Wan Fiuja We I Fulap long Hop
Divosen blong Ol Yang Adalt Raon long Wol
Sandei, 8 Jenuware, 2023
Elda Jeffrey R. Holland: !Ol dia yangfala fren blong mifala long evri ples! Hem i wan spesel janis blong Sista Holland mo mi blong save stap ia wetem yufala long naet ia. Nomata se mifala i stap kam aot long plante long yufala raon long wol tru long ol naesfala teknoloji blong taem tedei, mitufala i glad blong gat wan grup blong yufala blong mitufala nomo long yunivesiti ia mo institiut blong relijin blong hem, mo long ples ia we mitufala i statem kolej edukesen blong mitufala, deit mo mared.
Naoia mi ting se mi filim wan smol kolkol win i pas tru long rum taem mi talem toktok ia mared. No wari. Bae mitufala no tokbaot mared tedei long naet. Sam long yufala i mared finis, mo mitufala i no wantem ol narawan long yufala blong jiam mo ronwe long rum ia. Be mi bin talem se mitufala i bin yang mo statem deit mo mared long yang taem, mo wetem tingting long maen se sapos mitufala i save faenem mitufala long wan naet olsem, ?hu i save? Maet i save hapen long ol narawan.
I tru, plante long yufala ol sista i bin talem se i gat sam man we oli nidim blong oli talem strong long olgeta, o sapos no, sutum wan bonara o ating wetem wan smol besbol bat. Sapos i gat eni yang woman long ples ia we i sidaon wetem wan yang man we i stap mekem olsem, Elda mo Sista Holland i givim raet long yu blong stikim rif blong hem wetem elbo blong yu naoia—long wan naesfala wei we inaf blong pasem lav, mo i inaf blong talemaot strong poen ia. Bae mitufala i glad sapos hemia i wokaot long yufala long wei ia olsem we i bin wokaot blong mitufala, be nomo se long taem blong mitufala, i bin elbo blong mi mo rif blong Sista Holland .
Long Jun we i stap kam, bae hem i 60 yia, we Pat mo mi i bin mared long Sent Joj Tempol we i wan kilo mita nomo long eria blong yunivesiti i go. Siksti yia blong stap tugeta i givim long mitufala wan welkam janis blong talem tata long wan taem we i bin had tumas blong fulap mo wan taem blong sore, blong sam. Sloslo yumi stap kamaot long KOVID-19 wol sik, be bigfala sik we i kolosap semmak hemia we Baebol i tokbaot i stap yet olsem wan problem blong plante pat blong wol, mo i gat haf blong 1700 ded, we oli ripotem from sik ia evri dei.1 Problem ia i strong tumas, i no long saed blong helt nomo be tu, long sosol, politik mo ekonomi laef blong kolosap evri man long planet ia, long semmak wei o narafala wei.
Wan defren kaen problem we i stap kamkamaot long is blong Yurop, we plante milian pipol, we i tekem tu ol memba blong Jos, oli bin fesem hadtaem, oli muvaot i go long ol defdefren ples, o we oli givim laef blong olgeta long wan faet we oli no askem mo oli no nidim blong mekem. Sam wik i pas, oli givim wan asaenmen long mi long Yurop, Sista Holland mo mi, mitufala i mit wetem sam long ol rifuji blong Yukren. Mitufala i laf mo krae mo prea wetem olgeta we oli lego evri samting i stap mo ronwe wetem ol klos nomo long basket blong olgeta. Mitufala i filim semmak filing ia mo harem nogud from ol fetful memba blong yumi insaed long Rasia we oli nogat rong, be oli kasem kil long faet ia. Antap long ol rabis taem ia, long plante ples raon long wol, yumi luk ol bigfala faet long masket—mo tu, wan nogud taem las wik nomo long ples ia long saot Yuta—toti fasin insaed long entetenmen, ol aktiviti blong politik we ol stamba prinsipol olsem, stap ones, stap kaen, mo talem trutok, i olsem se ol man oli bin fogetem.
