O Le Malaga o le Olaga Faaletino
O Se Afiafi ma Peresitene Dieter F. Uchtdorf
Faigalotu mo Talavou Matutua i le Lalolagi Atoa • 14 Ianuari, 2018 • Maota Autu mo Konafesi
Ou uso e ma tuafafine pele, uo pele, ou te aumai ia te outou alofaaga ma faamanuiaga a le Korama a Aposetolo e Toasefululua.
Ua ou misia Peresitene Thomas S. Monson. Sa avea o ia ma a’u uo mamae ma faapelepele, faiaoga, ma faufautua. Ae ou te faamautinoa atu ia te outou, o le Alii lava Ia o loo i ai i le taiulu o lenei Ekalesia, Lana Ekalesia, faapena Le Ekalesia a Iesu Keriso o le Au Paia o Aso e Gata Ai. Ua saunia e le Alii se fuafuaga paia ina ia taitaiina ai pea Lana Ekalesia i taimi uma e perofeta, tagatavaai, ma talifaaaliga.
O loo matou manatuaina pea outou. Matou te tatalo mo outou, ma matou alolofa ma fiafia ia te outou.
O le sauniga i le lalolagi atoa e potopoto ma fefaasoaai ai lea na muamua atu ma o le a faaauau pea pe a mavae lenei sauniga o se faataitaiga se tasi lea o lo outou lelei. Ua auai le sefulu afe o outou i ni auala ofoofogia, mai i le fesoasoani i e mafatia, i le siitia o agaga o isi e ala i pesega. Ua faamoemoeina oe e faasoa atu le tala lelei o le talalelei a Iesu Keriso e ala i savali faaagafesootai ma isi vaega ma e ala i au faataitaiga patino. Faafetai mo le faaalia o lo outou naunautaiga e auauna atu i le Atua ma uso a tagata.
E lelei le i ai ma outou i le aso ma lagona lo outou agaga, la outou malosi, la outou naunautai. Ua ou fiafia ua tatou maua se avanoa e faalogologo atu ai i lo’u toalua. O Harriet o le lasusulu o lo’u olaga. Ua silafia uma e tagata o ia, ma alolofa ia te ia. O ia le ituaiga o tagata na te faaleleia ma faafiafiaina atili i latou o siomiaina o ia. O ia moni lava o le faatosinaga ia te au.
O lea faatoa uma ona faamanatu le 55 tausaga o le ma faaipoipoga. A ma vaavaai atu i le ma fanau e toalua ma o la taitoalua, a ma fanau a fanau e toaono ma o latou aiga, ma le ma fanau a fanau a fanau e toatolu, ma te maofa lava i le maoae tele o le malaga o lenei olaga.
O Le Vaitau o Tali Vave
Sa oo mai se manatu mata’ina ia te au a o ou saunia mo lenei faasalalauga. Ioe, e moni, o tausaga a o 18 i le 30 ou tausaga sa seasea iloa atu i le faaata i tua ae e ui i lo’u matua o i ai nei, o loo ou lagonaina pea le talavou i totonu. O le mea moni, o le toatele o i tatou o tagata matutua e manatu ia i tatou lava o ni tagata talavou ua leva ona ola mo se taimi umi.
O tupulaga matutua atu e tele atu ni mea e tutusa ai le tou tupulaga nai lo mea tou te ono manatu i ai. Ou te talitonu o eseesega i le va o fanau a le Tama Faalelagi, po o le a lava lo latou matutua, e itiiti lava e faatusatusa i tulaga e tutusa ai. Mo se faataitaiga, e toatele outou o loo i ai fesili e uiga i le Atua ma oe lava ia—lo fesili loloto ma taua ia e talitutusa ma fesili na fesili ai tagata e matutua atu ia te outou:
“O i ai moni ea se Atua? E popole ea o Ia?”
“O ou i ai ea i luga o le ala sao?”
“Aisea ou te lagona ai i nisi taimi le leai o se faamoemoe, lofituina, le amanaiaina, po o le tuuatoatasi?”
“Aisea e le o faatosinaina ai e le Atua lo’u olaga?
Aisea na le tali mai ai o Ia i se tatalo?”
“Aisea na Ia faatagaina ai au ia oo i lenei faanoanoa, ma’i, po o se faalavelave?
E mafai ona avea nei fesili ma ni fesili e faigata ona taliina.
