Paglaum sa Israel
Presidente Russell M. Nelson: Kulang ang mga pulong aron mapadayag ang among pasalamat niana nga seminary choir. Pagkanindot, maayo kaayo ninyong pagkakanta. Salamat. Daghan kaayong salamat. Samtang nagtan-aw ko niining Conference Center nga napuno sa matahum nga mga Santos sa Ulahing mga Adlaw, gibati nako nga sa katapusan nakuha na nako ang dakong pamilya nga akong gilauman. Adunay 22,000 kaninyo dinhi karong gabhiuna ug liboan pa nga uban kanato pinaagi niini nga sibya.
Si Sister Nelson ug ako nalipay gayud kaayo nga makauban kamo karong gabhiuna. Ganahan kami nga makig-uban kaninyo, ang kabatan-onan sa Ang Simbahan ni Jesukristo sa mga Santos sa Ulahing mga Adlaw—ug sa inyong mga magtutudlo ug mga ginikanan.
Nindot unta nga makadungog kami sa matag usa kaninyo kalabut sa inyong mga kasinatian sa pagpangandam alang sa atong tibuok kalibutan nga panagpundok, samtang nagbasa kamo sa Basahon ni Mormon matag adlaw ug samtang nag-ampo kamo aron madungog kon unsa ang gustong itudlo sa Ginoo kaninyo.
Sa makausa pa, akong ipadayag ang atong pasalamat sa seminary choir sa pagkanta sa atong pangbukas nga himno uban sa ingon nga pagbati. Kana nga himno—“Salamat, O Dios, sa Propeta”—kadto nga mga pulong mipaduol sa atong kasingkasing ngadto ni Propeta Joseph Smith. Pagkadako sa atong utang kaniya! Siya ang propeta niining katapusang dispensasyon! Hunahunaa! Susama siya kaninyo og edad sa dihang nadasig siya sa mga pulong ni Apostol Santiago: “Kon aduna man kaninyoy nakulangan og kaalam, papangayoa siya sa Dios.”1
Kadto nga mga pulong miduso sa batan-ong Joseph sa pag-adto sa duol nga kakahoyan, diin gibu-bu niya ang iyang kasingkasing ngadto sa Dios.
Naabli ang kalangitan! Nakita ni Joseph ang Amahan ug ang Anak ug nakat-unan sa iyang kaugalingon kon asa moadto alang sa mga tubag sa iyang mga pangutana.
Karon mohangyo ko sa matag usa kaninyo sa pagbuhat sa gibuhat ni Joseph. Dad-a ang inyong mga pangutana diretso ngadto sa inyong Langitnong Amahan diha sa pag-ampo. Hangyoa Siya, sa ngalan ni Jesukristo, sa paggiya kaninyo. Makakat-on mo sa inyong kaugalingon—karon sa inyong edad—unsaon pagdawat og personal nga pagpadayag. Ug wala nay makahimo og mas dakong kalainan sa inyong kinabuhi kay sa niana!
Mosaad ko kaninyo—dili sa tawo nga inyong tupad apan kaninyo—nga, bisan asa man kamo sa kalibutan, bisan asa kamo diha sa dalan sa pakigsaad—bisan kon, niining higayuna, wala kamo nakasentro diha sa dalan—mosaad ako kaninyo nga kon sinsero ug kanunay kamong mobuhat sa espiritwal nga buhat nga gikinahanglan sa pagpalambo sa importante, espiritwal nga kahanas sa pagkat-on unsaon sa pagkadungog sa mga paghunghong sa Espiritu Santo, makadawat kamo sa tanang direksyon nga gikinahanglan ninyo sa inyong kinabuhi. Hatagan kamo og mga tubag sa inyong mga pangutana sumala sa kaugalingong paagi sa Ginoo ug sa Iyang kaugalingong panahon. Ug ayaw kalimti ang tambag sa inyong mga ginikanan ug mga lider sa Simbahan. Nagtinguha usab sila og pagpadayag alang kaninyo.
Kon nasayud kamo nga ang inyong kinabuhi gigiyahan sa Dios, bisan pa sa mga hagit ug kasagmuyo nga mahimong moabut, mobati kamo og kalipay ug kalinaw.
Karon, gusto namong mamulong ninyo kabahin sa labing dako nga hagit, sa labing dako nga kawsa, ug sa labing dako nga buhat sa yuta. Ug gusto namo kamong dapiton nga mahimong kabahin niini!
Gihangyo nako si Sister Wendy Nelson sa paghatag og konteksto niana nga importanting mensahe. Palihug, Sister Nelson.
Sister Wendy W. Nelson : Minahal ko nga kaigsoonan, kinsa among gimahal ug gisaligan, gusto nakong sugdan pinaagi sa pagsulti ninyo sa unsay nakita nako ug sa akong bana usa ka adlaw samtang nag-drive mi sa kabungturan sa Utah gamit ang all-terrain vehicle.
Nindot kadto nga adlaw sa tinglarag. Ganahan mi nga maanaa sa mga kakahoyan nga bulawanon ug nindot, tag-as ug tul-id, tanan nagkab-ot sa langit.
Dayon, miliko mi og eskina ug nakakita ko og kahoy nga mipahinumdom nako kanako ug unsay kasagaran nakong bation sa daghang sitwasyon.
Pamilyar mo niana nga pagbati? Motan-aw mo sa palibut ug ang tanan tag-as ug tul-id ug nagkab-ot sa langit, maingon ta.
