“Para sa Kusog sang mga Lamharon: Ang Mensahe sang Manluluwas sa Imo,” Para sa Kusog sang mga Lamharon, Mar. 2024.
Bulanan nga Mensahe sang Para sa Kusog sang mga Lamharon, Marso 2024
Para sa Kusog sang mga Lamharon: Ang Mensahe sang Manluluwas sa Imo
Ini nga giya nagabulig sa imo nga iangot ang imo mga pagpili kay Jesucristo kag sa Iya doktrina.
I Stand at the Door and Knock [Nagatindog ako sa Pwertahan kag Nagapanuktok], ni J. Kirk Richards
Hunahunaa nga nagaistar ka sa dumaan nga Galilea, 2,000 ka tuig na ang nagligad. Ikaw kag ang imo mga abyan gin-imbitar sa isa ka debosyonal para sa mga lamharon sa lokal nga sinagoga, nga ang espesyal nga imbitado nga manughambal: si Jesus sang Nazaret. Sa isa ka punto sa Iya mensahe, ginaagda ni Jesus ang lamharon nga mga tagpalamati nga magpamangkot sa Iya.
Ano nga sari sang mga pamangkot ang sa banta mo imo mabatian?
Sa banta ko ang pila ka mga pamangkot magapakita sang kultura kag mga sirkumstansya sadtong panahon. Pero nagapati gid ako nga madamo sa mga ini ang dawsa pareho gid sang mga pamangkot naton sa karon nga panahon.
Halimbawa, sa Bag-ong Katipan, ang mga tawo nagpamangkot sa Manluluwas sang pareho sa mga ini:
-
Ano ang kinahanglan ko himuon agud makaangkon sang kabuhi nga wala katapusan?1
-
Ginabaton bala ako? Nalakip bala ako?2
-
Kon makasala ang akon utod sa akon, kapila ko sia patawaron?3
-
Ano ang matabo sa sining kalibutan sa palaabuton? Mangin hilway bala ako sa katalagman?4
-
Mapaayo Mo bala ang akon pinalangga?5
-
Ano ang kamatuoran?6
-
Paano ko mahibal-an kon husto ang akon dinapadulongan?7
Indi bala nga nagapanumdom kita sang amo man nga mga butang kon kis-a? Sa kalawigon sang mga siglo, ang mga pamangkot wala nagbag-o sing daku. Kag amo man ang kaluoy sang Manluluwas sa mga nagapamangkot sang mga ini. Nakahibalo Sia kon daw ano ka makatulublag kag makalilibog ang kabuhi. Nakahibalo Sia kon daw ano kahapos sa aton nga magtalang. Nakahibalo Sia nga nagapalibog kita kon kis-a parte sa palaabuton. Kag nagasiling Sia sa imo kag sa akon, pareho nga nagsiling Sia sa Iya mga sumulunod sang una:
Kon may importante kamo nga mga pagpili nga himuon, si Jesucristo kag ang Iya ginpanumbalik nga ebanghelyo amo ang pinakamaayo nga pilion. Kon may mga pamangkot kamo, si Jesucristo kag ang Iya ginpanumbalik nga ebanghelyo amo ang pinakamaayo nga sabat.
Ini ang rason kon ngaa nanamian gid ako sang Para sa Kusog sang mga Lamharon: Giya sa Paghimo sang mga Pagpili. Gintudlo kita sini kay Jesucristo agud mabaton naton ang Iya kusog. May kopya ako sini sa akon bulsa pirme. Kon makasugata ako sang mga tawo sa bisan diin man sa kalibutan nga gusto makahibalo kon ngaa ginahimo naton, nga mga miyembro sang Simbahan ni Jesucristo, ang aton ginahimo, ginapakigbahin ko ining giya sa ila.
Ang Para sa Kusog ang mga Lamharon nagatudlo sang wala katapusan nga mga kamatuoran parte sa Manluluwas kag Iya Pamaagi. Nagaagda ini sa imo nga maghimo sang mga pagpili nga nabase sa sinang mga kamatuoran. Kag ginapakigbahin sini ang ginpromisa nga mga bugay nga ginatanyag Niya sa mga nagasunod sa Iya. Palihog basaha, binagbinaga, kag ipakigbahin ining giya!
Agdaha Sia sa Imo Kabuhi
Gusto ni Jesucristo nga mangin bahin sang imo kabuhi—isa ka dalayon, adlaw-adlaw nga presensya, sa maayo kag sa indi maayo nga mga tinion. Wala Sia nagatindog lang sa punta sang dalanon, nga nagahulat sa imo nga maabtan Sia. Malakat sia upod sa imo sa kada tikang nga imo pagahimuon. Sia ang Dalan!
