2010–2019
Ma Sefanna in Kraist
Ohktohpa 2018


Ma Sefanna in Kraist

Mwet sacohk ma wiyuc ke orekma luhn Leum, Nga luhlahlfongi kuht kuh in oruh wo liki ac enenuh in oruh wo in pain kawuck sasuc nuh ke Alu.

Lwen wo, tamuhlwel ac tahmtahel sacohk wiyuck. Oacna ke kuht fahk ke kahs Brazilian Portuguese luhk, “Boa tarde!” Nga puhla insewowo in tuhkweni ke toeni luhlahp wolacna se inge ke Alu luhn Jisus Kraist luhn Mwet Luhlahlfongi ke Lwen Sahflah ke kolyuck luhn mwet pahluh sacohk lasr, Prestuhn Russell M. Nelson. Nga lut ke luhma yohk lasr kais sie in lohngwack puhsra luhn Leum sin mwet kuhlwacnsap Lal fin facluh ke lwen sahflah kuht moul ke.

Petsac
Infacl Amazon
Petsac
Infacl Amazon oreklac ke infacl luo ohsun

Acn sihk fin acn Brazil arulacna kahsruhp ke kasrpacn acn. Sie seltahl pa infacl pwengpweng se pahngpahng Amazon, sie infacl yohk ac loes emet fin facluh. Oreklac ke infacl lukwac, Solimões ac Negro. Usrnguckiyac uh, eltahl tuhkweni sohrohr ke mael met liki kof ah ohsun miksiyucki, mweyen kais sie infacl ingacn siena acn elos muhtwacwacack sohrohr ma we, mohiyac kahsruhsr la, foliyac ac ohuiyac, ac kacmikuhls oreklac kac. Tukun maels ekahsr, kof ah tuhfah tuhkweni maeni nuh sie, oraclah infacl soko suc siena liki infacl lukwac met ah. Tukun kais sie ip ke infacl soko inge maeni, Infacl Amazon oreklac arulacna fokoko pwacnwacng ke pacl se sun Meoa Atlantic, el pahtokwack kwewa kof kihfihnte ah oruh kof kofonot ah kuh in sukokyak ke maels pucspucs e inkof ah.

Petsac
Kuhpahsrweni luhn kof ke Infacl Amazon

Ke atac se pacna inge ma Infacl Solimões ac Rivers tuhkweni sohrohrlah in oraclah infacl luhlahp soko pahngpahng Infacl Amazon, tuhlihk nuhtin God uh tuhkweni ke Alu Fohlohkyak luhn Jisus Kraist ke siena moul, facsin, ohiyac, oraclah mura na wolacna se ke Mwet Luhlahlfongi ke Kraist. Sahflahiyac ah, ke kuht ahkkweye, pahtok , ac luhngse sie sin sie, kuht tuhkweni oraclah kuh na fokoko se in oruh ma wo fin facluh. Ke kuht mwet fahsr tohkohl Jisus Kraist uh, tuhkweni kahsruhsr se fanna ke infacl wowo se, kuht fah kuh in sang kof “kofonot” luhn wosasuc nuh sin facluh maluh se.

Petsac
Mempucr sasuc tuhkweni nuh sie wi tuhlihk nuhtin God sahyac pac
Petsac
Oreklac sie u luhn Mwet Luhlahlfongi

Leum El ahkkahlwemye nuh sin mwet pahluh Lal in luti lah kuht ac ahkkweye ac luhngse kais sie fuhkah, tuh kuht in kuh in tuhkweni ike luhlahlfongi ac srihpac lasr in ukwe Jisus Kraist. Paul, Mwet Sap se luhn Olweacng Sasuc, el tuh luti tuh kowos suc “baptaisla in kupasryang nu yurin Kraist … : tuh kowos nuhkwewa ma sefannala yurin Kraist Jisus.1

Ke kuht oraclah olwelah lasr ke pacptais lasr in ukwe Mwet Lahngo, kuht wi mwet loh ye muhtuhn God lah kuht fah us inen Kraist nuh fahsr.2 Ke kuht kwacfe in eis ohiyac wo Lal nuh ke moul lasr, kuht eklac siena liki met ah, ke Iwaclah luhn Leum Kraist, ac luhngse lasr nuh sin mwet nuhkwewa yohkwelihk. 3Kuht puhlakihn elyah yohk lasr ke mwe enenuh ac engan luhn mwet nuhkwewa. Kuht liye kuht oacna tamuhlwel ac tahmtahel, oacna tuhlihk nuhtin God ke oreklac muhtahl, oiyac, ac finsrak. Kuht kena karihngihn sie sin sie ac us mwe toasr luhn kais sie.4