Makamao sila sa tanan. Nagsul-ob sila sa perpektong sinina, daw kanunayng mosulti sa saktong mga butang, walay mga problema, hingpit nga masulundon—ug daw walay nahimong sayop sa ilang kinabuhi.
Ug unya, aw, anaa kamo ug ako!
Minahal ko nga kaigsoonan, panahon na nga hunungon ang pagtandi sa atong kaugalingon ngadto sa uban. Panahon na nga hunungon kining sayop nga mga panglantaw sa atong kaugalingon ug sa uban. Ang tinuod mao nga dili kita ingon ka masalaypon sama sa atong gihunahuna, ug ang uban dili sama ka perpekto sa atong pagtan-aw kanila—tanan gawas, siyempre, sa atong Manluluwas, si Jesukristo.
Ang importante lang nga kamo ug ako tukma nga nagbuhat sa unsay atong gipasalig—gani gipakigsaaran—sa premortal nga kinabuhi uban sa atong Langitnong Amahan nga atong buhaton samtang ania kita dinhi sa yuta.
Busa, mangutana ako kaninyo: Unsa man ang katuyoan nga gapakatawo man kamo?
Pagkanindot kaha kon makatan-aw kamo og 10-minutos nga video kalabut sa inyong premortal nga kinabuhi diha sa YouTube.
Si Propeta Joseph Smith mitudlo nga kon makatan-aw kamo sa langit sulod sa lima ka minuto, mas mahibalo kamo kalabut sa usa ka hilisgutan kay sa kon inyo kining gitun-an sa tibuok ninyong kinabuhi.2 Busa hunahunaa lang kon makahimo kamo sa pagtan-aw sa inyong premortal nga kinabuhi sulod sa 10 minutos!
Siyempre nakaamgo kita nga maalamong gihimo sa Ginoo nga dili kita makahinumdom niadto nga mga panumduman. Apan, sa makadiyot lang, hunahunaa ang epekto sa inyong kinabuhi karon kon tugutan kamo sa pagtan-aw og 10 minutos sa inyong premortal nga kinabuhi.
Nagtuo ko nga kon inyong makita ang inyong kaugalingon nga nagpuyo uban sa inyong Langitnong mga Ginikanan ug ni Jesukristo; kon makaobserbar kamo sa inyong gihimo sa premortal nga kinabuhi ug makita ang inyong kaugalingon nga naghimo og mga pasalig— gani mga pakigsaad—apil sa uban, lakip ang inyong mga mentor ug mga magtutudlo; kon inyong makita ang inyong kaugalingon nga maisugong mitubag sa mga pag-ataki sa kamatuoran ug maisugong mibarug alang ni Jesukristo, nagtuo ko nga ang matag usa ninyo makabaton sa gipadak-an nga gahum, gipadak-an nga pasalig, ug mahangturong panglantaw sa pagtabang ninyo nga mabuntog ang bisan unsa ug tanan ninyong kasamok, pagduha-duha, kalisud, ug mga problema. Ang tanan niini!
Nagtuo ako nga kon mahinumdom kamo kon kinsa ang inyong gisulti nga inyong tabangan samtang ania kamo sa yuta, o unsang sakit nga mga kasinatian nga miuyon kamo nga maagian, nga bisan unsa nga lisud nga sitwasyon nga anaa kamo karon— o maanaa—moingon kamo, “A, karon nahinumdom na ko. Karon nakasabut na ko. Nakasabut na ko niining lisud nga sitwasyon. Uban sa tabang sa Ginoo makahimo ako niini!”
Karon, diay laing butang nga dapiton ko kamo sa paghunahuna. Ganahan kong maghunahuna nga ang matag usa nato mianhi sa yuta nga dunay papel nga gipataput sa atong espiritu nga giulohan og “Mga Buhatunon Samtang anaa sa Yuta.”
Hisgutan nato kon unsay mahimong maanaa niana nga papel. Maghisgot ta sa lima sa mga butang nga siguradong nasulat diha sa inyong papel sumala sa ebanghelyo ni Jesukristo.
Una, mianhi kamo aron modawat og mortal nga lawas. Ug kana, mga higala, importante gayud kaayo.
Ikaduha, mianhi kamo aron masulayan.
Lain pay ato, nakabantay ba kamo nga ang atong pagsulay kasagaran naglakip sa pagkat-on sa pagkontrolar sa mga gana ug kahinam sa atong mga lawas, nga usahay mahimong lisud kaayo kontrolahon? Kon nanlimbasug kamo karon sa nagpadayong mga epekto sa bisan unsang matang sa adiksyon o sa dakong sala nga wala pa mahinulsuli, moawhag ko ninyo sa pagtangtang niini gikan ninyo pinaagi sa pakigsulti sa inyong bishop—karon. Naghupot siya og mga yawe sa priesthood nga makatabang kaninyo.
Ang ikatulong butang nga buhaton samtang dinhi sa yuta: mopili sa pagsunod ni Jesukristo ug sa pagpanalipud Kaniya, sama sa inyong gibuhat sa premortal nga kinabuhi.
Ikaupat, pagpili nga maghinulsol kada adlaw ug moambit sa sakrament kada semana. Kon inyong buhaton, maayo kamo sa espiritwal nga paagi, malig-on ug mapalambo, ug sa katapusan mabalaan ug mahimaya pinaagi sa Pag-ula ni Jesukristo.
Karon, ania ang ikalimang butang sa inyong lista: pangitaa ug tumana ang inyong mortal nga mga misyon. Minahal nakong mga higala, sa premortal nga kinabuhi kamo ug ako gihatagan og talagsaong mga misyon nga tumanon samtang ania kita sa yuta.
