Txiaj Ntsim Muaj Nuj Nqis Heev Los ntawm Vajtswv Los
Peb lub neej puv nkaus muaj kev ntseeg, kev xyiv fab, kev zoo siab, kev cia siab, thiab kev siab hlub tau thaum peb tso siab ntseeg rau ntawm Khetos txawm yog ntseeg me me xwb.
Kuv cov kwv tij thiab cov muam, peb nyuam qhuav koom ua ke muaj ib lub rooj sab laj dawb huv, ib txoj kev coj ua uas tau muaj los hauv phau Vaj Lug Kub Npaiv Npaum thaum haiv neeg Ixayees yav thaum ub sib sau ua ke kom hnov tau tus Tswv tus Ntsuj Plig thiab ua Vajtswv tsaug rau Nws tej koob hmoov.1 Peb muaj lub cib fim ua neej nyob hauv ib lub caij nyoog uas txoj kev coj ua tau txum tim rov qab los dhau ntawm tus Yaj Saub Yauxej Xamiv.2 Kuv yaum nej txhua tus sau tseg rau hauv nej phau ntawv ceev xwm txheej saib nej tau xav li cas hauv nruab siab hais txog lub sij hawm dawb ceev no.
Tsis ntev tas los no, peb tau muab peb tus phooj ywg thiab peb tus yaj saub, Thawj Tswj HwmThomas S. Monson thas. Txawm hais tias peb kuj nco nws kawg nkaus li, los peb ua tus Tswv tsaug uas Nws tau hu ib tug yaj saub tshiab, Thawj Tswj Hwm Russell M. Nelson, kom coj kav Nws lub Koom Txoos. Raws li ib tug txheej txheem zoo peb tau pib dua ib zaj hauv peb lub Koom Txoos zaj keeb kwm. Nov yog ib qho txiaj ntsim muaj nuj nqis heev los ntawm Vajtswv los.
Thaum peb txhua tus tsa tes txhawb nqa Thawj Tswj Hwm Nelson, peb sawv ua tim khawv rau ntawm Vajtswv lub xub ntiag thiab lees pom hais tias nws yog tus uas muaj cai pauv Thawj Tswj Hwm Monson qhov chaw. Tsa tes li ntawd, peb cog lus hais tias peb yuav mloog nws lub suab thaum nws txais lus coj kev los ntawm tus Tswv los.
Tus Tswv hais tias:
“Nej yuav tsum ua raws li tag nrho nws [txhais tias tus Thawj Tswj Hwm ntawm lub Koom Txoos] cov lus thiab cov lus txib uas nws yuav muab rau nej thaum nws txais tau tej ntawd… ;
“Vim nej yuav tau txais nws txoj lus, zoo ib yam li los kiag ntawm kuv lub qhov ncauj los, nrog tag nrho txoj kev ua siab ntev thiab kev ntseeg.”3
Kuv tau paub peb tus yaj saub thiab thawj tswj hwm tshiab no tau 60 xyoo lawm. Kuv tau nrog nws ua hauj lwm hauv Pawg Kaum Ob tug Thwj Tim tau 33 xyoos, thiab kuv ua tim khawv hais tias tus Tswv txhais tes tau npaj peb tus yaj saub tshiab no kom rais los mus ua peb thawj tug thwj tim thiab yaj saub thiab tswj kav tag nrho tej yawm sij ntawm lub pov thawj hwj dawb huv saum lub ntiaj teb no. Thov kom peb txhua tus rau siab txhawb nqa nws thiab nws ob tug pab cuam thiab ua raws li lawv tej lus qhia. Peb kuj zoo siab txais tos Txwj Laug Gong thiab Txwj Laug Soares ua mej zeej ntawm Pawg Kaum Ob tug Thwj Tim.
Tom qab Yexus txoj Kev Sawv Rov Los, ib qho uas muaj los lawm uas peb ua koob tsheej txog hnub vas xaum vas thiv Easter no, Nws tshwm sim rau Nws cov thwj tim pom thiab hais tias, “Nej cia li muaj kaj siab: Leej Txiv txib kuv los li cas, kuv yuav txib nej mus ib yam nkaus li ntawd.”4 Saib seb, muaj ob qho—Vajtswv txib Nws Leej Tub los. Leej Tub txib Nws cov tub qhe—txiv neej thiab poj niam—kom ua tiav Nkawd tej hauj lwm.
