Zaj Lus hauv Ntxiv Dag Zog rau cov Tub Hluas Ntxhais Hluas Txhua Hli, Plaub Hlis Ntuj 2025
Kev Pab Los ntawm Yexus Khetos: Vim Li Cas thiab Ua Li Cas
To taub vim li cas Yexus Khetos yeej yog lo lus teb thiab Nws ua li cas kom pab koj.
Cov duab los ntawm Dan Wilson
“Kuv xav tias kuv ua yuam kev tas li. Nyuaj rau kuv sim ua ntxiv.”
“Kuv raug tej xwm txheej nyuaj. Kuv tsis paub yuav ua li cas kom mua tom ntej.”
“Kuv txhawj txog yav tom ntej. Xyov tsis paub kuv puas txawj vam meej.”
“Kuv nkees tas, tiam sis tshuav ntau yam ua.”
Nej puas txawj to taub txog tej teeb meem no? Thawj Tswj Hwm Russell M. Nelson tau qhia hais tias, “Txawm nej muaj lus nug los sis muaj teeb meem li cas los, kev teb yeej nyob ntawm Yexus Khetos lub neej thiab tej lus qhia.” (“Lus Teb Yeej Yog Yexus Khetos,” Plaub Hlis Ntuj 2023 lub tuam rooj sab laj [Liyahaunas, Tsib Hlis Ntuj 2023, 127]).
Yooj yim hais tias, “Lus teb yeej yog Yexus Khetos.” Tiam sis yuav tsum siv zog ntxiv kom to taub vim li cas thiab Nws ua li cas kom thiaj li yog lus teb.
Vim Li Cas Yexus Khetos Yeej Yog Lus Teb?
Thaum Nws theej peb lub txhoj, tus Cawm Seej tau ua peb yam tseem ceeb:
-
Nws tau kov yeej kev tuag, uas ua rau peb txais tau kev sawv rov los.
-
Nws tau them tus nqi rau tag nrho tej kev txhaum, uas ua rau peb hloov siab lees txim, loj hlob tuaj, thiab rov qab mus cuag Vajtswv los tau. Qhov no kuj pab peb zam txim pub rau lwm tus thaum lawv ua txhaum, vim Yexus Khetos tau muab lawv tej kev txhaum rau Nws tus kheej ris.
-
Nws tau hnov txhua txoj kev mob, kev txom nyem, kev ntxias, kev mob kev nkeeg, thiab tej kev qaug zog (saib Amas 7:11–13). Qhov no txhais tias Nws paub tseeb tias yuav ua li cas kom pab peb thiab kho peb zoo thiab muaj hwj chim txhawb peb dag zog kom nyiaj tau tej kev sim siab thiab siv zog ua neeg zoo dua.
Xaiv ib qho teeb meem twg, ces qhov uas daws tau teeb meem yeej nyob ntawm ib yam ntawm peb yam tseeb no.
Txom nyem los? Vim Yexus Khetos tau raug txhua yam xwm txheej, Nws paub tias tej yam koj raug zoo li cas. Nws tsis tshem nej tej nra txhua lub sij hawm, tiam sis Nws muaj peev xwm muab dag zog rau tib neeg uas ris tej nra ntawd (saib Mauxiyas 24:15).
Ua yuam kev los? Vim Yexus Khetos tau kov yeej kev txhaum, peb tsis tas ua yuam kev tas li. Kev hloov siab lees txim yog kev hloov los ua neeg zoo zuj zus raws li Nws paub peb hloov tau.
Muaj mob muaj nkees los? Vim Nws tau kov yeej kev tuag, peb yuav sawv rov los muaj cev zoo tag nrho uas yuav tsis raug kev mob kev nkees. Yexus Khetos kuj “ris … neeg tej kev mob” (Amas 7:11), Nws thiaj li yog tus neeg zoo tag nrho kom nplij lawv lub siab thiab txhawb nqa lawv.
