Ukoukoran te Atatai Rinanon te Tamnei
Ti kainnanoia bwa ti na ataa te koaua tiaki ti rinanon ara iango ma rinanon naba bwanaan te Tamnei ae maraara man rau.
Tariu ao mwaneu, e a tia te Uea ni kaokiokia n tuangiira ni “botumwaaka n ukoukori te rabakau, n te kamatebwai ao n te onimaki naba.”1 Ti kona ni karekea te ota ao te atatai tiaki ti rinanon man ara iango ma rinanon naba ana kairiiri ao ana kairi te Tamnei ae Raoiroi.
E a tia n tainako Ana kairi te Tamnei ae Raoiroi n aki riki bwa iteran maiu.
Buu ae tangiraki, Irene, ao Ngai ti kaina te Ekaretia 31 te ririki n nako ngke ti a tibwa mareaki. Ti kaai n ikawairake iaon Colombia, ma tabeua te namwakaina imwiin ara mare, au mwakuri e uotira ni kamaekaira i Tiaman. Ti rangi ni uarereke ao a rangi ni mwaiti ara kaantaninga ao ara iango; bon te tai ae kamiimi ao ni kakukurei iroura.
Ngke I tabe n iangoa au mwakuri, e namakinna Irene bwa ti na karekea te rongorongo mai karawa, n aki ataia bwa ni kanga ke n ningai. Ngaia are e a kariaia rokoia taan kabonakoi kaako n aekaia nako nakon mweengara n aron te entiaikorobitia, bwain kaitiakan te kaa, booki ni kuuka, bwaai ni kuuka, ao a mwaiti riki, n tataningaa rokon te rongorongo ae onoti anne.
N te tairiki teuana e tuangai bwai iai uoman ataeinimwaane n oneaia aika roroo aika a karebwerebwe n ara mataroa ao e reke irouna te namakin ae korakora bwa e na kariniia. A taku bwa a kan marooro ma ngaira iaon taekan te Atua ma a na manga oki ngkana iai ngai n te auti. Ngaia aio te rongorongo ae kantaningaaki?
A waaki ni kawariira, ao man aia kairiri, ti wareware ni booki aika tabu ao ni moanna n ataa aron kakawakin Iesu Kristo bwa ngaia ara Tia Kamaiu ao te Tia Kabooi Maiura. Ti nanokawaki bwa ti a tia ni bwabetitoaki ngke ti uarereke, are e a tia n riki bwa te berita ae aki kakawaki. E ngae n anne, te manga bwabetitoaki riki e nanonaki naba bwa kaainakin te Ekaretia ae boou aei, ngaia ae ti riai n ataa moa rongorongona ni kabane.
Ma ti na kanga n ataia ngkana mitinare a tuangira taekan ana Boki Moomon, taekan Iotebwa Timiti, ao taekan te babaire n kamaiu bwa a boni bane ni koaua? Ngaia ae, ti a tia n ataia man a na taeka te Uea bwa ti kona “ni kinaia man uaaia.”2 Ngaia ae, n te kawai ae baireaki raoi, ti moana ukoukoran te Ekaretia man taratarakin uaa aika nakoraoi man raraoi n ara iango. Tera ae ti reiakinna? Ngaia, ti nooria:
-
Aomata aika tangira ao ni kukurei ao utu aika tamaroa aika a ataia bwa aomata ni kabane a na namakina te kukurei n te maiu aei ao tiaki ti n te kainnano ao n te karawawataaki.
-
Te Ekaretia ae e aki kaboia taan reirei ma kaain te Ekaretia ma a butimwaai mwiokoaia ao katabeaia.
-
Te ekaretia ae e boboto iaon Iesu Kristo ao utu iaon bwaai ni kabane, ae a karaoa aia aki mamatam teuana te tai n te namwakaina ao a buokiia rarikin ao kainnano, ae a kaungaaki iai katei aika tamaroa, a reireiniira bwa ti na aki anai bwaai aika a kaorakiira.
