Porous Ren ewe Pochokunen Serafo Iteiten Maram, July 2025
Mwirin Ei Manau
Ponuwen Ekkoch Kapaseis
An Samach non Nang kokkot a ngeni kich ekiek me kinamwe usun manau mwirin mano.
Chunga seni Thomas Arnaud
Met epwe fis murin ach mano?
Iei menin ewe kapaseis non meinisin namanam. Ekkewe ponuwan sia angei seni Jises Kraist me An kapas allim ra men unusen manaman. Ei manau esap iei nesoponon. Pokiten Jises Kraist a manausefan, ngunuch repwe chufengen ngeni inisich, me kich meinisin sipwe manausefan non eu ran.
Ewer, mi wor pwan ekkoch tichikin manau mwirin mano minne ra feito rech seni pwarata ikenai minne mi tongeni ponuweni pwan ekkoch ach kapaseis. Ikkei ekkoch ekkena kapaseis, fiti ekkoch mwochomwochen ponuwan.
Met usun nikinikin ngunun inis?
Ngun a eu sokkun mettoch, nge a chok “kon echipwer ika nimenimoch” (Doctrine and Covenants 131:7). Ngunun inis a usun nikinikin inisin aramas mi mwukono.
Ifan ewe fonufanen ngun?
Met a fis non ewe fonufanen ngun?
Me nein ekkoch metttoch, ngun ekkewe ra etiwa ewe kapas allim ra etetten ar repwe afanafana ewe kapas allim ngeni ngun ekkewe rese mwo etiwa ewe kapas allim. Ekkena ngun ra tongeni fini ar repwe etiwa ika resap etiwa.
Met usun nikinikin inis mi manausefan?
Inis mi manausefan rese tongeni mano, ir futuk me chu, me ir mi unusoch. Ir mi amwarar me ning. “Ese wor mettoch a kon ning ach sipwe neneta won nap seni emon mwan me fefin mi manausefan.”
Met a fis non ewe muun selestial?
Ekkewe ir mi nom non ewe tekian kinikinin ewe muun selestial ra winiti usun Samach non Nang me mefi eu unusen pwapwa. Ra angei meinisin met mi wor ren ewe Sam. Ra fiti An angang me ning. Ra ririfengen non apupunu ren fansoun esemuch me iei ra nom non famini esemuch, a wor pwisin nour semirit ngun esemuch.
Met me usun ren aramas rese pupunu me non ei manau?
Sam non Nang mi unusochun pung me umoumoch. “Ewe Samon a pwonei pwe non ekkewe fansoun esemuch esap wor feioch epwe amam seni noun at me nengin ekkewe ra apwonueta ekkewe annuk, ra ennet ngeni ar pwon mi pin, me mochen met mi pung.”
Semei me inei ir mi riri fengen non ewe tempel, nge iei ra keimufesen. Ion ngang mi riri ngeni?
Menin en mi “uputiw non ewe pwon mi pin” (ina, uputiw mwirin semom me inom kewe ra riri fengen non ewe tempel), ika menin en mi riri ngeni semom me inom non ewe tempel mwirin ar riri fengen. Non ei napanap, om kewe feioch ir mi chok nom inamo ika semom me inom ra finata ar repwe keimufesen me ar riri a komorono.
Finien semom me inom resap atai om feioch. Ewe auchean mettoch ngonuk pwe kopwe nikitu ne tupwon me kutta pwisin ekkewe feiochun tempel. Nge ren nefinen om famini, kopwe “epinukunuk non ewe Samon me kutta An ourur,” kopwe sinei pwe “Samach non Nang epwe tumunochu pwe emon me emon aramas epwe angei meinisin feioch minne a mochen me an finata epwe mutata.”
Met epwe fis ngeni aramas ekkewe ra mano ren ar angeiano manauer?
Sise sinei met a fis ngeni aramas mi mano ren ar angeiano manauer, me sise tongeni apungur (usun chok ren aramas meinisin, nesoponon). “Inamo ren met ukukun achoch an atongeach kewe, an souemwen, me ekkewe mi sinenap, nii manau ese ukutiw. …
“Ese pung ren an emon aramas epwe angeiano pwisin manauan. Nge inamo, Kot chok a tongeni apungu an ewe aramas ekiek, foffor, me ukukun pungun memef (nengeni 1 Samuel 16:7; Doctrine and Covenants 137:9). …
“Ekkewe a mano senir emon atongeer ngeni nii manau ra tongeni kuna epinukunuk me chikar non Jises Kraist me An Achasefan.”
© 2025 seni Intellectual Reserve, Inc. Meinisin pung mi kawor. Mi katou non USA. Kapunguno non fosun Merika: 6/19. Kapungunon chiakun: 6/19. Chiakun Porous Ren ewe Pochokunen Serafo Iteiten Maram, July 2025. Chuukese. 19618 901