Mo yes, i gat plante narafala kastom mo sosol problem we i mekem mitufala i tingting plante. Be mitufala i no kam blong mekem yufala harem nogud long ol problem blong wol. !I tru, mitufala i kam blong tokbaot gud saed blong risen ia! Mitufala i luksave ol filing blong ol tingting we i fasfas long wanem we i stap hapen long jeneresen blong yufala. Mifala i talem sore from jeneresen blong mifala i no bin stretem ol problem ia yet we naoia yufala stap fesem. Be mifala i singaot long yufala mo evri narafala yang Lata-dei Sent blong lid strong wetem klin fasin long saed blong spirit we i save stretem olgeta, we i save mekem i kam gud bakegen wef blong fraet, ol tingting blong givap, mo wari we i stap raonem yumi. Hem i impoten tumas blong yufala blong no prea nomo blong Lod i win long laef blong yufala,2 olsem we Presiden Russell M. Nelson i bin askem, be tu, prea se ol valiu blong laef blong yufala bae i win wetem ol narawan we oli no sua tumas yet. Sapos, yumi wanwan olsem ol disaepol blong Jisas Kraes, yumi gat moa lav, gat pis mo stap kaen, sapos yumi evriwan i traem blong obei ol komanmen blong God, afta, bae yumi gat evri risen blong filim gud nomo abaot ol situesen blong wol mo blong yumi. Blong wokbaot i go long fiuja long wei ia, we i fulap long pis mo promes blong God, bae yumi save mekem wan bigfala jenis long wol. Abraham Lincoln i talem se wan taem hem i bin traem blong pulumaot wan rabis gras mo planem wan flaoa long ples blong gras ia, eni taem we hem i gat janis blong mekem. Sapos yumi mekem hemia, ol drae ples blong yumi long saed blong wol ia mo spirit, bae oli kam ol garen we oli grin kwiktaem nomo.3
Yufala we i stap long Jemani tedei long naet—long ples ia we i gat plante help i kam tru long ol Kristin man we i go long olgeta rifuji blong Yukren we mitufala i bin mitim—bae i luksave toktok blong Johann Goethe we i se “sapos evriwan i bin brum long fored blong doa blong hemwan, bae ful wol i klin i no long taem.”
So, blong luksave ol jalenj mo wantem blong help blong tokbaot olgeta, Sista Holland mo mi i kam tedei long naet ia olsem we Aposol Pita i talem: “sipos ol man oli askem … oltaem yufala i mas rere blong givim ansa long olgeta.”4 Bae mitufala i tokbaot hop, mo talemaot we yumi mas neva lusum hop o ol fasin we i joen wetem hem: fet mo jareti. Mitufala i luksave se i gat plante wei blong talem mining blong ol prinsipol ia we oli wok tugeta, mo bae yu harem mifala i tokbaot sam long ol mining blong mifala tedei long naet. Bae yufala i harem tu we mifala i talemaot wetem Moronae se hop hem i impoten sapos we yumi “kasem [ol] ples blong hem we i kam long papa long ples we [Hem] i bin mekem rere.”5 Mifala i wantem yu blong klemem ples blong yufala olsem ol pikinini boe mo gel blong wan king. Blong mekem hemia, yumi mas luksave se hop i wan mesej nomo mo wan fasin blong stap open long ol janis; hem i janis ia blong evriwan we i biliv.6 Olsem wan we i biliv mo i fulap gud wetem hop mo (wetem fet mo jareti), Sista Holland i filim strong blong talem hamas kongregesen blong naet ia raon long wol, i impoten tumas mo wanem bae i wok blong yufala long ol dei we i stap kam. Hem i save se yufala i grup ia we bae mifala i pasem stik blong resis ia i go long yufala mo hem i filim se i impoten blong yu stanap mo akseptem wok blong yu ia. Sista Holland.
Sista Patricia T. Holland: Mi gat wan strong filing abaot yufala. Jeneresen blong yufala i moa strong, blong ol yang adalt we wol ia i save. Mi lavem yufala from hemia. Elda Holland mo mi i talem tangkyu tumas from we yufala i stap kipim ol kavenan blong yufala mo traehad blong mekem wanem i raet. Mo from se i gat fulap long yufala, bae yufala i gat paoa we Elda Holland i bin tokbaot. Mi luk laet blong yufala insaed long rum ia. I saen bigwan. Hemia i mekem mi tingbaot taem Sevya bae i kamkamaot long Ol Man blong Nifae. Hem i talem: “Leftemap laet blong yufala blong mekem se i save saen long wol. Luk mi mi laet we yufala i mas leftemap.”7 Olsem yufala, mitufala tu i bin yang long wan taem, be naoia mitufala i kam olfala nao. Taem mi stap luklukbak long laef blong mi, mo sapos mi save gobak laef bakegen long eni pat blong laef ia, mi hop se bae mi save mekem wan samting i moa defren—we i defren olgeta—!Mekem i simpol! Long mi, i luk olsem se evri samting i moa gud taem hem i simpol—kakae blong yumi, klos blong yumi, ol samting blong haos blong yumi, mo ol taemtebol blong yumi. Wanem we mi no glad tumas long hem bitim evri samting long yang taem blong mi, hem i we mi no bin luk hamas gospel i simpol mo naes tumas; Mi tingting long gospel olsem se i gat tumas samting blong mekem. Mi filim se i tumas, i had tumas, mo tu, samtaem i defren smol. Long mi olsem wan yang adalt, i luk olsem mi mas klaem wan hil blong stret mo gud fasin, gotru long rod blong faea blong stap klin, mo stretem evri doktrin we ol man oli no agri wetem, sapos mi eva wantem God blong i akseptem mi long fored blong Hem.
