Irooj, Kwonaaj ke Kōm̧m̧an Bwe Meja En Maron̄ Peļļo̧k
Jej aikuj kalimjōk doon kōn māj ko mejān Rilo̧mo̧o̧r eo.
The Lion King ej juon pija in mōn̄ka kōn African savanna. Ke ļaion kiin̄ eo eaar mej ilo an kar lo̧mo̧oren eo nejin, irooj lion eo edik kar kipel n̄an diwōjļo̧k ilo an ritōl nana eo kakkure jokkuun wōt juon eo an savanna. Irooj in laion in ekar ba bōk aelōn̄ in kiin̄ in jān jipan̄ an juon an rūkaki. Ekar jipan̄ e kōppeļļo̧k mejān n̄an aikuj eo eļap ilo mour ioon savanna. Bar bōk maron̄ eo ejim̧we āinwōt juon kiin̄, ļaion in edik ļoor kapilōk eo n̄an “reilo̧k ilōn̄in ta eo ej loe.”1
Ilo ad ekkatak n̄an an erom̧ rijolet aolep men ko an Jemān, gospel eo ej katakin kōj n̄an reilo̧k ilōn̄in ta eo jej loe. N̄an reilo̧k ilōn̄in ta eo jej loe, jej aikuj kalimjōk doon kōn māj ko mejān Rilo̧mo̧o̧r eo. Ok in gospel eo eobrak kōn armej ilo aolep kain jekjek in mour. Jejjab maron̄ lukkuun meļeļe kālet ko im wāween mour ko an armej ilo laļ in ad, jarlepju ko an Kabun̄, aaet ilo baam̧le ko ad, kōnke ejeja ad jeļā aolepān pija eo ej kwaļo̧k wōn er. Jej aikuj reilikļo̧k n̄an wāween ko repidodo im ļōmņak ko im kadebakbakļo̧k kūlaaj mej in reim̧aanļo̧k eo ad make jān en̄jake eo ad.
Ikar kōppeļļo̧k mej ko meja n̄an “reilo̧k ilōn̄ in ta eo ikar loe” ke ikar jerbal āinwōt juon mijen būreejtōn. Juon elder edik ekar itaaktok kōn pere im mijak ilo mejān. Ke kōm ar bwebwenato ilo juon intōrpiu, ekar ba kōn būrom̧ōj im ajļo̧k, “Ikōņaan ro̧o̧l n̄an m̧weo imō.” Ikar ļōmņak ippa make, “Ekwe, kōjro maron̄ ņamejļan men ņe.” Ikar kōkapilōklōk e bwe en lukkuun jerbal im bwe en jar ium̧win juon wiik innām ko̧o̧ļ tok eō. Juon wiik tokālik, enan̄in aolep minit, ekar ko̧o̧ļ tok. Ekar kōņaan wōt ro̧o̧l. Ikar bar kōkapilōklōk e bwe en jar, buuļ jerbal, im n̄an ko̧o̧ļe eō juon wiik. Ilo intōrpiu eo am juon, ejjeļo̧k men ekar oktak. Ekar kipeļ e bwe in kōro̧o̧ļ e.
Iaar jab kōņaan bwe menin en waļo̧k. Ikar jino katakin e kōn kwojarjar in kūr eo an. Ikar rōjan̄ e bwe en meļo̧kļo̧k e im etal im jerbal.”2 Bōtaab jekdo̧o̧n ta kain kōl ikar leļo̧k, ļōmņak eo an eban oktak. Āliktata ekar alikkar n̄an eō bwe imaron̄ bōlen jab jeļā ta jekjek eo. Innām ikar en̄jake juon im̧we n̄an kajjitōk ippān juon kajjitōk: “Elder, ta ņe epen n̄an eok?” Ta eo ekar ba ekar dāil menono eo aō: “Būreejtōn, ijjab maron̄ riit.”
