Dor di Diseño Divino
E mannan di Señor ta guia bo. Dor di “diseño divino,” E ta den e detayenan chikitu di bo bida i tambe den e logronan grandi.
Rumannan, parando akinan den e konferensia general mundial inspirá aki mi ta sinti bo forsa i bo espíritu, mi no por yuda di pensa riba e palabranan di e Apòstel Pedro: “[Señor], ta bo pa nos ta akinan.”1
Esei ta eksaktamente loke Alma a bisa despues di a prediká na e pueblo di Amoniah. Alma a bai for di e siudat dor di e maldat di e hendenan. Pronto un angel a aparesé na Alma i yam’é pa “regresá e siudat di Amoniah, i prediká atrobe na e hendenan di e siudat.”2
Alma a hasi esei “pura,” drentando “ e siudat for di otro via.”3
“Ora e la drenta e tabata tin hamber, i e la bisa un hòmber: Lo bo duna un siervo humilde di Dios algu di kome?
“I e hòmber a bisé: Mi ta un Nefita, i ami sa ku bo ta un profeta sagrado di Dios, pasobra bo ta e hòmber di kua un angel a bisa den un vishon: Lo bo risibí.”4
E hòmber tabata Amulek.
Awó, ta yega Alma a yega haña Amulek? No, no tabata koinsidensia ku e la bai den e siudat pa medio di e via ku lo gui’é na e hòmber fiel aki ku lo bira su kompañero di mishon.
Elder Neal A. Maxwell a yega di splika: “Ningun di nos ta usa kompletamente e oportunidatnan i hende duna na nos den nos sirkulo di amistat. Abo i ami por yama e intersekshonnan aki ‘koinsidensia.’ E palabra aki ta komprendibel pa mortalnan usa, pero koinsidensia no ta un palabra apropiá pa deskribí e obranan di un Dios omnisiente. E no ta hasi kos pa medio di ‘koinsidensia’ pero dor di ‘diseño divino.’”5
Nos bida ta manera un tabla di ahedres i Señor ta move nos di un lugá pa otro - si nos ta respondé na susuronan spiritual. Wak atras, nos por mira Su man den nos bida.
Nos ta mira asina un intervenshon selestial ora Nefi a regresá pa buska e planchanan for di Laban. E “a wòrdu guia pa e Espíritu, sin sa fo’i adelantá e kosnan [ku e] mester hasi.”6 Laban pronto tabata su dilanti fuma, i Nefi a mat’é, kue e planchanan, i hui bai serka su rumannan. Ta djis e la yega topa ku Laban? Òf tabata dor di “diseño divino”?
Eventonan signifikante ta desplegá den e evangelio i den e Iglesia ku ta krese e reino di Dios riba tera. Nan no ta dor di kasualidat pero ta Dios su plan. E ku a krea e mundu aki por kalma e laman ku Su palabra i por guia tantu Alma komo Amulek i Nefi i Laban pa nan ta na e kaminda korekto na e momentu korekto.
Asina tambe, eventonan i asosiashonnan ta desplegá den kada un di nos su bida ku ta krese Dios su obra na tera.
Elder Joseph B. Wirthlin a papia di un momentu kaminda Presidente Thomas S. Monson a bis’é: “Tin un man ku ta guia nos riba tur kos. Hopi biaha ora kosnan pasa, no ta pa kasualidat. Un dia, ora nos wak bek riba e koinsidensianan den nos bida, nos lo realisá ku kisas nan no tabata koinsidensia tòg.”7
Hopi bia, nos bon obra ta konosí solamente pa algun hende. Nan ta, sinembargo, registrá den shelu. Un dia, nos lo ta para komo testigu di nos deboshon di nos alma pa obranan di rektitut. Ningun prueba òf kalamidat por destruí Dios su plan di felisidat. Sigur, dor di “diseño divino,” goso ta bin den mainta.”8 “Mi a bin na mundu pa kumpli ku e boluntat di [e] Tata,”9 Hesus a siña. Rumannan, nos tambe.
