Si Joseph Smith

Ni Elder Neil L. Andersen

Sang Korum sang Napulogduha ka mga Apostoles

Litrato

Si JesuCristo nagpili sang balaan nga tawo, isa ka matarong nga lalaki, nga magpangulo sa Pagpanumbalik sang bug-os Niya nga ebanghelyo. Iya ginpili si Joseph Smith.

Sa iya nahauna nga pagbisita kay Joseph Smith sa edad nga 17, ang isa ka anghel nagtawag sang ngalan ni Joseph kag nagsiling sa iya nga siya, si Moroni isa ka mensahero nga ginpadala gikan sa atubang sang Diyos kag ang Diyos may isa ka buluhaton nga ipahimo sa iya. Hunahunaa ninyo kon ano ayhan ang naisip ni Joseph sang ang anghel tungod sini nagsiling sa iya nga ang iya ngalan ”makilala sa kaayuhan kag sa kalainan sa mga kapungsuran, mga kaliwatan, kag mga hinambalan.”¹ Ayhan ang pagkakibut sa mga mata ni Joseph nagbangud sa pagsulit ni Moroni, nga ang pareho nga maayo kag malain ihambal tuhoy sa iya sa tunga sang tanan nga katawhan.²

Ang paghambal sang kaayo ni Joseph Smith mahinay nga nag-abot; ang malain nga paghambal sa iya gilayon nga nag-umpisa. Si Joseph nagsulat: ”Daw ano ka makatilingala sina nga ang isa ka indi nakilala nga batang lalaki ... isipon … nga may nagakabagay nga importyansya nga magbihag ... sang pinamapintas nga paghingabot.”³

Samtang ang apghigugma kay Joseph nagtubò, amó man ang pagdumot. Sa edad nga 38, siya ginpatay sang hubon sang manggamo nga 150 ka mga tawo nga may pinta ang mga nawong.⁴ Samtang nga ang kabuhi sang Propeta hinali nga nautod, ang kaayo kag kalain nga pagahambalon parte sa iya nagsugod pa lang.

Ayhan matingala balá kitá sa malain nga ginhambal batok sa iya? Ang Apostol nga si Pablo gintawag nga buang kag nadulaan sang isip.⁵ Ang aton pinalangga nga Manluluwas, ang Anak sang Diyos, gintawag nga palakaon, isa ka palainom, kag ginasudlan sang malain nga espiritu.⁶

Ang Ginuo nagsiling kay Joseph nahanungod sa iya kapalaran:

”Ang katapusan sang kalibutan magpamangkot tuhoy sa imo ngalan, kag ang mga buang-buang magtamay sa imo, kag ang impiyerno magsalimao batok sa imo;

Samtang ang may maputli sang tagipusuon, ... ang maalam, ... kag ang mga matarong, magpangita ... sang naunay nga mga bugay halin sa imo mga kamot.”⁷

Ngaa balá nga ang Ginuo nagatugot nga ang paghambal sang malain nagalagas sa maayo? Ang isa ka rason amó nga ang pagsupak batok sa mga butang sang Diyos nagapakadto sa mga nagapangita sang kamatuoran nga magpangamuyo sa mga sabat.⁸

Si Joseph Propeta sang Pagpanumbalik. Ang iya espirituhanon nga buluhaton nagsugod sa pagpakita sang Amay kag Anak, nga ginsundan sang madamo nga langitnon nga mga pagbisita. Siya ang instrumento sang Diyos sa pag-abot sang balaan nga kasulatan, nadula nga doktrina, kag ang pagpanumbalik sang priesthood. Ang importansya sang ginhimo ni Joseph nagakinahanglan sang lapaw pa sa malaamon nga panghunahuna; ini nagakinahanglan nga kitá, katulad ni Joseph, ”magpamangkot sa Diyos.”⁹ Ang espirituhanon nga mga pamangkot takos sa mga sabat nga espirituhanon halin sa Diyos.

Madamo sa mga nagbali-walâ sa buhat sang Pagpanumbalik simple nga indi nagapati nga ang mga langitnon nga nilalang nagapakighambal sa mga tawo sa duta. Imposible, siling nila, nga ang bulawan nga mga lamina ginhatag sang isa ka anghel kag ginlubad paagi sa gahum sang Diyos. Sa sina nga di-pagpati, ila madali nga ginasikway ang panaksi si Joseph, kag ang diutay lang nagapakanubo sa pagduhaduha sa kabuhi ni Joseph kag pagbutangbutang sa iya pagkatawo.

