“Faapotopoto—Aua Le Taapeape,” Mo Le Malosi o le Autalavou, Iulai 2023.
Sau, Mulimuli Mai ia te A’u
Faapotopoto—Aua Le Taapeape
E le faaalia e le Atua le faaituau i tagata, ma e le tatau foi ia i tatou.
Ata na tusia e Travis Constantine
I ni nai vaiaso talu ona ou taunuu i Siamani o se faifeautalai, sa ma tu’itu’i ai ma la’u soa taitai i le faitotoa o se tamaitai matua, o lē sa malie ma te aoaoina o ia.
I le taimi o le ma lesona muamua, sa ma valaaulia o ia e faitau leotele se mau. E ala i matatioata mafiafia, sa ia faitau ai ma le faigata tele, ma tauto’ai i upu. Ma sa pupuu ana tali i a matou fesili. Ma te lei mautinoa po o le a le tele o lona malamalama.
Sa ma fai atu ia te ia e faitau ni fuaitau faapitoa i le Tusi a Mamona a o lei oo i le isi a ma asiasiga. Ina ua ma toe o mai, sa ia faitauina ae sa foliga mai sa lei malamalama i ai. Sa ma taumanatunatu pe ono i ai ni ona luitau i le aoaoina. Sa ma taumanatunatu pe tatau ona ma faaauau le aoaoina o ia. Ae sa ma faaauau pea.
I le ma asiasiga na sosoo ai, sa faateia i maua ina ua ia fai mai ua manao o ia e papatiso. Ma, a o faaauau pea ona ma aoaoina o ia, sa ma matauina o lana faitau na faasolosolo ina lelei atu. O ana tali i ā ma fesili sa pupuu pea ae sa foliga mai sa sili atu ma mautinoa.
Sa lei umi ae ou siitia atu i se isi aai, ae sa tusi mai lla’u soa taitai ia te au mulimuli ane na papatisoina lenei tamaitai ma sa lagolagoina e tagata o le paranesi. Pe afai na e fesili mai ia i maua i ni vaiaso na muamua atu po o ai o a ma tagata aoao uma atonu o le a papatisoina ma maua se nofoaga i le Ekalesia, atonu e le’i i ai o ia i le pito i luga o le ma lisi.
Ma o lea na ma aoaoina ai se lesona tuai—le lesona lava lea e tasi na aoaoina e le Aposetolo o Peteru i aso la ua leva ma e manaomia e i tatou taitoatasi ona aoao pea: E le faailogaina tagata e le Atua”“ (Galuega 10:34).
O Se Suiga Tele
Sa pulefaamalumalu Peteru i le Ekalesia i se taimi faigata. Sa poloai atu le Faaola i Ana Aposetolo, “O atu ia outou i le lalolagi uma, ina talai atu ai le talalelei i tagata uma lava” (Mareko 16:15). Ae o le taimi lea sa latou talai atu ai ma papatisoina na o totonu lava o tagata Iutaia.
Ona tutupu lea o ni mea ofoofogia. O se taitai o le toaselau Roma e igoa ia Konelio—o se Nuuese, o se tagata e le o se Iutaia, o se fitafita sa ofuina le toniga lava lea e tasi e pei o i latou o e sa faasatauroina Iesu Keriso—sa vaai i se agelu i se faaaliga. Na ta’u atu e le agelu ia Konelio e auina atu se tasi i se tagata e igoa ia Peteru e aoao o ia. E lei leva lena, ae maua e Peteru se faaaliga lea na ia vaai ai i meaai sa faasaina i lalo o le tulafono a Iutaia, ae sa ta’u atu ia te ia e ai ona ua faamamaina e le Atua. O le taimi lava na uma ai ona maua e Peteru lenei faaaliga, na taunuu atu ai auauna a Konelio ma fai atu ia te ia latou te o. Sa ta’u atu e le Agaga ia Peteru e alu.
