E Pei o se Faamalama i Lou Agaga

Saunia e Richard M. Romney

Mekasini a le Ekalesia

Ina ua latou pepese faatasi ma le latou aufaipese a le uarota i se faaaliga a ekalesia soofaatasi, sa aoaoina e nei talavou le tele o mea e uiga i le auala e mafai ai e musika ona aumai faatasi ia tagata talitonu uma.

talavou e toatolu

O Megan C., Ethan M., ma Romy C. e i ai se mea e tutusa ai: Latou te fiafia i musika migao. Latou te fiafia i le ala e siitia ai ma musuia ai i latou, i le ala latou te lagona ai. Latou te fiafia foi e vaai pe faapefea ona siitia ma musuia ai isi.

O Megan, 18; Ethan, 19; ma Romy, e 17 tausaga, e i ai foi se isi mea e tutusa ai: Latou te pepese uma i le aufaipese a le latou uarota i Florida, ISA. Ma talu ai nei na tuuina atu ai e le aufaipese ia i latou se avanoa sili atu e faasoa atu ai lo latou fiafia i musika e ala i le auai i se Faafiafiaga Musika a Ekalesia Soofaatasi.

“O lo matou nuu o loo i ai se fesootaiga a ekalesia soofaatasi lea e tele mea e aumai faatasi ai tagata o faatuatuaga eseese,” o le tala lea a Ethan. Mo se faataitaiga, sa talimalo le vaega i se talanoaga i se taumafataga o le Iftar (o le taumafataga o le afiafi ina ua faaiuina e Musolemi sa latou anapogi i aso taitasi i le taimi o lo latou masina paia o le Ramadan), sa faatulagaina ai ni galuega fesoasoani e pei o le tapenaina o ato aoga faafafa mo fanau sa manaomia le fesoasoani, ma sa latou faia meaai ofofua, lea e saofafai ai i se laulau tagata e le masani i le tasi ma talanoa e uiga i meaai, tu, ma talitonuga na olioli ai ia latou aganuu.

autalavou o loo aai, pepese, ma auauna atu

E fiafia tagata o le aufaipese e aai i le taumafataga o le afiafi ma auauna atu faatasi ma i latou o isi faatuatuaga.

Tatou Uo

Ioe, o le sini o le faatasiga o le fesoasoani i tagata mai tulaga eseese ina ia avea ma ni uo.

“E i ai se aiga Take ou te vaai i ai i taimi uma i taumafataga a ekalesia soofaatasi, ma latou te taufetuli mai ia te au ma fai mai, ‘Ua matou matua fiafia lava e toe vaai ia te oe! ’” Ua fai mai ai Romy. “I se lalolagi e matua tele naua sauaga o mataupu faalelotu ma le faatuatua, e matagofie le mafai ona tatou o mai uma faatasi ma talanoa le tasi i le isi.” I le taimi o se tasi o galuega fesoasoani, “sa matua agalelei tamaitai o se isi ekalesia,” o lana tala lea. “Latou te lei popole e uiga i le lotu a isi tagata. Sa na ona i ai iina e ofo atu la laua fesoasoani. Sa matuā matagofie lava.”

“E mafai ona tatou talitonu i mea eseese,” o le tala lea a Megan, “ae ou te faaaloalogia lava ia talitonuga o isi tagata ma e manaia foi le fesootai ma i latou i lenei tulaga lea tatou te mananao uma e aoao e uiga i le tasi ma le isi.”

“O la matou ekalesia o se tasi lea o sui fou o le faatasiga,” o le tala lea a Ethan. “O lea sa ou matuai faafetai ai i le tele o lo latou agalelei ia i matou ma le auala na latou taliaina ai i matou. Ou te iloa i nisi o nofoaga, e le malamalama ai tagata i le Ekalesia. O lea ou te faafetai ai pea pe a mafai e tagata ona talia eseesega o le tasi ma le isi ma vaavaai mo mea e tutusa ai i tatou.”

Ma Le Loto Gatasi

O se tasi o mea e tutusa ai vaega uma o le faatuatua o le musika. O le Faafiafiaga Faamusika a Ekalesia Soofaatasi o le a avea ma se avanoa sili mo e talitonu e tuufaatasia ai i le vivii atu i le Atua. O le aufaipese a le uarota o se tasi o le pe a ma le afa taseni o vaega o loo fai ma sui o faalapotopotoga i le aai atoa.

“Sa i ai se aufaipese o logo, se pese toalua, o se aufaipese tele, o se aufaipese laitiiti, o se fagufagu-ma-le piano, ma isi mea faapena,” o le faamalamalama mai lea a Megan. “Sa talosagaina vaega taitasi e fai ni pese se lua.”

Ua faaauau mai ai Megan, “Sa matou mananao ia mautinoa o le mea na matou usuina o le a iloa ai e tagata matou te talitonu ia Iesu Keriso faapea foi ma lo matou talitonu i le Tama Faalelagi. Sa matou mananao e fatu se lagona o le tapuai.”

Sa filifili le aufaipese i ni pese se lua sa latou faatinoina muamua, “Great Things and Small Things,” saunia e Steven Kapp Perry, ma le “Sacraments and Symbols,” saunia e Janice Kapp Perry, Steven Kapp Perry, ma Lynne Perry Christofferson.

“O le pese muamua o se pese fiafia. Ua ofoina mai ai le faamautinoaga e faapea, e ala mai i le Atua, e mafai ai ona e faia soo se mea, pe itiiti pe taua tele, “o le tala lea a Ethan. “O le pese lona lua e i ai se migao loloto. E pei lava o se salamo, ma e fatuina ai se lagona moni o le tapuaiga.”

