Imaron̄ In Kōm̧m̧an Men Otemjej Ilo Kraist

Jodikdik ro rej kwaļo̧k wāween an Kraist kar kōkajoor er kōm̧m̧ani men ko reppen (lale Pillippai 4:13).

Rilo̧mo̧o̧r Ejeļā Wāween Jipan̄ Eō ilo Aō Nan̄inmej in Kāānjōr

juon jiron̄

Mour eo aō ekar em̧m̧an m̧ae wintōr ilo 2020. Ikar nan̄inmej kōn ta eo kōm ekar ļōmņak ekar juon kinej, im ikar bōk elōn̄ kattōn uno ko letok jān taktō. Tokālik, ikar jinoe en̄jake an emetaktak bōra, em̧ōkm̧ōk, im ļōtļo̧k. Ejjab to tokāļik ikar rūj ilo 10 awa jima bon̄ ļōmņak wōt ke ejibbon̄ im kar jino kepojak n̄an jikuuļ.

Ke sister eo aō ekar ba n̄an eō bwe ej bon̄ wōt, ikar ettōr n̄an ruum̧ eo an jinō im jema ilo wiwijet. Jinō ekar jibwe bōra, im ikar lukkuun biba. Kōm ekar etal im loļo̧k taktō raan eo tok juon, eo ekar kōm̧m̧ane elōn̄ test ko.

Bon̄in eo ro jinō im jema rekar jan̄ tok n̄an ruum̧ eo aō. Rekar ba n̄an eō bwe ikar leukemia im bwe kōm aikuj etal n̄an juon hospital n̄an bōk eļapļo̧k uwaak. Ikar ped ilo emergency ruum̧ eo aolepen bon̄in eo im kar jinoe chemotherapy treatment jejjo raan tokālik.

Treatment eo aō enaaj wōnm̧aanļo̧k bar juon iiō ak ruo, ako ekar jino em̧m̧an jidik kōm̧adm̧ōde. Ikar en̄jake an em̧m̧anļo̧k im kar kōjatdikdik ke imaron̄ kar bar maron̄ jepļaak im jikuuļ ejjab to jān iien eo. Ekar jab pidodo. Chemo eo ekar jelōt eō ilo elōn̄ kain wāween, ekoba jekjek ilo di ņae etan avascular necrosis me ej kōm̧m̧an bwe en apan̄ aō etetal.

jiron̄ eo ilo hospital

Jekdo̧o̧n—bōlen em̧ool kōn menin—ekar ļapļo̧k aō eddōk im epaakeļo̧k Jema Ilan̄. Kiio ewōr juon aō meļeļe em̧wilaļ kōn Pinmuur eo an Jisōs Kraist. Ikōn ļōmņak kōn Pinmuur eo An āinwōt juon men kwoj wōt aikuji n̄e kwoj kōm̧m̧an bōd. Men eo ej m̧ōttan, ak pedped ioon Rilo̧mo̧o̧r eo ej barāinwōt juon men me ekar jipan̄ eō an dik aō en̄jake ajimakeke.

Jisōs Kraist ekar bōk ioon Make aolepen en̄taan im jerawiwi ko ad, eo meļeļein E ejeļā lukkuun jekjek eo n̄an jipan̄ eō ilo aō kar ioon nan̄inmej in leukemia. Ioon jabdewōt apan̄ ko emaron̄ kōm̧m̧ān en̄jake in ajimakeke, ak kōn Pinmuur eo an Kraist, jemaron̄ bōk aenōm̧m̧an ilo jeļā bwe E elukkuun jeļā ta eo jej ioone.

Ruby H., Utah, USA