Pa medio di e eksperensia den nos propio biahe, mi sa ku Señor lo move nos riba e aparente tabla ahedres pa kumpli ku Su obra. Loke por aparentá di ta un kasualidat ta, en echo, supervisá pa un Tata den Shelu amoroso, ku por konta e number di kabei riba tur kabes.10 Ni sikiera un para ta kai na suela sin ku nos Tata ta sa.11 Señor tei den e detayenan chikitu di nos bida, i e insidentenan i oportunidatnan ta pa prepará nos pa alsa nos famianan i otronan miéntras nos ta yuda konstruí e reino di Dios na tera. Kòrda, manera Señor a bisa Abraham, “Mi konosé e final for di e komienso; p’esei mi man lo ta riba bo.”12
Señor a pone mi den un hogar ku mayornan amoroso. Dor di e stándartnan di mundu, nan tabata hendenan komun; mi tata devoto tabata un shofùr di trùk; mi mama angel, un ama di kas. Señor a yuda mi haña mi kerida kasa, Melanie; E la inspirá un negoshante, ku a bira un kerido amigu, pa duna mi un oportunidat di empleo. Señor a yama mi pa sirbi un mishon, tantu komo un hóben komo un presidente di mishon; E la yama mi den e Quorum di Setenta, i awor E a yama mi komo un Apòstel. Mirando atras, mi ta realisá ku ami no a orkesta ningun di e movidanan ei; Señor a hasié, meskos ku E ta orkesta movidanan importante pa abo i pa esnan ku bo ta stima.
Kiko lo bo tin di wak den bo propio bida? Kiko ta Dios su milagernan ku ta rekordá bo ku E ta serka di bo. Bisando, “Mi ta aki”? Pensa riba e momentunan ei, bo bida diario, ora Señor a aktua den bo bida - i a bolbe aktua. Tesorá nan komo momentunan ku Señor a mustra konfiansa den bo i den bo eskohonan. Pero permiti’É pa hasi mas di bo ku bo por hasi di bo mes riba bo mes. Tesorá ora E ta involukrá. Tin biaha nos ta konsiderá kambionan den nos plannan komo un mal paso den nos biahe. Pensa riba nan komo e promé paso na ta “riba Dios su kaminda.”13
Algun luna pasa nos nieta a uni na un grupo di hóben pa bishita vários sitio históriko di Iglesia. E itenerario final a indiká ku e lo pasa den e mesun área ku su ruman misionero, nos nietu, ta sirbiendo. Nos nieta no ta tin niun intenshon di wak su ruman riba su mishon. Sinembargo, ora e bus tabata drenta den e pueblo kaminda su ruman tabata sirbi, nan por a mira dos misionero tabata kana pabou den e kaya. Un di e misioneronan tabata su ruman.
Antisipashon a yena e bus ora e hóbennan a pidi e konduktor pa para p’asina e por kuminda su ruman. Den ménos ku un minüt, despues di lágrima i palabranan dushi, su ruman tabata bek riba su kaminda pa kumpli ku su debernan misional. Despues nos a komprondé ku su ruman tabata riba e kaya ei pa ménos ku sinku minüt, kanando for di un sita pa su outo.
Tata Selestial ta pone nos den situashonnan ku intenshon spesífiko den mente. E la hasi esei den mi bida, E ta hasiendo esaki den boso bida, meskos ku E la hasié den bida di nos nietunan.
Kada un di nos ta presioso i stima dor di Señor ku ta preokupá, ku ta susurá, i ku ta vela riba nos den maneranan úniko pa ku kada un di nos. E ta infinitamente mas sabi i mas poderoso ku hende hòmber i muhé mortal. E konosé nos desafionan, nos triunfonan, i nos deseonan rekto di nos kurason.
Mas ku un aña pasa miéntras mi tabata pasando den e Manzana di Tèmpel, un di e hermana misioneronan a aserka mi i puntra mi, “Bo ta kòrda mi? Mi ta di Florida.” E la bisa mi su nòmber, Hermana Aida Chilan. Si, mi ta kòrda klaramente ora ma sera konosí ku n’e i su famia. Su presidente di estaka a sugerí pa bishita su famia. E la bira bon kla ku nos tabata einan pa nan yu, Aida, ku no a wòrdu boutisá ainda. Despues di nos bishita i mas ku un aña di enseñansa i hermandat, Aida a boutisá.
