Mukenji wa ku Ngondu Bua Dikankamika dia Bansonga, Ngondu wa Kumpala 2025
Tangila kudi Kilisto
Tshiena bualu tshia Bansonga 2025 netshikuambuluisha bua kusungula dieyemena pa mutu pa dielakana ne ditabuja pa mutu pa ditshina.
Kailey wa bidimu dikumi ne muanda muteketa wakadi mu bulombodi wa kasumbu ka bansongakaji too ne pakafikaye ku njiwu ne kupetaye disama dia mputa mu bonga ku mutu. Disama dienda diakamupangisha bua kuya mu kalasa ne kutuadijaye kudiumvua nkaya. Wakatatshishibua mu lungenyi ne kakamanya kua kutangila bua kupeta diambuluisha. Mulunda wakamuambila bua kuteleja bena bukenji. Bakamulongesha pa Bupikudi bua Yezu Kilisto. Dilonga bikola pa Kilisto biakamupesha ditekemena, ne wakumvua bu Nzambi nkayenda uvua pabuipi nenda.
Kailey wakambila mamuenda ne, “katshia ntshitumuanji kumvua ne Nzambi mmunanga. Kadi mpindiewu ndi mumanya ne mmunanga.
Mamuenda, Michelle, bivua bimupitshila. Yeya ne muluma wenda, Brock, bakumbuka mu Ekelezia wa Yezu Kilisto wa Bansantu ba Matuku a Ndekelu pavua Kailey ne bidimu muanda muteketa bua nkonku mishilangana, dielakana, ne ntatu. Bavua bela meji ne muanabu wa bakaji uvua mua kuikala ne disanka yeya kayi mu bisangilu ne mikenji yonsu. Kabavua mua kuela meji ne dipangadika diabu divua mua kupangisha Kailey bua kuikala mu malanda mimpa ne Nzambi to. Pavua Michelle ne Brock bamona muvua Kailey mushintuluka, bakamona ne kukavu tshipolu tshila katshia badiumvua pabuipi ne Nzambi, ne bakasua kumvua kabidi nanku.
Bakamonangana ne Muepiskopo wabu, ne pashisha dîku, too ne muanabu ne Kailey wa baluma Braeden, bakapingana mu Ekelezia. Kudiumvua pabuipi ne Nzambi ne kuikala mu malanda mimpa nenda —nangananga kupitshila ku disambila—biakapingaja ditabuja diabu. Dipingana mu Ekelezia kadiakandamuna ku nkonku anyi ntatu yabu yonsu to, kadi bakamona ne kuikala ne malanda makola ne Nzambi kuvua ne mushinga wa bungi kupita muvuabu kabayi ne ditabuja.
Ebi bionsu biakabanga pavua mulunda—tshitenda bu wewa—wakabikila Kailey bua kutangila kudi Kilisto. Ne wakenza nanku!
Yezu Kilisto wakamba: Tangilayi kundi mu meji onsu; kanuedi mpata, kanutshinyi (Dilongesha ne Bipungid 6:38). Etshi tshidi dilongesha didi panyima pa Tshiena bualu tshia Bansonga 2025. Itabujayi tunuleja mushindu unudi mua kusungula dieyemena pa mutu pa dielakana ne ditabuja pa mutu pa ditshina panudi nutangila kudi Kilisto.
Diabakaji ku Diabaluma: Muanetu mukaji Runia, Mulombodi Mukulu Freeman, Muanetu mukaji Spannaus
Tamara W. Runia
Pandi ntatshishibua, bitu misangu ya bungi bingambuluisha bua kufuanyikija Yezu Kilisto ne bianza bienda biolola. Pandi ntangila kudiye, ndi mvuluka miaku ya musambu, “I Will Walk with Jesus [Nengenda ne Yezu]”: “Kakundekela, nansha pandi nkuluka.”
Emily Belle Freeman
Pandi mbala mufundu wa tshiena bualu etshi, ndi mvuluka Petelo pa Mbuwa wa Galela. Dishindamena pa tshipepela tshikola kuakavudija kutshina kuenda ne mpata, kumufikisha too ne ku didîna mu mavuala makola. Kadi kuimanyina pa Mupandishi kuakamupesha mushindu wa kuenza bualu buvuaye kayi muanji kuenza kumpala: wakuendela pa mayi! Bidi bikemesha, bushuwa. Ntshinyi tshiudi mua kukumbaja pawudi utangila Kudiye?
Andrea Muñoz Spannaus
Misangu yonsu indi ngumvua bowa, nansha mema muaba kayi anyi mu nsombelu kayi, ndi ngela meji ku malanda anyi ne Tatu wa Mu Diûlu ne Yezu Kilisto. Ndi ndiambila misangu ya bungi mu meji muanyi ne: NDI MUANA WA NZAMBI. Ndi ntunguluka ne kuenza nunku too ne pandi mbanga kudiumvua bimpa. Bitu anu bienda!
Diabakaji ku diabaluma: Muanetu wa baluma Wilcox, Mulombodi Lund, Muanetu wa baluma Nelson
Bradley R. Wilcox
Diela lukonku: nganyi utu uditatshisha ne mukunanga bikola. Baledi benu ne balombodi ba Ekelezia anyi? Bantu ba ku internete baudi mua kuikala umue wa ku nomba anyi? Tangila kudi Tatu Nzambi ne Kilisto. Badi bushuwa baditatshisha!
Steven J. Lund
Vuluka tshidibu bakuvuluija paudi wambulula tshiena bualu mu dikuata dia mudimu wa Buakuidi bua Alona ne tshia bansongakaji: Udi muana munangibua wa baluma ne wa bakaji wa Nzambi. Ikala ne ditabuja ne Tatu wetu udi ne dilongolola bueba. Ditangila kudi Kilisto didi diumvuija ne Bupikudi buenda budi bushuwa munkatshi mua dilongolola adi.
Michael T. Nelson
Kubala mifundu tshidi kutangila kudi Kilisto! Mpata ne ditshina bitu bijika patudi tuvuluka bishima ne malongesha a Yezu. Tudi ba diakalenga bua kuikala ne meyi enda. Bidi bienzeka mu nsombelu yonsu itudi tupitshila mu mioyo yetu.
© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, January 2025. Tshiluba. 19615 760