Pa inge ma Paul el ahkuhtweyac ke luhngse pwacye. 5 Mormon, mwet pahluh se ke Puk luhn Mormon, el ahkuhtweyac pack e luhngse pwacye luhn Kraist,”6suc pa yohk emet, fuhlwact, ac fokoko emet ke ohiyacn luhngse. Mwet pahluh lasr mihsenge, Prestuhn Russell M. Nelson, tuhfahna ahkkahlwemye kalmeyacn luhngse pwacye se luhn Kraist pa in kahsruh, suc tuhngal yohk ac sun muhtahliyac in luhngse ac karihngihn kais sie oacna ke Mwet Lahngo el oruh ah.7

Lelah kuht in lohacng nuh ke mwe luti ke luhngse ac karihngihnyuck, oacna ke Mwet Lahngo el oruh, weacng ohiyacn ahkkweye, kahsruh, ac pahtok elos suc tuhfahna eklac ac elos ma muhtwacwacack in ahkkahlwemye nuhnak la in wi mukwikwi luhn Alu uh.

Ke mwet kawuck sasuc inge som illac liki facluh ac sruokyac wosasuc luhn Jisus Kraist, welah Alu Lal, eltahl eklac oacna mwet tuhma lutlut Lal, sifil isuslac ke El.8 Eltahl sislah facluh se elos etuh yohk kac ac sulwaclah in fahsr tohkohl Jisus Kraist, ke srihpac fohn luhn insiyac, welah “infacl” sasuc se oacna Infacl Amazon—infacl soko ma fokoko ma wo ac suwohs ma sohrohr suwohslah nuh ye muhtuhn God. Mwet Sap Peter el ahkuhtweyac kac oacna “sie fihl sulweyucklac, mwet tol lun tokosrah, sei mutunfal mutal, mwet lun God sifacna.” 9 Ke mwet sasuc inge tuhkuh nuh ke infacl sasuc ac tiac etweyuck wo selos se inge, met wihn na eltahl ac sahp puhla tuhlac kuhtuh.. Kawuck sasuc inge sifacna konwacltahlwack ke elos tilyang nuh ke infacl soko ma siena ke oreklac la, temperature la, ac kain in ma oreklac kac—infacl soko ma oasr facsin la sifacna, facsin, ac kahs. Moul sasuc se luhn Kraist inge sahp elos ac tarilac kac. Sifacna nuhnkuh ke kihtin pacl lah fuhkah puhla laltahl ke pacl se emet eltahl fin lohng ke kais sie pohloh kahs pa nuh ke “FHE,” “BYC,” “Sacnri in lalo,” “pacptais ke mwet misac,” “Rilif Sosaiti,” “Melchizedek Pristut,” “kais tolu ke u se,” ac kuhtuh pac.

Fihsrwacsr in liye lah efuh elos in suhpah. Ke kuhtuh ohiyac, elos ac sifacna siyuck selos, “Kuh oasr acn fal nuh sihk inge? Kuh nga fal nuh ke Alu luhn Jisus Kraist luhn Mwet Luhlahlfongi ke Lwen Sahflah? Kuh Alu uh enenweyuc? Kuh ngac sokwack kawuck sasuc in kahsrwe yuc ac tahpuhk yuc?”

Kawuck sacohk wiyuck, ke kuhtuh pacl, kuhtuh sesr suc ma oasr ke siena acn ke fuhfahsryucsr loeloes luhn mwet tuhma lutlut enenuh in ahsrwelah paho fucsrfucsr in pain kawuck sasuc lasr, eisacltahl ke acn elos oasr kac, ac kahsruh, luhngse, ac esacltahlwacng nuh ke moul lalos. Kawuck sasuc nuhkwewa inge pa tamuhlwel ac tahmtahel sacohk nuhtin God.10 Kuht tiac kuh in fuhlwelah finne sie selos mweyen, oacna Infacl Amazon ma epacl nuh ke kais sie infacl srihsrihk sohrohrlah maeni nuh kac , kuht enenuh eltahl oacna ke eltahl enenwekuht uh. Pacna ke kuht tuhkweni na sie ac eklac oacna Infacl Solimões ac Negro kuht fah oraclah kuh na fokoko se nuh ke ma wowo fin facluh se inge.

Kawuck sasuc lasr usacni talan ituckyang sin-God, engan, ac ma wolacna kwaclos. Ohiyac lalos ke wosasuc uh kuh in koluk, pwacnwacng kahsrwe kuht in nahwelah testimony lasr sifacna eltahl oacyacpac use ngwetngwet sasuc nuh ke kahlwem lasr ke moul ac wosasuc.

