Kōrā ro im Ekkatak Gospel eo ilo M̧weo
Rilo̧mo̧o̧r eo ej ami waanjon̄ak eweppān kōn ekōjkan ami naaj jerbale juon m̧ōttan eaorōk ilo An emmakūt n̄an juon jikin eļapļo̧k kōmejajik katak gospel eo ilo m̧weo.
Kōrā ro jeiū im jatū jitōn bōro, ekanooj aiboojoj n̄an kweilo̧k ippāmi. Ej juon iien elem̧ōņōņō ilo Kabun̄ eo an Jisōs Kraist im Armej ro Rekwōjarjar ilo Raan ko Āliktata. Irooj ej lutōk leplep jeļāļo̧kjeņ ioon Kabun̄ eo An āinwōt An kar kallim̧ur bwe Enaaj kar.
Kwoj keememej ta eo Eaar ba: “Ewi toun an maron̄ dān ko rej ibebtok ettoon wōt? Ta kajoor eo enaaj dāpij lan̄ ko? Ejja āinwōt an pen an armej erļo̧ke pein jidikdik n̄an kabbōjrake Missouri reba ilo kooj eo an em̧ōj karōke, ak n̄an ukōte lōn̄ļo̧k, āinwōt n̄an kapan̄ Eo Ekajoor Bōtata jān lutōklaļtak jeļāļo̧kjeņ jān lan̄ ioon bōran Armej ro Rekwojarjar ilo Raan-ko Āliktata.”1
M̧ōttan eo kiiō an Irooj kwaļo̧k jeļāļo̧kjeņ eo eiookļo̧k kōm̧ōkajļo̧k An lutōkleplep m̧ool eo indeeo ioon bōran im lowaan būruwōn armej ro An. Em̧ōj An kar kalikkare bwe leddik ro nejin Jemedwōj Ilan̄ renaaj kōm̧m̧ane juon jerbal eaorōk ilo kōm̧ōkajļo̧k jab in ekabwilōn̄lōn̄. Juon kein kam̧ool kōn kabwilōn̄lōn̄ eo ej An tōl rikanaan eo An emour n̄an kōļapļo̧k kalikkar eo ioon kōmeļeļe eo an gospel eo ilo m̧weo im ilo baam̧le eo.
Komaron̄ kajjitōk, “Ekōjkan an men jab in kōm̧m̧an an sister ro retiljek juon kajoor eaorōk n̄an jipan̄ Irooj lutōkleplep jeļāļo̧kjeņ eo ioon Armej ro An Rekwojarjar?” Irooj ej letok uwaak eo ilo “Baam̧le Eo: Juon Naan in Kean̄ n̄an Laļ in” Kom̧ij keememej ke naan ko, bōtaab komaron̄ lo meļeļe eo ekāāl im kile bwe Irooj eaar lo oktak kein rekaitoktok limo, ko rej kiiō waļo̧k. Ilo naan in kean̄ eo, Eaar leļo̧k n̄an sister ro eddo eo n̄an erom rikatakin pedped an gospel eo ilo baam̧le eo ilo naan kein: “Ro jinen eddo eo aer eaorōk ej n̄an kōkkaajririik ajri ro nejier.”2 Menin ekoba naajdik kōn m̧ool an gospel eo im jeļāļo̧kjeņ.
Naan in kean̄ eo wōnm̧aanļok wōt: “ro jemen im jinen rej kallim̧ur n̄an jipan̄ doon āinwōt m̧ōttā ro rej juōn wōt.”3 Rej m̧ōttā ro rej juon wōt, juon wōt ilo kōjatdikdik eo aer n̄an eddōkļo̧k ilo jetōb im n̄an bōk jeļāļo̧kjeņ eo, im bwe ren ippān doon kōn jipan̄ doon. Rej juon wōt ilo jem̧ļo̧k eo aer ekwojarjar n̄an erom mour ijo ilōn̄ tata ippān doon. Ilo m̧ool, em̧m̧aan ro im kōrā ro rejjab maron̄ mour ijo eutiej tata make iaer.
Etke, innām, juon jiron̄ nejin Anij ilo juon jem̧jerā eippān doon im juon wōt ej bōk eddo eo eļaptata n̄an kōkkajiririk kōn ōn eo me eaorōk tata aolep rej aikuj bōke, jeļāļo̧kjeņ kōn m̧ool eo ej itok jān lan̄? Ekkar n̄an ta eo imaron̄ meļeļe kake, eļakkar wōt jekjek eo an Irooj in jān ke baam̧le ko raar ejaak ilo laļ in.