Kitá labi na gid nga nasubuan kon ang isa nga sang una nagatahud kay Joseph Smith nagadula sang iya pagtuo kag tungod sini nagapakalain sa Propeta.¹⁰

”Ang pagtuon sa Simbahan ... paagi sa mga mata sang iya sini mga nagbiya, ”si Elder Neal A. Maxwell sang kaisa nagsiling, ini ”katulad sang pagpakigsugilanon kay Judas nga maghangop kay Jesus. Ang mga nagbiya pirme nga nagahambal sang labi sa ila mga kaugalingon sang sa ina nga ila ginbayaan.”¹¹

Si Jesus nagsiling, ”Pakamaayuhon ninyo ang mga nagabuyayaw sa inyo, ... kag magpangamuyo kamo sa ila nga madinumuton nga nagagamit sa inyo, kag nagahingabot sa inyo.”¹² Maghatag kitá sang kaayo sa yadtong mga nagapakalain kay Joseph Smith, samtang nakahibalo sa aton kaugalingon nga tagipususon nga siya propeta sang Diyos kag masulhay nga ang ining tanan madugay na kaayo nga ginpanagna ni Moroni.

Paano kitá magsabat sa sinsero nga nagapamangkot nga nagakabalaka sa mga di-maayo nga mga hinambal nga iya nabatian ukon nabasa nahanungod sa Propeta nga si Joseph Smith? Siyempre, padayon kitá nga nagaabi-abi, sa tampad kag sinsero nga mga pamangkot.

Sa mga pamangkot nahanungod sa pagkatawo ni Joseph, ayhan magpaambit kitá sa mga pulong sang linibo nga nakakilala sa iya sing personal kag naghalad sang ila mga kabuhi para sa buluhaton nga iya ginbuligan nga mapasad. Si John Taylor, nga gintiro sang apat ka beses sang hubon sang manggamo nga nagpatay kay Joseph, nga sang ulihi nagpahayag: ”Ako nagapamatuod sa atubang sang Diyos, mga anghel, kag mga tawo, nga si [Joseph] isa ka maayo kag dungganon, [kag] maputli nga tawo ... [kag] ang iya pribado kag publiko nga pamatasan masaligankag siya nagkabuhi kag napatay nga isa ka tawo sang Diyos.” ¹³

Ayhan magpahanumdom kitá sa tampad nga nagapamangkot nga ang Internet walâ sing salaan sang ”kamatuoran.” Ang iban nga mga impormasyon, bisan nga ano pa ka nagakombinsi, simple nga indi matuod.

Sang madamo nga tuig ang nagligad nagbasa ako sang isa ka sinulat sa Time Magazine nga nagtalastas sang pagkadiskubre sang isa ka sulat, nga kuno ginsulat ni Martin Harris, nga nagsupak sa sugilanon ni Joseph Smith nahanungod sa pagkadiskubre sang bulawan nga mga lamina.¹⁴

Ang diutay nga mga miyembro nagbiya sa Simbahan bangud sadtong dokumento. ¹⁵

Masubo silingon, sila madali nga nagbiya. Sa masunod nga mga binulan, ang mga may kinaadman nakatukib [kag ang mangingilog nagkumpisar] nga ang sulat isa ka kumpleto nga paniplang.¹⁶ Ayhan kamo mahinangpanon nga nagaduhaduha sa mga balita, apang indi gid kamo dapat nga magduhaduha sa pagpamatuod sang mga propeta sang Diyos.

Ayhan kita magpahanumdom sa nagapamangkot nga ang iban nga mga impormasyon tuhoy kay Joseph, basi ginahatag sing lubos nga indi sa kahulugan sang iya panahon kag kahimtangan.

Si Elder Russell M. Nelson naglarawan sining hunahuna: ”Sadto ako nag-alagad nga manugkonsulta sa gobiyerno sang Estados Unidos sa iya National Center for Disease Control sa Atlanta, Georgia. Sang isa ka bes nga ako nagahulat sang taksi nga magdul-ong sa akon sa airport pagkatapos sang amon mga miting, ako nag-uluuntay sa hilamon sa paghimulos sang diutay nga silak sang adlaw bag-o ako magbalik sa tigtulugnaw nga panahon sang Utah. ... Sang ulihi nakabaton ako sa koreyo sang isa ka retrato nga ginkuha sang retratista nga may telephoto nga lente, nga naglarawan sang akon tion sang pagpahuway sa hilamon. Sa idalom sining retrato nagasiling, ’Manugkonsulta sa Gobiyerno sa National Center.’ Ang retrato matuod, ang ginasiling matuod, pero ang kamatuoran gingamit sa pagpahayag sang binutig nga hunahuna.¹⁷ Indi naton ginabali-walâ ang aton nahibal-an sa isa nga indi pa naton mahangpan.