I no impoten blong talem, tingting blong mi afta long taem ia i moa bitim wan smol gel ia blong Saot Yuta, we hem i filim se hem i save faet agensem. I olsem wan man i bin talem long wantaem se: “I gat wan risen from wanem pipol i no joenem yufala ol Kristin from yufala i werem relijin blong yufala olsem ol rop we i gat nil we oli wokem hat blong king long hem.” I gat wan man nomo we i bin werem rop we i gat nil we oli wokem hat blong king long hem, mo Hem i mekem olsem blong yumi save laef wetem glad oltaem, mo stap long pis—no long harem nogud. Gospel ia i no blong stap olsem wan maonten we smol gel bae i no save klaem long hem. Hem i wantem hem—mo evriwan long wol ia—blong oli fulap wetem hop. Hem i wantem yumi blong save se gospel ia i naes tumas mo i simpol.
Be plis no andastanem rong. Taem mi tokbaot hop, mi no minim se Kraes i mas givim evri samting we yumi wantem olsem majik. Hop blong yumi bae i moa long hemia blong Pinocchio, “taem yu wis long wan sta”8 sapos hem i hop ia we Sevya i tijim. Ol brata mi ol yangfala brata mo sista blong mi, hem i wan presen long yumi mo ful famli blong wol ia. Yumi mas luksave hemia olsem wan laet we i stap saen long wol blong tudak ia. Olsem wan we i stap raet i talem, “I nogat wan we i harem nogud tumas olsem olgeta we oli nogat hop, blong mekem evri samting we gospel i nidim olgeta blong mekem.”9
Swit simpol fasin ia blong faenem presen blong hop ia hem i we yu no nid blong lukaotem; yu no nid blong ronron olbaot mo biaen long hem; yu no mas mo no save mekem. Olsem evri samting long wol blong gladhat, bae yu no save askem wetem paoa blong yuwan o long paoa blong eni narafala man. I nogat wan isi o stret wei blong kasem ol blesing we yumi nidim. Bae i no kam long wan longfala eksasaes blong pulum win o ridim wan buk long olsem wanem blong faenem fasin blong stap hapi.
I tru, ol pat we yumi mekem oli impoten, be i tru se oli smol tumas; God i gat bigfala pat long wok ia. Pat blong yumi i blong kam long Hem wetem tingting mo hat we i stap daon, afta yumi no mas wari mo fraet.10 ?From wanem i simpol tumas? From se biaen long evri samting Kraes i tijim—long evri skripja, stori, mo parabol—hem i promes ia se, wetem God, “hem i save mekem olgeta samting,”11 promes ia se paoa blong God i save waepemaot evri wota blong ae.12 Yumi blong lego wanem yumi wantem tumas mo lukaotem spel long Lod.13 Yumi blong kam long fored blong Hem wetem hat mo tingting we i stap daon8 mo kasem ol blesing we i kam wetem lav blong Hem we i no save finis. Tras blong yumi i mas olsem hemia blong wan smol pikinini, o wan smol sipsip, we yumi yumi stap insaed long bigfala grup blong sipsip blong Lod.
Hat blong yumi bae oltaem no save spel be nomo, sapos oli spel long God.
Singaot ia blong no flas mo gat hat we i stap daon—wan samting we i tokbaot fasin blong God Hemwan—se Hem i no flas mo gat wan hat we i stap daon—i wan singaot we i go long yumi evriwan olsem ol disaepol blong Hem. Sapos yumi save laef long wei ia, Hem i talem, bae yumi faenem spel long sol blong yumi, mo faenemaot se yok blong Hem i isi, mo ol harem nogud blong Hem i no hevi.15 Mi luk singaot ia blong no flas mo gat wan hat we i stap daon bakegen mo bakegen taem mi stap ridim olgeta skripja. (Ating hem i from mi nidim bakegen mo bakegen.)
Mi sua se i nogat samting we i gat ol gudfala mo bigfala risal long saed blong spirit, i kam long eniwan we i nogat hop mo tingting we i stap daon. Kaen tingting ia nao hem i hop blong mifala blong yufala tedei long naet—blong mekem yufala i lanem hemia, taem yufala i yang yet. Mifala i wantem blong yufala i save se wetem ful hat blong yufala se God i Papa blong yufala, mo Hem i “stap lukaot long yufala, i stat long taem we yufala i bon,”10 mo Hem i gat ol plan blong yufala—ol plan blong wan “fiuja we i gat hop.”11
Mi wantem serem tu skripja we mi laekem insaed long OlTesteman we i yusum sam lanwis ia. Aesea i talem:
“!Ol laen blong Isrel! Yufala we i stap yet, yufala i lisin long mi … Mi mi stap lukaot long yufala, i stat long taem we yufala i bon.