N̄an waanjon̄ak, eaar Iv eo me eaar bōk jeļāļo̧kjeņ eo bwe Adam kar aikuj in bōk m̧ōttan leen wōjke eo an wōjke in jeļāļo̧kjeņ eo n̄an erro n̄an kōjparok aolep kien ko an Anij im n̄an ejaake juon baam̧le. Ijjab jeļā etke eaar itok m̧oktata n̄an Iv, bōtaab adam im Iv raar lukkuun in juon wōt ke jeļāļo̧kjeņ eo eaar lutōkleplep ioon Adam.
Bar juon waanjon̄ak kōn an Irooj kōjerbal menin letok ko an naajdik an kōrā ro ej wāween An kar kōkajoorļo̧k ļōm̧aro nejin Helamōn. Ij m̧weiur n̄e ij riiti bwebwenato eo im keememej naan in kallim̧ur ko an jinō make rōmera ke iaar likūt m̧weo n̄an jerbal in ritariņae.
Helamōn eaar je:
“Raar ekkatak jān ro jineer, bwe eļan̄n̄e reban pere, Anij enaaj lo̧mo̧o̧ren er.
“Im raar kōmmeļeļeik n̄an eō naan ko an ro jineer, im ba: Kōmij jab pere ke ro jinem raar jeļā.”4
Ilo aō jab jeļā aolep un ko an Irooj n̄an leļo̧k eddo eo eaorōk tata n̄an naajdiki ilo baam̧le eo n̄an kōrā ro retiljek, ij tōmak ewōr an n̄an maron̄ eo ami n̄an iakwe. Ej aikuji eļap iakwe n̄an en̄jake aikuj ko an bar jet eļapļo̧k jān eo ami make. Ej iakwe eo erreo an Kraist n̄an armej eo kom̧ij naajdiki. En̄jake jab in an iakwe eo erreo ej itok jān armej ro kar kālete n̄an rinaajdik eo n̄an an erom erreeo n̄an men ko an Pinmuur eo an Jisōs Kraist. M̧ato eo an Doulul eo an Kōrā ro, eo m̧am̧a make eaar kwaļo̧ke, eaar āinwōt n̄an n̄a im̧we: “Iakwe Em̧ool Ejjamin Jako.”
Āinwōt jiron̄ ro nejin Anij, ewōr ippam̧ jolet eo im maron̄ eo eļap n̄an jeļā aikuj ko an ro jet im n̄an iakwe. Bwe, āinwōt juon tōprak, ej kōm̧m̧an an ļapļo̧k an pidodo ami bōk unoojdikdik ko an Jetōb. Innām Jetōb eo emaron̄ tōl ta eo kom̧ij ļōmņake, ta eo kom̧ij ba, im ta eo kom̧ij kōm̧m̧ane n̄an naajdik armej ro bwe Irooj en maron̄ luktōkleplep jeļāļo̧kjeņ eo, m̧ool eo, im peran eo ioer.
Kom̧ kōrā ro kom̧ij ron̄ ainikiō rej kajjojo pād ilo juon jikin ejej uwaan ilo iaļ eo ami ilo mour. Jet rej leddik ro reddik ilo m̧wen̄an eo eļap an kweilo̧k eo an kōrā ro ej kab kein kajuon. Jet rej jiron̄ ro reddik kōppopo n̄an erom rinaajrik ro Anij ekōņaan bwe ren erom. Jet ej kab m̧ōj aer m̧are me ejjan̄in wōr nejier ajri; ro jet rej m̧am̧a ro reddik ippān juon ak lōn̄ļo̧k ajri ro. Jet rej m̧am̧a ro ewōr nejier jodikdik ro im ro jet ippān ajri ro ilo jikin mijen. Jet ewōr ajri ro me em̧ōj aer kar erom m̧ōjņoļo̧k ilo tōmak im rej ettoļo̧k jān m̧weo. Jet rej mour make iaer kōn an ejjeļok rejtaer etiljek. Jet rej būbū ro.
Aaet, jekdo̧o̧n ta jekjek eo ami make, kom̧ij m̧ōttan—juon m̧ōttan eo aorōk—an baam̧le eo an Anij im eo ami make, men̄e ilo ilju im jekļaj, ilo laļ in, ak ilo laļ eo an jetōb. Lōke eo ami jān Anij ej n̄an naajdik jon̄an wōt eo kom̧ maron̄ an ro uwaan baam̧le eo An ak eo ami make kōn iakwe im ami tōmak ilo IroojJisōs Kraist.
