Au Kila Vakataki Au na Veika Oqo
Mai vei Elder Craig C. Christensen
Ena Mataveiliutaki ni Vitusagavulu
Noda vulica vakataki keda ni dina na kosipeli vakalesui mai nei Jisu Karisito e rawa ni dua na ka cecere ka rekitaki duadua ena bula oqo.
Kemuni na taciqu lomani, eda sa dau vakauqeti tikoga ena nona ivakaraitaki yadua kei na veiqaravi ni matabete o Peresitedi Thomas S. Monson. Ena dua na gauna walega oqo, era a tarogi e vica na dikoni, “Na cava o dau taleitaka duadua vakalevu me baleti Peresitedi Monson?” E nanuma lesu e dua na dikoni na nona dau solia o Peresitedi Monson, ni se gone, na nona ka ni vakatatalo vei ira na nona itokani era gadreva tu. E dua tale e tukuna na nona dau qaravi ira na yada ena nona tabanalevu o Peresitedi Monson. E dua e dusia na nona kacivi me iApositolo ni se gone sara ka vakalougatataki ira na tamata e vuravura raraba. Qai kaya e dua na cauravou, “na ka au dau qoroya vakalevu duadua vei Peresitedi Monson na nona ivakadinadina tudei.”
E dina sara, eda sa vakila taucoko na nona ivakadinadina bula digitaki na noda parofita me baleta na iVakabula o Jisu Karisito kei na nona yalodina me dau muria tikoga na veivakauqeti ni Yalotabu. Ena veika yadua e dau wasea, e sureti keda o Peresitedi Monson me da bulataka vakavinaka cake na kosipeli ka segata ka vaqaqacotaka na noda dui ivakadinadina yadua. Nanuma na ka a tukuna mai na itutu ni vunau oqo ena vica ga na koniferedi sa oti: “Me rawa ni da kaukauwa ka vorata na kaukauwa kecega era dreti keda tiko ki na yasana cala … , me tu na noda dui ivakadinadina. Se o yabaki 12 se 112—se dua ga na yabaki ena kedrau maliwa—e rawa ni o kila vakataki iko ni dina na kosipeli i Jisu Karisito.”1
E dina ni vagolei na noqu itukutuku nikua vei ira era voleka cake ki na 12 mai na 112, na ivakavuvuli au wasea e baleti keda kece. Ni saumi lesu na itukutuku nei Peresitedi Monson, au na taroga mada, eda sa dui kila beka vakataki keda ni dina na kosipeli? E rawa beka ni da vakadeitaka ni noda ga na noda dui ivakadinadina? Meu cavuti Peresitedi Monson tale: “Au na kaya tikoga ni ivakadinadina tudei me baleta na noda iVakabula kei na Nona kosipeli ena taqomaki keda mai na ivalavala ca kei na ca e vakavolivoliti iko. … Kevaka e se bera ni sa dua tiko na nomu ivakadinadina ni veika oqo, cakava na veika e ganita mo rawata kina e dua. E yaga vei iko me tiko e dua na nomu ivakadinadina, baleta na nodra ivakadinadina na tani ena tauri iko ga ena dua na gauna.”2
Au Kila Vakataki Au na Veika Oqo
Noda vulica vakataki keda ni dina na kosipeli vakalesui mai nei Jisu Karisito e rawa ni dua na ka cecere ka rekitaki duadua ena bula oqo. Me da na tekivu beka ena noda vakararavi ena nodra ivakadinadina eso tale—ka kaya, me vakataki ira na cauravou yaloqaqa, “Keimami sega ni vakatitiqataka na nodra ivakavuvuli na tinai keimami.”3 Oqo na vanua vinaka me da tekivu kina, ia me da qai taracake mai kea. Me da tudei ena bulataki ni kosipeli, e sega ni dua na ka e bibi mai na noda ciqoma ka vaqaqacotaka na noda dui ivakadinadina. Sa dodonu me rawa ni da tukuna, me vakataki Alama, “Au sa kila ni sa dina na veika au sa tukuna.”4
“Ia dou sa kila li na vuna au kaya kina ni sa dina?” e tomana o Alama. “Raica au sa kaya vei kemudou, sa vakatakila vei au na Yalo Tabu ni Kalou. Au a lolo ka masu ena vica na siga me vakatakilai kina vei au na veika oqo. Ia au sa kila ni sa ka dina, ni sa vakatakila vei au na Turaga na Kalou ena kaukauwa ni Nona Yalo Tabu.”5
Au Gadreva meu Raica na Veika a Raica ko Tamaqu
Me vakataki Alama, a yaco me kila talega vakataki koya na dina o Nifai. Ni oti na nona vakarorogo tiko vei tamana ni tukuna tiko na veika vakayalo a sotava, a vinakata o Nifai me kila na veika e kila o tamana. E sega ni lomatarotaro walega oqo—oqo e dua na ka a viakania ka viagunuva. E dina ga ni se “gone sara,” e tu vua “na gagadre [me] kila na veika vuni ni Kalou.”6 E mateca me “vakatakilai vei au na veika oqo ena kaukauwa ni Yalo Tabu.”7
Ni “sa vakananuma tiko e loma[na] ko Nifai,” sa kauti koya “na Yalo Tabu … ki na dua na ulunivanua cecere sara,” ka laki tarogi kina vua, “A cava ko vinakata?” E rawarawa na nona sauma: “Au sa via raica na veika sa raica ko tamaqu.”8 Ena vuku ni vakabauta ni yalona kei na nona sasaga vagumatua, a vakalougatataki o Nifai e na dua na ka vakasakiti. A ciqoma e dua na ivakadinadina ena vuku ni sucu, bula kei na nona Rube ena Kauveilatai na iVakabula o Jisu Karisito sa voleka tiko mai; sa raica na kena lako mai na iVola i Momani kei na Vakalesui Mai ni kosipeli ena veisiga e muri—na veika kece oqori me isau ni nona gagadre yalodina me kila vakataki koya.9
Na veika yadua oqo a sotava kei na Turaga, a vakarautaki Nifai me baleta na meca kei na bolebole ena sotava ena dua na gauna totolo. A rawa kina me tudei ni ra sotava dredre tiko eso na nona matavuvale. A rawata oqo baleta ni sa vulica vakataki koya ka kila vakataki koya. Sa vakalougatataki ena nona ivakadinadina.
