Mukenji wa ku Ngondu wa Liahona, Ngondu Muitanu 2026
Ngikadilu wa Kilisto
Patuikala ne bua kutshimuna mu ditantshisha ngikadilu wa Buena Kilisto, tudi ne bua kuikala ne menzeji Enda—menji Enda, ne ngenyi ya mutshima.
Mupostolo Petelo udi utuvuluija ne: “Halua ku nshikidilu kua matuku, baseki nebalue ne tuseku tuabo, benda bu mudi nkuka yabo mene, ne bamba kabidi ne, Mulayi wa dilua diandi udi Hanyi?”
Petelo udi utuvuluija ne “Mukalenga kena ushanguluka” ne pikalu kumueka dinengakana mu dilua Dienda, bidi bualu bua lusa luenda ludi kaluyi ndekelu mu ditupesha tshikondu tshia bungi bua kukudimuna mutshima kumpala kua “dituku dinena ne didi dikuatshisha bowa dia Mukalenga.” “Kadi dituku dia Mukelenge dilualua,” mudi Petelo wamba ne makanda, “ … mu dituku adi diulu nedijimine ne diyoyo dinene, ne bintu bia mu diulu nebifungutuke ne kahia kakole, ne buloba ne bintu bidimu nebihie.”
Katshia tuamanya ne Mukalenga nealue ne neateka buloba bupia-bupia muikala buakana bonsu, Petelo udi webeja, “Bunudi n’abu mbua kuikala bantu ba mushindu kai?” Udi ubela ne tudi ne bua kuikala badilongola ne tshisumi tshionsu mpindiewu bua ne padi Mukalenga ulua, neatupeta “mu ditalala, katuyi ne katoba, katuyi ne kadiu” tuludika mioyo ya tshijila.
Bu mundi munana meji pa lukonku lua Petelo, “Bunudi n’abu mbua kuikala bantu ba mushindu kai?” Ndi mupangandika bua kuakula lelu pa ngikadilu wa Yezu Kilisto. Bidi mu dijikija ngikadilu wa Kilisto bua tulua “mushindu wa bantu” batudi ne bua kuikala. Dipeta ngikadilu wa Kilisto didi umua wa ku mishindu ya mushinga utudi tuangata dina dienda pamutu petu.
Patudi tuela meji pa ngikadilu wa Mupandishi, tudi tuteta bua kushindamena diakamue pa bikadilu bienda, bu mudi buimpa, bululama, didipuekeshi, lusa, ne dikima, kadi tudi kabidi ne bua kuela meji, Tshinyi tshidi mu Yezu tshidi tshifila dijuka ku bimanyinu bia ngikadilu bu ewu. Ndi ngitabuja ne bidi bimuma bilelela bia meji, majinga, ne meji a mutshima. Ngikadilu wa Buena Kilisto udi uledibua ku mutshima wa Buena Kilisto. Nunku, patuikala ne bua kutshimuna mu ditantshisha ngikadilu wa Buena Kilisto, tudi ne bua kuikala ne menzeji Enda—meji Enda, ne ngenyi ya mutshima. Buetu tuetu, bidi bilomba tshidi mifundu ibikila dishintuluka dikola dia mutshima.
Kulonda muyuki wa meji a nyuma ne wa buprofete wa Mfumu Benyamina, bantu benda bakajadika “Nyuma wa Mukalenga wa Bukola Bonsu … udi muenza dishintuluka dikola kutudi, anyi mu mitshima yetu, ne katuena kabidi ne dijinga dia kuenza malu mabi to, kadi dia kuenza malu mimpa diba dionsu.” Mfumu Benyamina wakandamuna, “Nenubikidibua bana ba Kilisto, bana benda ba baluma, ne bana benda ba bakaji; bualu monayi, lelu ewu wanuledi mu nyuma; bualu nudi nuamba ne mitshima yenu yakudimuki kupitshila ku ditabuja mu dîna dienda.”
Mu bualu bua bantu ba Mfumu Benyamina, ne bamua bakuabu, diledibua dia mu nyuma edi ne dishintuluka dia mu mutshima bivua bia tshikuma musangu umua. Bua ba bungi ba kutudi, dishintuluka dietu dikola dia mutshima didi dienzeka kakesa kakesa mu tshikondu ne tshikondu. Mu mushindu mukuabu, tshipeta tshidi tshia momumua ne tshia mushingu wa mumomua. Ne mu mishindu yonsu, bidi bilomba ditabuja mu Kilisto, dikudimuna mutshima, tshipungidi tshia ditambula tshia ditumikila, ne ngâsa wa Yezu Kilisto kupitshila ku Nyuma wa Tshijila.
Eyowa, bidi bilomba didienzeja dia tshishiki ne dikuatshishibua ku luseka luetu, kadi vuluka, kabiena anu bualu didienzeja to. Lumu lupia-lupia luimpa lua Yezu Kilisto ludi ne tudi, yonsu wa kutudi, mua kubikila ngâsa wa Yezu Kilisto bua kutuambuluisha. Ne ditambula ne dijadikibua bietu, Udi utulaya dienda netu dia Nyuma wa Tshijila, mutumibua wa ngâsa Wenda. Kupitshila ku Nyuma wa Tshijila, tudi tupeta buenzeji ne mapa a nyuma, “bukola bua bu wa tshijila” mu miyo yetu. Bukola bua dikudimuna ebu budi butuala dishintuluka dikola dia mutshima ne bimanyinu bia ngikadilu bidi bidituala.