Ayhan aton ipahanumdom sa nagapamangkot nga si Joseph indi nag-isahanon sa pagbisita sang mga anghel.

Ang mga saksi sang Libro ni Mormon nagsulat: ”Amon ginapahayag sa mga pulong nga maligdong, nga isa ka anghel sang Dios ang nagpanaog gikan sa langit, kag ... amon gintan-aw kag nakità ang mga lamina.”¹⁸Makasulit pa kitá sang ginsiling sang madamo pa.¹⁹

Ang tampad nga nagapamangkot dapat makakità sang paglapnag sang ginpanumbalik nga ebanghelyo bilang bunga sang buluhaton sang Ginuo paagi sa Propeta.

May yara na sa sobra sa 29,000 nga mga katilingban sang Simbahan kag 88,000 nga mga misyonero nga nagatudlo sang ebanghelyo sa bug-os nga kalibutan. Minilyon nga mga Santos sa mga Ulihing Adlaw ang nagatinguha sa pagsunod kay JesuCristo, ang nagakabuhi sing halangdon nga mga kabuhi, ang nagasapupo sa mga imol, kag nagahatag sang ila tiyempo kag mga talento sa pagbulig sa iban.

Si Jesus nagsiling:

”Ang maayo nga kahoy indi magbunga sang malain nga bungangkahoy, kag sa amó man sina nga ang malain nga kahoy indi magbunga sang maayo. ...

”... Paagi sa ila mga bunga sila makilala ninyo.”²⁰

Ining mga pagpaathag nakakombinsi, apang ang sinsero nga nagapamangkot indi dapat magsalig sa diri lang agud matapos ang iya paghisayod sa kamatuoran.

Ang tagsa ka nagapati nagakinahanglan sang espirituhanon nga pagpat-od sang balaan nga misyon kag pamatasan sang Propeta nga si Joseph Smith. Ini matuod sa kada henerasyon. Ang espirituhanon nga mga pamangkot bagay nga mahatagan sang espirituhanon nga mga sabat.

Sining karon lang samtang ako sa East Coast sang Estados Unidos, ang isa ka nagbalik na nga misyonero naghambal sa akon nahanungod sa iya abyan nga nadulaan sang pagpati kay Joseph Smith. Sila nakigpasugilanunay sing madamo nga beses, kag ang nagbalik na nga misyonero daw may mga pangduhaduha mismo sa iya kaugalingon bunga sang ila mga paghambalanay.

Bisan pa nga ako naglaum nga siya maghatag sang kabakod sa iya abyan, ako nagkabalaka sa iya panaksihon. Mga kauturan, tuguti ninyo nga ako maghatag sang paandam: Indi kamo mangin daku nga bulig sa iban kon ang inyo mismo pagtuo indi seguro nga nakaangot.

Sang nagligad nga mga simana nagsakay ako sa eroplano pakadto sa South America. Ang attendant sang flight nagdirekta sang amon pagtalupangod sa bideyo nahanungod sa safety. ”May pagduhaduha.” kami ginpaandaman, ”apang kon ang pressure sang cabin nagabaylo, ang mga dingding sa ibabaw sang inyo pulungkuan magbukas, kag maggwa ang oksiheno nga mga tabon sa guya. Kon ini matabo, dawhaton ninyo kag butongon ang tabon sa guya pakadto sa inyo. Ibutang ang tabon sa guya sa ibabaw sang inyo ilong kag bàbà. Isul-ob sa inyo ulo ang lastiko nga higot kag ipasibuon ninyo sing husto.” Pagkatapos ining paandam: ”Seguraduhon ninyo nga napasibu ang inyo mismo tabon sa guya bag-o kamo magbulig sa iban.”