Me Kerea Vua na Kalou
Me vakataki Nifai, se “tamata gone” talega na Parofita o Josefa Simici ena gauna sa “dau vakasamataka sara kina vakatitobu” na veika dina vakayalo. Vei Josefa, oqo e dua na gauna ni “veilecayaki levu,” niu vakavolivoliti ena veitukutuku veisaqasaqa ka veilecayaki me baleta na lotu. E vinakata me kila se lotu cava e dina.10 Ni vakauqeti mai na malanivosa oqo ena iVolatabu: “Kevaka e dua vei kemudou sa lailai vua na vuku, me kerea vua na Kalou,”11 a cakacaka vakataki koya me kunea e dua na isaunitaro. Ena dua na mataka totoka ni vulaitubutubu ena 1820, a curuma e dua na veikau ka tekiduru ena masu. Ena vuku ni nona vakabauta vakakina ni tiko vua na Kalou e dua na cakacaka bibi me cakava, a ciqoma o Josefa e dua na raivotu lagilagi ni Kalou na Tamada kei na Luvena, o Jisu Karisito, ka vulica vakataki koya na veika me cakava.
O raica beka ena veika e sotava o Josefa e dua na ivakarau e rawa ni o vakayagataka mo rawata kina se vaqaqacotaka na nomu ivakadinadina? E vakatara o Josefa me curuma na yalona na ivolanikalou. E vakasamataka vakatitobu ka vakayagataka ena veika e sotava. E qai cakacakataka na veika sa vulica. Na vuana na iMatai ni Raivotu lagilagi—kei na veika kece e tarava mai. Na Lotu oqo a tauyavutaki ena ivakavuvuli, ni dua ga vei keda—oka kina e dua na gonetagane ena vanua ni teitei yabaki 14—e rawa ni “kerea vua na Kalou” ka ciqoma e dua na isau ni nona masu.
Na Cava Beka na iVakadinadina?
Dau wasoma noda rogoci ira na lewe ni Lotu ni ra kaya ni nodra iyau vakamareqeti duadua na nodra ivakadinadina ni kosipeli. Sai koya na isolisoli tabu mai vua na Kalou ka yaco mai vei keda ena kaukauwa ni Yalo Tabu. Sai koya na veivakadeitaki malua, sega ni veivukiyaki eda ciqoma ni da vuli, masu, ka bulataka na kosipeli. Sa i koya na vakilai ni Yalo Tabu ni vakadinadinataka ki yaloda ni veika eda vulica tiko ka cakava e donu.
Eso na tamata era tukuna na ivakadinadina me vaka e dua na itabataba ni cina—e dua ga vei rau e waqa se boko; e dua tiko na nomu ivakadinadina, se sega ni dua. Na ka dina, na ivakadinadina e vaka e dua na vunikau ka dau curuma na itagede eso ni tubu kei na vakatorocaketaki. Eso na vunikau babalavu duadua e vuravura e kunei ena Redwood National Park ena ra kei Amerika. Ni o tu ena vu ni vunikau vakaitamera oqo, e veivakurabuitaki ni da vakasamataka ni o ira yadua era tubu mai ena dua na sorenikau somidi. Sa vakakina na noda ivakadinadina. E dina beka ni ra na tekivu mai ena dua ga na ka e sotavi vakayalo, era na tubu ka toroicake ni toso na gauna ni dau vakabulabulataki kei na veika vakayalo eda sotava.
