ყოველთვიური გზავნილი ჟურნალიდან ახალგაზრდების გასაძლიერებლად , დეკემბერი, 2024

შობა

დევიდ ა. ედვარდსი

საეკლესიო ჟურნალები

შეიტყვეთ ამ ნაცნობი საშობაო სცენის შესახებ, რათა გაიგოთ, როგორ გვეხმარება ის მხსნელზე მივმართოთ ყურადღება.

ქეროლაინ ვიბერტის ილუსტრაციები

ბეთლემი

ბეთლემი ებრაულად ნიშნავს „პურის სახლს“. მას ხანდახან დავითის ქალაქსაც უწოდებენ, რომლის შთამომავლობიდანაც იწინასწარმეტყველეს მესიის მოსვლა (იხილეთ იერემია 23:5; იოანე 7:42). სამუელმა ზეთი სცხო დავითს ბეთლემში მეფედ კურთხევისას (იხილეთ 1 მეფეთა 16:1–13). იწინასწარმეტყველეს, რომ მესია იქ დაიბადებოდა (იხილეთ მიქა 5:2).

„რაოდენ მიზანშეწონილი იყო, რომ [იესო ქრისტე], „სიცოცხლის პური“, „პურის სახლიდან“ უნდა გამოსულიყო“.

პრეზიდენტი რასელ მ. ნელსონი, „In This Holy Land [ამ წმინდა მიწაზე]“, ლიახონა, თებერვალი, 1991, 13.

სასტუმრო

სიტყვა სასტუმროს ბერძნული შესატყვისი ნიშნავს ნებისმიერ დროებით საცხოვრებელს, მათ შორის სასტუმრო ოთახს. მარიამმა „მიაწვინა [ყრმა ქრისტე] ბაგაში, ვინაიდან სასტუმროში არ იყო ადგილი მათთვის“ (ლუკა 2:7). (ჯოზეფ სმითის თარგმანში ნათქვამია „სასტუმროები [inns]“). „ადგილი არ იყო“ შეიძლება ნიშნავდეს, რომ ისინი არსად მიიღეს ან რომ არცერთი ის ადგილი, სადაც მათ შეიძლებოდა, ღამე გაეთიათ, არ იყო ბავშვის გასაჩენად შესაფერისი. რაც არ უნდა ყოფილიყო ნამდვილი მიზეზი, ისინი მივიდნენ იქ, სადაც ბაგა იყო.

ბაგა

ბაგა არის ამაღლებული ყუთი ან ღარი, სადაც ცხოველების საკვები ინახება. ძველ იუდეაში ისინი ძირითადად ქვისგან იყო დამზადებული. სასტუმროებს ჰქონდათ ცენტრალური ეზოები ბაგებით და ბევრ სახლს ასევე ჰქონდა ბაგა დიდ, მთავარ ოთახში, რათა ცხოველები ღამით იქ გაეჩერებინათ.

ახალშობილის გასახვევი ტანსაცმელი

დედები ახალშობილებს (საბანში ან ქსოვილში) ათასობით წლის განმავლობაში ახვევდნენ. ეს მათ ამშვიდებს და უქმნის კომფორტულ გარემოს მუცლიდან გამოსვლით მიღებული შოკის შემდეგ. ქსოვილს, რომელსაც მარიამი იყენებდა, შესაძლოა, ჰქონოდა ნიშანი, რომელიც მათ ოჯახს გამოარჩევდა.

მარიამი და იოსები

ისინი იყვნენ კარგი და მართალი ხალხი და ორივე დავითის შთამომავალი იყო. თითოეულ მათგანს ეწვია ანგელოზი, რათა ისინი მხსნელის შობისთვის მოემზადებინა (იხილეთ მათე 1:18–25; ლუკა 1:26–38). მათ ბეთლემამდე 100–140 კმ (60–90 მილი) გაიარეს. მოგზაურობის დროს მარიამი ორსულად იყო.

მწყემსები

ბეთლემის მახლობლად მწყემსები ფარას მწყემსდნენ. ზოგიერთი მკვლევარის აზრით, ქალაქთან ახლოს მხოლოდ ტაძრისთვის მსხვერპლშესაწირი ცხვრის ყოლა იყო ნებადართული. ასე რომ, ეს მწყემსები შესაძლოა, მწყემსდნენ ცხვრებს, რომლებიც წარმოადგენდნენ იესო ქრისტეს მსხვერპლს ჩვენთვის (იხილეთ მოსე 5:6–7). მათ დატოვეს თავიანთი ფარები მესიის სანახავად, რომლის გამომსყიდველი მსხვერპლი ცხოველთა მსხვერპლშეწირვის ტრადიციას დაასრულებდა.

ყრმა იესო

იესო ქრისტე არის შობის სცენისა და ჩვენი ცხოვრების ცენტრალური ფიგურა.

„იმედი მაქვს, ამ საშობაო სეზონზე გამოყოფთ დროს, რომ რამდენიმე წუთი წყნარად ჩამოჯდეთ და მისცეთ ნება მხსნელის სულს, გაგათბობთ და დაგამშვიდოთ. … მშვიდად დაჯექით იმ პატარა ბავშვთან ერთად და წადით სულიერად გაძლიერებული. … დაე, ეს იყოს დასვენებისა და გამოცოცხლების, დარწმუნებისა და განახლების მომენტი.

„ღმერთი გიბოძებთ ამ შობის კურთხევას, როდესაც თქვენ ჩემთან ერთად იქნებით მოწმე მხსნელი იესო ქრისტესი — ჩვენს და ყველა ადამიანის ცხოვრებაში მისი ცენტრალური ადგილისა და თვით არსებობის მიზნის“.

უხუცესი დ. ტოდ კრისტოფერსონი თორმეტ მოციქულთა ქვორუმიდან, „იყავი მშვიდობით“, ლიახონა, დეკემბერი, 2015, 37.

© 2024 Intellectual Reserve, Inc. All rights reserved. Printed in USA. English approval: 6/19. Translation approval: 6/19. თარგმანი ყოველთვიური გზავნილის ახალგაზრდების გასაძლიერებლად, დეკემბერი, 2024. Georgian. 19346 131

შენიშვნები

1. Joseph Smith Translation, Luke 2:7 (ლუკა 2:7, სქოლიო b).

2. იხილეთ ენდი მიქელსონი, „An Improbable Inn: Texts and Tradition Surrounding [წარმოუდგენელი სასტუმრო: ტექსტები და ტრადიციები] ლუკა 2:7“, სტუდია ანტიკა ტომი 14, # 1 (მაისი, 2015).

3. იხილეთ ენდი მიქელსონი, „An Improbable Inn [წარმოუდგენელი სასტუმრო]“.

4. იხილეთ რასელ მ. ნელსონი, „The Peace and Joy of Knowing the Savior Lives [მხსნელის ცხოვრების შეცნობის მშვიდობა და სიხარული]“, „ლიახონა“, დეკემბერი, 2011, 19–20.

5. იხილეთ ალფრედ ედერშეიმი, The Life and Times of Jesus the Messiah [მხსნელი იესოს ცხოვრება და დრო], მე-8 გამოცემა, (1907), 1:186.