O Uringnga, Uringnga
Henry B. Eyring
Kauoman ni Kauntira n te Moan Beretitentii
“O uringnga, uringnga,” burabeti n ana Boki Moomon a kauring ma nanoia.1 Au botoniango bon te kaungai ngkami nakon karekean kawai ni kinai ao n ururinga ana akoi te Atua.
I karabwarabwa ibukin te kuaea n aia anene n te ingabong aei, are e kaota taekan te Tia Kamaiu, ao I karabwarabwa n nooria bwa taekan teuana kunaia are a aneneia, “This Is the Christ,” e koreaki iroun Beretitenti James E. Faust. Ngke I tekateka irarikin te Tari Newell, I kaania man titirakinna, “A uara natim?” E taku, “Ngke e mena Beretitenti Faust n te kaintekateka anne, anne ana titiraki n taainako.” I aki miimi n aei, ibukina bwa Beretitenti Faust bon te katooto ae kororaoi n taainako iroun ana reirei Iesu are e kabwarabwaraaki n te Anene ao Taeka aika Taekinaki n te bong aio. I namakina anne n taainako n au tai n rikirake, I tangiria n riki n ai aron Beretitenti Faust. Tao e na bon reke taina.
Ngke a rangi ni uarereke natira, I moana korean tabeua rongorongon bwaai ake a riki ni katoa bong. N na tuangi ngkami bwa e kanga ni moanaki aei. I oki n ae e a tairaa nakon mweengau man katabeau n te Ekaretia. E a bon roo. Taman kainnabau, are e mamaeka n uakaan ma ngaira, e kakubanakoai ngke I mwananga ni kaeineta mataroan au auti are i moa. E uouota te bwabwati ni bwaibu iaon angana, n nakonako ni kawaekoa ao e bwainna n ana kunnikai ni mwakuri. I ataia bwa e a tia n kakatea te tititem ni bwamiia te ran man te karanga ae inano nakoira i eta nakon ara auti.
E wingare, e taetae n ae amarau, ao imwina e kabaitii n rirarikiu nakon te roo ni karaoa ana mwakuri. I mwananga tabeua mwanekau ni kaeineta te auti, n iangoa te bwai are e a tia ni karaoia ibukira, ao ngke I roko n te mataroa, E roko n au iango—tiaki inanon oin au taeka—taeka aikai: “I aki anganiko baika ko rinanona aikai ibukim. Korei.”
I rinnako. I aki matu. E ngae ngke I a bon kua, I anai tabeua beeba ao I moana au koroboki. Ao ngke I karaoa aei, I a oota n te rongorongo are e roko n au iango. N na riai n koroboki ibukia natiu bwa a na wareki, teuana te bong n taai aika a na roko, bwa baikara bwaai ake I noori iai bain te Atua ni kakabwaiaa ara utu. Tibuu te unimwaane e aki kainnanoia bwa e na karaoa are e karaoia ibukira. E kona n angan temanna bwa e na karaoia ke e bon aki naba karaoia. Ma e beku ibukira, ana utu, n te kawai are a waaki inanona n taainako ana reirei Iesu Kristo aika iai aia berita ma te Atua. I ataia bwa e koaua. Ngaia are I koreia, bwa a aonga natiu ni kona ni warekia n te bong teuana n te tai are a kainnanoia iai.
I korei tabeua bwaai ni katoa bong inanon ririki. Akea te bong ae I aki karaoa aei e ngae ngke I rangi ni kua ke N na kautimwaaka n te bong are i mwina. Imwain ae N na koroboki, I aki toki n iangoa raoi te titiraki aio: “I a tia n noora bain te Atua n taben nanoira ni buokira ke ni buokiia natira ke ara utu n te bong aei” Ni kakaraoan aei, iai te bwai ae e moanna n riki. Ngkana I tarai kanoan te bong, I kona n noori kakoaua ni baike e karaoi te Atua ibukira ni kabane are I a tia n aki n nooria n kakumekumen te bong anne. Ngkai e riki anne, ao e riki n angiin te tai, I a ataia bwa kakaraoan aei e kariaia bwa te Atua e na kaota nakoiu baike E a tia ni karaoi.
