« Ineine nō te riro ’ei misiōnare », Nō te pūai o te feiā ’āpī, Māti 2023
Ineine nō te riro ’ei misiōnare
Nāhea ’outou e ’ite ai ē, ’ua ineine ’outou nō te tāvini i te hō’ē misioni ?
’Ua fa’aha’amana’o mai te peresideni Russell M. Nelson ia tātou i te faufa’a rahi o te ’ohipa misiōnare, ’e ’ua fa’aitoito i te feiā ’āpī tamāroa ’e te feiā ’āpī tamāhine ’ia fa’aineine nō te tāvini.1 E ’ohipa rahi te rirora’a ’ei misiōnare rave tāmau, mai te reira ato’a rā te rirora’a ’ei hō’ē !
I te tahi taime, e nehenehe te fa’aineinera’a misiōni e riro ’ei ’ohipa teimaha, nō te mea tē vai ra e rave rahi ’ohipa e rave :
« Tītauhia iā’u ’ia ha’aputu i te moni ».
« E ti’a iā’u ’ia tuatāpapa i te ’Ia Poro Haere i Tā’u nei ’evanelia. »
« Nāhea vau ’ia tunu i te mā’a ’aore rā ’ia pu’a i tō’u iho ’ahu ? »
« E ti’a iā’u e fa’ata’a i te hō’ē fārereira’a ’e tō’u ’episekōpo ».
« ’Ua nava’i ānei tō’u ti’aturira’a nō te fa’a’ite i te ’evanelia ? »
E mea tano teie mau mana’o ’e mau māna’ona’ora’a. Terā rā, e mea maita’i a’e ’ia rōtahi i ni’a i te ’ōpuara’a rahi a’e nō tā ’outou tāvinira’a.
Tā ’outou tumu
E mea maita’i ’ia ui ia ’outou iho : « Nō te aha vau e hina’aro ai e tāvini i te hō’ē misiōni ? »
Penei a’e tē mana’o ra ’outou ē, ’o te reira tā ’outou hōpoi’a. Penei a’e tē ’oa’oa nei ’outou ’ia ora i roto i te hō’ē vāhi ’āpī ’aore rā ’ia ha’api’i i te hō’ē reo ’āpī. Penei a’e e hina’aro ’outou e fa’a’ite i tō ’outou ’itera’a pāpū nō te tāra’ehara a Iesu Mesia ’aore rā i te ha’api’ira’a tumu o te ’utuāfare mure ’ore. ’Aore rā tē ti’aturi nei ’outou, mai tā te peresideni Nelson i parau ē, « e ti’a i te mau ta’ata ato’a ’ia fāna’o ’ia ’ite i te ’evanelia a Iesu Mesia tei fa’aho’i-fa’ahou-hia mai ».2
Te tahi mau tumu nō te tāviniraa i te hō’ē misiōni, e mea maita’i a’e ïa i te tahi atu, ’e ’ua hau i te hō’ē tumu maita’i nō te haere. E ti’a mau i tā ’outou mau tumu ’ia rōtahihia i ni’a i tō ’outou here i te Fatu ’e i tāna ’evanelia i fa’aho’i-fa’ahou-hia mai. ’A feruri i ni’a i tā ’outou mau tumu ’e e tauturu ānei te reira ia ’outou ’ia tāvini i te Fatu « ma tō ’outou ’ā’au ato’a, ma tō ’outou pūai, ma tō ’outou mana’o ’e ma tō ’outou itoito ho’i » (Te Ha’api’ira’a Tumu ’e te mau Fafaura’a 4:2). ’E mai te mea ’aita ’outou e hina’aro, e nehenehe ’outou e pure i te Metua i te ao ra nō te tauturu ia ’outou ’ia roa’a te reira.
Tō ’outou ’itera’a pāpū
« E ’itera’a pāpū ānei tō’u nō ni’a i te ’evanelia a Iesu Mesia ? ’E tē ti’aturi mau ra ānei au, ’ua pi’i ’oia iā’u nō te tāvini ? »
Hō’ē fā misiōnare ’o te anira’a ïa ia vetahi ’ē ’ia haere mai i te Mesia ra. Mai te mea tē ani nei ’outou i te ta’ata ’ia ha’api’i mai nō ni’a ia Iesu Mesia ’e tāna ’evanelia, e mea faufa’a te reira nō te fāri’i i tō ’outou iho ’itera’a pāpū.
