« Te semeio hope’a », Nō te Pūai o te Feiā ’Āpī, Tēnuare 2023.
Mai, pe’e mai
Te Semeiohope’a
Tē vai ra te hō’ē semeio faufa’a roa a’e i te tā’āto’ara’a.
I te Atua, e ti’a te mau mea ato’a nei (hi’o Luka 1:37 ; Philipi 4:13). E nehenehe ānei rā tā ’outou e pure nō te hō’ē mea mau ’e ’ia tae mai te reira ? Nō te aha te tahi mau ta’ata e fāri’i ai i te mau semeio ’āre’a vetahi ’aita ? ’E e aha te aura’a mau o teie mau mea nō ’outou ?
E toru semeio tahito, e toru semeio nō teie ’anotau, ’e hō’ē semeio hope’a tē ha’api’i-ri’i mai nei ā ia tātou.
1
Semeio tahito
Mau fa’ahōho’ara’a nā Camila Gray
’Ua hau atu paha o Maria i te māere ri’i a parau ai te melahi Gaberiela iāna ē, e riro ’oia ’ei metua vahine nō te Fa’aora. E’ita e ti’a ’ia tupu. ’Ua fa’ata’a rā te melahi Gaberiela ē, e tamaiti Iesu nā te Atua ’e ’ua parau, « ’Aore roa ho’i e mea e ’ore e ti’a i te Atua » (Luka 1:37). ’E ’ua tano te melahi. ’Ua fānau o Maria i te Fa’aora o te ao nei.
Te semeio nō teie ’anotau
E piti misiōnare e tāvini ra i Mehiko tei rātere nā ni’a i te hō’ē purūmu rahi i te mau mahana ato’a. I te tahi taime e tīa’i rāua 10 minuti hou a nehenehe ai e haere, ’e i te rahira’a o te taime, tītauhia ia rāua ’ia horo ! I muriho ’ua fārerei rāua i te hō’ē melo pa’ari, taere e te paruparu. ’Ua hina’aro ’oia e haere mai i te purera’a nā muri iho ia rāua, terā rā—teie te tahi tuha’a e’ita e nehenehe e rave—e tītauhia iāna ’ia haere nā ni’a i te purūmu rahi. ’E ’aita, e’ita tā te mau misiōnare e nehenehe e amo iāna (noa atu ē, ’ua feruri pāpū rāua i te reira !). I muri iho rā, ’ua fāri’i rāua i te hō’ē semeio. « I te taera’a mātou i ni’a i te purūmu », tē nā ’ō ra te hō’ē o te mau misiōnare, « ’aita hō’ē pere’o’o uira i tere mai. ’Ua ti’a ia mātou ’ia haere marū roa ’e ma te pāruruhia ».
E’ita e nehenehe ? ’A feruri fa’ahou !
Nā te Atua, e ti’a te mau mea ato’a (tae noa atu i te mau mea e’ita e ti’a !).
2
Semeio tahito
Tē vai ra hō’ē ta’ata tei « ro’ohia i te ma’i hāpepa », ’aore rā te ha’aparuparu. ’Ua ti’aturi ’oia e nehenehe te Fa’aora e fa’aora iāna. Terā rā ’ua hā’atihia Iesu e rave rahi ta’ata, ’e e mea fifi roa ’ia haere iāna ra. Nō reira e aha tā terā ta’ata i rave ? ’Ua ha’apou maira tōna mau hoa iāna ē tōna ro’i mai ni’a mai i te tāpo’i fare e tae atu ai i te Fa’aora ra. ’Aita, e ’ere paha i te mea ’ōhie. Terā rā, e mea pāpū ē, e fa’aro’o rahi tōna ’e tō tōna mau hoa. ’E ’ua faufa’ahia te reira—’ua fa’a’ore Iesu i te mau hara a taua ta’ata ra ’e ’ua fa’aora iāna (hi’o Luka 5:17–26).
Te semeio nō teie ’anotau
Tē ha’uti ra ’o Ella W. ’e tōna mau hoa i roto i te ’āua ’a mo’e ai te hoa mo’o ’ūrau a vetahi o tōna mau hoa. E ’ere paha te reira i te mea fifi roa. ’A ha’amana’o rā ē, te mau mo’o e taui te ’ū nō te ’āno’i i te mau mea e hā’ati ra ia rātou. I muri a’e i te hō’ē taime mā’imira’a, ’ua fa’aoti Ella e taime nō te pure ma te fa’aro’o. ’Aita i maoro roa, ’ua ’itehia ia rātou te mo’o i ni’a i te hō’ē tumu rā’au ! « I te taera’a te reira i roto i te rima o te hō’ē ta’ata, ’ua parau mātou i te hō’ē pure ha’amāuruuru i te Metua i te ao ra », tē parau ra Ella.
E tae mai te mau semeio nā roto i te fa’aro’o ia Iesu Mesia
E nehenehe te mau mea ato’a e’ita e tupu, e tupu noa i te Atua. Tītauhia rā ia tātou ’ia fa’atupu i te fa’aro’o i te Fa’aora (’aore rā ’ia vai noa a’e te hina’aro ’ia ti’aturi !) ’e ’ia fa’a’ohipa i taua fa’aro’o ra nō te fa’atupu i te mau semeio.