Te karabwarabwara ae bati e moanna ni rikirake i nanou. E kakorakoraki au koaua. I a ataia raoi ma te koaua bwa Tamara are i Karawa e ongo ao e kaekai taian tataro. I namakina riki te karabwarabwa ibukin te kabebete ao katiakakia are e roko man ana Mwakuri ni Kamaiu te Tia Kamaiu Iesu Kristo. Ao e kakorakoraaki au onimaki bwa te Tamnei ae Raoiroi e kona n uoti bwaai nako nakon ara ururing—n ikotaki naba ma bwaai ake ti aki noori ke n tabennanoi bwa a riki n ningai.
A mwaiti ririki aika a tia n nako. Natiu mwaane a ikawai ngkai. Ma te tai teuana ma teuana ao temanna mai ibuakoia e na kakubanakoai n taekina ae kangai, “Tamau, I wareware man ana kaobi am tieno iaon rongorongon te…” ao imwina e na bon tuangai bwa e kanga warekan te bwai ae e riki ngkoa ni buokia n noora te bwai are e a tia te Atua ni karaoia n ana bong.
Au botoniango bon te kaungai ngkami nakon karekean babaire ni kinai ao n ururinga ana akoi te Atua. E na karikirakea ara koaua. Tao ko na aki koroboki n te tieno. Tao ko na aki tibwaua am koroboki are ko kawakinna ma naake ko tangiria ma ni beku ibukiia. Ma ngkoe ao ngaiia a na bon kakabwaiaki ngkana kam uringnga bwa tera ae e a tia ni karaoia te Uea. Kam uringa te anene are ti aneneia n tabetai: “Wareki am bwai; atong araia, Ao e na mimi nanom iroun Iesu.”2
E na aki bebete ururingana. Aron maiura ngkai e karabaki matara n te roki, ti aki kona n uringnga bwa aekira te maeka ma Tamara are i Karawa ao Natina ae Tangiraki, Iesu Kristo, n te aonaaba imwain te maiu aei; ao ti aki naba kona n nooria ni matara n rabwata ke n iangoia. Nooran bwaai aikai e kainnanoa te Tamnei ae Raoiroi. Ao e aki bebete n tabetai te tau ibukin raonakira iroun te Tamnei ae Raoiroi n te aonaaba ae buakaka.
Anne bukina ngkai mwanuokinan te Atua e a tia n riki bwa te kaangaanga ae teimatoa ibuakoia natina man moan te aonaaba. Iangoa ana tai Mote, ngke te Atua e katauraoa te berena ao aanga aika kakai man rangi n ootara e kairiia man kamanoia natina. Ma, burabeti a kauringiia aomata ake a tia n rangi ni kakabwaiaaki, n aron are a kauring burabeti n taainako ao a na teimatoa ni karaoa aei: “Kabatia kawakinan tamneim, ba ko kawa ni manuoki baike a nori matam, ao a kawa n nako mai nanom n ua tokini maium ni kabane.”3
Ao te kakaewenako n ururing e a tia n riki bwa te kabanea ni matoa n taainako ibukiia naake a kakabwaiaaki n ae bati. Naake a kakaonimaki nakon te Atua a kamanoaki ao a kanakoraoaki aroia. E riki anne bwa uaan te beku iroun te Atua ao kawakinan Ana tua nako. Ma n raonakin kakabwaia akanne bon te kariiri n mwaninga taekan Teuare E anga. E bebete te moanna n namakin bwa a aki roko kakabwaia mairoun te Atua ae tangira are bon ngaia ae ti kainnanoia ma man oin korakorara. A tia burabeti ni kaokioka te bwaebaweti aio irouia:
Ao ngaia are ti a kona n noora kewen, ao aki teimatoan nanoia natiia aomata; eng, ti kona n nooria bwa inanon ana raoiroi te Uea ae korakora ao e bon kakabwaiaia ma ni kanakoraoa aroia ake a kawenea aia onimaki irouna.
Eng, ao ti kona n nooria bwa n te tai are e nakoraoi iai aroia ana botanaomata, eng, n rakan aia marae n ununiki, aia nanai ma aia ikota ni man, ao n aia koora, ma aia tirewa, ao bwaai ni kabane aika a kakawaki n aekaia ma aroia nako; ao ni kawakinan maiuia, ma kainaomatakiia ma inanon baia aia kairiribai; ao kamarauan nanoia aia kairiribai bwa a na aki kateirakei buaka ni kaaitaraia; eng, n te koaua raoi, karaoan bwaai ni kabane ibukin mweraoia ma kukureia ana botanaomata; eng, ao anne ngkanne te tai are a kamatoatoai nanoia, ma ni mwaninga taekan te Uea ae Atuaia, man toubeka Teuare e Tabu iaan waeia—eng, ao e riki aio ibukin beebeten aroia, ma korakoran nakoraoin kaubwaia.”