“… Bambae mi stap lukaot long yufala yet, [gogo hea blong yufala i kam waet]. Mi mi mekem yufala, mo mi bambae mi holem yufala i stap gud; … Mi bambae mi stap givhan long yufala, mo mi bambae mi stap sevem yufala.”12
Mo Jeremaea i raetem:
“Mi nomo mi save ol plan we mi mekem finis from yufala. Mi mi wantem we bambae yufala i stap gud olwe, trabol bambae i no kasem yufala.
“Nao long taem ya, bambae yufala i kam long mi … yufala i prea long mi, mo mi bambae mi harem yufala.”13
Mi testifae long yufala, ol yang brata mo sista blong mi, se hemia i wan trutok we mi save tru long eksperiens blong miwan se Papa blong yumi long Heven bae i mekem pat blong Hem blong mekem ol promes ia oli kam tru. Hem i stap long yumi blong biliv nomo, i simpol nomo blong biliv, blong kam moa olsem ol pikinini taem yumi putum yumiwan daon mo speseli taem yumi stap talem tangkyu taem yumi kasem ol presen blong Hem. ?Yu wantem wan gudfala yia long yia ia? ?Yu wantem wan fiuja we i fulap long hop? ?Yu biliv se i gat ol blesing i stap blong yu? ?Yu luk gudfala fasin blong God inaf blong i mekem yu gohed blong hop mo lukaotem Hem antap? Hemia i hapen taem yu nildaon, yu bodaon, iven bae yu foldaon long leg blong God. !Wan naes simpol fasin! Nil daon, bodaon, foldaon long “fes blong God blong gladhat blong Hem.”14
Elda Holland i soem long yu se bae yu faenem naesfala presen ia blong hop i joen wetem tufala narafala presen blong God—hemia blong fet mo hemia blong jareti. Plis no mekem wanem mi bin mekem taem mi yang, blong mekem ol klin fasin ia i bigwan tumas mo i had tumas mekem se yumi nogat hop ia blong traehad blong andastanem olgeta. Lavem hamas ol fasin ia i simpol.
Bae mi givim yu wan simpol samting long oda ia. Fet i blong trastem God mo Jisas Kraes oltaem, hop i blong save gud se bae Hem helpem yumi, mo jareti i lav blong Hem mo paoa ia blong wok tru long yumi.
Mi bin lanem abaot fasin blong gat jareti, se i nogat wan long yumi i gat paoa, taem o risos blong mekem evri samting we hat blong yumi i wantem yumi blong mekem. Yumi no save mekem evriwan; hat blong yumi i bigwan i bitim paoa blong yumi. Paoa blong God i naes tumas we i stap muv tru long yumi blong save mekem i kam bigwan, paoa blong putum tingting i stap daon, mo dabolem ol hadwok blong yumi we i nogat limit mo mekem ol samting blong ol narafala man we bae yumi neva save mekem yumiwan.
Ol simpol wei ia long ol trifala bigfala doktrin ia i bin blesem laef blong mi. Mi wantem tumas sapos mi save luk olgeta long wan moa isi wei mo mekem hemia longtaem. Mi biliv strong se God i wantem blong mekem ol trutok blong gospel i simpol inaf blong iven wan pikinini i save andastanem. ?Mi save ripitim? Fet i blong save se i gat wan God. Hop i blong trastem se bae Hem i helpem yumi. Mo jareti hem i lav blong Hem we i stap wok tru long yumi.
Taem mi stap tokbaot ol presen we i kam long God, bae mi ademap wan moa presen long hop blong yumi long niufala yia ia. Blong stap soemaot fet, hop mo jareti i naes tumas we toktok i nosave talem inaf—mo i simpol we toktok i no save talem inaf—presen ia we i Laet blong Kraes. Laet ia, i joen kolosap long hop i wan presen we oli givim long evri man, woman, mo pikinini we oli bin o bae oli bon i kam long wol ia. Oli fasem insaed long yumi. Hem i pat blong sol blong yumi.