Kuht na lutiyuck na emet lah kuht ac oruh fuhkah in kahsruh kawuck sasuc lasr in puhla wo ac luhngse fin acn Alu Fohlohkyak luhn Jisus Kraist. Eltahl enenuh ma tolu na elos kuh in muhta kuh ac luhlahlfongi ke moul lalos:

Ma se met, eltahl enenuh tamuhlwel ac tahmtahel ke Alu uh suc ma lohacng na pwacye nuh selos, kawuck pwacye ac suwohs nuh sin suc ma kuh in eklac na pwacye, suc fah fahsr siskaclos, ac suc fah topuk kihsensiyuck lalos. Ke mempucr, kuht in ahkolah pacl nuhkwewa ac suk ngwetngwet sasuc inge ke welah mukwikwi ac miting luhn Alu uh, finne kunac fuhkah, kunohkohn, kuh mwe siyuck lasr. Kuht kuh in oruh ma srihsrihk in kahsruh kawuck sasuc lasr inge in puhla luhngse ac painyuck ke Alu se, pa nuh ke oruh pwacngwack kuhlwacng, isracsr nuh selos, muhta yohrohlos in tuhkweni on ac alu, tuhkahkuhnlah ineltahl nuh sin mempucr sahyac ac kuhtuh pac. Ke kuht ikacslah insiyacsr nuh ke kawuck sasuc ke ohiyac kuhtuh inge, kuht oruh ke nguhnin karihngihn. Ke kuht karihngihn nuh selos oacna Mwet Lahngo el oruh, elos tiac puhla oacna muh eltahl “mwet sac lun kalkal lasr uh.” Elos ac fah puhla elos kuh in muhta ac kawuckyak, ac yohk srihpac, elos fah puhla luhngse luhn Mwet Lahngo ke karihngihn pwacye lasr.

Ahkluo, kawuck sasuc enenuh in oasr kunohkohn la—sie pacl lal in kuhlwacnsapuh mwet sahyac. kuhlwacnsap uh pa sie ohiyac suhmaht yohk emet ke Alu luhn Jisus Kraist luhn Mwet Luhlahlfongi ke Lwen Sahflah. El ahkfahsryeyuck ke pacl se luhlahlfongi lasr uh kapwack fokokoi. Kawuck sasuc nuhkwewa enenuh in oasr pacl se inge la. Ke pacl se pisap ac mwet karihngihn ward sapkihn in ahkwoye pahng se, wacngihn ma kuh in sruok kuht in suli kawuck sasuc lasr inge in kahsrwe kuht ke ohiyacn kahs kuh orekma.

Ahktolu, kawuck sasuc fah “ahkinsewowoyeyuck ke kahs wolacna luhn God.”11 Kuht kuh in kahsrwelos in luhngse ac in etuh ke ma suhmuhslah ke kuht rit ac sramsramkihn mwe luti nuh selos, sang kahsruh neke in ip srihsrihkiyac sramsram ac ahkuhtweyac kahs upac. Kuht kuh in kahsrweltahl pac in sifacna eis kolyuck ke lutiyacn ma suhmuhslah lwen nuhkwewa. Oacyacpac, kuht kuh in ukwaclah kawuck sasuc lasr inge ne lohm selos ac solwacltahl ma ne lohm sesr sahyacn na lwen akwucki nuh sesr nuh ke pacl in miting luhn Alu uh, kahsrweltahl in mayang nuh ke infacl luhlahp soko ke mura luhn Mwet Luhlahlfongi.

Akihlen pahlah ac srihkasrak ma kawuck sasuc lasr oraclah uh in welah mempucr ke sucu luhn God, ekihn tamuhlwel ac tahmtahel wiyacsr, kuht kuh in akacsruhi lah kuht ac kuhtanglah fuhkah kain in ma upac pacna inge ke moul lasr. Ma se inge kuh in kahsrweltahl in etuh lah eltahl tiac muhkwena ac God Elac fah ahkinsewowoyacltahl oacna ke elos ahkyohkye luhlahlfongi laltahl ke olwelah Lal.12

Ke Infacl Solimões ac Negro maeni nuh sie, Infacl Amazon el yohkwelihk ac fokokoi. Ke atac se pacna inge, ke kuht ac kawuck sasuc lasr pwacyena in tuhkweni, Alu Fohlohkyak luhn Jisus Kraist fah fokokoi ac tu na kuh. Muhtwacn sacohk kiyuck, Rosana, ac nga tarilac ma luhlahp nuh sin mwet nuhkwewa ma kahsrwe kuht in sroacng nuh ke infacl sasuc soko key ac pucs somlah, ke kuht sruokyac na wosasuc luhn Jisus Kraist fin acn sesr. Lusen yac fahfahsruh, mwet kuhlwacng inge tuh kahsrwe kuht lutlut pwacye nuh sesr ac kahsrwe kuht in tahfwelah in som sokowacna in suwohs.

