“Te Marooro ma Eilish n Taekan te Tamnei ae Raoiroi,” Te Rao, Tianuare. 2024, 40–41.
Te Marooro ma Eilish n Taekan te Tamnei ae Raoiroi
Eilish bon te ataeinnaine ae 12 ana ririki ni maiu ae roko man te Aba ae Singapore Mainuku. Ti titirakinna bwa e kanga ni buokaki iroun te Tamnei ae Raoiroi.
Tuangiira rongorongom.
I rangi n tatangira te wareware ao te takakaro ae te nete, ao au bwai n reirei ae mamate nanou iai bon te numera. Te amwarake ae mamate nanou iai bon te lasagna, ao te kara ae uraura bon mamaten naba nanou. Ngkana I ikawai, I kantaningaia bwa N na riki bwa te rooia ao ni mwakuri n te tabo ni boowi.
Tera raoi namakinan te Tamnei ae Raoiroi iroum?
Irou, te Tamnei ae Raoiroi titebo ma bon raoraou ae I kaan ma ngaia. N au namakin bon Ngaia temanna ae I kona n onimakinna ngkana I kawakin tuua ao au berita aika tabu ma Tamara are i Karawa. I iangoia bwa kanga te tia kairai ao raoraou. E kona ni buokai ni karaoi rinerine aika a raraoi.
Tera am taeka n reirei ae ko na angan temanna ae tuai koaua raoi bwa e a tia n namakina te Tamnei ae Raoiroi?
N tabetai I bon namakina naba te nanououa ngkana tao I a tia n namakina te Tamnei ae Raoiroi. Ma ngkana ko karaua n iangoia raoi, ni wareware ni booki aika tabu, ao n tataro, ao ko namakina te kukurei iai, bwa anne te Tamnei ae Raoiroi. N tabetai te kakauongo iroun te Tamnei ae Raoiroi tiaki tii te namakin E kona n riki bwa te kantaninga ke n aron naba te iango. Ngkana ko bon teimatoa n nanououa, ko kona n tataro n taainako ao ni butiia riki te Uea ibukin ana ibuobuoki.
N ningai ae ko a tia iai n namakina te Tamnei ae Raoiroi?
N te ririki ae nako, I iira te kaboo n te nete. N aroia angiina kaain au tiim, e bon nako nanou. Ngke I moana au takakaro, a konaaki kaain ara tiim n te moan takakaro aika uoua. A bwara nanora. Ngkanne a taetae n aki akaaka aomata ake a tabe ni mataku, ao kanga ti namakinna ae ti a rootaki riki. Ti a konaaki.
Ngke e titirakinai tinau bwa e uara ara takakaro, e a waanai te tang. I bon rangi n nanokawaki. I nakon au ruu, bwa e tamaroa man rau, ao I a tataro. Imwiin are I tia n tataro, I namakina te bebete ao e korakora te rau inanou. I ataia bwa e a tia n anganai karauan nanou te Tamnei ae Raoiroi ao E na buobuokai. Ma teuana riki te kaboo ae nang roko bon inanon te ririki aei, I ataia bwa E na memena irarikiu ngkana I takakaro.
Iai riki te bwai ae ko buokaki iai iroun te Tamnei ae Raoiroi?
E a tia naba ni buokai te Tamnei ae Raoiroi ngke I a mwaing man te Moanrinan nakon te Bootaki n Ataeinnaine. I rangi ni kukurei ni mwaing nakon te Bootaki n Ataeinnaine. Ma I bon namakina te nakonnano n te tai naba anne. I bon nanokawaki naba teutana ni kitana te Moanrinan.
Imwaain au moan kiraati, I tataro ao ni butiia Tamara are i Karawa bwa e na buokai ni kukurei n te Bootaki n Ataeinnaine. I namakina te rau inanou ngke I a rin inanon au kiraatiruum ae boou. I a tauraoi n reireinaki. E ibuobuoki ngkana ko uringnga bwa te Tamnei ae Raoiroi e na memena ikekei ibukiu!
Kamataata n te tamnei iroun Annabel Tempest