Idajon̄jon̄ eo ami aolep raan ej n̄an jeļā wōn eo n̄an naajdiki, ekōjkan, im n̄aat eo. Kom̧ij aikuj jipan̄ eo an Irooj. E ejeļā būruwōn ro jet, im E ejeļā n̄āāt eo rej pojak n̄an bōk naajdik eo ami. Jar in tōmak eo ami enaaj kanooj aorōk n̄an jeraam̧m̧an eo ami. Kom̧ maron̄ pedped ioon bōk tōl eo An.
Eaar letok kōketak in: “Kajjitōk ippān Jema ilo Eta ilo tōmak, im lōke bwe kom̧ro naaj bōk, im kom̧ro naaj bōk Jetōb Kwōjarjar, eo ej kaalikkar men otemjeļo̧k ko rej mennin aikuj.”5
Ilo kakobaba n̄an jar, m̧ool in ekkatak jeje ko rekwojarjar enaaj erom m̧ōttan kajoor in eddōkļo̧k eo ami n̄an kōkkajiiriri. En̄in ej kallim̧ur eo: “Im kom̧in jab ļōmņak im̧aanļo̧k ta kom̧ naaj ba; ak ko̧koņi ilo ļōmņak ko ami iien otemjej naan ko in mour, im enaaj lewōj n̄an kom̧ ilo ejja awa eo wōt m̧ōttan eo naaj jon̄e n̄an armej otemjej.”6
Kōn menin kom̧ naaj bōk eļapļo̧k iien n̄an jar, n̄an kejōkļo̧kjeņ, im n̄an ļōmņak kōn men ko ilo jetōb. Enaaj wōr ami jeļāļo̧kjeņ eo an m̧ool eo kar lutōkleplep ioomi im eddōkļo̧k ilo kajoor eo ami n̄an kōkkajiiriri ro jet ilo baam̧le eo ami.
Enaaj wōr iien ko n̄e kom̧ij en̄jake bwe eddōkļo̧k eo ami ilo ekkatak ekōjkan kōkōm̧anm̧anļo̧k n̄an kōkkajiiriri ej rum̧wij. Enaaj bōk tōmak n̄an niknik. Rilo̧mo̧o̧r eo eaar jilkinwaj n̄an kom̧ kōketak in:
“Kōn menin, jab mōk ilo kōm̧m̧an em̧m̧an, bwe kom̧ij likūt pedped in juon jerbal eļap. Im jān men ko reddik ej jebarļo̧k men eo eļap.
“Lo, Irooj ej aikuj bōro eo im ļōmņak eo em̧ōņōņō; im ro rem̧ōņōņō im pokake renaaj m̧ōn̄ā men ko rem̧m̧an jān āneen Zaion ilo raan kein āliktata.”7
Ami pād joteen in ej kein kam̧ol bwe kom̧ij m̧ōņōņō n̄an bōk kūr eo an Irooj n̄an naajdik ro jet. Menin em̧ool jekdo̧o̧n n̄an ro reddik tata ijin joteen in. Kom̧ij maron̄ jeļā wōn n̄an naajdik ilo baam̧le eo ami. Eļan̄n̄e kom̧ij jar kōn lukkuun kōttōpar, juon āt ak turin māj enaaj itok n̄an ļōmņak eo ami. Eļan̄n̄e kom̧ij jar n̄an jeļā ta eo n̄an kōm̧m̧ane ak ta eo n̄an ba, kom̧ naaj en̄jake juon uwaak. Kajjojo iien kom̧ij pokake, ami kajoor n̄an naajdik enaaj ļapļo̧k. Kom̧ naaj m̧aanjabpopo n̄an raan eo n̄e kom̧ naaj naajdik ajri ro nejim make.
M̧am̧a ro an jodikdik ro remaron̄ jar n̄an jeļā ekōjkan n̄an naajdik ļaddik ak leddik eo nejin me āinwōt ejjab en̄jake naajdik eo. Kom̧ maron̄ jar n̄an jeļā wōn eo emaron̄ wōr kilaan ilo jetōb ajri eo nejūm̧ aikuji im naaj bōke. Anij ej ron̄ im uwaake kain jar rōt kein an bōro an m̧am̧a ro rej inepata, im Ej jilkinļo̧k jipan̄.
Barāinwōt, juon būbū eo ej pād ijin joteen in emaron̄ en̄ajke būrom̧ōj kar kōm̧m̧an jān inepata ko im apan̄ ko an ajri ro nejin im ajri ro jibūn. Komaron̄ bōk peran eo im tōl eo jān en̄jake ko an baam̧le ko ilo jeje ko rekwojarjar.
Jān tōre eo an Iv im Adam, kōn Jemed Israel, im n̄an aolep baam̧le ilo Bok in Mormon, ewōr juon katak em̧ool kōn ta eo n̄an kōm̧m̧ane kōn būrom̧ōj ko kōn ajri ro rejjab ron̄jake: wōnm̧aanļo̧k wōt im iakwe.