Ina ua uma ona feiloai ia Konelio ma vaaia lona lelei ma le faamaoni, sa iloa e Peteru le uiga o lana faaaliga vaaia. Sa manaomia ona oo atu le talalelei i Nuuese e pei foi o Konelio. O lea na aoao mai ai le Aposetolo o Peteru, “E le faailogaina tagata e le Atua: a e peitai o le mata’u ia te ia i nuu uma lava, ma fai le amiotonu ua talia i latou e ia” (Galuega 10:34–35). Sa aoao atu e Peteru ia Konelio e uiga ia Iesu Keriso ma valaaulia o ia ma lona aiga ina ia papatisoina. (Tagai i le Galuega 10.)
O le aumaia o le talalelei i Nuuese ua faailogaina ai se suiga tele mo le uluai Ekalesia. O nisi tagata sa faigata ona taliaina lenei suiga. Ae o le mea sa’o lea, ma sa aoao mai ai se upumoni autu e uiga i le Atua ma o tatou uso a tagata.
Leai se Faaituau
Pe a Ia faamanuiaina Ana fanau, e le faaalia e le Atua le faaituau e faavae i tagatanuu, ituaiga tagata, itupa, tamaoaiga, aoaoga, tomai, foliga vaaia, po o soo se isi lava eseesega e vaeluaina ai tagata. 1 Ua “tasi tagata uma i le finagalo o le Alii; o lē ua amiotonu ua faapitoa e le Atua” (1 Nifae 17:35). E mafai e tagata uma ona o mai ia te Ia, aua “ua tutusa tagata uma i le Atua” (2 Nifae 26:33). “A e vaai Ieova i le loto” (1 Samuelu 16:7). Na te talia i latou o e “fai le amiotonu, … naunau i le alofa, ma … feooai ma le lotomaualalo” (Mika 6:8).
E mafai esoo se tasi ona filifili e sau ia Iesu Keriso, osia feagaiga ma le Tama Faalelagi, ma mulimuli i o La’ua ala. Ma o lenei upumoni e tatau ona taiala ai le auala tatou te faasoa atu ai le talalelei a le Alii ma Lona alofa.
E le mafai ona na ona tatou vaai i uiga i fafo o se tasi ma mafaufau e le o i latou o ni “ituaiga” mo le talalelei. E le mafai ona tatou faaaogaina faailoga faalelalolagi i tagata ma mafaufau o na faailoga e faaleaogaina ai i latou mai le faaaofia ai i le lotu. E le mafai ona tatou filifili e aua ne’i auauna atu i se tasi ona e eseese o latou manatu faaupufai, mea e fiafia i ai, po o tofo mai ia i tatou.
E le vaai le Atua i se tagata o se tuufaatasiga o faailoga e faatusa i vaega eseese po o uiga auaumama. Na te vaai i se tagata e toatasi—Lona atalii/afafine. Ma o le auala lena e tatau ona tatou vaai atu ai i tagata taitoatasi—o se tagata tulaga ese ma se avanoa tutusa ma le tomai e o mai ai i le Atua.
Ia Avea ma se Tagata Faapotopoto
Ua uunaia e Peresitene Russell M. Nelson i tatou ina ia auai i le faapotopotoina o Isaraelu.2 Ae afai tatou te filifili e avea ma “faailoga tagata” e le pei o le Atua, pe a oo i le faasoaina atu o le talalelei ma faaaofia tagata i le lotu, atonu o le a tatou faataapeapeina pe vaevaeina e sili atu nai lo le tatou faapotopotoina ma le faalotogatasiina.
Sei o tatou faia taitoatasi se tautinoga: aua nei toe faataapeapeina. Avea o se tagata faapotopoto. Alofa, faasoa, ma valaaulia.
Sa ma le mautinoa ma la’u soa pe o le fafine sa ma aoaoina i Siamani sa foliga mai o le a papatisoina. Ma te lei iloaina lona loto, ae sa silafia e le Atua. Ua ou fiafia sa uunaia i maua e aoao pea o ia.
A o e taumafai e mulimuli i le Agaga ma taumafai e aua nei avea ma se tagata e faailogaina tagata, o le a taialaina oe e fesoasoani ia i latou o siomia oe e o mai ia Keriso, e tusa lava po o a o latou eseesega.