Ang malain nga halambalon nahanungod sa Propeta nga si Joseph Smith magdugang samtang kitá nagapadulong sa Ikaduhang Pagkari sang Manluluwas. Ang di-lubos nga mga kamatuoran kag toso nga mga paniplang indi mabuhinan. May yara nga mga miyembro sang inyo panimalay kag mga kaabyanan nga magkinahanglan sang inyo bulig. Subong amó ang panahon nga magpasibu sang inyo mismo espirituhanon nga oksihena nga mga tabon sa guya agud kamo handa nga magbulig sa iban nga nagapangita sang kamatuoran. ²¹

Ang pagpamatuod sa Propeta nga si Joseph Smith mag-abot nga lainlain sa tagsa sa aton. Ayhan ini mag-abot samtang kamo nagaluhod sa pagpangamuyo, nga nagapamangkot sa Diyos nga magpamatuod nga siya tunay nga propeta. Ayhan ini mag-abot samtang kamo nagabasa sang sinulat nahanungod sa Unang Palanan-awon sang Propeta. Ang panaksi ayhan magtubò sing mahinay sa inyo kalag samtang kamo nagabasa sang Libro ni Mormon paliwat-liwat. Ayhan ini mag-abot samtang kamo nagahatag sang inyo mismo pagpamatuod sa Propeta nga si Joseph Smith ukon samtang kamo nagatindog sa templo kag nagatalupangod nga paagi kay Joseph Smith ang balaan nga gahum sang pag-ugyon ginpanumbalik sa kalibutan.²² Sa pagtuo kag matuod-tuod nga tinutuyò, ang inyo pagpamatuod sa Propeta nga si Joseph Smith mangin mabakod. Ang padayon nga pagpamatuod kon kaisa ipakalainon sang iban, apang ini indi gid makapatay sang inyo tudok nga pagtuo.

Sa mga lamharon nga nagapamati subong, ukon nagabasa sining mga pulong sa palaabuton nga mga inadlaw, nagahatag ako sang piho nga panghangkat: Mag-angkon kamo sang personal nga panaksi sang Propeta nga si Joseph Smith. Gamita ang inyo mga tingog sa pagtuman sang panagnaon nga mga pulong ni Moroni nga maghambal sang maayo tuhoy sa Propeta. Yari ang duha ka mga ideya: Nahauna, pangitaa ang balaan nga mga kasulatan sa Libro ni Mormon nga inyo mabatyagan kag mapatihan nga pat-od gid nga matuod. Pagkatapos ipaambit ninyo ini sa inyo panimalay kag mga abyan sa home evening sang panimalay, sa seminaryo, kag sa inyo mga klase sa Young Men kag Young Women, nga ginakilala nga si Joseph amó ang isa ka instrumento sa mga kamot sang Diyos. Ang masunod, basahon ninyo ang panaksi ni Joseph Smith sa Pearl of Great Price ukon sa sining pampleta, nga subong yara sa 158 nga mga linggwahe. Makità ninyo ini online sa LDS.org ukon sa mga misyonero. Ini ang panaksi mismo ni Joseph Smith sa kamatuoran sang natabo. Basahon ninyo ini sing masami. Binagbinagon ninyo nga i-rekord ang panaksi ni Joseph Smith sa inyo kaugalingon nga tingog, pamatian sing padayon, kag ipaambit sa mga abyan. Ang pagpamati sa pagpamatuod ni Joseph Smith sa inyo tingog magbulig nga magdala sa inyo sang panaksi nga inyo ginapangita.

May maayo nga mga inadlaw nga mag-abot. Si Presidente Thomas S. Monson nagsiling: ”Ining daku nga kawsa ... magapadayon nga magpasulong, magpabag-o kag magpakamaayo sa mga kabuhi. ... Walâ sing puwersa sa bug-os nga kalibutan ang makapauntat sa buluhaton sang Diyos. Walay sapayan sa magaabot, ining daku nga kawsa magpasulong.” ²³

Nagahatag ako sang akon panaksi nga si Jesus amó ang Cristo, aton Manluluwas kag Manunubos. Nagpili Siya sang balaan nga tawo, matarong nga tawo, nga magpangulo sang Pagpanumbalik sang kabug-usan sang Iya ebanghelyo. Iya ginpili si Joseph Smith.

Ako nagapamatuod nga si Joseph Smith isa ka matampad kag maputli nga tawo, isa ka sumulunod ni Ginuong JesuCristo. Ang Diyos nga Amay kag ang Iya Anak, nga si JesuCristo nagpakità sa iya. Siya naglubad sang Libro ni Mormon paagi sa dulot kag gahum sang Diyos.

Sa aton katilingban lapaw sa mantu sang kamatayon, maathag naton nga mahangpan ang sagrado nga tawag kag balaan nga misyon sang Propeta nga si Joseph Smith. Sa malapit nga panahon, kamo kag ako kag ”minilyon [pa] makakilala kay ’Brother Joseph’ liwat.” ²⁴ Sa ngalan ni JesuCristo, amen.