’Aita e tītauhia ’ia maita’i roa tō ’outou ’itera’a pāpū ; e vai tāmau noa te vāhi nō te patu i ni’a iho. Te mea faufa’a roa ’o te niu ïa : Iesu Mesia. E nehenehe ’outou e ha’api’i ’ia ’ite iāna nā roto ia ’outou iho, ma te tuatāpapara’a i tāna mau parau i roto i te mau pāpa’ira’a mo’a, te purera’a i te Metua i te ao ra nā roto i tōna i’oa, ’e te tūtavara’a ’ia ora mai iāna te huru.
Te rirora’a ’ei misiōnare fa’ahiahia e ’ere noa ïa i te rirora’a ’ei ta’ata ’aravihi i te paraparaura’a i te ta’ata i te mau taime ato’a, ’aore rā ’ia tāmau ’ā’au i te mau pāpa’ira’a mo’a ato’a (noa atu e nehenehe ā ’outou e ’ohipa nō te ha’amaita’i i tō ’outou mau ’aravihi). ’A tāmau noa ai ’outou i te vare i te Fatu, ’ia ti’aturi iāna, ’e tē hina’aro mau nei e rave i tāna ’ohipa, e fa’arahi ’oia i tā ’outou mau tauto’ora’a ’e e tauturu ho’i ’ia fa’ariro ia ’outou ’ei misiōnare ’aravihi.
Tō ’outou ’ōro’a hiero
« ’Ua ineine ānei au nō te haere i te hiero ? »
Hou ’outou ’a tāvini ai i te hō’ē misiōni, e mea pāpū e fāri’i ’outou i tō ’outou ’ōro’a hiero i roto i te hiero, mai te mea ’aita ā ’outou i rave atu ra i te reira.
’Ua riro te mau ha’amaita’ira’a o te hiero ’ei « hō’ē mea tumu roa tei hi’o-pinepine-’ore-hia i roto i te fa’aineinera’a nō te tahi pi’ira’a i te ’ohipa ». ’E « ’o tō ’outou iho vai-ti’amā-ra’a te tītaura’a faufa’a roa a’e nō te fāri’i i te mau ha’amaita’ira’a o te hiero ».3 ’A fa’aineine ai ’outou ’e ’a ti’amā ai ’outou nō te haere i te hiero ’e nō te rave i te mau fafaura’a mo’a ’e te Atua, e fa’aineine ato’a ïa ’outou ia ’outou iho ’ia riro ’ei misiōnare nāna (hi’o Te Ha’api’ira’a Tumu ’e te mau Fafaura’a 105:33 ; 109:22).
I te pae hope’a, e nehenehe ’outou e haere i roto i te hō’ē piha fa’aineinera’a nō te hiero. Terā rā, ’a tīa’i noa ai i te reira taime, e nehenehe ’outou e rave i tā ’outou iho tuatāpapara’a ’e te fa’aineinera’a. ’Ua hōro’a mai te peresideni Nelson i te tahi mau pāpa’ira’a mo’a ’e te tahi mau tumu parau nō te ’evanelia tā ’outou e nehenehe e tuatāpapa nō te ha’api’i mai nō ni’a i te hiero.4 E nehenehe ato’a ’outou e ’apo rahi mai atu ā i ni’a temples.ChurchofJesusChrist.org.
’Ua ti’amā ’e ’ua ineine
Fa’ahou ā, e rave rahi huru fa’aineinera’a nō te misiōni. ’Oia mau, e ti’a ia ’outou ’ia ha’aputu i te moni, ’ia tāpe’a noa i te tino pautuutu, ’e ’ia ha’api’i i te mau ’aravihi tumu mai te tīfaifaira’a i te ’ahu ’aore rā te tunura’a i te mā’a. E nehenehe ā ’outou e fāri’i i te reira mau fā.
Eiaha rā e vaiiho i te mau mea ri’iri’i ’ia ha’afifi ia ’outou. Te fa’aineinera’a faufa’a roa a’e tā ’outou e nehenehe e rave, ’o te mea ïa e fa’ati’a ia ’outou ’ia riro ’ei mauiha’a ti’amā ’e te ’aravihi i roto i te rima o te Fatu.
Mai te mea tē mana’o ra ’outou ē, e’ita e tano ia ’outou, tē hepohepo ra ’outou, ’aore rā, e mea pāpū ’ore nō te tāvini, mai te reira iho ā. ’A ha’amana’o noa ē, tē hina’aro nei te Fatu ’ia manuia ’outou ! Mai te mea e ti’aturi ’outou iāna ’e e pe’e i te arata’ira’a a te Vārua, e tauturu ’oia ia ’outou ’ia fa’aineine nō te riro ’ei misiōnare maita’i roa a’e tā ’outou e nehenehe e riro mai.