Toru ha’api’ira’a nō roto mai i te taure’are’ara’a o Iosepha Semita

Nā Matthew C. Godfrey

Tuha’a fa’atere nō te ’ā’amu o te ’Ēkālesia

’A hi’o mai e aha tā ’outou e nehenehe e ’apo mai nā roto i te mau ’ohipa i tupu nō te peropheta, ’a 200 matahiti i teienei.

taure’are’a tamāroa

’Ua fāri’i a’ena ānei ’outoum i te mana’o ē, e mea fifi roa ’ia fa’aau ia tātou i te mau ta’ata nā mua atu ? ’Ua ora na rātou e mea maoro i teienei—e nehenehe mau ānei rātou e ha’api’i mai ia ’outou i te hō’ē mea nō ni’a i tō ’outou orara’a ? ’Ē ! ’O Iosepha Semita te hō’ē hi’ora’a rahi. I te 18ra’a o tōna matahiti, ’ua ha’api’i mai ’oia i te tahi mau mea nō ni’a i te fāri’ira’a i te mau pāhonora’a i te pure ’e tōna aura’a ’e tōna Metua i te ao ra. E nehenehe teie mau ha’api’ira’a e tauturu ia ’outou i teie mahana.

Ha’api’ira’a #1 : I te tahi taime, e tītauhia te taime nō te fāri’i i te mau pāhonora’a.

E’ita te mau pāhonora’a i te pure e tae oi’oi noa mai. E ’ere te tīa’ira’a i te mea ’ōhie—mai te mea iho ā rā e roa’a te mau pāhonora’a vitiviti i ni’a i te itenati, nō te mau uira’a ato’a.

Mai te mea tē mana’o ra ’outou ē, e rave te Atua i te taime roa nō tē pāhono ia ’outou, ’aita ’o ’outou ana’e. E 12ra’a te matahiti ’o Iosepha Semita, ’a ha’amata ai ’oia i te feruri nō ni’a i « te mau ha’ape’ape’ara’a faufa’a rahi ato’a nō te maita’i o [tōna] vaerua tāhuti ’ore ».¹ ’Ua ’aro ’oia i te mau uira’a nō ni’a i tōna iho ti’a-mā-ra’a ’e te ’ino o te ao nei, nō nā matahiti e piti i muri nei. ’Ua tītauhia e piti matahiti nō te feruri māite, te tuatāpapara’a i te mau pāpa’ira’a mo’a ’e te mau fa’aotira’a nō teie mau uira’a hou te Atua ’e Iesu Mesia e fā mai iāna, i roto i te uru rā’au mo’a.

Mai te reira ato’a nō tātou. Mai te mea e uira’a tā tātou, e tītauhia paha te mau mahana, te mau ’āva’e ’aore rā te mau matahiti hou tātou ’a fāri’i ai i te hō’ē pāhonora’a. ’Aita rā e fifi. E mea faufa’a roa te ’ohipa tā tātou e rave ra, ’a tīa’i noa ai. ’A ha’amana’o e aha tā Elder Jeffrey R. Holland nō te pupu nō te Tino ’Ahuru ma Piti ’āpōsetolo i ha’api’i : « E ti’a i te huero ’ia fa’a’amuhia ’e ’ia tīa’i tātou ’ia pa’ari te reira ».²

Iosepha Semita e tai’o ra i te ’episetole a Iakobo

Ha’api’ira’a #2 : ’Ua ’ite te Atua ia tātou ma tō tātou i’oa.

Hou te 18ra’a o tōna matahiti, ’ua haere mai te Atua te Metua, o Iesu Mesia ’e te melahi Moroni e fārerei iāna. E mea māere mau ! ’E ’ua ’ite teie mau ta’ata hanahana ato’a i te i’oa o Iosepha. ’Ua mātau maita’i rātou iāna !

’Ua mātau maita’i ato’a te Atua ia ’outou. E tamari’i ’outou nāna ’e ’ua ’ite ’oia i tō ’outou i’oa. ’Ua ha’api’i te Atua i teie parau mau nō ni’a i tāna mau poietera’a ē, « ’ua tai’ohia rā te mau mea ato’a e au nei, nā’u ho’i te reira, ’e ’ua ’ite au i te reira » (Mose 1:35).