Wan long ol fevret skripja blong mi i talem hemia: “Mo Spirit i givim laet long evri man we i kam long wol; mo Spirit i givim moa laet long evri man long evri ples long wol, we i lisin gud long voes blong Spirit.”21
Laet ia i wan long ol stamba tingting blong hop long ol laef blong yumi. Hem i leftemap tingting, i gud tumas—blong gat hop mekem se i gat wan samting insaed long yumi we, i no talem nomo long yumi se i gat wan raet wei blong gotru ol hadtaem blong laef, be tu, i talem long yumi se bae yumi faenem stret wei ia sapos yumi “no flas mo gat hat we i stap daon.”17 Olsem we Presiden Nelson i bin talem long ful Jos long wik we i jes pas se, “Wol i nidim laet blong Jisas Kraes. Mo wol i nidim [tumas] [naesfala] laet blong yu.”18
Ol yangfala fren blong mi, prea blong mi long naet ia—hop blong mi—i we yufala evriwan ol yang adalt raon long wol bae i akseptem singaot ia olsem misin blong yuwan, mo bae yufala i tekem hop we Sevya i tokbaot mo karem olsem wan toj i go long olgeta we oli filim se wol ia i tudak tumas mo i wan had ples tumas. ?I gat wan narafala wei we mi save leftemap tingting blong yu blong luk se blong holem laet ia i seves we bae yu givim? Plis, plis andastanem se hemia i samting we i moa impoten we mi filim blong talem long yufala tedei long naet. Bigfala fraet blong mi hem i we bae mi no save talem i gud inaf blong yu bilivim mi tru. Yu mas holem laet ia long wan wei we bae evri tudak long wol ia bae i neva save kilimaot.
Lukluk ia we i simpol be i gat paoa, blong yu long gospel long ol bigfala mo had problem, i save jenisim wol ia we i tudak mo i stap foldaon. Plis gat fet long God, hop se bae Hem i helpem yu, mo akseptem jareti we i givim paoa long Hem blong wok tru long yu blong mekem wanem yu nomo i save mekem.
Taem yu akseptem jalenj ia mo statem niufala yia ia, afta we yu lukluk insaed, mi plis long yu blong lukluk i go antap. Ol ae we oli lukluk i kam long yu, bae hem i blong Papa long Heven, we i save, mo bae i, putum ol blesing ia long yu long hop blong stret mo gud fasin. Yu save kasem ol blesing ia sapos yu stap ronem olgeta. Plis stop blong stap ronron kasem taem yu taet tumas. Stap kwaet; no muvmuv. Mekem i kam simpol. No flas mo gat wan hat we i stap daon, mo prea. Mi testifae long yu se ol merikel bae oli kam taem yumi slo daon, taem yumi stap kwaet, mo taem yumi nildaon. Evri samting we Papa i gat, oli save kam blong yu wan dei.19 Wan wei we i gat hop tru blong go tru long fiuja blong yu. Mi lavem yufala tumas, mi stap tingting long yufala, mo mi oltaem prea from yufala. Long nem blong Jisas Kraes, amen.
Elda Holland: Tangkyu Sista Holland, i no nomo blong stap tijim gospel be blong stap laef folem mo blong fulap wetem hop long Kraes we i stap wetem yu. Long ol plante hadtaem blong mitufala—mo blong siksti yia blong mared, yu save gat sam—Sista Holland i bin laef folem wanem we hem i bin tijim. Oltaem hem i bin stap olsem wan we i biliv. Oltaem hem i stap trastem laet we i stap raonem sol blong hem. Oltaem hem i stap laef wetem wan tingting we i sua, se God bae i harem ol prea blong yumi mo soem rod long yumi iven taem naet i luk tudak tumas. Long wan wol we samting i luk olsem i tumas long wan yang kapol, ol trutok mo ol promes blong gospel, fulap taem hem i evri samting ia nomo we yumi nid blong hang long hem, be hemia i bin inaf from mitufala i stap ia tedei long naet, we mitufala i bin kasem moa blesing long kolosap 60 yia i bitim we mitufala i drim long hem. So, olsem we naesfala woman ia i bin talem mo i bin mekem, plis gat hop long, prea oltaem, mo stap man blong biliv.
Mi ademap long kaonsel blong Sista Holland, toktok blong leftemap tingting insaed long ol skripja, we i blong fesem fiuja wetem glad sapos i posibol. Wan i bin raetem long wantaem se, aot long evri toktok blong leftemap tingting we Kraes i bin givim i kam long yumi insaed long skripja, aot long evri hop we Hem i wokem givim, hemia we yumi stap wokem no akseptem hem i ol toktok blong leftemap tingting ia blong “stap glad.”25 ?Plis bae yumi tingting hevi long Kraes mo toktok blong Hem? ?Bae yumi save traem nomo? Bae yumi akseptem glad invitesen ia we i fulap long hop tedei long naet, taem yumi tekem nara janis ia blong statem wan niu yia mo mekem laef blong yumi i stret olsem wanem we yumi wantem.