Yexus Khetos Ua Li Cas Kom Pab Peb
Tiam sis txawm yog peb paub vim li cas tus Cawm Seej yeej yog lus teb (vim Nws yog leej twg thiab Nws tau ua dab tsi rau peb), peb tseem yuav tsum paub tias Nws ua li cas kom pab peb thiab muab dag zog rau peb. Nov yog ob peb txoj kev:
Thov Vajtswv. Yog peb thov Vajtswv los ntawm Yexus Khetos lub npe, tib neeg uas tsis zoo tag nrho hais tau lus nrog ib tug Vajtswv uas zoo tag nrho. Peb thov tau kom txais dag zog uas peb xav tau, thiab Vajtswv yuav teb—tsis yog raws li peb xav tau, tiam sis raws li ib txoj kev uas yuav ua rau peb txais tau koob hmoov. Tus Cawm Seej txoj kev caw muaj tseeb: “Thov, ces nej yuav tau txais” (Yauhas 16:24; 3 Nifais 27:29; Lus Qhuab Qhia thiab Kev Khi Lus 4:7).
Lub Txiaj Ntsim Vaj Ntsuj Plig Dawb Huv Leej Txiv Saum Ntuj Ceeb Tsheej, Yexus Khetos, thiab tus Vaj Ntsuj Plig Dawb Huv koom siab koom ntsws muaj ib lub hom phiaj. Lawv ua hauj lwm ua ke! Txhua lub sij hawm uas tus Vaj Ntsuj Plig Dawb Huv coj koj mus los sis nplij koj lub siab, koj yuav to taub tias Yexus Khetos yog tus uas pab koj thiab.
Ua Raws Li Kev Khi Lus. Txwj Laug Dale G. Renlund ntawm Pawg Kaum Ob tug Thwj Tim tau qhia tias: “Lo lus txoj kev ua raws li kev khi lus hais txog tej kev khi lus uas peb khi kom peb los cuag Yexus Khetos thiab nrog Nws sib raug zoo. Los ntawm txoj kev sib khi no, peb txais tau Nws lub hwj chim mus ib txhis li.” (Plaub Hlis Ntuj 2023 lub tuam rooj sab laj [Liyahaunas, Tsib Hlis Ntuj 2023, 36]).
Kev Tshav Ntuj. Thaum peb muab siab rau ntseeg Yexus Khetos thiab hloov siab lees txim, peb txais tau kev pab ntxiv thiab txais dag zog (uas hu ua kev tshav ntuj) kom thiaj li muaj peev xwm ua tej yam uas peb ua tsis taus peb tus kheej xwb (saib Phau Qhia txog Vaj Lug Kub, “Tshav Ntuj”). Kev dag zog, los sis kev tshav ntuj no, los ntawm ntau yam los rau peb: los ntawm tus Vaj Ntsuj Plig Dawb Huv, ib tug phooj ywg, ib tug qhua, ib txoj kev xav. Qhov tseeb mas, txhua yam zoo yeej los ntawm Yexus Khetos (saib Maulaunais 7:22). Thaum koj ua siab ntev ntxiv, los sis muaj zog me ntsis ntxiv kom nyiaj tau, cia li to taub tias Yexus Khetos pab koj.
Nco Ntsoov Vim Li Cas thiab Nws Ua Li Cas
Yog li ntawd lwm lub sij hawm uas koj muaj lus nug los sis ib qho teeb meem, cia li ntsia ntsoov Yexus Khetos. Nco ntsoov tias vim Nws kov yeej kev txhaum, kev tuag, thiab lwm yam teeb meem ntawm lub neej no, ces tsis muaj ib yam dab tsi uas Nws ua tsis taus. Cia li nco txog qhov uas Nws ua li cas kom foom koob hmoov rau nej, ces nej yuav pom Nws lub hwj huam hauv nej lub neej. Nws hlub nej kawg nkaus!
© 2025 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, April 2025. Hmong. 19625 295