Peb yuav tsum tsis txhob xav tsis thoob uas cov neeg uas tus Tswv hu kom ua Nws tej hauj lwm tsis yog neeg zoo tag nrho. Cov dab neeg hauv cov vaj lug kub hais txog tej yam uas muaj los rau cov txiv neej thiab cov poj niam uas Vajtswv hu kom ua ib txoj hauj lwm loj heev—peb Leej Txiv Saum Ntuj Ceeb Tsheej ib co tub thiab ib co ntxhais zoo—raug hu los mus ua lawv tej hauj lwm hauv lub Koom Txoos, rau rau siab ua li ntawd, tiam sis tseem tsis tau zoo tag nrho. Ib yam li ntawd rau peb thiab.
Vim rau qhov uas peb txhua tus muaj tej yam uas peb ua tsis zoo tag nrho, peb yuav ua li cas sib pab sib txhawb mus lawm tom hauv ntej? Qhov thib ib yog muaj kev ntseeg—kev ntseeg tiag rau ntawm tus Tswv Yexus Khetos. Kev ntseeg rau ntawm tus Cawm Seej yog thawj ntsiab cai ntawm tus Khetos txoj lus qhuab qhia thiab txoj moo zoo.
Ob peb xyoos dhau los kuv mus xyuas Thaj Av Dawb Huv. Thaum peb tsav tsheb mus dhau ib tsob nroj mustard, tus thawj coj ntawm BYU Jerusalem Center nug kuv saib kuv puas tau pom ib lub noob mustard. Kuv tsis tau pom, ces peb tau nres. Nws muab cov noob los ntawm tsob nroj mustard rau kuv saib. Cov noob ntawd me me heev.
Kuv txawm nco tau Yexus cov lus qhia hais tias: “Kuv qhia tseeb rau nej hais tias, yog nej muaj kev ntseeg luaj lub noob [mustard], nej hais rau lub roob no hais tias, ’Cia li txav ntawm no mus rau tod!’ Ces lub roob ntawd yeej yuav txav mus. Nej yuav ua tau txhua yam huv tib si!”5
Yog tias peb muaj kev ntseeg me me npaum li ib lub noob mustard, tus Tswv yuav pab tau peb tshem tej roob ntawm kev poob siab thiab kev tsis ntseeg ntawm tej hauj lwm uas peb muaj thaum peb ua hauj lwm pab Vajtswv cov me nyuam, suav cov neeg txheeb ze, cov mej zeej ntawm lub Koom Txoos, thiab lawv cov uas tseem tsis tau los koom lub Koom Txoos.
Cov kwv tij thiab cov muam, peb lub neej puv nkaus muaj kev ntseeg, kev xyiv fab, kev zoo siab, kev cia siab, thiab kev siab hlub tau thaum peb tso siab ntseeg rau ntawm Khetos txawm yog ntseeg me me xwb—twb yog npaum li ib lub noob mustard nkaus xwb.
Txwj Laug George A. Smith nco qab ib co lus zoo uas tus Yaj Saub Yauxej Xamiv tau hais rau nws hais tias: “Nws qhia kuv hais tias kuv yuav tsum tsis txhob poob siab, txawm hais tias muaj teeb meem npaum li cas ib ncig ntawm kuv. Yog tias kuv nyob hauv lub qhov tob tshaj plaws hauv Nova Scotia thiab tag nrho tej Roob Rocky Mountains tsuam kuv, kuv yuav tsum tsis txhob poob siab tiam sis tuav raws, muaj siab ntseeg, thiab muaj siab loj thiab kuv mam li kov yeej tau thaum kawg.”6
Peb yuav tsum nco ntsoov Povlauj cov lus tshawj tawm hais tias: “Vim Yexus Khetos txhawb nqa kuv lub zog, kuv thiaj tiv taus txhua tsav yam huv tib si.”7 Paub li no yog dua ib qho txiaj ntsim muaj nuj nqis los ntawm Vajtswv los.
Ntxiv rau tej txiaj ntsim uas kuv tau hais txog, muaj ntau dua ntxiv thiab. Nim no kuv yuav hais lus txog ob peb qho—tej txiaj ntsim ntawm Hnub Caiv, lub cim nco txog, kev pab lwm tus neeg, thiab qhov txiaj ntsim zoo kawg nkaus uas yog peb tus Cawm Seej, Vajtswv Leej Tub.
Lub hwj chim ntawm Hnub Caiv yog kom hnov tau kev zoo siab, kev xyiv fab, thiab kev sov siab so los ntawm tus Tswv tus Ntsuj Plig nyob tom lub koom txoos thiab nyob hauv tsev, es tsis muaj dab tsi txiav qhov ntawd.