Kōkapilōklōk eo ejim̧we ikar ļōmņake ekar lukkuun aorōk n̄an an ron̄jake ekar jab n̄an aolep wāween ko rekkar n̄an aikuj eo an. Ta eo ekar lukkuun aikuji ekar bwe in reilo̧k ilōn̄in kajjitōk ko aō im ļoor Jetōb eo n̄an jipan̄ eō meļeļe ta eo ekar pād ilo ļōmņak eo an elder in. Ekar kōņaan bwe en jejjet aō etale im leļo̧k n̄an e juon unin an kōjatdikdik. Ijjelo̧kin, ikar kōm̧m̧an āinwōt ikar lukkuun lōke e im pen. Elder in eperan ekar katak riit im erom̧ juon rikaļooren Jisōs Kraist erreo. Ekar kōppeļļo̧k meja n̄an naan ko an Irooj: “Bwe Jeova e jab lo āinwōt armej ej lo; bwe armej ej lale ālkin armej, a Jeova ej lale būruon” (1 Samuel 16:7).
Ta ejjab juon kōjeraam̧m̧an ke n̄e Jetōb eo an Irooj ej kadōbakbakļo̧k loļo̧kjeņ ko ad. Keememej rikanaan Ilaija, eo ekar rujtok im loe jarin tariņae an Syria rej jepooļe jikin kweilo̧k eo an kōn kidia ko im jariōt ko? Rikarejar eo an ekar mijak im kar kajjitōk ippān Ilaija ta eo renej kōm̧m̧an kōn kain wāween eo. Ilaija ekar jiron̄ļo̧k e bwe en jab inepata, kōn naan in kakeememej kein: “Jab mijak, bwe ro rej rie kōj relōn̄ jān ro rej rie er”(2 Kiin̄ Ro 6:16). Rikarejar in ekar jab jeļā kōn ta eo rikanaan eo ekar kōnono kake. Ekar jab maron̄ reilo̧k ilōn̄in ta eo ekar maron̄ loe. Ijoke, Ilaija ekar loe jarin tariņae ko an enjeļ ro rekar m̧aanjabpopo n̄an tariņae kōn armej ro an rikanaan eo. Kōn mennin Ilaija ekar jar n̄an Irooj bwe en kōppeļļo̧k mej ko mejān likao eo edik, “im ear loļo̧kjeņ im, lo, toļ eo e obrak kōn kidia ko im jariot kijeek ko rej kōpool Ilaisha” (2 Kiin̄ 6:17).
Ekkā ad kōjno̧lo̧k kōj make jān ro jet kōn oktak ko ilo ta eo jej loe. Jej en̄jake aenōm̧m̧an ipeļaakin ro rej ļōmņak, kōnono, nuknuk, im m̧akūtkūt āinwōt kōj im jejjab inem̧m̧an ippān ro rej itok jān jekjek ko roktak ak wāween mour. Ilo m̧ool, kōj aolep jej ke itok jān laļ ko roktak im jej aolep kōnono kajin ko roktak? Jej ke aolep lo an laļ in pen kōn likjab ko rellōn̄ in en̄jake ko ad make ilo mour? Bwe jet rej lo im kōnono kōn mej ko mejān Jetōb, āinwōt rikanaan Ilaija, im jet rej lo im kōnono kōn jejjet in loļo̧kjeņ eo, āinwōt ikar ioone ippān mijenede eo nejū.
Jej mour ilo juon laļ me ej mour kōn keidi ko, jon̄jon̄, im kōnana. Ijjelo̧kin an lo kōn kūlaaj ko jān social media, jej aikuj kalimjōk itulowa kōn m̧wil ko an anij mej jej kajjojo bōke. M̧wil ko an anij im jan̄nuwaade ko rejjab maron̄ likūti ilo Pinterest ak ilo Instagram.
