“‘O Auala e 5 e Tumau ai i luga o le Ala,’” Mo le Malosi o le Autalavou, Fep. 2023.
O Auala e 5 e Tumau ai i luga o le Ala
Na faailogaina e Iesu Keriso le ala ma taitai atu ai le ala i lo tatou aiga faalelagi.
Ua asiasi Elder Dale G. Renlund i Natal, Pasila, ia Novema 2016.
I ni nai tausaga ua mavae, sa matou savalia ai ma lo’u aiga se alasopo mauga i Aisalani e matamata i se afu lauiloa. Matou te lei oo lava i lenei mauga, sa matou le mautonu e uiga i le alasopo, ma e le o matou o ni tagata poto masani i savaliga sopo.
Sa matou vaavaai atu i isi o amataina le ala ma mulimuli i ai. E lei leva, ae le vaaia i latou ma sa faapena foi le ala! Sa matou tilotilo ma le faaeteete ma matauina maa ua faaputuina ma le loto i ai, sa ta’ua o maafaailoga [cairns], ua maka ai le ala agai i le afu. Sa matou matauina foi ni vaega o le eleele e lata ane i le alasopo sa i ai le mutia vavae papae.1 O le laa atu i luga o lena mutia e masani lava ona faatumulia ai o matou seevae i le palapala ma le vai.
Sa matou aoaoina o le mutia vavae e ola i faataufusi ma faailogaina ai se ala matou te le’i mananao e mulimuli ai. Sa oo ina matou mautinoa o le mulimuli i maafaailoga o le a taitai atu ai i matou i le afu.
Sa lei faigofie le auala, ae sa matou tumau pea, ma mulimuli ma le faaeteete i maafaailoga ma aloese mai le mutia vavae. Mulimuli ane, sa matou taunuu atu i le afu matagofie ma fiafia ai i le vaaiga mai le tumutumu mauga ma le mālū o le vai.
A o matou savavali atu i lalo o le mauga, sa matou vaaia ai na fesoasoani maafaailoga ia i matou e aloese mai vaivai loloto ma tofē tifatō matou te lei vaaia muamua. Sa matou faafetai ona na fesoasoani na maafaailoga e taitai saogalemu i matou.
I la tatou malaga i lo tatou aiga faalelagi, e mafai ona faigata ona tautai le ala. O le mea e faafetai ai, ona o Iesu Keriso sa “faailogaina ma taitaia le ala.”2 A o tatou suesue i Lona soifuaga ma aoaoga, e mafai ona tatou aoao i le ala na Ia faatautaia ai le olaga faitino ma tuu ni maafaailoga faafaatusa mo i tatou e mulimuli ai. Pe a tatou mulimuli i na maafaailoga, i le faia o mea na faia e Iesu, e mafai ona tatou taunuu ma le mautinoa i lo tatou taunuuga.
Maafaailoga #1. Iloa Pe O Ai Oe
Ata na tusia e Bryan Beach
Sa aoao Iesu Keriso a o tuputupu ae o Ia ma sa oo ina silafia pe o ai o Ia (tagai Luka 2:49). Faatasi ai ma le talitonuga i Lona faasinomaga, sa mafai ai ona Ia tautino atu o Ia o le Mesia lea na fetalai ai perofeta (tagai Faaliliuga a Iosefa Samita, Mataio 4:18 [i le Mataio 4:19, vaefaamatalaga a]; Ioane 4:25–26).
O le iloaina po o ai oe o se maafaailoga autu taua tele. Po o le a lava le isi mea e te filifili e faailoa ai oe lava, o lou faasinomaga sili ona taua o oe o se atalii/afafine o le Atua. Afai e te le maua lenei maafaailoga, e mafai ona e se ese mai le ala ma iu i luga o le mutia vavae.
Maafaailoga #2. Saili ia Iloa le Finagalo o le Tama Faalelagi
Sa saili Iesu Keriso ia iloa le finagalo o Lona Tama. Ina ua mavae Lona papatisoga, sa “aveina ai lea o [Ia] e le Agaga i le vao ina ia faatasi ai ma le Atua.” O iina, sa Ia faalaina ai ma “talanoa ma le Atua” (Faaliliuga a Iosefa Samita, Mataio 4:1–2 [tagai Mataio 4:1, vaefaamatalaga e; Mataio 4:2, vaefaamatalaga i]; ua faaopoopo le faamamafa). Sa Ia aoaoina le finagalo o Lona Tama ina ia le masalosalo i le finagalo o le Atua mo Ia. O le aoaoina o le finagalo o le Atua o se maafaailoga lea ua tuua e Iesu mo i tatou.