Semmak olsem wetem evri invitesen blong Hem i kam long yumi, Kraes i bin laef folem wanem we Hem i bin tijim. Nomata long ol hadtaem we Hem i stap go tru long hem, Hem i gat hop, i lukluk long gud saed, mo i helpem ol narawan blong mekem semmak, we i tekem tu, ol profet blong God. Aot long ol dip ples blong Libeti Kalabus mo ol dip ples blong lusum hop, we hem i bin fesem long ples ia, nambawan kaonsel blong Profet Josef Smit i go long Ol Sent we oli bin stap prea aotsaed blong hem i kamaot i blong “yumi mekem wetem glad hat evri samting we i stap long paoa blong yumi; mo afta, bae yumi stanap kwaet, wetem bigfala tras evriwan, blong luk fasin we God i sevem man, mo blong Lod i soemaot han blong hem.”2 Mo i nogat wan we i tingting long gud saed blong evri samting, i gat hop mo i fulap wetem hop bitim Russell Marion Nelson, profet blong yumi we i stap laef i talemaot kaonsel blong Josef taem hem i talem long yumi i no longtaem i pas: I no gat wan blesing long saed blong spirit we bae Lod i holemtaet mo no givim long olgeta we oli stret mo gud. … Lod bae i wantem yumi blong lukluk … i go long fiuja ‘mo mekem samting wetem glad’ [Teachings of Presidents of the Church: Joseph Smith (2007), 513].”27 Ol profet oli stap glad oltaem from se oli ol tru disaepol blong Jisas Kraes, mo hemia nao i nambawan fasin blong evri hop. Ol profet oli stap glad from se oli save plan; oli save huia i win long en.
Olsem we Sista Holland i bin talem gud, paoa ia blong luk wol long gudfala saed, i wan nara presen blong God. “Ol man”—mo mi ademap ol woman mo ol pikinini—“oli stap, blong oli save gat glad,”4 ol skripja oli talem. Hemia i from wanem hem i “plan ia blong glad.”29 Olsem wan risal blong plan mo Atonmen blong Kraes, we i stamba long plan ia, yumi save gat bigfala hop nomata hamas ol dei blong yumi oli nogud.
Naesfala eksampol blong Sevya long saed blong hemia, i nidim fasin blong yumi blong gat respek taem yumi fesem wan niufala yia we i save karem ol jalenj i kam long sam long yumi. Tingting long hemia. ?Olsem wanem nao Jisas i save tokbaot fasin blong stap glad long medel blong evri harem nogud we Hem i stap fesem taem bae oli krusifaem Hem? Iven long lastaem we i Hem i mas mekem las desisen long taem blong Las Sapa, Kraes i gohed blong stap rimaenem ol disaepol blong Hem long risen mo wok blong “stap man blong glad.”6 Mi bin stap tingting long miwan se, wetem soa we i Hem i stap go from, olsem wanem nao Hem i save tokbaot gud saed o blong ol brata blong Hem oli lukluk long evri samting ia wetem bigfala glad. I tru, hemia i soemaot fet blong Hem hop blong Hem mo bigfala lav we i kam from Hem i save wanem bae i hapen long en blong stori. Hem i save se stret mo gud fasin i win taem ol las storian i finis. Hem i save se oltaem laet i winim tudak oltaem mo oltaem mo oltaem. Hem i save se Papa blong Hem long Heven i neva givim wan komanmen mo no givim wan wei blong mekem i hapen.7 Blong win long wan faet, i mekem evriwan oli glad, mo Kraes i man ia we i winim ded mo hel. Okei, hemia i wan hevi samting blong tingting long hem tedei long naet, be hemia i wanem oli stap glad from. Win blong Kraes i stamba ples blong hop blong yumi long niufala yia ia mo long evri yia—blong oltaem.
From ol samting we i pulumaot tingting mo ol temtesen blong Lusifa, bae fasin blong stap gat hop mo stap man blong glad tumoro o nekis manis o nekis yia bae i save had tumas. Nomata long hemia, stret poen we Sista Holland i stap askem blong gat wan lukluk we i stap nomo long ol simpol samting mo wan laef we i no stap givap long ol stamba samting long laef blong wan Lata-dei Sent. Samtaem yumi volontia blong lukluk nomo long ol temtesen, mo samtaem laef i mekem hemia blong yumi, be long wanwan long tufala, sapos yumi bildimap ol testemoni blong yumi long ol stamba samting blong gospel, yumi save kasem ol gudfala samting tru long ol eksperiens we oli stap olsem ol jalenj blong yumi, olsem wan gudfala fren blong mi stap fesem naoia. Hem, waef blong hem, mo gel blong hem—mo mi ting se oli stap lisin tedei long naet—oli stap eksperiensem sam hadtaem long saed blong helt naoia—ol jalenj we oli series tumas, bae mi talem olsem. Oli gat plante risen we bae i mekem olgeta oli taet mo givap mo oli tingting se wanem nao gudfala samting hop o fet o jareti blong olgeta, i save mekem blong olgeta. Be from oli gat strong tingting blong stap olsem wan disaepol long tugeta taem blong glad o harem nogud, i givim paoa long olgeta.
