“Wāwein Aō kar Peptaij,” Jera, O̧kwōj 2023, 12–13.
Wāwein Aō kar Peptaij
Iakwe! N̄a Aranoarii. Ij jokwe ilo Tahiti. Ij 11 iiō detta, im ij utiej n̄an ba bwe ij juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Ekōjkan am̧ kar jeļā kōn Kabun̄ in?
Jet m̧ōtta raar karuwaineneik baam̧le eo aō n̄an juon m̧akūtkūt an Kabun̄ in. Kōm kar barāinwōt karuwainene n̄an juon peptaij an ajri. Ikar kajjitōk ippān m̧am̧a eļan̄n̄e imaron̄ ioon mijenede ro kōnke ikar kōņaan ekkatak eļapļo̧k kōn Jisōs Kraist.
Ekar ewi wāwein am̧ en̄jake ke kwar ioon mijenede ro?
Mijenede ro raar lukkuun em̧m̧an! Ikar aolep iien lo̧udin̄din̄ n̄an katak ippāer kōn Jisōs Kraist im gospel eo An. Em̧m̧an kar ippa bwebwenato ko raar jiron̄ eō im ikkure ko kōm kar ikkure n̄an jipan̄ eō ekkatak.
Ewi wāween kar peptaij eo am̧?
Jema ekar peptaiji m̧am̧a im n̄a ilo raan in ļotak eo aō ke ekar 11 aō iiō. Ikar lukkuun in m̧ōņōņō! Kōm kar karuwaineneik elōn̄ armej ro kōm kar iakwe er. Ro m̧ōtta ilo jikuuļ im rūkaki eo aō raar itok n̄an rejtake eō.
Ke ikar waļo̧ktok jān dān eo, ikar obrak kōn lan̄lōn̄. Ikar ettōn̄ dikdik ļo̧k n̄an lo̧jiln̄ū. Ikar kanooj m̧ōņōņō imaron̄ ļoor waanjon̄ak eo an Jisōs Kraist.
Ta en̄jake eo am̧ ilo iien eo kwar etal n̄an Būraimere ej kab kein kajuon?
Ilo jinoin, ikar kanooj ikūm̧kum̧ inan̄in kar jan̄ wōt jidik. Bōtaab ikar etal n̄an juon m̧akūtkūt an Būraimere. Ikar aikuj jeļā kajjien aolep, im ikar kōm̧m̧an jet m̧ōtta.
Eļan̄n̄e kwoj kāāļ, aō kapilōk ej n̄an itok n̄an kūlaaj in Būraimere eo am̧, jekdo̧o̧n eļan̄n̄e kwoj mijak ilo jinoin. Kōmij iakwe armej ro rekāāl!
Ewi wāwein am̧ ļoor Jisōs Kraist?
Ij jar im etal n̄an jar aolep Jabōt. Ij kōnono ippān baam̧le eo aō kōn gospel eo an Jisōs Kraist.
Ij kajjieon̄ pukōt ro jet me rej aikuj jipan̄. Ilo m̧weo, ij jipan̄ m̧am̧a kōn jerbal ko. Ij jipan̄ jema ilo atke eo, jōkjōk kane ko, im kalōk men ko. Jejjo allōn̄ ko remootļo̧k, ward eo am ekar wōr juon an iien kwaļo̧k tōļan. Ij juon rikkure kōn kein kōjan̄jan̄, kōn menin ikar kōjan̄ tūram̧ ko aolepān bon̄ōn eo!
Pija ko jān Stéphane Sayeb