Duna kitay mga oportunidad sa pagtuman sa atong mortal nga mga misyon, apan dili kinahanglan nga atong buhaton. Walay mopugos kanato. Duna kitay kabubut-on sa pagpili kon unsaon nato paggahin ang atong panahon ug kusog, ang atong mga talento ug mga kapanguhaan. Gani, parte gayud sa atong pagsulay ang atong pagpili kon unsay buhaton.
Ang pagpili anaa ra kaninyo ug kanako. Buhaton ba nato ang bisan unsa nga gikinahanglan aron matuman ang talagsaong mga misyon diin gipadala kita sa yuta?
Samtang mamalandong kamo niana nga pangutana, motipas kita og atong hisgutan nganong naa kamo dinhi sa yuta—niining piho nga panahon, nga talagsaon kaayong panahon sa kasaysayan sa yuta.
Nganong ania man kamo sa yuta karon?
Nganong wala man kamo gipakatawo sa mga 1880? o 30 ka tuig gikan karon?
Mosulti ako kaninyo og kasinatian nga personal nga mitudlo kanako mahitungod sa makasaysayanong panahon nga atong gipuy-an.
Kanunay kitang naghisgot kalabut sa pagpuyo sa ulahing mga adlaw. Kita, labaw sa tanan, mga Santos sa Ulahing mga Adlaw. Apan tingali kini nga mga adlaw mas “ulahi” na kay sa atong mahunahuna.
Kini nga kamatuoran nahimong reyalidad kanako tungod sa akong nasinati sulod sa usa ka 24-oras nga panahon nga nagsugod niadtong Hunyo 15, 2013. Ang akong bana ug ako didto sa Moscow, Russia.
Samtang nakigkita si Presidente Nelson sa mga lider sa priesthood, pribilehiyo nako nga makigkita sa dul-an sa 100 sa atong mga sister. Akong gimahal ang atong Russian nga mga sister. Talagsaon sila!
Sa dihang miduol ako sa pulpito aron mamulong, nakasulti ako og butang nga wala nako damha. Misulti ko sa mga babaye: “Gusto nakong makaila kamo pinaagi sa kaliwatan. Palihug barug samtang isulti ang tribo sa Israel nga nagrepresentar sa kaliwatan nga gipahayag diha sa inyong patriyarkal nga panalangin.”
“Benjamin?” Duha ka babaye ang mibarug.
“Dan?” Laing duha.
“Ruben?” Dugang pipila ang mibarug.
“Neptali?” Dunay dugang nga mibarug.
Samtang gisulti ang mga ngalan sa napulog duha ka mga tribo sa Israel—gikan sa Aser ngadto sa Sebulun—ug samtang namarug ang kababayen-an, nahingangha kami sa among nasaksihan, nabati, ug nakat-unan.
Pila kaha sa napulog duha ka mga tribo sa Israel ang girepresentaran diha nianang gamay nga panagtigum sa wala kaabut og 100 ka mga babaye niana nga Sabado sa Moscow?
Napulog usa! Napulog usa sa napulog duha ka mga tribo sa Israel girepresentaran nianang gamay nga lawak! Ang bugtong tribo nga wala mao ang kang Levi. Nahingangha ako. Makatandog kadto nga espiritwal nga higayon alang kanako.
Pagkahuman dayon niadto nga mga miting ang akong bana ug ako midiretso sa Yerevan, Armenia. Ang unang mga tawo nga among nahimamat sa pagnaug namo sa eroplano mao ang mission president ug ang iyang asawa. Sa usa ka paagi, nakadungog siya mahitungod niini nga kasinatian sa Moscow, ug uban sa dakong kalipay, miingon siya, “Sa tribo ko ni Levi!”
Hunahunaa lang ang among kalipay sa dihang ang akong bana ug ako nakahimamat sa ilang mga misyonaryo sa sunod nga adlaw, lakip ang usa ka elder nga gikan sa tribo ni Levi kinsa nahitabo nga gikan sa Gilbert, Arizona.
Karon, sa dihang bata pa ako nga nagtambungan sa Primary sa Raymond, Alberta, Canada, akong nakat-unan nga sa katapusang mga adlaw—sa dili pa ang Ikaduhang Pag-anhi sa Manluluwas—ang napulog duha ka tribo sa Israel pundokon. Makahinam kanako kana nga kamatuoran ug, sa samang higayon, komplikado kaayo aron akong masabtan. Busa hunahunaa kon sama sa unsa kadto kanako nga makauban ang mga sakop sa tanang napulog duha ka mga tribo sa Israel sulod sa usa ka 24-oras nga panahon!
Ako nang nakat-unan nga wala unta nako hangyoa kadto nga mga sister sa pagpaila sa ilang kaugalingon pinaagi sa kaliwatan tungod kay ang patriyarkal nga mga panalangin sagrado ug ang mga kaliwatan nga gipahayag diha niini personal. Apan mapasalamaton ko sa pribilehiyo nga personal nga makita ang mga resulta sa pagpundok sa Israel. Ang epekto niana nga kasinatian wala gayud mokunhod diha sa akong kasingkasing ug hunahuna.
Minahal nako nga mga kaigsoonan, kini gayud ang ulahing mga adlaw! Walay panahon nga sama niini sa kasaysayan sa kalibutan. Wala gayud! Sa premortal nga kinabuhi, kamo ug ako mipasalig sa pagbuhat og mahinungdanong buhat samtang ania kita dinhi sa yuta. Ug uban sa tabang sa Ginoo, buhaton nato kana! Sa pangalan ni Jesukristo, amen.
