“Kōm̧m̧ao ippān Eilish kōn Jetōb Kwojarjar,” Jera, Jān. 2024, 40–41.
Kōm̧m̧ao ippān Eilish kōn Jetōb Kwojarjar
Eilish ej juon leddik 12 iiō dettan jān Bukwon eo Rear in Singapore. Kōm kar kajjitōkini kōn wāween an Jetōb Kwojarjar jipan̄ e.
Kwaļo̧k kajeem make n̄an kōm.
Em̧m̧an ippa riit im ikkure volleyball, im katak eo em̧m̧antata ippa ilo jikuuļ ej bōnbōn. M̧ōn̄ā eo enno tata ippa ej lasagna (ļōjania), im kōļar eo em̧m̧antata ippa ej būrōrō. N̄e irūtto ļo̧k, ij kōtmene bwe in juon lawyer im jerbal ilo m̧ōn ekajet.
Elmen en̄jake in Jetōb Kwojarjar n̄an kwe?
N̄an n̄a, en̄jake Jetōb Kwojarjar ej āinwōt juon m̧ōtta ej pād tūru. Ij en̄jake bwe E ej juon eo imaron̄ kōjatdikdik ioon n̄e ij kōjparok kien ko im bujen ko aō ippān Jemedwōj Ilan̄. Ij ļōmņak kōn E āinwōt juon aō ritōl im m̧ōtta. E emaron̄ jipan̄ eō kōm̧m̧an kāālet ko rem̧m̧an.
Ta naan in kapilōk eo jenaaj leļo̧k n̄an juon eo ejjab lukkuun jeļā ke em̧ōj aer en̄jake Jetōb Kwojarjar?
Jet iien ejjab bar em̧m̧an aō en̄jake n̄e ijjab en̄jake Jetōb Kwojarjar. Ak eļan̄n̄e kwoj lukkuun lōmņak kake, riiti jeje ko rekwojarjar, im jar, im em̧m̧an am̧ en̄jake kōn juon men, Jetōb Kwojarjar eo ne. Jet iien ron̄ ainikien Jetōb Kwojarjar ejjab juon en̄jake wōt. Emaron̄ bar juon kōļmenļo̧kjen ak ļōmņak. N̄e kwoj en̄jake wōt tarpok, komaron̄ jar aolep iien im bar kajjitōk ippān Irooj kōn jipan̄.
N̄āāt eo kwar en̄jake Jetōb Kwojarjar?
Iiō eo ļo̧k, iaar ikkure ilo juon jiāe in volleyball. Āinwōt eitōn aolep rikkure ro m̧ōtta, ikar ikkūm̧kūm̧ Ke ij jino ikkure, tiim eo am ekar luuji ikkure ko ruo jinointata. Kōm kar ebbweer. Innām armej ro rej alooje ikkure eo rekar ba jet naan ko rejekkar, im ekar nana ļak wōt am en̄jake. Kōm eaar luuj.
Ke jinō ej kajjitōk ippa ejeet, ikar jino jan̄. Iaar lukkuun inepata. Iaar etal n̄an ruum̧ eo aō, ijo em̧m̧an im ejjelo̧k keroro ie, im ikar jar. Ālkin aō jar, iaar en̄jake meraļo̧k im eļapļo̧k aenōm̧m̧an ilo būruō. Ikar jeļā Jetōb Kwojarjar ekar kaenōm̧m̧an eō im E enaaj jipan̄ eō aolep iien. Kōn juon bar jiāe ej itok iiō in, Ijeļā E enaaj pād ippā ilo aō ikkure.
Ekōjkan an Jetōb Kwojarjar maron̄ bar jipan̄ eok?
Jetōb Kwojarjar ekar bar jipan̄ eō em̧akūt jān Būraimere n̄an Doulul eo an Jiron̄ ro. Iaar m̧ōņōņō kōn em̧m̧akūt n̄an Doulul eo an Jiron̄ ro. Ak ejja iien eo wōt ikar bar ikkūm̧kūm̧. Iaar bar lukkun būrom̧ōj in em̧m̧akut jān Būraimere.
Mokta jān kūlaaj eo aō m̧oktata, iaar jar im kajjitōk ippān Jemedwōj Ilan̄ n̄an jipan̄ eō m̧ōņōņō ilo Doulul eo an Jiron̄ ro. Iaar en̄jake aenōm̧m̧an ilo būruō ke ij juurļo̧k loan kūlaajruum̧ kāāl eo aō. Iaar pojak in ekkatak. Emenin jipan̄ n̄an keememej bwe Jetōb Kwojarjar enaaj pād ijo ippa aolep iien!
Kōmeļeļe ko jān Annabel Tempest