Neeg coob heev cia li ua neej nyob online ntsia ntsoov lawv cov xov tooj tsis tu qab li—tej screen no ci ci rau lawv tej ntsej muag niaj hnub niaj hmo thiab lawv mloog nkauj tsis tso tseg li npaum li tias lawv hnov tsis tau tus Ntsuj Plig lub suab yau yau. Yog tias peb tsis nrhiav sij hawm kom tso tej ntawd tseg rau ib chim, peb yuav tsis muaj tej cib fim hnov Vajtswv lub suab hais tias, “Nyob ntsiag to, thiab paub tias kuv yog Vajtswv.”8 Nim no yeej tsis muaj dab tsi phem txog qhov uas siv tej tshuab los yog xov tooj no vim tej ntawd kuj los ntawm tus Tswv los, tiam sis peb yuav tsum siv tej no raws li kev txawj ntse. Nco qab ntsoov qhov txiaj ntsim ntawm Hnub Caiv.
Qhov txiaj ntsim ntawm txoj kev noj lub cim nco txog hauv txoj kev sib ntsib txais lub cim nco txog yuav tsum tsis txhob ua ib yam qub los yog ib yam uas peb lam tau lam ua. Tsuas yog 70 feeb hauv ib lub lis tiam tag nrho uas peb thiaj nres tau thiab nrhiav tau kev thaj yeeb nyab xeeb, kev xyiv fab, thiab kev zoo siab ntau ntxiv hauv peb lub neej.
Kev noj lub cim nco txog thiab rov qab nrog tus Tswv sib khi lus yog ib lub cim qhia rau tus Tswv hais tias peb yeej yuav nco ntsoov Nws. Nws txoj Kev Theej Txhoj yog ib qho txiaj ntsim los ntawm Vajtswv lub siab zoo los.
Lub cib fim ua hauj lwm pab Leej Txiv Saum Ntuj Ceeb Tsheej cov me nyuam yog ib lub cib fim kom ua raws li Vajtswv Tib Leej Tub tus yam ntxwv thaum peb ib leeg pab ib leeg.
Tej lub cib fim pab lwm tus neeg yog tej yam yus ua vim yog yus lub luag hauj lwm—hauv peb tsev neeg, peb tej hauj lwm tom lub Koom Txoos, thiab peb tej kev koom tej koom haum hauv koog zej zog.
Lub Koom Txoos cov mej zeej—poj niam thiab txiv neej huv tib si, yog tias lawv muaj siab xav—yuav tsum tsis txhob ua xyem xyav thiab xeem ua tej hauj lwm tseem fwv rau ntawm txheej tseem fwv twg txawm lawv nyob qhov twg los xij. Peb tej suab tseem ceeb heev niaj hnub nim no hauv peb tej tsev kawm ntawv, peb tej nroog, thiab peb tej teb chaws. Kev cai ywj pheej nyob qhov twg, los peb lub luag hauj lwm yog kom pov ntawv xaiv cov txiv neej thiab cov poj niam zoo uas kam ua hauj lwm pab.
Tej cib fim ua hauj lwm pab lwm tus neeg yog tej yam uas peb ua es tsis yog raug hu kom ua—tsis yog peb lub luag hauj lwm—thiab los rau peb thaum peb cev tes mus pab lwm tus neeg uas peb ntsib hauv lub neej no. Nco qab ntsoov hais tias Yexus tau qhia tus kws lij choj hais tias peb yuav tsum hlub Vajtswv thiab peb tus neeg zej zog ib yam li peb tus kheej thiab tau muab tus Xamalas Siab Zoo rau peb ua ib tug yam ntxwv.9
Tej kev pab lwm tus neeg pab tau peb kom to taub Khetos lub neej thiab tej hauj lwm txhawb nqa zoo dua. Yexus tau los kom ua hauj lwm pab, thiab ib yam li cov vaj lug kub qhia, “ib yam li Neeg Leej Tub, nws los nws tsis tau kom leej twg tu nws, tiam sis nws los tu sawv daws thiab muab nws txoj sia los txhiv ntau leej.”10
Tej zaum Petus tau piav txog tus Cawm Seej tej hauj lwm hauv lub ntiaj teb no zoo tshaj plaws, siv xya lo lus xwb thaum nws hais txog Yexus hais tias, “nws ncig mus ua tej yam zoo.”11
Tus Tswv Yexus Khetos yog lub txiaj ntsim muaj nqis ntau tshaj plaws rau peb uas los ntawm Vajtswv los. Yexus hais tias, “Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau.”12
Nifais hais txog saib peb tus Cawm Seej tseem ceeb npaum li cas thaum nws hais tias, “Peb hais txog Khetos, peb xyiv fab rau Khetos, peb qhia txog Khetos, peb qhia tej yuav muaj los yav tom ntej txog Khetos, thiab peb sau raws li peb tej lus qhia tej yuav muaj los yav tom ntej, xwv kom peb cov me nyuam yuav paub cia siab rau lub hauv paus twg kom txais kev zam txim rau lawv tej kev txhaum.”13 Khetos yuav tsum yog lub hauv paus ntawm peb lub neej txhua lub sij hawm thiab nyob txhua qhov txhia chaw.