Pero indi Niya pag-ipamilit ang Iya pamaagi sa imo kabuhi. Ginaimbitar mo Sia sa imo kabuhi, paagi sa imo mga pagpili. Ini ang rason kon ngaa ang isa ka giya para sa paghimo sang mga pagpili, pareho sang Para sa Kusog sang mga Lamharon, malahalon gid. Tagsa nga maghimo ka sang matarong nga pagpili nga nabase sa wala katapusan nga mga kamatuoran sang Manluluwas, ginapakita mo nga gusto mo Sia sa imo kabuhi. Inang mga pagpili nagabukas sang mga puertahan sang langit, kag ang Iya kusog magabubo sa imo kabuhi.11
Maghimo sang Mabakod nga mga Kaangtanan
Siguro madumduman mo nga ang Manluluwas nagkumparar sinang mga nagapamati kag nagatuman sang Iya mga pulong sa maalam nga tawo nga “nagpatindog sang iya balay sa [bato].” Paathag Niya:
“Nagbunok ang ulan, nag-awas ang baha sa pangpang sang suba kag nagwaswas ang mabaskog nga hangin sa sadto nga balay; pero wala ini matumba tungod kay napasad ini sa [bato].”12
Ang isa ka balay makalampuwas sa bagyo indi tungod mabakod ang balay. Indi man ini makalampuwas tungod ang bato mabakod. Ang balay makalampuwas sa bagyo tungod malig-on ini nga naangot sa sinang mabakod nga bato. Ang importante amo ang kabakod sang pagkaangot sa bato.
Sa amo man, sa aton pagtukod sang aton mga kabuhi, importante nga maghimo sang maayo nga mga pagpili. Kag importante nga mahangpan ang wala katapusan nga kamatuoran sang Manluluwas. Pero ang kabakod nga kinahanglanon naton agud mabatoan ang mga bagyo sang kabuhi nagaabot kon iangot naton ang aton mga pagpili kay Jesucristo kag sa Iya doktrina Amo ina ang ginabuligan sang Para sa Kusog sang mga Lamharon nga aton himuon .
Halimbawa, siguro nahibal-an sang imo mga abyan nga nagatinguha ka nga indi maggamit sang bastos ukon masakit nga halambalanon. Siguro makita ka nila nga nagadab-ot sa sinang bata sa eskwelahan nga wala ginasapak ukon bisan gani ginabully sang kalabanan. Pero nakahibalo bala sila nga ginahimo mo ining mga pagpili tungod gintudlo ni Jesucristo nga “ang tanan nga tawo imo mga utod—lakip na … ang mga tawo nga lain sangsa imo”?13
Ang imo mga abyan siguro nakahibalo nga nagasimba ka kada Domingo. Siguro nadiparahan nila nga may pila ka kanta nga ginapatay mo ukon may pila ka sine nga ginabalibaran mo ang imbitasyon sa pagtan-aw. Pero nakahibalo bala sila nga ginahimo mo ining mga pagpili tungod kay may “makalilipay ka nga relasyon sang pagpakighisugot sa Amay nga Langitnon kag kay Jesucristo,” kag nga bilang kabahin sinang pangako nga sundon ang Manluluwas, mapasalamaton ka “nga ara ang Balaan nga Espiritu bilang imo pirme nga kaupod”?14
Siguro nakahibalo ang mga tawo nga wala ka nagainom sang makahulubog nga ilimnon ukon nagapanigarilyo ukon nagagamit sang makahalalit nga mga droga. Pero nakahibalo bala sila nga ginahimo mo ining mga pagpili tungod nagtudlo si Jesucristo nga ang “imo lawas sagrado,” “isa ka dalayawon nga regalo halin sa imo Amay nga Langitnon,” nga ginhimo sunod sa Iya imahe?15
Siguro ang imo mga abyan nakahibalo nga indi ka magkodigo ukon magbinutig kag nga ginaseryoso mo ang pag-eskwela. Pero nakahibalo bala sila nga tungod ini kay si Jesucristo nagtudlo nga “hilwayon kamo sang kamatuoran”?16
Labaw sa tanan, ang imo bala mga abyan nakahibalo nga ginahimo mo ining kon kis-a ginakaugtan nga mga pagpili agud mangin tampad sa mga talaksan ni Cristo tungod nakahibalo ka nga si Jesucristo ang imo kusog”?17
Sia Amo ang Imo kusog
Ginahatag ko sa imo ang akon sigurado nga saksi nga si Jesucristo ang Dalan sa masanag kag mahimayaon nga palaabuton—imo palaabuton. Kag Sia man ang Dalan sa masanag kag mahimayaon nga subong. Maglakat sa Iya dalan, kag magalakat Sia upod sa imo. Mahimo mo ini!
Mahal kong lamharon nga mga abyan, si Jesucristo amo ang inyo kusog. Magpadayon lakat upod sa Iya, kag buligan Niya kamo nga magtimbook “kaangay sang mga agila”18 padulong sa wala katapusan nga kalipay nga ginhanda Niya para sa inyo.
© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, March 2024. Hiligaynon. 19356 861