E mafai ona e aoaoina le finagalo o le Atua mo oe lava e ala i tusitusiga paia, upu a perofeta soifua, ma musumusuga a le Agaga Paia. Ae e manaomia foi ona e talanoa ma le Atua i le tatalo, e pei ona sa faia e Iesu. O le iloaina o lou sootaga moni ma le Atua—o Ia o lou Tama ma o oe o Lona atalii/afafine—e avea ai le tatalo ma mea masani (tagai Mataioi 7:7–11). O faigata i le tatalo e aliae mai mai le faagaloina o lenei sootaga.
Maafaailoga #3. Faaogatusa Lou Loto ma le Finagalo o le Tama Faalelagi
Sa faaogatusa e Iesu Keriso Lona finagalo ma le finagalo o Lona Tama (tagai Ioane 6:38). O le faaogatusaina o o tatou loto ma le finagalo o le Atua o se isi maafaailoga lea na tuua e Iesu e faailoga ai le ala.
E manaomia ona e faaogatusaina ma le faaeteete lou loto ma le finagalo o lou Tama oi le Lagi. O le tatalo o se tasi lea o auala e faia ai. O le faamoemoega o le tatalo e le o le suia o le finagalo o le Atua ae ia fesoasoani ai ia te oe e aoao ma talia Lona finagalo.
Maafaailoga #4. Osia ma Tausia Feagaiga ma le Atua
Na fetalai atu Iesu Keriso i Ona soo, “Ina mulimuli mai ia ia te au” (Mataio 4:19). Tatou te faia e ala i le faatinoina o le faatuatua ia te Ia, salamo, papatisoina i Lona suafa, ma maua le Agaga Paia. I le papatisoga, tatou te osifeagaiga, pe folafola atu, ia tausia poloaiga ma osia ma tausia isi feagaiga ma le Atua. O feagaiga taitasi o se maafaailoga i luga o le ala o feagaiga lea e tau atu ia Keriso.
I la matou savaliga sopo, sa matou saoloto ai ma lo’u aiga e filifili se auala e tau atu i le tumutumu o le mauga, ae o se auala ese atonu e le mafai, ma na foliga mai o le a le tau atu lava i le afu. Atonu semanu matou te mau i le palapala, poloka i tofē lamatia, pe fati ona o le vaivai. O le tumau ai i luga o le ala ua maua ai le auala sili ona tuusao ma mautinoa i lo tatou taunuuga.
E le mafai ona tatou faia ni a tatou lava ala ma faamoemoe i taunuuga o folafolaga a le Atua (tagai Mataio 7:24–27). Tatou te saoloto e filifili la tatou lava ala, ae e le mafai ona tatou filifilia taunuuga o le lē mulimuli i le ala ua faaali mai e le Atua. E le mafai ona tatou tautevateva i se tofē ma “filifili” e aua nei pauu.
Maafaailoga #5. Tumau e oo i le Iuga
O Iesu Keriso, e ala i Lana Togiola, na faamaeaina le galuega na tuuina atu e le Atua ia te Ia e fai (tagai Ioane 17:4). O le tumau e oo i le iuga ma le faamae’aina o la tatou galuega o se maafaailoga talafeagai lea e mulimuli ai ina ia taunuu atu i lo tatou taunuuga manaomia.
Afai tatou te le malamalama i mea na faataunuuina e le Faaola, o le a tatou iu lava i seevae susū, ma palapala aua tatou te lei iloaina lava o Ia pe faatasi atu ia te Ia i Lana galuega (tagai Faaliliuga a Iosefa Samita, Mataio 7:23 [i le Mataio 7:23, vaefaamatalaga a]).
Sa silafia e Iesu Keriso po o ai o Ia. Sa Ia silafia ma faaogatusa Lona finagalo ma le finagalo o Lona Tama. Sa Ia osia ma tausia feagaiga ma le Atua. Na Ia tumau e oo i le iuga. O le faia o lena mea, sa Ia faailogaina le ala ma taitai le auala. O la tatou galuega o le mulimuli ia te Ia ma maafaailoga sa ia tuuina mai, e le gata a o tatou i ai iinei i le lalolagi, ae faapea foi i le faavavau atoa.3 Ona avea ai lea o i tatou ma suli e maua mea uma o i ai i le Tama Faalelagi (tagai Faaliliuga a Iosefa Samita, Ioane 3:36 [i le Ioane 3:36, vaefaamatalaga a).