“Mga Pag-ampo sa Pasundayag sa Puppet,” Higala, Ago. 2026, 4–5.
Mga paghulagway pinaagi ni Alice Marrollo. Mahimong pakopyahan alang sa Simbahan nga paggamit lamang.
Mga Pag-ampo sa Pasundayag sa Puppet
Unsa kaha kon wala makatambong si Sonya sa pasundayag?
Usa ka tinuod nga istorya gikan sa Russia.
Milukso-lukso si Benjamin tabok sa plasa. Nagsidlak ang adlaw, ug siya naghinam-hinam. Gidala siya sa iyang mama sa teyatro sa puppet! Tua usab didto ang iyang higala nga si Sonya.
Wala madugay naa na sa teyatro sila si Benjamin ug si Mama. “Asa si Sonya?” Nangutana si Benjamin.
Gitan-aw ni Mama ang iyang relo. “Ang lola ni Sonya miingon nga magkita mi dinhi sa alas sayis. Lagmit moabot ra sila diri sa dili madugay.”
“OK.” Milingi-lingi si Benjamin sa palibot. Ang lobby sa teyatro adunay mga bintana nga bildo nga adunay mga puppet nga gidispli. “Mahimo ba natong tan-awon ang mga puppet samtang maghulat kita?”
“Sige.” Naglibot-libot sila si Mama ug si Benjamin aron tan-awon ang mga puppet. Usa kanila adunay rosa [pink] nga buhok. Naa gani puppet nga dragon nga nagbitay sa kisame!
Apan wala gihapon moabot si Sonya.
Si Benjamin nagsugod og kabalaka. “Mahimo ba nato silang tawagan?”
Niyango si Mama ug gikuha ang iyang telepono. Naminaw si Benjamin sa iyang pakigsulti sa lola ni Sonya. Unya iya kining gipalong.
“Naa sila sa bus, pero natanggong sila sa trapik,” ingon ni Mama. “Moabot na sila dinhi sa labing madali nga panahon.”
Milingi-lingi si Benjamin sa palibot. Nagdungan ang mga tawo padulong sa entablado aron manglingkod. “Unsa kaha kon dili makatambong si Sonya sa pasundayag?”
“Kinahanglan lang natong molaom sa labing maayo,” miingon si Mama. “Nganong dili kita mag-ampo?”
“OK.” Gikiyugpos ni Benjamin iyang mga bukton. “Langitnong Amahan, palihog tabangi si Sonya nga makaabot dinhi sa hustong oras. Pareho kami nga naghinam-hinam nga motan-aw sa pasundayag.”
Human sa ilang pag-ampo, naghulat sila og pipila pa ka minuto. Dayon miingon si Mama, “Kinahanglan tingali ta nga molingkod na.”
Si Benjamin hinay nga naglakaw nga bug-at ang mga tiil padulong sa mga laray sa humok nga pula nga mga lingkoranan. Halos wala nay bakanteng lingkoranan, mao nga gibutang niya ang iyang dyaket sa iyang tupad aron ireserba kini para kang Sonya ug sa iyang lola.
Ang tanang uban nga bata andam na alang sa pagsugod sa pasundayag. Apan si Benjamin nagpadayon sa pagtan-aw sa pultahan, naglaom nga moabot si Sonya.
Gisugdan sa usa ka trabahante sa teyatro ang pagsira sa pultahan para sa pagsugod sa pasundayag. Unya, sa kataposang segundo, duha ka tawo ang misulod. Si Sonya ug ang iyang lola kadto!
Mitindog si Benjamin ug miwara-wara. “Nag-ampo ko nga makaabot ka,” ingon niya samtang milingkod si Sonya.
Nipahiyom si Sonya. “Nag-ampo sab mi ni Lola samtang naa mi sa bus!”
Si Benjamin mibati og mapasalamaton. Kon naulahi pa si Sonya, OK ra unta. Apan kini usa ka malipayong pahinumdom nga gihigugma sila sa Langitnong Amahan.
Naabli ang mga kurtina, ug miabiba sila si Benjamin ug Sonya. Panahon na sa pasundayag!