Usa ka Pasko sa Pagkabanhaw nga Nakasentro sa Manluluwas

Ug usa ka Kinabuhi nga Nakasentro sa Pasko sa Pagkabanhaw

Ni Benjamin B.

Kitang tanan makadawat sa gahom sa Manluluwas sa kahupayan ug kabag-ohan.

Mga litrato pinaagi ni Janae Bingham

Pahinumdom sa editor: Sumala sa 16-anyos nga si Benjamin B., siya adunay “medyo laay nga kinabuhi.” Apan kasagaran sa mga tawo tingali dili mouyon. Si Ben magpatukar og baho [instrumento sa musika] sa orkestra sa iyang eskwelahan ug gamay nga mga tambol sa jazz nga banda sa iyang eskwelahan. Magdala siya og kazoo [murag dulaan nga instrumento] diha sa iyang bulsa aron magpatugtog, para lingaw-lingaw lang. Ug siya ganahan nga magkat-on, labi na bahin sa physics, psychology, philosophy, paleontology, ug pharmacology.

Mao nga oo, si Ben medyo makapainteresado. Ug sa miaging Pasko sa Pagkabanhaw, siya midesisyon nga mopunting sa Manluluwas sa pipila ka medyo makapaikag nga mga paagi. Apan labaw pa kamahinungdanon, si Ben nagpunting sa Manluluwas sa iyang inadlaw-adlaw nga kinabuhi, nagsalig sa Pag-ula ni Kristo aron maghinulsol, mag-usab, ug magserbisyo.

Ania ang pipila sa kang Ben nga (segurado-dili-laay) nga mga kasinatian diha sa iyang kaugalingon nga mga pulong.

Sa seminary, naghisgot kami kabahin kon unsa gayod ang gipasabot sa Pasko sa Pagkabanhaw ug kon unsaon gayod nato kini pagsaulog. Dili lang kini mahitungod sa kendi ug mga kuneho—kini mahitungod sa Manluluwas. Nangutana ko sa akong kaugalingon, “Unsa nga mga tradisyon sa Pasko sa Pagkabanhaw ang akong masugdan sa akong panimalay nga mas mopunting sa Manluluwas?”

Unsa nga mga tradisyon sa Pasko sa Pagkabanhaw ang akong masugdan sa akong panimalay nga mas mopunting sa Manluluwas?

Ganahan ko nga magtukod og mga butang gamit ang LEGO^® nga mga bloke. Nakakita ko og litrato sa Manluluwas gikan sa Librarya sa Ebanghelyo sa online ug giusab kini ngadto sa mga instruksiyon unsaon pagtukod og usa ka butang gamit ang mga LEGO nga bloke. Gitrabaho nako ang bloke nga litrato samtang naminaw sa kinatibuk-ang komperensiya. Sa dihang nahuman na ko, ako kining gibitay sa among panimalay.

Pagpanghatag og mga Pigurin sa Manluluwas

Nagpalit usab ako og dako nga kahon sa mga pigurin ni Jesukristo alang sa Pasko sa Pagkabanhaw. Sa sinugdanan akoa unta kining tagoan sa tanang dapit sa eskwelahan. Apan sa dihang nakit-an sa mga tawo sa eskwelahan ang kahon, nangayo sila og mga pigurin. Ang mga magtutudlo nagsugod usab sa pagpangayo. Ug dayon ang mga bata nga wala nako dahoma nga ganahan og pigurin ni Jesus nangayo og pigurin. Ug mao nga ako kining gipanghatag sa tanan nga tawo nga akong nakit-an.

Bisan unsa pa ang imong gihunahuna nga imong nabuhat, kanunay nga adunay luna alang ni Jesukristo sa imong kinabuhi.

Ang Manluluwas wala mahadlok nga makig-istorya sa tanan, bisan sa labing gisalikway nga katawhan sa Iyang katilingban. Siya higala nila. Siya migahin og oras uban nila. Siya mikaon uban nila. Ang pagpanghatag sa mga pigurin nagtudlo nako nga mahimong mas mahigalaon, sama sa Manluluwas. Kini usab nagtudlo nako nga bisan kinsa ka man, bisan unsa pa ang imong gihunahuna nga imong nabuhat, kanunay nga adunay luna alang ni Jesukristo sa imong kinabuhi.