E sega kina ni vakidacala, ni gauna e vakamacalataka kina na parofita o Alama na ivakarau eda vakatorocaketaka kina e dua na ivakadinadina, e tukuna na kena tubu e dua na sorenikau me dua na vunikau. “Kevaka,” e kaya o koya, “ko sa tea e lomamu e dua na sorenikau vinaka, sa na tubu vakaidina ni ko sa vakabauta, … ia ni ko sa vakila ni sa tubu cake mai ko na kaya—sa sorenikau vinaka dina oqo, se sa ivunau vinaka ka dina, raica sa vakamarautaka na yaloqu kau sa taleitaka sara.”12
E vakavuqa ni sa i koya oqo na itekitekivu ni dua na ivakadinadina: ni da vakila na veivakararamataki tabu kei na veivakadeitaki vei keda ni dina na vosa ni Kalou. Ia, me vaka na vakasakiti ni veika e vakilai oqo, era kena itekivu ga. Se bera ni oti na nomu cakacaka ni kena vakatuburi na nomu ivakadinadina—me vaka ni se bera ni oti na cakacaka ni kena vakatuburi e dua na vu ni kaudamu ni sa kadre cake mai delaniqele e dua na tubana lailai. Kevaka eda sega ni kauwaitaka se weletaka na veivakauqeti taumada vakayalo oqo, kevaka eda sega ni vakamareqeti ira ena noda vulica tikoga na ivolanikalou ka masu tiko kei na noda vakasaqara e so tale na veika vakayalo, ena seyavu na veika eda vakila ka malai sobu noda ivakadinadina.
Me vaka e tukuna o Alama: “Ia kevaka dou sa vakaweleweletaka ka sega ni qarava, ena sega ni ti na wakana; ia ni sa cilava na siga sa malai, ia ni sa sega na wakana, sa raqosa sara, dou na qai cavuta ka biuta laivi.”13
Ena vuqa na gauna, na noda ivakadinadina ena tubu me vaka ga na tubu ni dua na vunikau: toso tikoga, voleka ni da sega ni raica, ni da sa qarauna ka gumatuataka. “Ia mo dou muria na vunau,” e yalataka o Alama, “qarava vinaka na vunikau ni sa tubu mai, ia me dei tikoga na nomudou vakabauta kei na nomudou vosota, ni dou sa namaka tiko na vuana, raica kevaka sa vakakina sa na bula; ia dou na rawata kina na bula tawamudu.”14
Oqo na Kena Gauna; Nikua na Kena Siga
Na noqu ivakadinadina e tekivu niu vulica ka vakasamataka vakatitobu na iVola i Momani. Niu tekiduru meu kerekere vua na Kalou ena masu malumalumu, e vakadinadinataka ki yaloqu na Yalo Tabu ni ka au wilika tiko e dina. Na ivakadinadina bula taumada oqori sa yaco me yavu ni noqu ivakadinadina ni vuqa tale na dina vakosipeli, me vaka e vakavuvulitaka o Peresitedi Monson: “Ni da sa kila ni dina na iVola i Momani, ena tarava mai ni parofita dina ni Kalou o Josefa Simici ka ni a raici rau na Kalou na Tamada Tawamudu kei na Luvena o Jisu Karisito. E muria talega mai ni a vakalesui mai na kosipeli ena iotioti ni veigauna oqo mai vei Josefa Simici—okati kina na vakalesui mai ni Matabete i Eroni kei na Matabete i Melikiseteki.”15 Me tekivu mai na siga oya, sa levu na veika bibi au sotava kei na Yalo Tabu ka vakadeitaka vei au ni dina na kosipeli vakalesui mai nei Jisu Karisito. Au rawa ni kaya vata kei Alama, ena yalodei, niu kila vakataki au na veika oqo.
Kemuni na noqu itokani gone, oqo na kena gauna nikua na kena siga me da vulica se vakadeitaka vei keda ni dina na kosipeli. E tiko e dua na cakacaka bibi me da cakava o keda yadua. Me rawati na cakacaka oqo, ka da taqomaki mai na veivakauqeti vakavuravura ka vaka me dau toso tikoga mai, me tu vei keda na vakabauta nei Alama, Nifai, kei na gone o Josefa Simici me da rawata ka vakatorocaketaka na noda dui ivakadinadina.
Me vaka na dikoni gone au a tukuna taumada, au qoroi Peresitedi Monson ena nona ivakadinadina. E vaka e dua na kaudamu balavu, ia na ivakadinadina mada ga nei Peresitedi Monson a taura na gauna na kena tubu kei na kena toroicake. E rawa ni da yaco me da kila vakataki keda, me vakataki Peresitedi Monson ga, ni o Jisu Karisito na noda iVakabula ka Dauveivueti ni vuravura, ni o Josefa Simici na parofita ni Veivakalesui mai, okati kina na vakalesui mai ni matabete ni Kalou. Eda taura tu na matabete tabu oqori. Me da vulica na veika oqo ka kila vakataki keda ga sa noqu masu malumalumu ena yaca i Jisu Karisito, emeni.