Menzeji a Buena Kilisto
Majinga kayi a mutshima wa Kilisto atudi tujinga bua kutuala mu mtshima wetu nkayetu? Nentela asatu.
1. Dinanga Dikezuka dia Kilisto
Munkatshi mua menzeji adi enza ngikadilu wa Kilisto mudi bunangi, “dinanga dikezuka dia Kilisto.” Bivua dinanga dikezuka divua, kumpala ku Difuka, dimutuala bua kudifila Nkayenda bu Musungidi. Mulambu Wenda wa Bupikudi uvua ne udi tshienzedi tshia ku mutu tshia dinanga. Bu muakambaye nkayenda: “Kakuena muntu ne dinanga dinena bu edi, dia muntu ufila moyo wenda bua balunda benda” ().
Dinanga dia Kilisto didi dituala bimanyinu bia ngikadilu bu mudi lusa, ditukija, didisuila bua kudiakaja “pawudi musakibua kudi Nyuma wa Tshijila,” ne mu bushuwa didisuila bua kubuikidila.
Mukulu David A. Bednar udi uvuluka ne kukadi bidimu bipita, mukaji mukuabu wa mu tshikongu tshienda uvua mumulomba bua kukumbula nsongakaji ibidi ivua mituadibua ku lupitadi panyima pa mipetakanangana ne njiwu ya mashinyi. Mu tshikondu atshi tshia mushinga, muanetu mukaji ewu wakapeta ku dibikila dikuabu dia ku kamua mukenji mubi ne muanenda wa bakaji uvua mufua ku mputa mipeta mu njiwu imua ayi. Mu dîyi dipuekela ne dia lutulu, wakamba: “Mulombodi Mukulu Bednar, tudi ne bua kuyukila ne bamamu bakuabu babidi abu. Tudi ne bua kubamanyisha pa lukasa bua mushindu udi bana babu bikala ne nebikala batuadibua ku lupitadi pa lukasa lonsu.” Mukulu Bednar udi uvuluka “kakuvua lusa lua nkaya; …kakuvua diditangila dia nkaya. Ngikadilu wa Buena Kilisto wa mukaji mudifila ewu uvua mumueneshibua mu ditangila dia lukasa ne dia mu yeya bua kujikija majinga a bamamu babidi bakuabu bavua bakenga.
Mukulu Bednar udi utentekela, “Ngikadilu udi mubuluibua … mu bukola bua ditapulula dikenga dia bantu bakuabu patudi tuetu bietu tukenga; mu bukola bua kujandula nzala ya bakuabu patudi bietu ne nzala; ne mu bukola bua kutuala lusa bua dikenga lufu dia mu nyuma dia bakuabu patudi mu dikenguluka dietu dia mu nyuma.”
Ndi ngela meji a Yezu mu dikenga pabuipi ne lufu pa mutshi mutshiamakana uvuluka mamuenda, Maliya, ne umuteka mu bukubi bua Mupostolo Wenda Munanga Yone.
Kuambuluisha ne Kukuba Bakuabu
Buenzeji buibidi budi butua mpanda ku ngikadilu wa Mupandishi budi dinanga dikola Dienda dia kupepeja buimpa ne ditanta dia bakuabu. Panyima ba bionsu, tshiena bualu tshienda tshionsu, mu dipetangana ne Tatu, tshidi tshia kufikisha ku dibenga kufua ne moyo wa tshiendelela wa bana ba Nzambi. Bu muakalongeshaye Bapostolo Benda:
“Wasua kulua munene munkatshi muenu, neikale muena mudimu wenu: …
“Muana wa muntu kabidi kakuluila bua bantu bamukuatshile mudimu, wakuluila bua kubakuatshila mudimu, ne bua kufila muoyo wandi bua kuhikula n’au bantu ba bungi.”
Bimanyinu ba ngikadilu bidi bitanta ku didifila bua dikalangana dimpa ne ditshimuna dia bakuabu biangata didipuekesha, lutulu, dibenga budisu, ne dikima. Mu diakula dienda ku Université wa Brigham Young, Mulombodi Mukulu Dallin H. Oaks wakabela, “Tangila ku mahinga bakuabu, ne didipuekesha didi dilonda.” Yezu wakalongesha, “Nuyile malu kundi; bualu bua meme ndi ne kalolo ne kanemu mu mutshima wanyi.” Kalolo kadi mushindu wa didikanda, dienzela anyi dilama makanda ne mapa bienda bia mushinga mu mushindu udi ukumbana.
Bu dibenga budisu, tshilejilu kayi tshishema tshitudi natshi pamutu pa bena bukenji, dikumi dia ku binunu bia bena bukenji badi badifila bua ngondu ne bidimu bia mioyo yabu anu mu disadila bakuabu (nangananga benyi) ne difila, mu dina dia Kilisto, mapa Enda adi kâyi kuelekeja a dikudimuna mutshima ne dibuikidibua?