Long wan imel (we mi serem wetem raet blong hem), fren blong mi i raetem:
“Ova long sam manis we i pas, wol blong mi kam smol tumas: [saes blong] hospital [ol bed] mo ol rum blong sik. [Rod we waef blong mi i tekem blong kam oraet afta we oli jenisim kidni blong hem] i soem se i had tumas, mo long las manis … hem i wokem go kam long hospital. Olsem wan risal, mi bin ‘karemaot’ miwan aot long plante samting blong wol we oli [raonem mi].” Tingting long toktok ia simpol.
Hem i gohed: “mi neva laekem toktok ia se Lod i stap givim ol hadtaem long yumi, be mi bilivim se Hem i save yusum olgeta blong ol stamba tingting blong Hem. Wan samting we i bin impoten long mi blong wik ia we i pas, hem i hamas … gospel i impoten mo i tru [we i save kam agensem plante samting we oli no impoten]. Eksperiens ia blong gat lav long ol narawan; kwaet voes blong God we i stap taem yu taet mo sidaon narasaed long bed blong wan pikinini we i sik o long wan waef we i stap harem nogud from wan bigfala sik long rum blong hospital, let long naet mo stap harem ‘pis i stap long sol blong yu.’
“Mi bin ridim Buk blong Momon mo ol Gospel mo [bin] filim lav blong God. Tru long sapot we i kam long Jos [mo save] ia long saed blong ol fasin blong God, [ol samting] we oli save helpem yumi blong progres i kam long God … oli ol tru samting abaot fet, testemoni, [hop, mo lav].”
Hem i endem, “mi no bin save go long ol sakramen miting blong plante wik, be mi bin luk plante gudfala pipol we oli bin stap tru long ol kavenan blong olgeta blong stap givim seves long famli blong mi. Mi bin kasem plante blesing tru long plante samting, mo mi lavem Lod, [mi lavem] gospel, [mi lavem] restoresen mo Jos.”8
Strong testemoni ia blong hop mo strong tingting we hem i soemaot long medel blong wan taem we i had tumas i tajem hat blong mi. Mo yumi nidim blong save se long wan taem, ol hop blong yumi mo ol strong biliv blong yumi bae i sua se bae oli traem mo bae yumi kam moa gud tru long wan safaring blong yumiwan. Ol naes yang fren blong mi, fet we oli no traem, i no fulap fet nating. Yumi talem se yumi stanap strong long ston blong Kraes. Yes, yumi mas stap olsem, from se ol strong win blong laef ia, mo wan fandesen olsem sanbij bae i no save holemtaet nomo taem win i blo mo ren i foldaon mo bigfala wota i kam.33
Wan las toktok taem yumi stap go from en blong brodkas ia raon long wol long naesfala niu yia ia, we i tekem tu wan niu yia blong institiut. Sam long yufala long evri ples, bae yufala i stap wari abaot ol samting we oli moa impoten bitim wanem sabjek bae yu tekem long skul o wanem wok blong skul from we bae yu go from. Sam long yufala we i stap gat bigfala wari blong stap sem—mo i nogat wan samting we i save spolem mo karemaot hop blong yumi mo karem yumi kam tugeta wetem bitim wanem we bigfala sin bae i save seperetem yumi wetem God. Sista Holland mo mi i bin tokbaot blong no jusum blong tokbaot sin o brekem loa, be bae i no soem responsabiliti blong mitufala long wanem wok we Lod i bin talem blong mitufala i tijim.
Oltaem bae i gat wan bigfala nid blong fulumap wol wetem prinsipol blong hop mo yusum fasin ia blong sakem sin. Taem yumi mekem sin, yumi save stret se faea blong hop blong yumi i stap muvmuv mo from wanem samtaem bae i luk olsem i ded. Long situesen olsem, yumi mas jenis, o hop blong fiuja blong glad blong yumi bae i ded. Kandel i ded fogud. Hemia i from wanem yumi evriwan i nidim blong blong sakem sin. !Yumi evriwan! Evri dei, Presiden Nelson i bin talem.10
So, mi askem long yufala tedei long naet blong fesem ol hadtaem blong sin naoia, stat long aoa ia, sin we i bigfala enemi blong hop mo hapines we mi save long hem long ful wol ia. Go long fored blong Lod mo talemaot ol sin blong yufala, mo go luk bisop sapos hem i wan series sin. Be jenisim wanem we i rong, nomata se i bigwan o smol. Fasin blong sakem sin hem i rod blong gat wan niu stat; hem i rod ia we bae yumi gat wan gudfala fiuja. Laef hem i had inaf finis, iven taem yumi stap karem wan hevi basket blong ol mistek blong yumi long baksaed ful dei—evri dei, ful naet, evri naet. Karemaot hemia. Jenisim wari blong gat pis. Jenisim bigfala harem nogud blong gat glad. Kraes i givim laef blong Hem blong mekem se yu save fri blong mekem hemia.
