Jikka ko im Naan ko Renana
“Etke jejjab kōm̧m̧ane juon kallim̧ur an baam̧le?” Jinen eaar kajjitōk.
“Jemaron̄ ke kōnnaan?” Jonas ekar kajjitōk ippān Jinen. Ekar jijet ioon ujoj eo iturin ijo liin ekar tūm̧tūm̧ ujoj jān jikin wut eo.
“Aaet. Ewōr ta bajjōk?” Jinen eaar kajjitōk. Liin ekar wutikļo̧k kuļōb in kallib ko an rettoon.
“Rainin ilo jikuuļ jet ajri ro raar ba juon naan ijjab jeļā. Raar ettōņ ke raar ba,” Jonas ekar kajjitōk. “Ij ļōmņak ekar juon naan enana.”
“Ekōjkan am̧ kar en̄jake ke kwar ron̄ naan eo?” Jinen ekar kajjitōk.
“Ekar jab kōm̧m̧an bwe en em̧m̧an aō en̄jake.”
Jonas ekar unoojdikdik kōn naan eo n̄an Jinen. Liin ekar jiron̄ e ta eo kar meļeļe in. Jonas ekar jim̧we. Ekar jab juon naan em̧m̧an.
“Bōtaab etke ej nana?” ekar kajjitōk.
“Enana kōnke ej juon naan elej im ejjab kautiej. N̄e jej kōjerbal naan ko āinwōt in, ej kōm̧m̧an an pen an Jetōb Kwojarjar eo pād ippād. Jetōb Kwojarjar ekar jiron̄ eok ekar nana. En̄in etke ekar jab em̧m̧an am̧ en̄jake itulowa.”
Jonas ekar kōmmōn̄. “Bōtaab ajri ro jet raar āinwōt raar em̧ōņōņō. Etke ekar n̄a wōt eo ekar jab em̧m̧an aō en̄jake?”
“Ekōjkan am̧ jeļā ajri ro jet ekar jab em̧m̧an aer en̄jake?” Jinen eaar kajjitōk.
“Kōnke raar aolep ettōn̄ im medikdik ke juon ekar ba naan eo.” Jonas ekar tarpok.
“Jet iien armej rej ettōn̄ ak medikdik n̄e ejjab em̧m̧an aer en̄jake,” Jinen ekar ba. “Im jet iien n̄e eļap aer ron̄ ak ba naan ko renana, ejjab kainepataierer n̄an jidik. Bōtaab ekar wōt jab jim̧we n̄an ba naan ko. Ej āinwōt kain ujoj kein. Ij tūm̧i bwe en erreo wōt jikin kallib eo im n̄an kōtļo̧k bwe mennin eddōk ko ren eddōk.”
“Ij m̧ōņōņō ikar jab ba naan eo,” Jonas ekar ba.
“Bar n̄a,” Jinen ekar ba. “Ebun̄ būruwō kōn kwe. Im ewōr juon aō ļōmņak. Etke jejjab kōm̧m̧ane juon kallim̧ur an baam̧le?”
“Kain rōt?” Jonas ekar kajjitōk.
“Jen kallim̧ur n̄an kōjerbal naan ko rem̧m̧an im jab naan ko renana. Emaron̄ juon kallim̧ur aorōk an baam̧le.”
Jonas ekar kōņaan ļōmņak jab eo. E im Jinen raar idik pein doon. Jonas ekar en̄jake em̧m̧an kōn kallim̧ur eo ekar kōm̧m̧an ippān Jinen.
“Kiiō, ekōjkan am̧ kallim̧ur n̄an jipan̄ eō kadedeļo̧k ittūm̧ ujoj?” Jinen eaar kajjitōk. “Innām inaaj kallim̧ur n̄an bōk eok n̄an park eo.”
Jonas ekar ūjō im bōk juon jabōļ edik. “Ej juon koņ.”
Ke ekar jipan̄ Jinen, Jonas ekar ļapļo̧k an em̧m̧an en̄jake. Ekar jeļā kallim̧ur n̄an jab kōjerbal naan ko renana ekar juon kāālet em̧m̧an n̄an baam̧le eo an.
Kōmeļeļe jān Dan Widdowson