Zaj Lus hauv Ntxiv Dag Zog rau cov Tub Hluas Ntxhais Hluas Txhua Hli, Kaum Ob Hlis Ntuj 2024

Lub Sij Hawm Yexus Yug

Los ntawm David A. Edwards

Lub Koom Txoos tej Phau Ntawv Xov Xwm

Kawm txog

Cov duab los ntawm Caroline Vibbert

Npelehees

Npelehees yog lus Henplais uas txhais tias “lub tsev muaj mov mog.” Tej lub sij hawm lawv hu lub zos no ua lub nroog Daviv, tus uas neeg hais tias yog tus Mexiyas caj ceg (saib Yelemis 23:5; Yauhas 7:42). Xamuyees twb muab Daviv tsa ua vaj ntxwv nyob hauv Npelehees (saib 1 Xamuyees 16:1–13). Cov yaj saub tau hais tias tus Mexiyas yuav yug los nyob ntawv (saib Mikhas 5:2).

“Yeej tsim nyog uas [Yexus Khetos], ‘cov mov uas cawm neeg txoj sia,’ yuav los ntawm ‘lub tsev muaj mov mog.’”

Thawj Tswj Hwm Russell M. Nelson, “In This Holy Land,” Liyahaunas, Ob Hlis Ntuj 1991, 13.

Lub Tsev So

Lus Kilis rau lo lus tsev so txhais tias ib qhov chaw twg uas tib neeg nyob rau ib ntus, xws li ib chav rau cov neeg qhua pw. Maivliag “muab [tus Me Nyuam Mos Liab Khetos] tso pw rau hauv ib lub dab zaub, rau qhov tej tsev so, neeg twb so puv tas lawm” (Lukas 2:7). (Joseph Smith Kev Txhais Lus hais tias “tej tsev so.” Tej zaum “puv tas lawm” txhais tias lawv twb raug cheem mus lwm qhov chaw los sis tsis muaj chaw txaus rau Maivliag yug tus me nyuam. Txawm li cas los xij, nkawd twb mus rau ib qho chaw uas muaj ib lub dab zaub.

Lub Dab Zaub

Ib lub db zaub yog ib lub thawv los sis lub dab uas tso cov khoom rau cov tsiaj noj. Puag thaum ub nyob hauv Yudas, lawv siv cov pob zeb ua. Tej tsev so twb muaj tog tsev nyob nruab nrab uas muaj dab zaub, thiab tej tsev feem ntau muaj dab zaub nyob hauv chav loj kom cov tsiaj yuav nyob hauv tsev thaum hmo ntuj.

Khaub Ncaws Qhwv

Txij thaum ob peb txhiab xyoo tas los cov niam tsev twb muab khaub ncaws qhwv lawv cov me nyuam mos liab. Lawv ua li no kom pab cov me nyuam mos liab nyob ntsiag to tom qab lawv tsis nyob hauv lub plab me nyuam lawm. Daim ntaub uas Maivliag siv los tej zaum muaj paj ntaub tshwj xeeb rau nws tsev neeg.

Maivliag thiab Yauxej

Nkawd yog ob tug neeg zoo thiab ncaj ncees, thiab nkawd ob leeg yog Daviv cov xeeb ntxwv. Muaj ib tug tim tswv tuaj xyuas nkawd ob leeg kom npaj rau tus Cawm Seej txoj kev yug los (saib Mathais 1:18–25; Lukas 1:26–38). Nkawd twb khiav deb li 100–140 km (60–90 mais) mus rau Npelehees. Maivliag muaj ib plab me nyuam thaum nkawd mus.

Cov Neeg Yug Yaj

Cov neeg yug yaj twb yug lawv cov yaj nyob ze Npelehees. Raws li ib cov kws tshawb fawb xav, tsuas pub cov yaj uas yuav raug txi hauv lub tuam tsev nyob ze ib lub nroog. Yog li ntawd tej zaum cov neeg yug yaj no tau tu cov yaj uas yuav sawv cev txog Yexus Khetos txoj kev txi rau peb (saib Mauxes 5:6–7). Lawv twb tseg cov yaj mus saib tus Mexiyas, tus uas yuav theej txhoj kom tsis tas muab cov tsiaj txi ntxiv li lawm.

Tus Me Nyuam Khetos

Yexus Khetos yog tus tseem ceeb tshaj ntawm qhov Nativity—thiab tus tseem ceeb tshaj hauv peb lub neej.

“Kuv cia siab tias nej yuav siv lub caij Christmas no kom zaum twj ywm rau ib me pliag thiab cia tus Cawm Seej tus Ntsuj Plig nplij nej lub siab kom sov so. … Zaum twj ywm saib tus me nyuam mos liab thiaj li ntxiv dag zog rau koj sab ntsuj plig. … Cia lub sij hawm ntawd ua rau nej sov thiab rov qab muaj zog.

“Thov Vajtswv kom cia nej txais tau txoj koob hmoov no hauv lub caij Christmas thaum nej, nrog kuv, ua tim khawv txog tus Cawm Seej Yexus Khetos—qhov uas Nws tseem ceeb tshaj plaws hauv peb lub neej, rau txhua tus neeg, thiab rau peb lub hom phiaj hauv lub neej no.”

Txwj Laug D. Todd Christofferson ntawm Pawg Kaum Ob tug Thwj Tim, “Be at Peace,” Liyahaunas, Kaum Ob Hlis Ntuj 2015, 37.

© 2024 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, December 2024. Hmong. 19346 295

Lus Cim

1. Joseph Smith Kev Txhais, Lukas 2:7 (nyob hauv Lukas 2:7, lub cim nram qab b).

2. Saib Andy Mickelson, “An Improbable Inn: Texts and Tradition Surrounding Lukas 2:7,” Studia Antiqua phau 14, zaj 1 (Tsib Hlis Ntuj 2015).

3. Saib Andy Mickelson, “An Improbable Inn.”

4. Saib Russell M. Nelson, “The Peace and Joy of Knowing the Savior Lives,” Liyahaunas, Kaum Ob Hlis Ntuj 2011, 19–20.

5. Saib Alfred Edersheim, The Life and Times of Jesus the Messiah, 8th ed. (1907), 1:186.