Presidente Nelson: Salamat, Wendy. Gimahal ko ikaw! Dili ba talagsaon siya?
Minahal nako nga batan-ong kaigsoonan, sigurado nga kini karon ang ulahing mga adlaw, ug ang Ginoo mipadali sa Iyang buhat sa pagpundok sa Israel. Kana nga panagpundok mao ang labing importanting butang nga nahitabo sa yuta karon. Walay makatandi niini sa gidak-on, walay makatandi niini sa kaimportante, walay makatandi niini sa kahalangdon. Ug kon pilion ninyo, kon gustuhon ninyo, mamahimo kamong dakong bahin niini. Mahimo kamong dakong parte sa usa ka dakong butang, mahinungdanong butang, halangdong butang!
Kon maghisgot kita kalabut sa pagpundok, nagsulti lamang kita niining sukaranang kamatuoran: ang matag usa sa mga anak sa atong Langitnong Amahan, sa matag kilid sa tabil, angayang makadungog sa mensahe sa gipahiuli nga ebanghelyo ni Jesukristo. Mohukom sila sa ilang kaugalingon kon gusto ba nilang masayud pa og dugang.
Kadtong kansang kaliwatan gikan sa lain-laing mga tribo sa Israel mao kadtong kansang kasingkasing labing siguro nga modangup sa Ginoo. Miingon Siya, “Ang akong mga karnero nagapatalinghug sa akong tingog, ug ako nakaila kanila, ug sila nagasunod kanako.”3 Kadtong nalakip sa balay sa Israel labing dali nga makaila ni Ginoong Jesukristo isip ilang Manluluwas ug magtinguha nga mapundok ngadto sa Iyang panon. Gusto nila nga mahimong miyembro sa Iyang Simbahan, mohimo og pakigsaad uban Kaniya ug sa Langitnong Amahan, ug modawat sa ilang importanting mga ordinansa.
Ang Ginoo misulti kang Propeta Joseph Smith nga karon, nagpasabut sa atong panahon, mao ang ika-onse nga oras ug ang katapusang higayon nga Siya motawag og mga mamumuo ngadto sa Iyang ubasan sa tuyo nga mapundok ang mga pinili gikan sa upat ka suok sa yuta.4
Mao kini ang akong pangutana karong gabhiuna sa matag usa kaninyo nga nag-edad og 12 hangtud 18: Gusto ba ninyong mahimong dakong parte sa labing dako nga hagit, sa labing dako nga kawsa, ug sa labing dako nga buhat sa yuta karon?
Gusto ba ninyong motabang sa pagpundok sa Israel niining bililhong ulahing mga adlaw? Andam ba kamo, kinsa mga pinili, nga motabang sa pagpangita sa mga pinili kinsa wala makadungog sa mensahe sa gipahiuli nga ebanghelyo? Gusto ba ninyo nga malakip niadtong “matulin nga mga sinugo” kinsa gipamulong ni propeta Isaias?5
Karon, ang pag-apil sa pagpundok sa Israel magkinahanglan og sakripisyo diha sa inyong bahin. Gani magkinahanglan kini og pipila ka mga kausaban sa inyong kinabuhi. Siguradong magkinahanglan kini sa inyong panahon ug kusog ug sa inyong mga talento nga hinatag sa Dios. Interesado ba kamo?
Hunahunaa lang ang kahinam ug kadinalian niining tanan: ang matag propeta sugod kang Adan nakakita sa atong panahon. Ug ang matag propeta naghisgut kalabut sa atong panahon, diha nga ang Israel pagapundukon ug ang kalibutan andamon alang sa Ikaduhang Pag-anhi sa Manluluwas. Hunahunaa kana! Sa tanang katawhan nga nakapuyo niining kalibutana, kita ang makahimo sa pag-apil niini nga kalihokan sa katapusan, dakong panagpundok. Makapahinam gayud kana!
Gireserba sa atong Langitnong Amahan ang daghan sa Iyang labing halangdong mga espiritu—tingali moingon ko nga labing nindot Niya nga team—alang niining katapusang hugna. Kadtong halangdon nga mga espiritu—kadtong labing maayo nga mga magdudula, kadtong mga bayani—mao kamo!
Mopamatuod ko nga ang panagpundok karon na, ug tinuod kini. Sa tuig nga ako natawo, ang total nga mga miyembro sa Simbahan wala kaabut og 600,000 ka mga tawo, nga walay miyembro sa South America. Karon adunay sobra sa 16 ka milyon ka mga miyembro sa tibuok kalibutan, nga dunay dul-an sa 3 ka milyon ka mga miyembro sa South America.
Sultihan ko kamo mahitungod sa usa nako ka kasinatian niadtong 1979. Nagserbisyo ako kaniadto isip Kinatibuk-ang Presidente sa Sunday School. Gidapit ako nga motambong og miting sa mga lider sa Simbahan diin ang Presidente sa Simbahan, si Presidente Spencer W. Kimball, mamulong. Miawhag siya kanamo sa pag-ampo nga adunay mga oportunidad sa tanang nasud aron ang ebanghelyo ni Jesukristo madala ngadto sa tanang tawo sa yuta. Piho niyang gihisgutan ang China ug mihangyo nga mag-ampo kami alang sa katawhan sa China. Miingon usab siya, “Kinahanglang moserbisyo kita sa mga Chinese. Kinahanglang makat-on kita sa ilang pinulongan. Kinahanglan kitang mag-ampo ug motabang kanila.”