Ewōr ippād waanjon̄ak in kōketak eo an Rilo̧mo̧o̧r eo ilo An kar kōkkajiiriri ajri in jetōb ro rej jum̧ae nejin Jemedwōj Ilan̄. Jekdo̧o̧n n̄e er im kōj jej kōm̧m̧an ad make metak, pein Rilo̧mo̧o̧r eo ej erļo̧k wōt.8 Eaar kōnono ilo 3 Nipai kōn ro Jein im Jatin ilo jetōb ro eaar kajieon̄ ilo ejjeļo̧k tōprak n̄an kōkkajiiriri er: “O kom̧ armej ro … ro rej jān m̧weo im̧ōn Israel, ewi jon̄an ekkutkut in Aō kar kakwelo̧ktok kom̧ āinwōt juon lo̧lo̧ ej kakwelo̧ktok jojo ko nejin ium̧win pā ko pein, im kar naajdik kom̧.”9
N̄an kōrā ro ilo aolep jon̄ak ko ilo em̧m̧akūt eo an mour in, ilo aolep jekjek an baam̧le, im ilo aolep m̧anit, Rilo̧mo̧o̧r eo ej waanjon̄ak eo ami eweppān kōn ekōjkan ami naaj kōm̧m̧ane juon m̧ōttan eaorōk ilo em̧m̧akūt eo An n̄an likūt eļapļo̧k aorōk ilo ekkatak gospel eo ilo m̧weo im baam̧le eo.
Kom̧ naaj bōtok aorōk in en̄jake eo ami kōn iakwe eo erreo n̄an oktak ko ilo m̧akūtkūt ko im iminene ko ilo baam̧ļe eo ami. Menin enaaj bōktok eļapļo̧k eddōkļo̧k eo ilo jetōb. N̄e kom̧ij jar ippān im kōn ro uwaan baam̧le eo, kom̧ naaj en̄jake iakwe eo ami im Rilo̧mo̧o̧r eo n̄an er. Menin enaaj erom ļapļo̧k im ļapļo̧k menin letok ilo jetōb ami ilo ami kappukōte. Ro uwaan baam̧le eo ami renaaj en̄jake ilo ami jar kōn eļapļo̧k tōmak.
N̄e baam̧le eo ej koba n̄an kōļap ainikien aer riiti jeje ko rekwojarjar, em̧ōj kadede ami naaj riiti im kar jar kaki n̄an kōpooj kom̧ make. Kom̧ naaj aikuj in lo iien ko n̄an jar kōn Jetōb eo n̄an kōmeramļo̧k ļōmņak eo ami. Innām, n̄e ej iien eo ami n̄an riit, ro uwaan baam̧le eo renaaj en̄jake ami iakwe n̄an Anij im n̄an An naan. Naaj naajdik er jān E im jān Jetōb eo An.
Ejja lutōkleplep in wōt emaron̄ itok ilo jabdewōt koba an baam̧le eļan̄n̄e kom̧ij jar im kōm̧m̧an karōk n̄an e. Emaron̄ in bōk kijejeto im iien, bōtaab enaaj bōktok kabwilōn̄lōn̄ ko. Ij keememej juon katak jinō eaar katakin ke iaar dik. Ij maron̄ loe wōt ilo ļōmņak eo aō mab eo ekōļar eaar kōm̧m̧ane kōn itok itak eo an Rijilōk Paul. Iaar ļōmņak ekōjkan an kar loe iien eo im kajoor eo n̄an kōm̧m̧an men jab in. Im n̄an rainin ij jeraam̧m̧an jān iakwe eo̧ an n̄an Rijilōk jab in etiljek.
Kom̧ naaj kajjojo lo wāween ko n̄an leļo̧k jipan̄ n̄an lutōkleplep eo an m̧ool eo ioon baam̧le ko ami im Kabun̄ eo an Irooj kar kōjepļaaktok. Kajjojo iami naaj jar, ekkatak, im kejōkļo̧kjeņ n̄an jeļā ta menin jipan̄ eo ami ejej uwaan enaaj. Bōtaab jeļā menin: kajjojo iami, kom̧ij ippān doon ippān ļaddik ro nejin Anij, enaaj erom juon m̧ōttan eļap an kabwilōn̄lōn̄ eo an ekkatak gospel eo im mour kake bwe enaaj kōm̧ōkajļo̧k kobatok eo an Israel im naaj kōpooj baam̧le eo an Anij n̄an bar ro̧o̧ltok eo an Irooj Jisōs Kraist. Ilo āt eo ekwojarjar etan Jisōs Kraist, amen.