“Ko Hoʻo Faʻifaʻitakiʻanga Mālohí,” Ko e Kaumeʻá, Sune 2026, 20–21.

Ko Hoʻo Faʻifaʻitakiʻanga Mālohí

Fai ʻe ʻEletā Aroldo B. Cavalcante

ʻO e Kau Fitungofulú

Fakatātā ʻo ha tamai mo e fānau ʻoku nau tūʻulutui ʻo lotu

ʻI heʻeku hoko ko ha palesiteni fakasiteiki ʻi Palāsilá, naʻá ku fuʻu femoʻuekina ʻaupito. ʻI ha ʻaho ʻe taha, naʻá ku foki mai ai ki ʻapi kuo fuoloa ʻa e poʻulí. Naʻe lahi ha ngaahi meʻa ʻi heʻeku fakakaukaú. Naʻá ku fakakaukau ke u talaange ki heʻeku fānaú ʻoku ou fuʻu helaʻia ʻaupito peá u hangatonu leva ʻo mohe.

ʻI he taimi naʻá ku ʻalu ai ke fakalea ki heʻeku fānaú ke nau poʻuli aá, naʻá ku sio ki heʻenau talitali ʻi honau lokí, mo tūʻulutui ʻi he falikí. Naʻa nau fakakaukau ke nau talitali mai kiate au ke mau lotu fakataha kimuʻa pea nau toki mohé. Naʻe ongo ʻenau tā sīpingá ki hoku lotó, peá u tūʻulutui mo kinautolu. Naʻa mau lotu fakataha.

ʻOkú ke maʻu ʻa e mālohi ke tākiekina ʻa e moʻui ʻa e niʻihi ʻokú ke feohi mo iá! Kātaki ʻo hoko ko ha faʻifaʻitakiʻanga lelei ki hoʻo mātuʻá ʻaki haʻo muimui kia Sīsū Kalaisi. Lotu, lau ʻa e folofolá, pea fakaafeʻi hoʻo ongomātuʻá ke mou fai ʻa e ngaahi meʻá ni. Te ke lava foki ʻo fakaafeʻi kinaua ke mou ō ki he lotú. Kuó u mamata foki ki he tākiekina kuo fai ʻe heʻeku fānaú ʻi honau ngaahi kaungāmeʻá ʻi hono fakaafeʻi pē kinautolú. Te ke lava ʻo fai ha liliu lahi ʻaki haʻo hoko ko ha faʻifaʻitakiʻanga lelei!

Ko e Hoko ko ha Faʻifaʻitakiʻangá

Tā fakatātā ʻo ha fānau fiefia ʻoku nau punopuna

Fakatahatahaʻi mai ha ngaahi kaungāmeʻa pe fāmili pea mou vaʻinga ʻi he vaʻinga faʻifaʻitaki ko ʻení!

Fili ha taha ke ne fili ha ngāue ke faʻifaʻitaki ki ai ʻa e tokotaha kotoa pē. Taufetongi ʻi he hoko ko e faʻifaʻitakiʻangá pea fili ʻa e ngāué.

Ki hano liliu ke fakakau ʻa e mūsiká, hivaʻi ʻa e “Do As Iʻm Doing” Children’s Songbook, 276) pe ko ha foʻi hiva Palaimeli ʻe taha lolotonga hoʻomou vaʻingá.

Fakaafeʻi ha Kaungāmeʻa

Fakakaukau ki hao kaungāmeʻa ʻokú ke fie fakaafeʻi ki he Palaimelí pe ko ha ʻekitivitī ʻa e Palaimelí. Hiki ʻa e fakamatala te nau fiemaʻú ʻi he feituʻu ʻoku fakaʻatā atu ʻi laló. Kosi ʻo toʻo ʻa e tohi fakaafé pea pelupelu ia, pea ʻoange ia ki ho kaungāmeʻá!