Mipauli ako ngadto sa akong asawa, si Dantzel (kinsa namatay kapin sa 13 ka tuig na ang milabay), ug miingon kaniya, “Mihangyo si Presidente Kimball kanamo niana nga miting sa pagkat-on og Inintsik! Ug wala ko makadungog niya nga miingon, ‘Tanan gawas ni Brother Nelson!’ Mao nga, andam ka ba nga magtuon og Mandarin Chinese uban nako?” Siyempre, miuyon siya ug gitudloan kami sa Mandarin.
Unom ka semana human sa pag-awhag ni Presidente Kimball, mitambong ko sa tinuig nga miting sa American Association for Thoracic Surgery. Gipahigayon kini sa Boston, Massachusetts. Nianang buntaga, nag-ampo ko sa akong kwarto sa hotel alang sa mga tawo sa China, sama sa gihangyo ni Presidente Kimball. Miadto ko sa unang miting nianang adlawa ug milingkod diin ako maglingkuran kanunay niining propesyonal nga mga miting—sa atubangan sa kwarto. Hinoon, sa pagpadayon sa miting, nag-anam ko ka dili komportable sa akong lingkuranan. Samtang gipalong ang mga suga alang sa usa ka slide presentation, mipahawa ko sa akong lingkuranan ug hilum nga milakaw ngadto sa luyo sa kwarto—usa ka dapit diin dili ko kasagarang molingkod. Sa pagsiga na usab sa mga suga, akong nakita nga naglingkod ko tupad sa usa ka Intsik nga doktor. Gipaila niya ang iyang kaugalingon nga si Propesor Wu Ying-Kai gikan sa Beijing, China!
Human sa nindot nga pakigsulti kaniya, gidapit nako siya sa pagbisita sa Siyudad sa Salt Lake ug sa paghatag og lecture sa University of Utah Medical School. Malipayon siyang midawat ug maayo ang iyang nabuhat. Dayon mibalik siya sa China.
Wala madugay niana, midapit siya nako nga mahimong visiting professor sa surgery sa Shandong Medical University sa Jinan, China. Miresulta kini sa sunod-sunod nga mga pagdapit kanako nga moserbisyo isip visiting professor sa duha pa ka mga unibersidad sa China.
Kining talagsaong propesyonal nga mga kasinatian—sa wala pa ko gitawag ngadto sa Napulog Duha—misangpot ngadto sa hangyo sa mga Chinese surgeon nga mopahigayon ko og open-heart nga operasyon aron maluwas ang kinabuhi sa ilang kinasikatan nga opera star. Gibuhat nako kana, ug mapasalamaton ko nga nagmalampuson kana nga operasyon. Nahitabo nga kadto maoy katapusang operasyon sa akong propesyonal nga kinabuhi.
Sa hapit na 40 ka tuig karon, nag-ampo ko alang sa mga tawo sa China. Nagmaya ako sa akong pakig-uban sa medikal nga mga kaabin ug ubang minahal nga mga higala sa China. Dako kaayong kalipay alang kanako karon nga opisyal nga gitawag nga “karaang higala sa China.”
Akong pagpamatuod nga kon buhaton nato ang bisan unsa nga gipabuhat sa propeta sa Dios kanato, maandam ang agianan ug mausab ang mga kinabuhi.
Karon, hinaut nga nangutana mo sa inyong kaugalingon, “Unsa may akong mabuhat, isip tin-edyer, sa pagtabang sa pagpundok sa Israel?” Si Sister Nelson ug ako nangutana niana gayud nga pangutana, ug uban pa, ngadto sa usa ka grupo sa kabatan-onan gikan sa edad nga 12 hangtud 18, nga ang kadaghanan ania dinhi karon.
Una ming nangutana, “Unsa man ang pagpundok sa Israel? Ug unsa man ang kahulugan niini kaninyo?” Nagkalain-lain ang ilang mga tubag, apan ang kadaghanan mipasabut nga dili sila sigurado kon unsa kini. Karong gabhiuna, gusto namo nga inyong masayran nga ang pagpundok sa Israel nagpasabut sa pagtanyag sa ebanghelyo ni Jesukristo ngadto sa mga anak sa Dios sa matag habig sa tabil kinsa wala makahimo og importanting mga pakigsaad sa Dios ug wala makadawat sa ilang importanting mga ordinansa.
Ang matag anak sa atong Langitnong Amahan takus sa oportunidad sa pagpili nga mosunod ni Jesukristo, modawat sa Iyang ebanghelyo uban sa tanang panalangin niini—oo, tanang panalangin nga gisaad sa Dios ngadto sa kaliwatan ni Abraham, Isaac, ug Jacob, kinsa, sama sa inyong nasayran, nailhan usab isip Israel.
Akong minahal nga talagsaong kabatan-onan, gipadala kamo sa yuta niining tukma nga panahon, ang labing importanting panahon sa kasaysayan sa kalibutan, aron motabang sa pagpundok sa Israel. Walay laing panghitabo dinhi sa kalibutan karon nga mas importante kay sa niana. Walay lain nga dunay mas dakong sangputanan. Walay lain gayud.
Kini nga pagpundok kinahanglang importante kaayo kaninyo. Kini mao ang misyon diin gipadala kamo dinhi sa yuta.
Busa ang akong pangutana ninyo mao nga “Andam ba kamong moapil sa grupo sa kabatan-onan sa Ginoo aron motabang sa pagpundok sa Israel?” Palihug hunahunaa kini. Ayaw usa pagtubag.
