya, maging sa langit at sa lupa, ang buhay at ang liwanag, ang Espiritu at ang kapangyarihan, ipinadala sa pamamagitan ng kalooban ng Ama sa pamamagitan ni Jesucristo, na kanyang Anak.

    “Subalit walang sinuman ang nagmamay-ari ng lahat ng bagay maliban sa siya ay ginawang dalisay at nalinis mula sa lahat ng kasalanan.

    “At kung ikaw ay dalisay at nalinis mula sa lahat ng kasalanan, mahihingi mo anuman ang iyong naisin sa pangalan ni Jesus at ito ay mangyayari” (Doktrina at mga Tipan 50:26–29).

35. Tingnan sa I Samuel 16:7; I Mga Taga Corinto 2:14. Para sa halimbawa ng pagpapalang ito na makita sa iba ang nakikita ni Jesus, tingnan ang salaysay ni Pangulong Henry B. Eyring ng kanyang karanasan bilang bishop ng isang kabataang lalaki na nakagawa ng krimen. Sinabi ng Panginoon kay noong Bishop Eyring, “Ipapakita ko sa iyo ang nakikita ko sa kanya” (“Lumakad Kang Kasama Ko,” 84).

36. Ito ang pangako at atas na ibinigay ng Tagapagligtas sa mga tao sa templo sa Masagana. Iniutos Niya sa kanila na mamuhay upang mapasakanila ang Kanyang liwanag at Kanyang halimbawa, upang maitaas nila Siya bilang liwanag ng daigdig sa kanilang buhay at sa kanilang mga pag-anyaya sa iba na lumapit sa Kanya. Sa pamumuhay nang ganoon, at sa pag-aanyayang ganoon, madarama Siya at makikita Siya ng iba sa mga tagapaglingkod ng Panginoon. (Tingnan sa 3 Nephi 18:24–25.)

37. Tingnan sa Russell M. Nelson, “Ang Halaga ng Kapangyarihan ng Priesthood,” Liahona, Mayo 2016, 68.

38. Tingnan sa Doktrina at mga Tipan 84:88.