Peb yuav tsum nco qab ntsoov hais tias yog Yexus lub npe uas nyob rau ntawm peb tej qhov chaw teev ntuj; peb ua kev cai raus dej tuav Nws lub npe; thiab peb txais kev pom zoo, kev tsa, lub vaj txiaj ntsim, thiab kev sib khi ua txij nkawm tuav Nws lub npe thiab. Peb noj lub cim nco txog thiab cog lus tias peb yuav ris Nws lub npe—thiab rais los mus ua neeg ntseeg Khetos tiag. Thaum kawg, zaj lus thov foom koob hmoov rau lub cim nco txog hais kom peb “nco ntsoov nws.”14
Thaum peb npaj rau Hnub Caiv Easter tag kis, cia peb nco qab ntsoov hais tias Khetos yog tus siab tshaj plaws. Nws yog tus Txiav Txim raws li kev ncaj ncees, tus Tam peb thiab rau siab thov kom Vajtswv zam txim, peb tus Txhiv Dim, tus Tswv Yug Yaj zoo, tus Mexiyas, tus Phooj Ywg muab siab npuab peb, thiab ntau yam ntxiv. Nws yog ib qho txiaj ntsim muaj nqis heev rau peb los ntawm peb Leej Txiv.
Hauv peb txoj kev ua thwj tim, peb muaj ntau yam kev xav tau, kev txhawj xeeb, thiab hauj lwm ua. Txawm yog li ntawd, muaj tej yam uas yuav tsum yog lub hauv paus ntawm peb txoj kev ua mej zeej hauv lub Koom Txoos. “Yog li ntawd,” tus Tswv txib hais tias, “ua neeg ntseeg; sawv ruaj nrees thiab ua txoj hauj lwm uas kuv tau muab rau nej ua; pab cov uas qaug zog, tsa tej txhais tes uas tsaug lawm, thiab ua rau lub hauv caug uas tsis muaj zog kom mus taus kev.”15
Ua li no yog lub Koom Txoos tej hauj lwm zoo! Nov yog txoj kev teev ntuj dawb huv! Nov yog txoj moo zoo tseeb thaum peb pab txhawb nqa thiab ntxiv dag zog rau lawv cov uas xav tau kev pab txawm yog ntawm lub cev nqaij daim tawv los yog sab ntsuj plig huv tib si! Ua li no peb yuav tsum mus xyuas lawv thiab pab lawv16 kom lawv tej lus tim khawv txog txoj kev ntseeg rau ntawm Leej Txiv Saum Ntuj Ceeb Tsheej thiab Yexus Khetos thiab Nws txoj Kev Theej Txhoj yuav nyob hauv lawv lub siab lub ntsws.
Thov kom tus Tswv pab foom koob hmoov rau peb kom peb saib peb tej txiaj ntsim muaj nuj nqis heev los ntawm Vajtswv los rau nqi, suav qhov uas peb yog mej zeej hauv Nws lub Koom Txoos uas txum tim rov qab los. Kuv thov kom peb yuav muaj siab hlub tag nrho Leej Txiv Saum Ntuj Ceeb Tsheej cov me nyuam thiab pom tau saib lawv xav tau kev pab li cas thiab kam teb lawv cov lus nug thiab kev txhawj xeeb txog txoj moo zoo yam meej meej li thiab ua siab zoo rau lawv kom sawv daws to taub zoo thiab ib leeg saib ib leeg rau nqi.
Kuv ua tim khawv hais tias Yexus Khetos yog peb tus Cawm Seej. Cov yaj saub thiab cov thwj tim, cov Tuam Thawj Coj, thiab cov thawj coj rau cov poj niam puav leej uas yog cov thawj coj ntawm lub Koom Txoos tau txais kev tshoov siab npaj tej lus uas yuav qhia nej hnub no. Thov kom txoj kev xyiv fab thiab kev kaj siab ntawm tus Tswv roos txhua tus thawj coj uas yuav hais kuv thov li no los ntawm Yexus Khetos lub npe, amees.