Mwet pahluh fin can Western Hemisphere etuh na pwacye in oruh kawuck sasuc uh in tuhkweni fahsr na luhlahlfongi la uh nuh ke infacl sasuc wowo soko suwohslah nuh ke moul ma pahtpaht. Sie srihkasrak an pa, akihlen sie lwen lasr ac etuh lah kuhf fah sun ma kain ma upac inge,13 Moroni el suhmuhslah kuhtuh step yohk srihpac ingacn nuh ke sihm lal lun Puk luhn Mormon:

“Ac tukun elos tuh eisyuck in pacptaislac, ac moklweyuck ac ahknwacsnwacsyeyucklac ke kuh luhn Nguhn Muhtahl, elos oacwaclah inmahsrlon mwet luhn alu luhn Kraist, ac inelos eisyuck, tuh elos in kuhi n esamyuck ac karihngihnyuckyang ke kahs wo luhn God, in liyaclosyang pacl nuhkwewa ke pruhe, muhngnguh muhkwena nuh ke orekma wo luhn Kraist, suc pa mwet sihm ac mwet ahksuwohsye luhlahlfongi lalos.

“Ac alu uh tuh toeni nuh sie ke pacl pucspucs, in lalo ac in pruhe, ac in sramsram sie nuh sin siepac ke ohiyac wo luhn nguhnalos.”14

Mwet sacohk wiyuck, ke orekma luhn Leum, nga luhlahlfongi muh kuht kuh in oruh wo liki ac enenuh in wo in paing kawuck sasuc lasr nuh ke alu uh. Nga ngihsre sum kom in nuhnkuh lah meac kuht kuh in oruh in sulpac sruokyac, eis, ac kahsrweacng nuh selos, muhtwacwacack ke sacnri se na fahsruh inge. Sekihn ma kunom ke Alu uh in tiac popoyak nuh ke solsol lom nuh sin kawuck sasuc inge e ke miting ac mukwikwi luhn Alu uh. Sahflahiyac uh, nguhnin mwet inge sacohk ye muhtuhn God ac yohk srihpac liki prokracm ac mukwikwi uh. Kuht fin oruh kahsruh nuh sin kawuck sasuc ke sesseslah luhn insiyacsr ke luhngse oacna ke Jisus el oruh ah, nga olwelah nuh sum, ke Inel tuh El ac afh kahsrwe kuht ke kuhiyacsr. Ke kuht orekma oacna mwet luhlahlfongi in kahsruh, oacna ke Mwet Lahngo el oruh, kawuck sasuc lasr fah eis kahsruh eltahl enenuh in tu na kuh, kihsackuhnlah, ac luhlahlfongi nuh ke sahflah. Eltahl ac wi kuht ekihn mwet fuhlwact luhn God ac fah kahsrwe kuht usacni kof kofonot nuh ke facluh se ma enenuh na upac mwe ahkinsewowo ke wosasuc luhn Jisus Kraist. Tuhlihk nuhtin God inge fah puhlakihn lah eltahl “tiac sifil mwet sac ac tahkuhsrkuhsr, tuh mwet wiyac luhn mwet lun God ac mwet in sucu lun God.”15 Nga olwelah nuh sum lah eltahl fah akihlen oasr luhn Mwet Lahngo ke Alu Lal sifacna. Eltahl fah wi kuht sohrohr nuh ke infacl soko ma kof ah kahkuhnlah ma wowo ne ken a eltahl sun poun Leum Jisus, ac eltahl ac lohng Pahpah El fahk, “Kowos fah eis moul ma pahtpaht.16

Nga suli kom in suk kahsruh luhn Leum in luhngse mwet sahyac oacna ke El luhngse kom. Mormon el luti, “Ohinge, mwet liki sacsohk luhk [ac tahmtahel], pruhe nuh sin Pahpah ke kuhiyacn sifowos nohfohn, tuh kowos in kuh in sesseslah ke luhngse se inge, ma El sang nuh selos nuhkwewa suc fahsr na pwacye tukun Wen nahtuhl, Jisus Kraist.”17 Ke ma inge, nga liye ac oruh oacna ke inen Jisus Kraist, amen.