Balikan nato ang ubang mga pangutana namo ni Sister Nelson ngadto sa among batan-ong mga higala. Nangutana kami, “Kon ang propeta modapit sa matag 12 ngadto sa 18-anyos nga tawo sa Simbahan nga motabang sa pagpundok sa Israel, unsay andam ninyong buhaton?”
Ang kabatan-onan mitubag uban sa makadasig nga mga komentaryo sama sa, “Kon ang propeta midapit namo sa pagtabang sa pagpundok sa Israel, hingpit gayud akong moapil niini.” Dunay lain nga misulti, “Undangan nako ang bisan unsa nga akong gibuhat ug motabang!” Lain pa: “Buhaton nako ang bisan unsa nga iyang isugo kanako, tungod kay ang propeta usa ka tigsangyaw gikan sa Dios.”
Ang ilang mga tubag naglakip usab sa: “Mahimo kong andam sa pagbuhat og dugang nga buhat sa family history. Mahimo kong mas bukas ug mas maningkamot sa pakigsulti sa uban mahitungod sa ebanghelyo. Mahimo kong maayo nga ehemplo sa pagpakita og Kristohanong mga hiyas. Mohimo ko og mas daghang mga bunyag alang sa patay, mousab og mga aspeto sa akong pagpakabuhi ug sa mga pagpili nga akong gihimo, moadto bisan asa nga iya kong paadtuon, magkat-on og bag-ong pinulongan, makighimamat og bag-ong mga tawo; mopahulam sa akong kopya sa Basahon ni Mormon niadtong wala pa makabasa niini. Ug mahimo kong labing maayong tawo nga mahimo nako.”
Nangutana usab kami niining mga batan-on kon unsay andam nilang isakripisyo aron makatabang sila sa pagpundok sa Israel. Usab, ang kabatan-onan nakalipay namo. Mitubag sila: “Dili na kaayo ko mogahin og oras sa sports aron makatabang ko og tawo nga nanginahanglan sa kamatuoran. Isakripisyo nako ang panahon uban sa mga higala ug dapiton hinoon sila nga moadto sa templo. Siguradong minosan nako ang paggamit sa telepono. Minosan nako ang pagtan-aw og salida. Andam pa [gani] kong isakripisyo ang akong katulog sa hapon sa Dominggo!”
Nangutana mi, “Kon gusto ninyong moapil sa pagtabang sa pagpundok sa Israel, unsay gusto ninyong sugdan o hunongon sa pagbuhat?” Mitubag sila og sama sa “Mas magtuon pa ko sa mga kasulatan, ug mas tinuoray, aron makatubag ko sa mga ipangutana sa mga tawo nako. Minosan nako ang akong oras diha sa social media; mas moapil diha sa yano nga miyembro-misyonaryo nga mga buhat, lakip ang inadlaw nga mga buhat sa pagserbisyo. Akong minosan ang akong oras sa telepono, ug, kon naa ko sa akong telepono, mo-post ko og mga kasulatan o ubang espiritwal nga mensahe sa social media. Tun-an nako ang mga pakigpulong sa kinatibuk-ang komperensya kay importante kaayo kini. Mokaon ko og makahimsog nga pagkaon aron magpabilin kong lagsik. Mohunong ko sa paghunahuna nga ang tanan mahitungod nako.” Salamat, mga kaigsoonan, sa inyong mga tubag sa among mga pangutana.
Hunahunaa kini, minahal ko nga batan-ong kaigsoonan, karon mismo nangandam ko alang sa adlaw nga kinahanglan kong mohatag og husay ngadto ni Propeta Joseph Smith, ni Presidente Brigham Young, ug sa uban—ug sa katapusan ngadto sa Ginoo—mahitungod sa akong pagkatinugyanan isip propeta sa Dios dinhi sa yuta karon. Dili ko gusto nga pangutan-on, “Brother Nelson, nganong wala man nimo mas giklaro sa kabatan-onan ang ilang responsibilidad sa pagpundok sa Israel? Nganong wala man ka mas magmaisugon sa pagpaapil kanila?”
Busa, karon akong dapiton ang matag batan-ong babaye ug matag batan-ong lalaki nga nag-edad og 12 hangtud 18 sa Ang Simbahan ni Jesukristo sa mga Santos sa Ulahing mga Adlaw sa pag-apil sa grupo sa kabatan-onan sa Ginoo nga motabang sa pagpundok sa Israel.
Unsay makatabang ninyo? Samtang magpadayon kamo sa pagbasa matag adlaw gikan sa Basahon ni Mormon, inyong makat-unan ang doktrina sa pagpundok,6 mga kamatuoran mahitungod ni Jesukristo, Iyang Pag-ula, ug ang kahingpitan sa Iyang ebanghelyo nga dili makita diha sa Biblia. Ang Basahon ni Mormon mahinungdanon sa pagpundok sa Israel.7 Gani, kon wala ang Basahon ni Mormon, ang gisaad nga pagpundok sa Israel dili mahitabo.
Ug karon dapiton ko kamo sa pag-andam sa inyong kaugalingon pinaagi sa pagbuhat og lima pa ka butang — lima ka butang nga mousab ninyo ug motabang ninyo sa pag-usab sa kalibutan.
Una, minosi ang inyong pagsalig sa social media, aron mapakunhod ang kalibutanong impluwensya niini kaninyo.