N reitana:
-
Ti tangira te kamataata iaon rikirakera ibon iroura, iaon te reirei, iaon te mwakuri korakora ao te riki n toronibwai.
-
Ti reiakina aron tamaroan te burokuraem iaon bwaai n ibuobuoki ibukiia aomata.
-
Ao a rangi n anaaki nanora man taian maungatabu ni kabuta, ma katangitang aika tamaroa ao reirei n te tamnei aika tibwauaaki ikanne.
Iangoan aei ni kabane, ti aki kona n noora ae iai buakakan te Ekaretia. Ni kaitaraana, ti tangiri bwai ni kabane ake ti noori. Ma e ngae n anne, ti tuai naba ni kona ni baireia bwa ti na bwabetitoaki ibukina bwa ti kan atai bwaai ni kabane imwain karaoana.
Ma, riki n ara tai n aki kona ni babaire, te Atua e teimatoa ni katauraoira, E katamaroaira, ao E buokiira ni kakaea te bwai ae ti kona n reiakinna ni kaota te koaua tiaki ti rinanon rabakaura ma rinanon bwanaan te Tamnei ae maraara ma ni bebete, ngkana e taetae riki nakon nanora.
Te bwanaa ao mwiin te namakin e roko n te tairiki teuana imwiin 10 te namwakaina n reiakinan te euangkerio, ngke ti wareware inanon Motiaea 18. “Ngkana kam tangiria ni … katokaa i aomi rawawataia raomi, … ao ni karau nanoia ake a kainnanoa karauan nanoia, … ngkana aio are tangiria nanomi, ao tera bukina bwa kam na aki kan bwabetitoaki inanon aran te Uea?”3
Te kibu anne man ana Boki Moomon e riinga nanora ao tamneira n ae korakora, ao ti waekoa n namakinna ao n ataia bwa akea raoi bukina bwa ti na aki bwabetitoaki. Ti ataia bwa te nano ae taekinaki inanon kiibu aikai bon bwaai aika a tangiri naba nanora ao bwaai aikanne bon bwaai aika a boongana. A rangi ni kakawaki riki nakon atakin bwaai ni kabane ibukina bwa a kaman tau ake ti atai. Ti a tia n tainako n onimaki iaon ana kawai ni kairoro Tamara are i Karawa ae tangiraki ao n onimakinna bwa E na teimatoa ni kairiira.
Ngaia are, te bong naba anne, ti bairea te bong are ti na bwabetitoaki iai, ao n te tai ae aki maan ao ti a bwabetitoaki!
Tera ae ti reiakinna man te taneiai anne?
Te moan, ti reiakinna bwa ti kona n onimakina Tamara are i Karawa ae tangira, ae teimatoa ni kataia ni buokiira bukina bwa ti kona n riki n aekan te aomata are E kinaa. Ti kamatoa te koaua ae nano n Ana taeka ngke E taku, “N na anganiia natiia aomata teutana imwiin teutana, te reirei teuana imwiin teuana; ao a na kakabwaiaki akana a ongeaba nakon au reirei, … bwa e na reke irouia te wanawana; bwa N na anga ae mwaiti riki.”4
Ao te kauoua, ti reiakinna bwa, irarikin ara iango aika a mataata raoi, teuana riki te kawai ni karekean te atatai e kona n anganiira te kairi ao te oota. Bon bwanaan Ana Tamnei ae Raoiroi ae maraara ma ni bebete nakon nanora ao nakon naba ara iango.
I tangiria ni kabotaua te mwakuri aei ma ara konabwai n iango. E a tia Tamara are i Karawa n anganiira tiaki ti teuana ma uoua matara aika ti kona n taratara iai. Ti kona n noora ae tau ma ti teuana matara, ma te mata are te kauoua e katauraoia ma te taratara riki teuana. Ngkana a katukaki taratara aika uoua aikai inanon kaburorora, a karekea teniua tamnein ara tabo.