Faataitai, Faataitai, Faataitai

A o latou sauni e pepese, sa faaaoga e Ethan se metotia sa ia faaaogaina muamua. “Ou te taumafai e faamuamua le faatofuina i le pese,” o lana tala lea. “Ua ou iloa ai, pe a mafai ona ou gauai atu i le uiga o le pese, ua mafai ona ou fiafia atili i ai. E moni ou te faamautinoaina e mafai ona ou usuina faalelei, ae e sili atu ona faigofie mo au le faia pe a ou ogatasi ma le savali o loo taumafai le pese e tuuina mai. Ou te fiafia e tuu se faamamafa i le sauniuniga faaleagaga.”

“Sa tatau lava ona matou pepese i sauniga faamanatuga ma faataitai foi mo isi mea faapena,” o le tala lea a Megan. “Ae sa matou iloa le taua o le faatasiga a ekalesia soofaatasi, o lea sa matou faamautinoa ai ua saunia vaega uma. Sa matou galulue malosi i ai.”

Mo le pese lona lua, na faaitiitia ai le aufaipese o tagata e 14 i lalo i le toavalu. “Matou te faataitai i Aso Lua, a o lei amataina alii talavou ma tamaitai talavou,” ua fai mai ai Megan. “Na ou mafaufau ai lava i le pese mo se vaiaso atoa, mo se masina atoa, moni lava. E le masani ona ou faia lenei mea, ae na ou maua le pese i le YouTube ma faaauau ai pea ona taina. Sa ou manao e faaleleia atili. Sa ou manao ia matou matuai pepese manaia lava ina ia matou pai atu i isi tagata. ”

Na malilie Ethan, Megan, ma Romy e faapea o faataitaiga uma lava na maua ai se faamanuiaga faaopoopo. “A outou toe usu faafia ia pese,” o le tala lea a Romy, “o savali o pese e tumau i lou mafaufau ma i lou loto.”

aufaipese a le autalavou

Ua pepese le aufaipese i le Faaaliga Musika a Ekalesia Soofaatasi.

I le Mafaufau, i le Loto

O lena mau ai i totonu o o latou mafaufau ma loto sa manino lava le molimauina a o pepese tagata o le aufaipese. “Sa matuai matagofie uma lava pese e lua,” o le tala lea a Romy. “Sa matuai filemu le aofia ma na lagona e tagata uma le Agaga a o usuina na pese. Sa matou lagonaina uma le lotogatasi.

“O le pese muamua sa avea lava ma se pese fiafia mo au,” o le tala lea a Megan. “Ou te lagona e pei sa i ai lena aafiaga i tagata i le taimi o le faafiafiaga. Sa ou maua se taimi fiafia i le usuina o le pese ma sa ou faamoemoe sa latou fiafia uma i ai. Ma le pese lona lua, na matagofie tele le tuufaatasiaina o leo. Ou te manatu o tagata uma sa faalogo i ai sa lagona se agaga o le faaaloalo ma le maofa mo le Atua.”

I le faaiuga o le afiafi, ua faaauau ai Megan, “Sa mafai ona matou talanoa i tagata auai ma le au maimoa. Ou te iloa sa fesili tagata i le matou faatonu o le aufaipese e uiga i pese sa matou usuina—’O le a lena ituaiga o musika? ‘ po o le ‘O fea na e maua ai lena faatulagaga?’ Sa mafai ona matou fegalegaleai o le tasi ma le isi ma talanoa e uiga i le musika sa matou faasoaina atu uma. Sa ou lagona le pei na mafai ona ou malamalama atili ia i latou e ala i a latou pese, ma sa lelei lo latou malamalama ia i matou ona o la matou pese. O musika e pei lava o se faamalama i lou agaga.”

O Le a Le Uiga Ia Te Au o le Musika

Megan: “E i ai se mafuaaga e i ai a tatou viiga, ma e i ai se mafuaaga e i ai a tatou musika lautele. Ou te manatu ona e finagalo le Alii ia tatou lagona le filemu ia te Ia. O se tasi o taimi autu ou te lagona ai le Agaga pe a ou mafaufau e uiga i le viiga o le faamanatuga. E fesoasoani tatou te manatua ai le Faaola ma mea uma na Ia faia mo i tatou.”

Ethan: “O musika e faatatau i le tauaveina o lagona i tua atu o se savali. E i ai le eseesega i le va o le faapea atu, ‘E mafai ona fesoasoani mai le Atua ia te au i tofotofoga,‘ lea e lelei ma moni, ma le usuina o se viiga ma lena lava savali e tasi. O loo manaomia ai sina taumafaiga sili atu a oe, o se tagata pese. E fesoasoani e te malamalama lelei ai i lena savali ma fesootai ai i se tulaga e loloto atu. O musika e auauna atu e faalauteleina ai soo se mea e te manao e tau atu i lē faalogologo i ai.”

Romy: “Pe a ou faalogologo i musika paia, ou te lagona le latalata atili atu ia Iesu Keriso. Ou te iloa na tuu e Iesu Keriso ia musika i lenei lalolagi ina ia mafai ona tatou olioli ma aumai ai isi ia te Ia. Pe a ou fia lagonaina le Agaga Paia, ou te usuina se viiga i lou loto ma lou mafaufau. O se tasi lea o auala e sili ona ou fiafia i ai e olioli ai.”