Sultihan ko kamo kalabut sa usa ka batan-ong lalaki nga inyong kaedad, ang apo sa akong suod nga higala. Sikat siya sa iyang mga higala ug usa ka lider sa iyang high school. Bag-o lang, ang iyang mga ginikanan nakakita og mga butang sa iyang telepono nga dili angay alang sa usa ka sumusunod ni Jesukristo. Miinsister sila nga undangan niya ang social media sulod sa usa ka panahon. Giilisan nila ang iyang smartphone og flip phone [telepono nga walay internet], ug nataranta siya. Unsaon niya pagkonektar ngadto sa iyang mga higala?
Sa sinugdanan nasuko siya sa iyang mga ginikanan, apan human sa pipila ka adlaw, nagpasalamat siya kanila sa pagkuha sa iyang smartphone. Miingon siya, “Gibati nako nga gawasnon sa unang higayon sulod sa dugayng panahon.” Karon manawag siya sa iyang mga higala gamit ang iyang flip phone aron mokonektar kanila. Tinud-anay na siya nga makig-istorya kanila imbis nga kanunay nga mag-text!
Unsa pa nga mga kausaban ang nahitabo sa kinabuhi niining batan-ong lalaki? Miingon siya nga ganahan siya karon nga nagawasnon sa mini nga kinabuhi nga namugna sa social media. Aktibo na siya nga nagpakabuhi imbis nga kanunayng migahin og panahon sa iyang telepono. Miapil siya og panglingaw-lingaw nga mga kalihokan sa gawas kay sa magdula og mga video game. Mas positibo siya ug matinabangon diha sa iyang panimalay. Nagtinguha siya og mga oportunidad sa pagserbisyo. Mas maminaw siya sa simbahan, adunay mas hayag nga panagway, mas malipayon, ug aktibong nangandam alang sa iyang misyon! Kining tanan tungod kay mipalayo siya sa negatibong impluwensya sa social media.
Busa, ang akong unang pagdapit ninyo karon mao ang pagpaminos sa inyong pagsalig sa social media pinaagi sa dili paggamit sa social media sulod sa pito ka adlaw. Moangkon ko nga adunay mga positibo sa social media. Apan kon mas tagdon ninyo ang mga post sa social media kay sa mga paghunghong sa Espiritu, niana gibutang ninyo ang inyong kaugalingon sa espiritwal nga peligro—ingon man ang peligro nga makasinati og grabing kamingaw ug kasubo. Kamo ug ako nakaila og mga batan-on nga naimpluwensyahan pinaagi sa social media sa pagbuhat ug pagsulti og mga butang nga dili gayud nila buhaton o isulti sa personal. Ang pagdaug-daog usa ka ehemplo.
Laing negatibo sa social media mao nga nagmugna kini og peke nga reyalidad. Ang tanan mobutang sa ilang labing makalingaw, makahinam, ug nindot nga mga litrato, nga nagmugna og sayop nga impresyon nga ang tanan gawas nimo adunay makalingaw, makahinam, ug nindot nga kinabuhi. Kadaghanan sa makita diha sa inyong nagkadaiyang social media nga mga post gituis, o peke. Busa hatagi ang inyong kaugalingon og pito ka adlaw nga pahulay gikan sa dili tinuod!
Pagpili og pito ka nagsunod nga mga adlaw ug buhata kini! Tan-awa kon makabantay ba kamo og kalainan diha sa inyong pagbati ug sa inyong hunahuna, ug bisan sa paagi sa inyong paghunahuna, nianang pito ka adlaw. Human sa pito ka adlaw, tan-awa kon duna bay pipila ka butang nga gusto ninyong hunungon sa pagbuhat ug pipila ka butang nga gusto ninyo karong sugdan sa pagbuhat.
Kining puasa sa social media mahimong tali lamang kaninyo ug sa Ginoo. Kini ang inyong timailhan kaniya nga andam kamong mopalayo sa kalibutan aron moapil sa Iyang grupo sa kabatan-onan.
Ang akong ikaduhang pagdapit mao ang paghimo og sinemana nga sakripisyo sa panahon ngadto sa Ginoo, sulod sa tulo ka semana nga magsunod, aron ipahibalo Kaniya nga gusto ninyong mahimong parte sa Iyang grupo sa kabatan-onan—labaw pa sa bisan unsa ninyong gusto. Sulod sa tulo ka semana undangi ang usa ka butang nga gusto ninyong buhaton ug gamita kana nga panahon sa pagtabang sa pagpundok sa Israel.
Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, nagtabang kamo sa pagpundok sa Israel. Ingon lang niana ka yano.
Samtang mag-ampo kamo kalabut niini nga sakripisyo sa panahon, magiyahan kamo nga masayud unsay mahimo ninyong hunungon nianang semanaha ug unsay mahimo ninyong buhaton aron motabang sa pagpundok sa Israel. Sama pananglit, ang usa ka batan-ong golfer dili modula og usa ka round sa golf ug igahin kana nga panahon sa bunyaganan sa templo.
Ang akong ikatulong pagdapit mao nga maghimo kamo og pagtimbang-timbang sa kinabuhi uban sa Ginoo, ug tingali uban sa inyong mga ginikanan ug sa bishop, sa pagsiguro nga nagbuhat kamo sa gikinahanglang buhaton diha sa dalan sa pakigsaad. Kon nahisalaag kamo, o kon adunay pipila ka butang nga kinahanglan ninyong undangon aron mas mahimong putli ang inyong hunahuna ug kasingkasing, karon ang hingpit nga panahon sa pag-usab.
