Padahk en Ong Kakehlepen me Pwulopwul kan ong sounpwong en, Sulai 2025
Mwurin Mour Wet
Pasapeng kan ong Ekei Peidek
Sapwelimen Sahm Nanleng pilahno kak kihong kitail insenamwahu oh meleilei me pid duwen mour mwurin mehla.
Wiawidahr sang Thomas Arnaud
Dahme pahn wiawi mwurin ahi pahn mehla?
Met pahn kakete wia peidek ehu ong pelien lamalam teikan. Pasapeng kan me kitail ahneki sang Sises Krais oh Sapwelime rongamwahuo inenen manaman. Mour wet kaidehn idi. Pwehki Sises Krais ah iasadahr, palingenitail kan pahn ehu ong paliwar akan, oh kitail koaros pahn iasada ehu rahn.
Ei mehlel, mie ekei ire duwen mour mwurin mehla me kohdong kitail sang ni kaudiahl en ansou et me pahn kak sapeng ekei peidek me kitail ahneki. Iet ekei peidek, iangahki ekei pasapeng.
Dahme palinwar ngehn akan duwehte?
Ngehno wia mehkot ieu, me “inenen unsek de mwakelekel” (Doctrine and Covenants 131:7). Paliwar ngehn akan duwehte paliweren aramas me laud.
Iawasa me sapwen ngehn?
Dahme kin kohla nan sapwen Ngehn?
Nan pwungen soahng pwukat, ngehn akan me alehdar rongamwahuo koasoansondier en kalohki rongamwahu ong ngehn teikan me saikinte alehda rongamwahuo. Ngehn pwuko kak pilada en alehda de pil soikala.
Dahme palinwar iasadahkan duwehte?
Paliwar akan me iasada sohte kak mehla, irail wiawikihda uduk oh tih, oh irail unsek. Irail me lingan oh kaselel. “Sohte mehkot me kaselel me ke pahn kilang me duwehte iasadahn ohl de lih emen.“
Dahme pahn kohla nan wein celestial?
Irail akan me kin mih wasa me keieu lapalap nan wein celestial irail pahn duwehla Sahmatail Nanleng oh esehla duwen popohl unseko. Irail alehdi soahng koaros me Sahmo sapwellimaniki. Irail kin patehng Sapwellime dodohk oh lingan. Irail katengtengdier ongehr pwopwoud soutuk oh met koukousonki peneinei soutuk, nainekidahr seri ngehn kei.
Ia mwomwen irail akan me sohte pwopwoud nan mour wet?
Samatail Nanleng me inenen pwung oh mahk. “Kauno inoukidahr me nan mour me potopot sohte kapai ieu kak soikala irail akan me kin kolokol kosonned akan, de kolokol arail inou kan, oh inongiong dahme pwung.”
Ai pahpa oh nohno katengteng penehr nan Tehnpas Sarawi, ahpw met ira mweipesengehr. Ihs me ih katengteng ong?
Ke kakete “ipwidiong nan inouo” (met iei, ipwidi mwurin omw pahpa oh nohno katengteng penehr nan Tehnpas Sarawi), de ke kak katengteng ong omw pahpa oh nohno nan Tehnpas Sarawi mwurin ara katengtengpenehro. Sohte lipilipil mehnia ire, omw kapai kan pahn mihmite mendahte ma ahmw pahpa oh nohno pilada en mweipeseng oh kawehla ara katengtengo.
Omw pahpa oh nohno’ ara mehn pilipil kan sohte pahn kawehla omw kapai kan. Me keieu kesempwal ong uhk iei en nantiong poadidihte oh pein rapahki kapai kan en tehnpas Sarawi. Sohte lipilipil songen irair da me mih nan omw peneinei, ke anahne “kopworopworiki Kauno oh rapahki Sapwellime epwel,” ese me “Samatail Nanleng pahn nantiong emen emen aramas en alehdi kapai koaros me ah ineng oh pilipil pahn mweidohng.
Dahme wiawiong aramas akan me kin kemehla pein irail?
Kitail sohte ese dahme wiawiong songen aramas kat me kin kemehla pein irail, oh kitail sohte kak tenekih irail (duwehte ong aramas teikan. koaros). “Mendahte uwen nannanti en irail akan me re poakehng, sounkweid kan, oh semen kan, sohte kak ansou koaros kauhiraildi ansou me re pahn kihsang pein arail mourre . …
“E sohte pwung aramas emen en pein kihsang ah mour. Ahpw, Koht kelehpw kak teneki en emen aramas ah madamadau kan, wiewia kan, oh ia wen ah kak pwukoahki (kilang 1 Samuel 16:7; Doctrine and Covenants 137:9). …
“Irail kan me kin loalokihla me re poakong kan arail kin kemehla pein irail ihte wasa me re kak diar ie koapworopwor oh kakehlaparail pahn sangete rehn Sises Krais oh Sapwellime Tomwo.”
© 2025 by Intellectual Reserve, Inc. All rights reserved. Ntingda nan USA. Mweimwei ong Lokaiahn Wai: 6/19. Mweimwei ong Kaweweh: 6/19. Kawehwehdi en Padahk en Ohng Kakehlepen me Pwulopwul en Sounpwong en, Sulai 2025. Pohnpeian. 19618 885