Despues ku nos a bishita e Manzana di Tèmpel, Aida a skibi mi un karta. E ta bisa: “Mi sa ku tur mi kurason ku Tata Selestial konosé kada un di nos i ku E ta kontinuá na pone nos den otro su manda pa un motibu. Danki pa ta un di mi misioneronan. Dor di saka man pa ami i haña mi sinku aña pasa.”14 Aida tambe a manda mi su historia di konvershon rekalkando e “kasualidat divino” ku a tuma lugá den su bida ku a hib’é na boutismo i konfirmashon, sirbiendo un mishon na e Manzana di Tèmpel, i su matrimonio den tèmpel resien.15
Tabata solamente un kasualidat ku e presidente di estaka a hiba nos na e hogar di Chilan òf si e i ami lo a topa despues den e Manzana di Tèmpel? Aida su testimonio ta testifiká ku tur esaki tabata parti di Dios si “diseño divino.”
Señor gusta ta ku nos. No ta kasualidat ku ora bo ta sinti Su Espíritu i aktua riba e susuronan ku bo ta sintiÉ manera E la primintí: “Lo mi ta bo dilanti. Lo mi ta ba no man drechi i na bo robes, i mi Espíritu lo ta den bo kurason, i mi angel rondó di bo, pa karga bo.”16
Nos tur tin kosnan similar ta pasa den nos bida. Nos por topa un persona ku ta parse similar, renobá un amistat, òf enkontra algu similar ku un hende straño. Ora esakinan pasa, kisas ta Señor ta rekordá nos ku nos tur ta rumannan di otro. Nos tur ta huntu den e mesun kousa – den loke Jose Smith a yama “e kousa di Kristu.”17
Awó, unda albedrio ta pas den e “diseño divino”? Nos tin un eskoho pa sigui òf no sigui nos Salbador òf su lidernan skohe. E patronchi aki ta kla den e Buki di Mormon ora e Nefitanan a bira lomba for di Señor. Mormon a lamentá:
“I nan a mira … ku e Espíritu di Señor no a preservá nan mas; si, e la alehá for di nan pasobra e Espíritu di Señor no ta mora den tèmpelnan impuru …
“P’esei Señor a stòp di preservá nan pa medio di su poder milagroso i inigualabel, pasobra nan a kai den un estado di inkredulidat i maldat horibel.18
No ta tur loke Señor ta pidi di nos ta resultado di kon fuerte nos ta, kon fiel nos ta, òf kiko nos sa. Pensa riba Saulo, ku Señor a para riba kaminda pa Damasko. E tabata bayendo direkshon robes en su bida; e no ta tin nada i aber ku nort òf sur. Saulo a wòrdu re dirigié divinamente. Konosí komo Pablo despues, su ministerio apostóliko a reflehá loke Señor ya tabata sa ku e tabata kapas di hasié bira, no loke e la pone pa hasi komo Saulo. Den e mesun manera, Señor sa kiko kada un di nos ta kapas di hasié bira. Kiko e Apòstel Pablo a siña nos? “I nos sa ku tur kos ta bin huntu pa e bon di esnan ku ta stima Dios, na esnan ku a wòrdu yama di akuerdo ku su propósito.”19
Ora nos ta rekto, deseoso, i kapas, ora nos ta purba na ta digno i kualifiká, nos ta progresá na lugánan ku nunka nos a imaginá i bira parti di Tata Selestial su “diseño divino.” Kada un di nos tin divinidat den nos. Ora nos mira Dios obrando pa medio di nos i ku nos, ku nos por wòrdu enkurashá, hasta gradesí pa e guia ei. Ora nos Tata den Shelu bisa, “Esaki ta mi obra i mi gloria - logra e inmortalidat i bida eterno di hende,”20 E tabata papia di tur Su yunan - abo en partikular.
Señor su man ta guiando bo. Dor di “diseño divino,” E ta den e detayenan chikitu di bo bida i tambe den e logronan grandi. Manera ta bisa den Proverbio, “Konfia den Señor ku tur bo kurason; … i e lo dirigí bo kaminda.”21 Mi ta testifiká ku E lo bendishoná bo, sostené bo, i trese pas pa bo. Den e sagrado nòmber di JesuCristo, amèn.