Afta, bae yu save mekem olsem we Nifae i askem long yumi blong mekem. Long impoten mesej blong Hem i no long taem bifo Hem i ded, pikinini boe ia we i luk fulap trabol mo raorao, i talem wanem we Sista Holland mo mi i wantem mo traem blong talem tedei long naet:
Yufala i mas wokbaot fored wetem strong bilif long Kraes, wetem wan stret mo klin hop, mo wan lav blong God mo blong evri man.”11
“Wetem wan stret mo klin hop,” bon wetem lav blong God mo long evri man—hemia nao wanem we mifala i wantem blong yufala long niufala yia ia. Blong stap gat stret hop ia wetem yu oltaem bae i no save stopem kwaet voes ia se God i lavem yu, se Kraes i Loya blong yu, se gospel i tru. Saen blong hem bae i rimaenem yu se tru long gospel, oltaem i gat—evri dei, evri aoa—wan niufala janis, wan niufala laef, wan niufala yia. !Wan merikel! !Wan presen! Mo from presen blong Kraes, ol nambawan samting long laef bae oli blong yumi sapos yumi gohed blong stap bilif, gohed blong stap traem mo gohed blong stap gat hop.
?Yufala i tingbaot ol raon wol situesen we mi bin tokbaot taem yumi stat? Fesem olgeta mo fesem ol jalenj blong yuwan taem yu save se wetem fet, evri samting bae oli kam gud long en. No akseptem wol long wanem we hem i stap mekem. Saenem laet blong hop blong yu long hem, mo mekem wanem we hem i nidim blong stap olsem. Stap laet ia we Sista Holland i askem blong yufala blong stap olsem, wan laet we bae i neva ded, laet blong Sevya blong wol.
Mi lego wan blesing blong aposol long wanwan long yufala tedei long naet mo blong niufala yia folem ol samting we mi save fo sua mo ol samting we bae yufala i oltaem nidim. Mi mekem hemia tru long lav we mi gat long yufala, lav blong Lod long yufala, lav blong Fas Presidensi mo Kworom blong Olgeta Twelef Aposol long yufala. !Lav blong evriwan! Mo yu we yu stap ia tedei long naet. Mi blesem yufala se simpol be bigfala paoa we i stap insaed long ol prinsipol blong sevem man, olsem fet mo hop mo jareti, bae i oltaem stap strong mo givim ol ansa long laef blong yufala. Mi blesem yu blong save, olsem we mi save blong tru, se gospel blong Jisas Kraes i gat bigfala valiu long yuwan, i gat hop we i no save finis, mo i tru blong oltaem. Mi testifae wetem atoriti blong mi olsem Aposol se hem i olsem, mo hem i ansa ia nomo we i stap tru oltaem long ol fulap jalenj blong laef, blong yu mo blong mi mo wei ia nomo blong kam olsem wan god long taem we i no save finis.
Mi blesem eni wan long yufala we i stap tokbaot ol dei ia blong “hadtaem blong fet.” Tru fet, fet we i jenisim laef, fet blong Ebraham, i oltaem wan hadtaem. Hemia i olsem wanem yu faenemaot sapos fet hem i fet o i no fet nating. Mi promesem yu se moa fet bae i minim hadtaem i go daon, kasem taem God bae i talem long en se: “Yu yu wan gudfala man we yu lukaot gud long ol wok blong mi.”12
Mi blesem wanwan long yufala blong save se Jos Ia blong Jisas Kraes blong Ol Lata-dei Sent, i tru se hem i: Jos Ia blong Jisas Kraes. Mo hem i tru nomo long ol odinens mo ol janis we Jos i stap givim, i save mekem wan i kam moa fulwan, “olsem Kraes nomo, we hem i bigman tru”37 Mi blesem wanwan long yufala, wanwan mo tru long nem blong yu, wetem evri presen we yu nidim blong rod ia, mo blesem yu, blong gohed strong wetem tingting blong wet longtaem, taem Papa blong yu long Heven, tru long waes blong Hem, i faenem bes rod blong samtaem givim yu wanem we yu askem, be oltaem givim yu wanem we yu nidim. Long tabu lav blong God, long Sevya we i stap from yumi, mo long Tabu Spirit we i oltaem givim kamfot, long paoa blong tabu prishud, mo long kastom blong ol profet we Presiden Russell M. Nelson i stap olsem, long tabu fasin blong Buk blong Momon, mo long “stret mo klin hop,” gospel ia i givim mi talem wetem tru hat mo tabu witnes mo witnes blong miwan long laef blong mi. Mi mekem olsem, long nem blong Hem we i stamba blong evri hop blong mi, we i nem blong Lod Jisas Kraes, amen.