Ao te burabeti aei e reitinako n taekinna: “Eng, ai waekoara n tabekaki rake n te kainikatonga; eng, ai waekoara ni kamoamoa, ma ni karaoi aekan bwaai nako aika a buakaka; ao ai waeremwera n uringa te Uea ae Atuaia, man ongo n ana reirei, eng, ai waeremwera n nakonako ni kawain te wanawana!”4
Te kananokawaki, te kaubwai tiaki ti oin are aomata a mwanuokina te Atua. E kona naba ni kaangaanga ururingana ngkana e aki nakoraoi maiura. Ngkana iai ara kaangaanga, n ai aroia aomata aika a mwaiti, n te rawawata ma te kainnano ke ngkana a tokanikai ara kairiribai iaora ke ngkana e aki toki te aoraki, ana kairiribai tamneira e kona n karokoa ana rongorongo ae buakaka bwa akea te Atua ke ngkana iai Ngaia E aki tabennanoira. Ngkanne e kona ni kaangaanga iroun te Tamnei ae Raoiroi ni kaururing i nanora kakabwaian te maiu are e a tia n anganira te Uea man uarerekera ao inanon ara nakobuaka.
Iai te bwainnaoraki ae bebete nakon te aoraki ae aki raoiroi ae mwanuokinan te Atua, Ana kakabwaia, ao Ana rongorongo nakoira. Iesu Kristo e berita aio nakoia Ana reirei ngke E nang tauraki, mangauti, ao imwina e uotaki nako n ae raroa mai irouia n waerake n te mimitong nakon tamana. A tabeaianga n ataia bwa a na kanga n teimatoa ngkai E aikoa mena ibuakoia.
Aio bon te berita. E koro nanona ibukiia ngkoa. Ao e kona ni koro nanona ibukira ni kabane ngkai:
“Bwaai aikai ae I a tia n taekin nakoimi, a kaman mena iroumi.
“Ma te Tia Karaunano, are te Tamnei ae Raoiroi, are E kanakoa te Tama n arau, E na reireiningkami bwaai ni kabane, ao E na kaururing i nanomi bwaai ni kabane ake I atongi nakoimi.”5
Te king ibukin karekean te ururing are e uota man kateimatoa te koaua bon karikan te Tamnei ae Raoiroi bwa toam. Bon te Tamnei ae Raoiroi are e buokiira n noori baike e a tia n karaoi ibukira te Atua. Bon te Tamnei ae Raoiroi are e kona ni buokiia naake ti beku ibukiia n nooria bwa tera ae e a tia ni karaoia te Atua ibukiia.
Tamara are i Karawa e a tia n anga te baeten ae bebete ibukira ibukin karekean te Tamnei ae Raoiroi tiaki ti te taina ma e reitinako inanon ara mangaongaora n ara bong koraki. Te baeten e okioki n te tataro n toa: Ti berita bwa ti na aki toki n ururinga te Tia Kamaiu. Ti berita bwa ti na katoka arana iaora. Ti berita bwa ti na kawakini Ana tua nako. Ao ti beritanaki bwa ngkana ti karaoa anne, e memena te Tamnei iroura n taainako.6 Berita akanne a uaia ni mwakuri n te kawai ae tamaroa ni kakorakorai ara koaua ao n tokin te tai, rinanon te Mwakuri ni Kamaiu, ni bitii anuara ngkana ti karaoa ara itera n te berita anne.
Bon te Tamnei ae Raoiroi are e kakoaua bwa Iesu Kristo bon natin Tamara are i Karawa ae tangiraki ae e tangirira man tangiria bwa e na reke iroura te maiu ae akea tokina ma Ngaia n ara utu. E ngae ngke ti a tibwa moana karekean te koaua anne, ti namakina te nano ni beku Ibukina ao ni kawakina Ana tua nako. Ngkana ti reitinako ni karaoan anne, ti karekea tibwakin te Tamnei ae Raoiroi n anganiira te korakora n ara tai ni beku. Ti a noora raoi bain te Atua, e a oota n te aro are inanon te tai tiaki ti ururingnga, ma ti karikirakea tangirana, rinanon mwaakan te Mwakuri ni Kamaiu, ti riki n ai arona.
