Ennaan eo jān Rikanaan eo
Ij Iakwe Eok
Kakkobaba jān “Kōnono ko kōn Jepļaaktok eo ippān Būreejtōn Russell M. Nelson,” pija in alooj ko kōjparoki, Gospel Media library.
Būreejtōn Nelson ekar ioon jet ajri in Būraimere ro ilo juon em̧ aļaļ ilo Palmyra, New York, USA. Ej alikkar āinwōt m̧weo ijo Josep Smith ekar jokwe ie ke ekar bōk Visōn eo M̧oktata. Erkein jet iaan men ko Būreejtōn Nelson ekar kwaļo̧ki ippān ajri ro.
Aolep Ajri rej Nejin Anij
Jekdo̧o̧n ia eo kwar ļotak ie ak būļaak ta eo kwoj kōjopelpele ak ta kajin eo kwoj kōnono. Jej aolep ajri ro nejin Jemādwōj Ilan̄, im jenaaj eddōkļo̧k n̄an erom āinwōt E.
Kijejeto im Jinekjej ko
Erom juon rikanaan ebōk eļap jerbal im eļap ekkatak. Men otemjej kōm̧m̧ani n̄an eromļo̧k āinwōt Rilo̧mo̧o̧r eo ebōk kijejeto. N̄e Anij ekar kōņaan lelo̧ Kien ko Jon̄oul n̄an Moses, ia eo Ekar jiron̄ Moses n̄an etal n̄an e? Ilōn̄ ioon jabōn Tol Sinai. Kōn menin Moses ekar etetal laļļo̧k n̄an jabōn toļ eo n̄an bōk Kien ko Jon̄oul. Irooj ej iakwe kijejeto kōnke kijejeto ej bōktok jinekjej ko me rejjab maron̄ itok ilo an ejjeļo̧k kijejeto.
Baam̧le eo an Rikanaan eo
Kōmij jinen im jemān jon̄oul ajri ro, ruwatimjuon leddik ro raiboojoj im juon ļaddik. Ruo iaer rej jokwe ilo lan̄ kiiō. Ekar wōr aer iien ekadu ioon laļ in, im rej pinniki kōm ilo lan̄. Kōmij koba ippān doon ilo tampeļ m̧are, eo ej meļeļe in bwe kōm naaj koba n̄an indeeo ālkin iien jidik eo am ioon laļ in.
Juon M̧ōņōkjān n̄an Lem̧ōņōņō
Jeje ko rekwojarjar rej āinwōt juon bok in kōmat. Eļan̄n̄e ejjeļo̧k juon am̧ bok in kōmat, im kwoj kab baj tōn jino iiōke pilawe eo im milik eo im lep ko, emaron̄ jab em̧m̧an keek eo am̧. Anij ekar letok n̄an kōj juon m̧ōņōkjān n̄an lem̧ōņōņō, im kar ņa etan kein ko.
Naan eo kien ej āinwōt juon kōllaajrak, āinwōt kar jiron̄ kōj ta eo n̄an kōm̧m̧ane. Bōtaab ej lukkuun in juon jekjek ekadu kitien n̄an ekkatak. N̄an waanjon̄ak, E ej jiron̄ kōj n̄an jab idaak arkooļ ak n̄an jab kōbaatat jikka im uno ko jet rej kakkure. Etke? Bwe en toļo̧k am̧ mour im m̧ōņōņōļo̧k. Kwoj ke ļōmņak in kar mour n̄an aō 95 iiō detta eļan̄n̄e ikar kōbaatat kadōk? Jaab. Im ij m̧ōņōņō. Im imaron̄ ski ippān ajri ro jibū.
Juon Men eo Eaiboojoj
Ukweļo̧k ej meļeļe in bwe aolep raan, jej kakkōtļo̧k jidik im kōm̧m̧ane jidikļo̧k n̄an erom āinwōt Irooj Jisōs Kraist. Ij ukweļo̧k wōt. Aolep raan ij kajjieon̄ n̄an ekkatak eļapļo̧k im eromļo̧k wōt āinwōt Irooj naaj kar kōņaan bwe in erom. Im bwe ejjab juon kaje. Men jab in ej juon iien em̧m̧an ekōlan̄lōn̄. Aolep raan, ij jerkak jān jikin kiki eo ilo jibbon̄ im ba, “O, juon men eiaboojoj enaaj waļo̧k rainin! Inaaj eromļo̧k āinwōt Jisōs.” ●
Meļeļe ko jān David Habben