N aron aei, ti a tia n anganaki uoua aron reken te rongorongo, rinanon ara konabwai n rabwatara ao n tamneira. Ara iango a karekea teuana te kawai rinanon ara namakin ao rinanon ara iango aika raraoi. Ma rinanon te Tamnei ae Raoiroi, e a tia te Tama ni katauraoa naba te kauoua n taratara, are bon te kabanea ni kakawaki ao ni koaua bukina bwa e roko ma Irouna. Ma bukina ngkai ana kairoro te Tamnei aki rangi n noraki, a mwaiti aomata aika aki ataa taekan te bwai n ibuobuoki anne.
Ngkana taratara aika uoua aikai a ikotaki inanon tamneira, teuana te tamnei ae bwanin e kaota koauan bwaai n te kawai are bon ngaia ni koaua. Ni koauana, rinanon a na taratara riki te Tamnei ae Raoiroi, “iango,” riki tabeua ake a katamneiaki rinanon otara, a kona n nooraki bwa bwaai aika a kewe ke ni kairua. Uring ana taeka Moronaai: “Ao ma ni mwaakan te Tamnei are e Raoiroi ao kam na kona n atai koauan bwaai ni kabane.”5
N au ka 31 n ririki bwa kaain te Ekaretia, I a tia n rinanona n taai aika mwaiti are ngkana ti tii onimakina ti ara iango ao ni kakea ke ni katinanikua te ota man te tamnei ae ti kona ni karekea rinanon ana wirikiriki ao ana anainano te Tamnei ae Raoiroi, titebo ae kanga ti na rinanon te maiu ma matara ae ti teuana. Ma ti a tia n anganaki uoua matara. Ti man ikotakin iango aikana uoua aikanne ae e kona n anganiira ataakin koaua ni kabane ao bwaai ni kabane aika ti rinanoi inanon maiura, n raonaki ma otara ni kabane ae tabwanin n aron kinakira ao te kantaninga ae ngaira natin Tamara are i Karawa.
I kauringaki n te bwai are e reireiniira Beretitenti Russell M. Nelson n te ririki ae nako ngke e taku bwa “ni boong aika imwaira, ti na bon aki kona n tokanikai n te tamnei n akean a na kairi, ana kaetieti, a na karaunano, ao ana kairoro te Tamnei ae Raoiroi ae teimatoa.”6
I a tia n ataia ma te koaua ae bwanin bwa:
-
Iai Tamara i Karawa ae tangira, ao a bane aomata ni kariaia bwa ti na nakomai nakon te aonaaba bwa mwakoron te baire mairoun te Atua.
-
Iesu bon te Kristo, E maiu ao bon au Tia Kamaiu ao te Tia Kabooa Maiu.
-
Iotebwa, te ataeinimwaane ae te tia mwakuri n te tawana ae nanorinano, e weteaki ao e riki bwa te burabeti ae korakora are e moan karaoa aei, ni koron te bong, ma kingina ni kabane, te mwaaka, ao te kariaia n ana nakoanibonga te Atua ae tabu.
-
Ana Boki Moomon bon te kauoman nikakoaua iroun Iesu Kristo ao a kantaningaaki utu bwa ana riki bwa utu aika akea tokiia
-
Ara Uea, Iesu Kristo, e kaira aei, Ana Ekaretia ae kaokaki, rinanon ara burabeti ae maiu, Beretitenti Russell M. Nelson, n te bong aei.
A tia koaua aikai ao aika mwaiti riki aika kakawaki n riki bwa reirei n tamnei aika kakawaki n aron are e buokai te Atua n riki nako iai. Ao e ingainga nanou nakon reirei aika mwaiti aika boou are E tangirai—ao ngkoe—ni karekei ngkana ti rinanon te maiu ae kakukurei ao n “reirei … n te kamatebwai ao n te onimaki naba.”
I ataia bwa a bane ni koaua bwaai aikai ao ni kakoauai n aran Iesu Kristo, amen.