3
Semeio tahito
’Ua fa’aipoipohia Elisabeta ’e o Zakaria e rave rahi matahiti ’aita rā e tamari’i. I te tahi taime, mai te huru ra ē, ’aita tā rāua mau pure fa’aro’o i pāhonohia. ’E i te hope’a, ’ua pa’ari roa rāua nō te fānau i te tamari’i. I muriho rā, ’ua fā mai te hō’ē melahi ia Zakaria ’e ’ua parau atu iāna ē, e fānau o Elisabeta i te hō’ē ’aiū. (Te ’ohipa ’ārearea : ’ua riro mai te ’aiū ’o Ioane Bāpetizo !) I te pae hope’a, ’ua riro mai te mea tupu ’ore ’ei mea tei tupu. ’Ua tīa’i maoro rā Elisabeta ’e ’o Zakaria (hi’o Luka 1).
Te semeio nō teie ’anotau
’Ua māuiui o Lindsey M. i te ma’i hōpi’i. « I te mau po’ipo’i ato’a, ’ua tāparu vau i tō’u Metua i te ao ra ’ia hōpoi ’ē atu i tō’u mau ira », te parau ïa a Lindsey. ’Aita rā rātou i haere ’ē atu. ’A tīa’i noa ai Lindsey ’ia fa’aorahia ’oia, ’ua fāri’i ’oia i te mau ha’amaita’ira’a autahu’ara’a, tei hōpoi mai i te hau iāna. ’E ’ua riro taua hau ra ’ei semeio iho. « ’Ia fāriu ana’e tātou i ni’a i tō tātou Metua i te ao ra, e pāpū maita’i ē, tei reira ’oia nō tātou, ma te ha’aparare i te mau semeio ’e te pūpū i te tāmāhanahanara’a », tē nā reira ra ’oia. I te pae hope’a ’ua fāri’i Lindsey i te hō’ē tāpūra’a ’o tei tauturu i tōna mau ira.
E tae mai te mau semeio mai te au i te hina’aro o te Atua
E nehenehe te Atua e rave i te mau mea ato’a. E fa’aro’o rahi paha tō ’outou. E tae mai rā te mau semeio mai te au i te tārena ’e te hina’aro o te Metua i te ao ra ’e mai tāna e fa’anaho. ’A ’imi i te tahi atu mau semeio i ni’a i te ’ē’a, mai te hau ’e te pūai nō te fa’a’oroma’i.
Te semeio hope’a
’Ua paraparau rahi tātou nō ni’a i te mau semeio. Terā rā, tē vai ra hō’ē semeio rahi a’e ’e te faufa’a rahi a’e i te tā’āto’ara’a. Taua semeio ra o te taime ïa ’a haere mai ai te Tamaiti a te Atua i ni’a i te fenua nei mai te hō’ē ’aiū, ’ua ha’api’i ’e ’ua fa’aora i muri iho, ’e ’ua hōro’a i tōna iho ora. ʼUa rave Iesu Mesia i niʼa iho iāna tā tātou mau hara, mau māuiui, ʼe mau paruparu. I roto i tāna semeio tē vai ra e toru mahana i roto i te hō’ē mēnema ’e i muri iho te hō’ē ti’afa’ahoura’a tei fa’atupu i te ora i muri a’e i te pohe nō tātou pā’āto’a. E taui te reira semeio i te mau mea ato’a.
E mea ’ōhie ’ia haru i te tāmatara’a i te fa’aro’o i roto i te hō’ē semeio ta’a ’ē. ’E e nehenehe te reira e riro ’ei mea pa’ari ’ia ’ore ana’e tātou e ’ite i te hina’aro o te Metua i te ao ra. Nō reira, ’eiaha e rōtahi i tō ’outou fa’aro’o i ni’a i te hō’ē semeio tā ’outou e hina’aro, e fa’atumu i te reira i ni’a i te semeio nō te tāra’ehara a te Fa’aora. ’A fa’aro’o ē, ’aita e mea e ’ore e ti’a i te Atua, nā reira ato’a te mau mea tā ’outou e pure ra. Terā rā, e fa’aro’o ato’a tō ’outou ē, e mea maita’i a’e tōna hina’aro i tō ’outou iho. Mai te mea ē, ’aita tā ’outou mau pure e pāhonohia mai tā ’outou e ti’aturi nei, e ha’apūai ’oia ia ’outou ’e e tauturu ’oia ia ’outou ’ia fa’a’oroma’i.
Te rāve’a hope’a
’A fa’atumu ai ’outou i tō ’outou fa’aro’o i ni’a ia Iesu Mesia, e hāro’aro’a ’outou e aha te aura’a nō te parau ē, e ti’a te mau mea ato’a i te Atua ra. E ti’aturi ’outou ē, e nehenehe te Metua i te ao ra e pāhono i tā ’outou mau pure, ’e e ti’aturi ’outou i tōna hina’aro ’e e fāri’i ’outou i tōna hau ’ia ’ore ana’e te mau mea e haere mai tei ’ōpuahia. E patu i tō ’outou fa’aro’o i roto ia Iesu Mesia. ’O ’oia te semeio. ’E e ti’a te mau mea ato’a iāna ra.