Pagkausab Pinaagi sa Manluluwas

Sa tibuok nakong kinabuhi naghunahuna ko, unsaon nako sa paggamit ang Pag-ula sa Manluluwas? Apan karon nga Pasko sa Pagkabanhaw, akong nakat-onan nga kon ako mohimo og mga kausaban sa akong kinabuhi aron mahimong mas sama sa Manluluwas, ang Iyang maulaong kaluoy naglihok sa akong kinabuhi. Ug kon ako maningkamot matag adlaw nga usbon ang gagmay nga mga butang, nan ako magsugod nga mahimong mas maayo.

Sa pipila ka tuig sa akong kinabuhi, nanlimbasog ko sa paggamit og pornograpiya. Human sa usa ka leksiyon sa seminary, nadasig ko nga makig-istorya sa akong bishop. Mas sayon ang pagsugod sa pagbuntog sa akong pakigbisog sa dihang nakasulti na ko ngadto sa akong bishop ug sa akong mga ginikanan, tungod kay lisod kaayo nga mag-inusara sa pagsinati niini.

Nagsugod ko sa pagpaningkamot nga mag-ampo ug magbasa sa akong mga kasulatan matag adlaw, ug naningkamot ko nga mahimong mas mabination sa eskwelahan. Nakatabang kini nako tungod kay mas nagtutok ko sa Manluluwas kay sa akong mga sala. Mas midangop ko ngadto Kaniya kay sa diin ako kaniadto.

Pinaagi sa Pag-ula ni Jesukristo, nabuntog nako ang akong pakigbisog sa pornograpiya. Ako nahimong mas maayo sa kon unsay gusto sa Ginoo nga ako mahimo. Karon makapanalangin na ko sa sakramento tungod kay ang Manluluwas miusab kanako ug milimpyo kanako. Ako mapasalamaton nga mahimong takos sa paggamit sa pagkapari aron panalanginan ang mga kinabuhi niadtong anaa sa akong palibot.

Pagkonektar sa Pasko sa Pagkabanhaw ngari Kanako

Karong tuiga sa seminary, ako adunay nindot nga kasinatian sa dihang naghisgot kami kabahin sa sakripisyo sa Manluluwas. Naghunahuna ko nga samtang Siya nag-antos, mahimo Niya kining hunongon bisan unsang orasa. Apan dayon ako Siyang gihanduraw nga naghunahuna, “Dili, kinahanglan nako kining padayon nga buhaton. Kinahanglan nako kining buhaton alang ni Ben. Siya nagkinahanglan niini.” Alang nako, kana nga hunahuna mikonektar gayod sa akong relasyon sa Manluluwas ngadto sa Pasko sa Pagkabanhaw.

Ako nakahibalo nga ang Manluluwas nabuhi ug namatay alang sa matag usa kanato sa personal nga paagi.

Sa sunod nga Pasko sa Pagkabanhaw, tingali magbuhat ko og laing bloke nga litrato ni Jesus. Seguradong ganahan kong manghatag og mas daghan pang mga pigurin. Bisan asa niana, maghunahuna ko sa pag-antos ni Kristo ug sa Iyang Pag-ula alang nako. Tungod Niya, ako makahinulsol sa akong mga sala ug makabalik ngadto Niya ug sa Langitnong Amahan sa umaabot nga adlaw.

Ako nasayod nga ang Manluluwas nabuhi ug namatay alang sa matag usa kanato sa personal nga paagi ug nga Siya nakahibalo kon kinsa kita ug unsay atong gikinahanglan. Kon kita maningkamot gayod, kita makagamit sa Iyang gahom sa kahupayan ug kausaban, ug kita mahimong mas maayo nga mga tawo.

Ang tagsulat nagpuyo sa Idaho, USA.