Tao ko na titiraki, “Ma e na kanga ni moanaki te waaki aei iroun temanna ae akea ana atatai iroun te Atua ao e taku bwa akea naba teuana ana taneiai ae tabu?” Aomata ni kabane a tia ni bane ni karekei taneiai aika tabu aika tao a aki noori. Aomata n tatabemaniia, ngke a roko n te aonaaba, a anganaki Tamnein Kristo. Aron ana mwakuri te tamnei anne e kabwarabwaraaki n ana boki Moronaai:
“Bwa nooria, a bane n anganaki aomata Tamnein Kristo, bwa aonga n ataa te raoiroi ma n te buakaka; ngaia are, N na kaota nakoimi kawain te motikitaeka; bwa bwaai ni kabane ake a kakao nakon karaoan te raoiroi ma n kairoro nakon kakoauan Kristo, e bon roko man mwaakan ao ana bwai n tangira Kristo; mangaia are kam na ataia ma te atatai ae kororaoi bwa bon mairoun te Atua.
“Ma te bwai are e kairoroia aomata bwa a na karaoa ae buakaka, ao bwa a na aki kakoaua Kristo, ao a na kakeaa, ma n aki toro iroun te Atua, ao ngkanne kam na kona n ataia ma te ataibwai ae kororaoi bwa bon mairoun te riaboro; bwa aio aron ana mwakuri te riaboro, bwa e aki kairoroa te aomata bwa e na karaoa ae raoiroi, e aki, tiaki naba temanna; ao aki naba ana anera; ao aki naba ake a tautaekanaki irouna. …
Ngaia are, I kairoroi ngkami, tariu, bwa kam na ukeuke ma te nanomwaaka inanon ootan Kristo bwa ko na ataa te raoiroi man te buakaka; ao ngkana kam tauii ni kabane bwaai aika a raoiroi, ma n aki kabuakakai, ao kam na bon riki bwa natin Kristo.”7
Ngaia are, bon imwain are aomata a karekea te kariaiakaki nakon ana bwaintituaraoi te Tamnei ae Raoiroi, ngkana a kamatoaki bwa kaain te Ekaretia, ao i mwain naba te Tamnei ae Raoiroi e kamatoai koaua nakoia imwain te bwabetito, iai aia taneiai aika a tabu. Tamnein Kristo e a tia, man ngke a uarereke, ni kaoia bwa a na karaoa ae raoiroi ao e kauringia te buakaka. Iai aia ururing n taneiai akanne e ngae ngke a aki ataia bwa a roko mai iaa. Te ururing anne e na okiria n te tai are a reireiaki irouia mitinare ke iroura ana taeka te Atua ao n te tai are a ongo. A na uringa namakinan te kimwareirei ke te rawawata n aia tai n reireiaki koauan te euangkerio. Ao te ururing anne ibukin te Tamnei ae Raoiroi e na kamarau nanoia n kariaia bwa e na kakoaua te Tamnei ae Raoiroi nakoia. Anne e na kairiia nakon kawakinan tuua nako ao tangiran katokaan aran te Tia Kamaiu iaoia. Ao ngkana a karaoa ae, n te ran ni bwabetito, ao ngkai a ongo mwanewen te kamatoa “Karekea te Tamnei ae Raoiroi” n taekinaki iroun ana toro te Atua ae iai te kariaia irouna, te korakora n ururinga te Atua n taainako e na rikirake.
I kakoaua nakoimi bwa namakin aika a raoiroi ake kam a tia n namakin n ami tai n ongora nakon koaua ake a taekinaki n te maungatabu aei a roko mairoun te Tamnei ae Raoiroi. Te Tia Kamaiu, are e berita bwa e na roko te Tamnei ae Raoiroi, bon natina Tamara are i Karawa ae tangiraki man mimitong.
N te tairiki aei, n tairikin te ingabong, ko kona n tataro ma iango raoi, n titiraki te titiraki ae kangai: Iai te rongorongo ae roko mairoun te Atua are bon ibukiu? I noora baina inanon maiu ke mauia natiu? N na karaoa anne. Ao ngkanne N na ukora te kawai ni kawakina te kanuring anne ibukin te bong are Ngai, ao naake I tangiriia, are ti kainnanoia n uringnga bwa mwaitira tangirara iroun te Atua ao mwaitira kainnanoana irouna. I kakoaua bwa E tangiriira ao e kakabwaiaira, n ae bati riki nakon are ti a tia n nooria. I ataia bwa e koaua, ao e anganai te kimwareirei ururingana. N aran Iesu Kristo, amen.