Kon dili kamo sigurado kon unsaon sa paghinulsol, pakigsulti sa inyong bishop o sa inyong ginikanan o sa duha. Motabang sila ninyo nga makasabut sa Pag-ula ni Jesukristo. Motabang sila ninyo nga masinati ang kalipay nga kanunay nga dala sa tinuod nga paghinulsol.
Palihug ayaw pagtipas sa dalan sa pakigsaad og dugang nga minuto. Palihug balik pinaagi sa tinuod nga paghinulsol, karon. Nagkinahanglan kami nga moapil kamo kanamo niini nga grupo sa kabatan-onan sa Ginoo. Lahi gayud kini kon wala kamo!
Ang akong ikaupat nga pagdapit mao nga mag-ampo kamo matag adlaw nga ang tanang anak sa Dios makadawat sa mga panalangin sa ebanghelyo ni Jesukristo. Kamo ug ako nagpuyo nga makita, ug padayon nga makakita, sa Israel nga gipundok uban sa dakong gahum. Ug mahimo kamong parte sa gahum sa luyo niana nga pagpundok!
Ang akong ikalima nga pagdapit mao nga magpalahi kamo; pagpalahi sa kalibutan. Kamo ug ako nasayud nga kinahanglan kamong mahimong kahayag sa kalibutan. Busa, ang Ginoo nagkinahanglan ninyo nga makita, madungog, molihok, ug magsinina nga sama sa usa ka tinuod nga disipulo ni Jesukristo. Oo, nagpuyo kamo sa kalibutan, apan lahi kaayo kamo og mga sumbanan sa kalibutan sa pagtabang ninyo nga makalikay sa negatibong mga epekto sa kalibutan.
Uban sa Espiritu Santo nga maoy inyong kauban, dili kamo mabutahan sa kultura sa pagkabantugan nga popular kaayo sa atong katilingban. Mahimo kamong mas maalamon kay sa nanglabay nga mga henerasyon. Ug kon usahay tawagon kamo nga “lahi kaayo”, ipasigarbo kana nga pagkalahi ug pagmalipayon nga misanag ang inyong kahayag niining nagkangitngit nga kalibutan!
Pagpakita og sumbanan alang sa tibuok kalibutan! Hangupa ang pagkalahi! Ang booklet nga giulohan og Alang sa Kalig-on sa mga Kabatan-onan kinahanglang maoy inyong sumbanan. Kini ang sumbanan nga gilauman sa Ginoo nga sundon sa tanan Niyang kabatan-onan. Kaon, isip Iyang mapaubsanong propeta, mohangyo ko ninyo sa pagtuon niini nga booklet pag-usab. Basaha kini nga mainampoon sama nga wala pa ninyo kini mabasa sukad. Markahi kini. Hisguti kini. Hisguti ang mga sumbanan ngadto sa inyong mga higala. Hukmi unsaon ninyo sa pagsunod niini nga mga sumbanan, inyong mga sumbanan, nga labaw pa ka hingpit.
Aduna kamoy kaugalingon ninyong kopya. Busa sa pagtapos sa miting karong gabhiuna, kon mopili kamo nga moapil, palihug pagdala og kopya sa Alang sa Kalig-on sa mga Kabatan-onan ug ihatag kining bag-o nga kopya ngadto sa usa ka higala kinsa tingali wala mahibalo sa inyong mga sumbanan o wala magsunod niini.
Pag-ampo kon kinsay nagkinahanglan niini nga booklet. Magiyahan kamo. Ug makahinam kini.
Karon, akong i-summarize pinaagi sa pagribyu sa akong lima ka mga pagdapit kaninyo sa pag-apil sa grupo sa kabatan-onan sa Ginoo nga motabang sa pagpundok sa Israel:
-
Paghimo og pito ka adlaw nga puasa gikan sa social media.
-
Paghimo og sinemana nga sakripisyo sa panahon ngadto sa Ginoo sulod sa tulo ka semana.
-
Pabilin diha sa dalan sa pakigsaad. Kon mitipas kamo, paghinulsol ug balik diha sa dalan.
-
Pag-ampo matag adlaw nga ang tanang anak sa Dios makadawat sa mga panalangin sa ebanghelyo ni Jesukristo.
-
Pagpalahi. Pagpahimong lahi. Ipakita ang imong kahayag. Hatagi ang usa ka higala og kopya sa booklet nga Alang sa Kalig-on sa Kabatan-onan.
Minahal ko nga mas batan-ong kaigsoonan, apil kamo sa labing maayo nga gipadala sa Ginoo sukad dinhi sa kalibutan. Aduna kamoy kapasidad nga mahimong mas lantip ug mas maalamon ug adunay mas dakong epekto sa kalibutan kay sa nangaging henerasyon!
Sa akong pagtapos, dapiton ko kamo sa pagbarug uban sa kabatan-onan sa tibuok kalibutan ug isinati ang kanindot nga mahimong sakop sa grupo sa kabatan-onan sa Ginoo diha sa “kasundalohan sa Zion” pinaagi sa pagkanta sa atong panapos nga himno, “Hope of Israel,” tungod kay kini nga himno mahitungod gayud kaninyo!
Gikan sa kinahiladman sa akong kalag, mopamatuod ko nga kini ang buhat sa Makagagahum nga Dios. Siya buhi. Si Jesus mao ang Kristo. Kini ang Iyang Simbahan, gipahiuli aron sa pagtuman sa balaang padulngan niini, lakip ang gisaad nga pagpundok sa Israel.
Kamo ang paglaum sa Israel, “ang mga bata sa gisaad nga adlaw”!8 Mopamatuod ko sa ingon sa pangalan ni Jesukristo, amen.