“Faatuatua i le Pogisa,” Mo Le Malosi o le Autalavou, Tes. 2022.
Faatuatua i le Pogisa
O ni nai fautuaga nei na fesoasoani ia te au i fesili ma masalosaloga.
Atapue mai le Getty Images
A o o’u laitiiti, sa masani ona asiasi lo’u aiga i le Great Basin National Park i Nevada, ISA. O se tasi o mea ofoofogia i le paka o le Ana o Lehman.
E taitaia oe e se taitai o maimoaga i le taele o le ana ma, i se tulaga patino, na te tapeina moli uma. Ua e oo i le pogisa atoa. O se lagona mamafatū, ma o le manatu o le sailia o lou ala e alu ese mai le ana e aunoa ma se malamalama e lofituina. O le mea e faafetai ai, e toe ki e le taitai o maimoaga ia moli ma toe taitai atu oe i fafo ma le saogalemu.
O nisi taimi tatou te feagai ai ma fesili ma e oo lava i masalosaloga e uiga i le Ekalesia ma a tatou molimau. E mafai ona lagonaina le mamafa ma le le mautinoa, e pei o le i ai i le ana pogisa.
E le afaina le i ai o ni fesili ma ni atugaluga. O le mea o le a faia ai se eseesega tele o le auala e te taulimaina ai.
O ni nai fautuaga nei na fesoasoani ia te au.
Faatino le Faatuatua
Ua ou iloaina afai ou te taulimaina fesili ma atugaluga mai se tulaga o le faatuatua, e mafai lava ona ou sailia se auala e agai ai i luma. “O le faatuatua e le o le maua lea o se malamalama atoaatoa i mea” (Alema 32:21). Ma, “e tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe” (Alema 32:27).
O le a ta’u atu e le lalolagi ia te oe afai e le mafai ona e faamaonia se mea e ala i se tulaga faatonuina faasaienitisi, e le mafai ona moni. E le o le ala lenei a le Alii. E pei ona ta’u atu e le Faaola ia Toma, o lē o le a le talitonu sei vagana ua ia tago i manu’a o le Faaola toetu mo ia lava, “Aua foi e te masalo vale, a ia e talitonu,” (Ioane 20:27).
Ole Atu, Saili, Tuitui Atu
O le fasifuaitau “ole atu, saili, tuitui atu” o loo ta’ua soo i tusitusiga paia (tagai Mataio 7:7; Mataupu Faavae ma Feagaiga 88:63). O le ala a le Alii e fesoasoani ai ia i tatou i a tatou fesili e mo i tatou e fesili atu ai ia te Ia ni fesili.
“A e afai ua leai se poto i so outou, ina ole atu ia i le Atua.” (Iakopo 1:5). Alu sa’o i le puna o upumoni uma. E alofa le Atua ia te oe ma o le a fesoasoani ia te oe.
Ia Avea o se Tagata e Saili i le Upumoni
Ua ou iloa o i latou o e saili ma le faamaoni ma le lotomaualalo i le upumoni o le a tele ina maua tali i a latou fesili i se taimi mulimuli ane. I se isi itu, o i latou o e na o le saili masei o le a na’o na agai mamao i luma mai le upumoni.
Ia avea ma se tagata e saili i le upumoni. O loo i ai le upumoni, ma e mafai ona e mauaina.
Fai se Pusa “Ina Ia Taliina Mulimuli”
O le a la lau mea e fai pe afai ua e sailia ma le lotomaualalo ma le faamaoni ia tali ma foliga e le oo mai lava?
Ou te toe fai atu, ou te filifili e taulimaina ma le faatuatua. Ua ou faia se tamai pusa i luga o se fata i lo’u mafaufau—e pei o se pusa ‘oa matagofie. O loo tusia ai i luga ia upu “Ina Ia Taliina i se Aso Mulimuli Mai.”
Soo se taimi lava e i ai sa’u fesili po o se popolega e le mafai ona ou foiaina, ou te tusia i se fasi pepa faalemafaufau, gaugau faalelei, ma tuu i totonu o le pusa. Ona ou toe tuuina lea i luga o le fata.
O le faia o lena mea, o loo ou faatinoina i le faatuatua o le a i ai se aso o le a tali mai ai le Alii. Atonu o le a Ia faia, atonu o le a Ia le faia. E pule lava Ia i Lona poto e le iu.
O le mea moni, ua taliina nisi o a’u fesili. Ae e tele o loo i ai pea i totonu o le pusa. Ma e le afaina ia te ia lena mea.
A’u uo pele ia Keriso, ia avea ma tagata e saili le upumoni.
A o faateleina lou faatuatua, o le a faatasi le Alii ma oe. Ma a o e faalatalata atu ia te Ia i le faatuatua, o le a Ia faaali mai ia te oe mea e tatau ona e iloa i le taimi sa’o.