N̄an bōk im iakwe ro jet ejjab meļeļein jej aikuj kautieji meļeļe ko aer. Āinwōt, m̧ool ej kōmalim lōn̄tata ilo ad lo, men̄e ej aikuj jab erom̧ juon menin bōbrae jouj. Lukkuun iakwe ro jet ej aikuji kōmelmel ko rejjab bōjrak jān ad kōm̧m̧ani kijejeto ko rem̧m̧antata kōn armej ro en̄jake in mour ko aer im likjab ko mej jemaron̄ jab lukkuun jeļā. Reilo̧k ilōn̄ in ta eo jemaron̄ loe kalimjōk ej menin aikuj ioon Rilo̧mo̧o̧r eo.
Ilo Māe 28, 2016, 16 iiō Beau Rickey im Austin eo m̧ōttan kar pād ilo ranch eo an baam̧le eo ilo Colorado. Beau im Austin rekar iuweļo̧k ioon wa ko waer kōn eļap kōtmāne n̄an juon raan in ito itak ekaitoktok limo. Rekar jab lukkuun mootļo̧k jokoko ke erro kar jelm̧ae jekjek eo ekauwōtata, eo me juon men ekabūrom̧ōjmōj ekar waļo̧k. Wa eo waan Beau ekar okjak, likūt Beau ium̧win 400 baun (180 kg) in aeen. Ke Austin eo m̧ōttan Beau kar loe, ekar lo an Beau kate bwe en mour. Kōn aolepān an kajoor, ekar kajjieon̄ kanōk namōjtak ļeo m̧ōttan. Eban m̧akūtkūt. Ekar jar kōn Beau innām kōkairirļo̧k n̄an kappok jipan̄. Āliktata armej ro ilo Emergency rekar itaaktok, ak jejjo wōt awa tokālik Beau ekar jako. Ekar bōk kakkije jān mour in.
Jinen im jemān rekar itaaktok būrom̧ōj. Ke raar jutak ilo aujpitōļ eo edik ippān eo m̧ōttan Beau jitōnbōro im ro uwaan baam̧le eo, juon būļijmāān ekar deļo̧n̄ļo̧k ilo ruum̧ eo im leļo̧k cell phone eo an Beau n̄an jinen. Ke liin ekar bōk taļboon eo, juon ainikien alarm ekar jan̄. Ekar kōppeļļok taļboon eo im loe alarm eo an Beau aolep raan. Ekar riiti ennaan eo ekalimomo, em̧m̧an an ļaddik jodikdik eoeo nejin ekar kōm̧m̧ane n̄an riiti aolep raan. Eaar riiti, “Keememej im likūt Jisōs Kraist ioļapin mour eo am̧ rainin.”
Pedped eo an Beau ioon Rilo̧mo̧o̧r eo eaar jab kadikļo̧k iakwe eo an ilo būrom̧ōj eo an ro jitōnbōro ilo jako eo an. Ijoke, ej leļo̧k eļap kōjatdikdik im meļeļe n̄an mour eo an Beau im kālet ko an ilo mour. Ej kōtļo̧k an baam̧le eo an im ro m̧ōttan reilo̧k ilōn̄in wōt jan̄ im n̄iļaļļaļ an m̧ōkaj an mej im mōkaj an lan̄lōn̄ kōn m̧ool ko an mour eo tok juon. Ekar juon tūriam̧o̧ eo ejouj n̄an ro jinen im jemān Beau n̄an aer maron̄ loe jān mejān ļaddik eo nejierro men eo eļap an kaorōke.
Āinwōt ro uwaan Kabun̄ in, em̧ōj kar kōjelete kōj kōn juon ainikien alarm ilo jetōb eo ej kakkōl kōj n̄e jej bōk mejān wabanban ko ad jān lo̧mo̧o̧r. Kwojkwoj eo ad kajjojo wiik ej kakeememej n̄an mijōk wōt Jisōs Kraist bwe jen maron̄ aolep iien keememej e im bwe jen maron̄ aolep iien bōk Jetōb eo an ippād (lale K&B 20:77). Mekarta jet iien jej kōjekdo̧o̧n e en̄jake ko an juon ainikien kakeememej an alarm. N̄e jej likūt Jisōs Kraist ilo ioļapļap in mour ko ad, Enaaj kōm̧m̧an bwe mejād en maron̄ peļļo̧k n̄an kōjatdikdik ro reļļapļo̧k jān ad make maron̄ keidi.