Te hō’ē tuha’a nō te tumu i roa’a ai ia Iosepha te ti’aturira’a e tītauhia nō te rave i te mea i anihia iāna ’ia rave, ’oia ho’i ’ua ta’a maita’i iāna ē, e tamari’i ’oia nā te Atua tei mātau maita’i iāna.

Iosepha Semita i roto i te uru rā’au mo’a

Ha’api’ira’a #3 : ’Ia tātarahapa ana’e tātou, tē ’īriti ra tātou ia tātou iho i te mau ’itera’a pae vārua.

Te hō’ē o te mau fa’aitoitora’a tumu a Iosepha nō te haere i roto i te uru rā’au mo’a, ’o te tātarahapara’a ïa i tāna mau hara. Terā ato’a ïa te tumu ’oia ’a pure ai i te pō ’a fā mai te melahi Moroni iāna : « ’Ia fa’a’orehia tāna mau hara ato’a ’e tāna mau hapehape » (Iosepha Semita—’Ā’amu 1:29). Tē ha’api’i nei te reira ia tātou e piti mea :

’A tahi, mai te mea ’ua rave tātou i te hape, ’eiaha tātou e mana’o e’ita tātou i te mea ti’amā nō te pure. ’Ua rave Iosepha i « te mau hara ’e te mau hapehape », ’ua ’ite noa rā ’oia ē, e nehenehe ’oia e pure ’e e fāri’i i te fa’a’orera’a hara.

Te piti, ’ia tātarahapa ana’e tātou, e nehenehe tātou e ’ite pūai atu ā i te Vārua. Mai tā Elder Jörg Klebingat nō te Hitu ’Ahuru i ha’amāramarama mai, « e rahi mai te ti’aturira’a pae vārua ’ia tātarahapa ana’e ’outou ma te hina’aro mau ’e ma te ’oa’oa i tā ’outou mau hara ».³

’Ua ha’api’i te peresideni Russell M. Nelson ē, e tauturu te tātarahapa ia tātou ’ia riro hau atu mai te Fa’aora ra te huru. ’A tātarahapa ai tātou, e ’īriti tātou i te mau ’ūputa o te ra’i. « E mā’iti tātou e tupu i te rahi i te pae vārua ’e e fāri’i i te ’oa’oa—te ’oa’oa nō te fa’aorara’a i roto iāna ».⁴

Nō reira mai te mea e tītauhia ia ’outou ’ia tātarahapa i te hō’ē mea, ’a nā reira ! ’Aita te reira e hōro’a noa mai i te hau ia ’outou ’e e tauturu te reira ia ’outou ’ia riro hau atu mai te Fa’aora te huru, e tauturu ato’a rā te reira ia ’outou ’ia fāri’i pūai a’e i te Vārua ’e ’ia fāri’i i te mau pāhonora’a i tā ’outou mau pure.

’Ua ora na paha Iosepha Semita e mea maoro i teienei, e nehenehe fa’ahou rā tāna mau ha’api’ira’a i ha’api’i mai i tōna taure’are’ara’a, e tauturu ia ’outou i teie mahana. Te tahi noa tumu nō te fa’a’ite i te māuruuru nō te peropheta Iosepha Semita.

200ra’a o te matahiti fānaura’a

E 200 matahiti i teie iho ’āva’e, ’ua fā mātāmua te melahi Moroni i te peropheta Iosepha Semita (i te 22 nō Tetepa, nō te ha’apāpū maita’i). ’A tai’o i te reira i roto Iosepha Semita—’Ā’amu 1:27–54.

Fa’ata’ara’a

1. I roto Iosepha Semita, « History, circa Summer 1832 », 2, josephsmithpapers.org ; ’ua fa’atanohia te pī’āpā, te tomara’a ’e te pāpa’ira’a rahi.

2. Jeffrey R. Holland, ’Āmuira’a rahi nō ’Ātopa 2020 (Ensign ’aore rā Liahona, Novema 2020, 116).

3. Jōrg Klebingat, ’Āmuira’a rahi nō ’Ātopa 2014 (Ensign ’aore rā Liahona, Novema. 2014, 19).

4. Russell M. Nelson, « E nehenehe tātou e rave maita’i a’e ’e e ha’amaita’i ia tātou », ’āmuira’a rahi nō ’Ēperēra 2019 (Ensign ’aore rā Liahona, Mē 2019, 67).