Didifila ku Disua dia Nzambi
Makanda misatu a mushinga ku ngikadilu wa Kilisto adi dijinga Dienda dia kutumbisha Tatu ne kukumbaja disua dia Tatu mu mushindu onsu wa pabuawu. Wakajadika, “Bidia bianyi bidi kuenza bu mudi wakuntuma musue ne kushikisha mudimu wandi.”
Dijinga dia Buena Kilisto dia kutumbisha Nzambi ne kuenza disua Dienda didi dituala ku bimanyinu bia ngikadilu bia butumbi, bululama, ne buimpa. Yezu, tshilejilu tshia bululama, “wakateyibua mu mata onso muomumue atudi tuteyibua n’aun kai ne bubi.” Tudi mua kudienzeja ku ngelelu wa meji ewu. Mukulu Kim B. Clark wakatshibikila musangu mukuabu moyo wa tshikadilu tshimpa tshia kalolu” ne diambuluisha dia Mukalenga.
“Moyo wa tshikadilu tshimpa tshia kalolu” udi moyo wa buimpa. “Buimpa budi tshitupa tshia meji ne tshienzedi biashila pa mishindu ya tshikadilu tshimpa bikola. Tshidi lulamatu kudi Nzambi ne kudi bakuabu. … [tshidi] kudienzeja bua kuikala mutokeshibua ne mukezuka mu nyuma ne mu mubidi.” Tshidi tshiangata dikebulula ne didifila ku bulelela, diela meji mimpa ne dienza malu mimpa. Mu diakula dienda dia ndekelu kutudi bu Mulombodi Mukulu wa Ekelezia tshidimu tshimua tshipita, Mulombodi Mukulu Russell M. Nelson wakasengelela: “Mêyi etu, ne bienzedi bidi bijinga bikala bimpa kakuyi kalema ne biûla tenta ne dinanga dikezuka dia Yezu Kilisto kudi bantu bonsu. Diesa dinena didi kumpala kuetu didi dia kulua bantu badi Nzambi mujinga bua tuikala.
Mu tshikosu, Yezu udi wela meji ne wenza malu mu dinanga dikezuka; Udi mujinga bua kutubenesha ne kutujikula; ne udi usanka bua kuenza disua dia Nzambi. Ne ditabuja mu Kilisto, tudi mua kusambila ne Nyuma wa Tshijila nênzeja dishintuluka dikola mu tuetu bua kushindamena pa menzeji a bunzambi â mu mutshima wetu ne kutuambuluisha bua kuenzela bienzedi bia ngikadilu wa buena Kilisto. Tudi mua kutungunuka ne dikudimuna mutshima bua kudiakaja patudi tudienzeja bua kulonda tshilejilu tshia Mukalenga, “Ditabuja ne dikudimuna mutshima bidi bituala dishintuluka dia mutshima” Tudi mua “kulua bantu badi Nzambi mujinga bua tuikala.”
Ndi mpingana ku bualu bua Dilua Dibidi dia Yezu Kilisto. Diangata ngikadilu wa Kilisto kadiena anu bualu bua didilongolola dia nkaya kadi bualu bua kumudilu bua dilongolola buloba bua dipingana dia Mukalenga ne ditshimuna dienda dia mu bukalenga bua butumbi bua bidimu tshinunu. Tudi tuteta kupepeja buenzeji bua bantu bena Kilisto mu buloba, kadi kukuata mudimu umua ku umua kudi mushindu wa Yezu Kilisto wa kushintulula tshimenga ne kuasa bukalenga Buenda. Tshidi disangisha dia masungula a bantu mu bikondu didi dienza ne dishintulula bimenga bua buimpa anyi bua bubi. Kakuena muntu wa kutudi nkayenda udi mua kushintulula buloba nansha, kadi yonsu wa kutudi udi mua kuikala ne buenzeji mu buloba.
Mu Dialumu edi dia disanka dia Pâsaka, Ndi njadika bua Yezu Kilisto mubika ku lufu ne udi ne moyo. Yeye udi mutu wa Ekelezia Wenda, Ewu. Mulombodi Mukulu Dallin H. Oaks udi mubikidibua kudiye bua kukôkesha pa Ekelezia pa buloba ne kuikala muprofete muakuidi wa Mukalenga pa buloba. Ne ditabuja mu Kilisto, ngikadilu wetu alua bua kuleja Wenda bua ne “biamueneshibueye, tuikale bafuanangana n’andi… ; bua ne tupete ditekemena edi; bua ne tulengeshibue bu mudiye mulengele,”Ndi nusengelela mu dina dia Yezu Kilisto, amena.
© 2026 by Intellectual Reserve, Inc. All rights reserved. Bipatula mu USA. Dianyisha mu: 6/19. Dianyisha dia dikudimuna: 6/19. Dikudimuna dia Monthly Liahona Message, Ngondu Muitanu 2026. Tshiluba. 20045 760