Iaar bōk leta in ekaitoktok limo kōn juon aļaam̧ ekōjparok en̄jake jān juon sister etiljek. Eaar jiron̄ eō bwe ilo juon kijejeto n̄an jipan̄ ļeo pāleen meļeļe ekōjkan an kar en̄jake, liin eaar jino kōm̧m̧ane juon laajrak ilo talboon eo an kōn men ko ļeo eaar kōm̧m̧ani ak ba me raar kakūtōtōki. Liin eaar kalikkar bwe n̄e iien ekar jejjet, liin enaaj kar kōm̧m̧ane juon kein kam̧ool ilo jeje n̄an kwaļo̧k ippān bwe enaaj kar kōņaan ukōt wāween ko an. Kōn menin, juon Jabōt ke rej bōk m̧ōttan kwojkwoj eo im kōļmenļo̧kjeņ kōn wōt Pinmuur eo an Rilo̧mo̧o̧r eo, ekar kile bwe je en̄jake ko an renana kōn ļeo pāleen ekar lukkuun kadiwōjļo̧k Jetōb eo jān e im jāmin naaj ukōt e.
Juon ainikien aļaam̧ ilo jetōb ekar jan̄n ilo būruwōn eo ej ba: “Kōtļo̧k e, kōtļo̧k e aolepān. Jeere noot ko Rej jab jipan̄.” Innām liin eaar je, im ij riiti: “Ikar bōk jidik iien n̄an n̄a n̄an ‘bōk peran’ eo n̄an ‘jeer’ aolepān laajrak eo. Bōtaab ke iaar kōm̧m̧ane, aolep en̄jake ko renana raar jako ilo aenōm̧m̧an. Būruwō ekar obrak kōn iakwe—iakwe n̄an ļeo pāleeō im iakwe n̄an Irooj.” Āinwōt Saul ilo iaļ eo an ļo̧k n̄an Damascus, liiin ekar oktak visiōn eo an. Ūliin ek ko raar wōtlo̧k jān mejān lio.
Rilo̧mo̧o̧r eo ad emakijkij an kar kōpeļļo̧k mejān kanniōk im jetōb ro repilo. Kōppeļļo̧k mej ko mejād n̄an m̧ool ko rekwojarjar, ilo meļeļe im kajin, kōpooj kōj bwe jen mour jān likjab ko an mour in. N̄e jej leļo̧k ad n̄an ainikien “alarm” ilo jetōb me rej kalikkartok juon aikuj in kajim̧we iaļ ak ļapļo̧k in jibadbad eo ejjeļo̧k jem̧ļo̧kin, jej bōk kallim̧ur eo ilo kwojkwoj eo bwe Jetōb eo en pād ippād iien otemjej,Men in ekar waļo̧k n̄an Josep Smith im Oliver Cowdery ilo Kirtland Temple ke kallim̧ur ko rem̧ool rekar katakin jān Jisōs Kraist, eo ekar kallim̧ur bwe “rōn̄ōl eo” an likjab ko an kanniōk renaaj “kar bōk jān [mājāer], im mejān koļmānļo̧kijeņ ko [ami] rekar peļļo̧k”(K&B 110:1).
Ij kam̧ool bwe jān kajoor eo an Jisōs Kraist, jemaron̄ reilo̧k ilo jetōb ilōn̄in ta eo jej lukkuun loe. Ilo ad keememej E im an Jetōb eo An pād ippād iien otemjej, mej ko mejān kōlmenļo̧kjeņ ko ad renej peļļo̧k. Innām m̧ool eo eļap kōn kwojarjar eo ilowaan aolepād wōj enaaj ļapļo̧k an kajoor an im̧we būruwōd. Ilo etan Jisōs Kraist, amen.