I lenei vaitau o tali vave—lea ua faigofie lava ona maua se malamalama maoti ma lē mailoa i le Google—tatou te le fiafia ai i nisi taimi pe a tuai ona maua mai ni tali i a tatou fesili sili ona patino, taua, ma faananati. Tatou te sii ae o tatou loto i le lagi ae na o le pau le mea e foliga mai o tatou maua o se “faailo (cursor) faatalitali” faaitatagata o loo taavilivili pea.
Tatou te le fiafia e faatalitali.
A tatou faatalitali e sili atu ma ni nai sekone mo se sailiga i le initoneti e tali mai, tatou te ono manatu ua faaletonu pe ua motusia foi le fesootaiga. I lo tatou le fiafia, e ono tatou lafoaia ai lava le sailiga. Ae a oo mai i fesili e faavavau, o mataupu tau i le agaga, e tatau ona tatou onosai atili.
E le o tali uma e tutusa le taua. O tali e oo mai le poto faalelalolagi po o manatu taatele e faigofie ona oo mai, ae e vave lava ona mou atu lo latou taua pe a oso mai ni teori po o ni faiga fou. O tali faalelagi—tali e faavavau—e le mafaatauina. O le mauaina o nei tali e tele ina manaomia ai le ositaulaga, galue, ma le onosai.
O nei tali e aoga ai le faatalitali.
O lo’u faamoemoega i le asō o le ofo atu lea o la’u molimau mautinoa e silafia outou e lo outou Tama i le Lagi, e faafofoga mai o Ia ia te outou, ma o le a Ia le tuulafoaiina lava outou. A gauai atu o outou loto ia te Ia ma taumafai e mulimuli i Ona ala, o le a i ai o Ia i o outou olaga ma taitai o outou ala a o outou faimalaga ai i lenei malaga maoae ma faafiafiaina o le olaga faaletino.
Faafesootaiina o Togitogi
O se tasi o tagata fatufatua’imea maoae o o tatou taimi, o Steve Jobs o le Apple, sa faia le manatu lenei: “E le mafai ona e malamalama i mea o le a tutupu ia te oe i le lumanai,” sa ia fai mai ai.“E faato’a mafai ona e malamalama i ai pe a uma ona tupu ma e manatuaina. O lea la e tatau ai ona e faatuatuaina o mea o le a tutupu ia te oe i le lumanai o le a e malamalama i ai.”1
O le a le uiga o lau saunoaga? Masalo o le a aoga se faataitaiga. I le tausiusiuga o le seneturi 19, na amata ai ona valiata Georges Seurat ma Paul signac i se sitaili fou na iu ina lauiloa o le neo-impressionism.O le la metotia sa i ai le togitogiga o atavali i ni togitogi ninii o lanu. I le lata mai, e foliga mai ai nei togitogi e le fesootai ma salalau solo. Ae a e tagai i le atavali atoa, e mafai ona e vaai i togitogiga ua taatitia lelei i ni lanu ma le auala o le a fatu mulimuli ane ai ia lanu ma faaali mai ai se mamanu matagofie. O le mea sa foliga muamua mai sa salalau solo ma fenumiai ua amata ona malamalama i ai. O nisi taimi e pei ai o tatou olaga o se atavali togitogi neo-impressionistic. O togitogi o lanu ia e fatu ai mea e tutupu ma taimi patino i o tatou aso e mafai ona vaaia le le fesootai ma le vavaō i le taimi muamua, Ua le mafai ai ona tatou vaaia se faatulagaga i na mea. Ua le mafai ai ona tatou mafaufauina o loo i ai so latou faamoemoega.
Peitai, a tatou toe laa i tua ma vaai atu i se vaaiga e faavavau, a tatou vaai i o tatou olaga i le faavaa o le talalelei a Iesu Keriso, e mafai ona tatou amata vaaia le auala e fesootai solo ai togitogi eseese i o tatou olaga. Atonu e le mafai ona tatou vaaia le ata atoa i lena taimi, ae o le a lava mea tatou te vaaia e faatuatuaina ai o loo i ai se mamanu matagofie ma silisili. Ma a o tatou tauivi e faalagolago i le Atua ma Lona Alo, o Iesu Keriso, o le a i ai se aso o le a tatou vaaia ai le fua faaiu, ma o le a tatou iloa ai sa taitaiina ma taialaina lava e le aao o le Atua a tatou laasaga.
O le a tatou iloa o le Agai o Tupu (Tufuga Sili) sa i ai se fuafuaga mo na togitogi salalau solo i le taimi atoa. O le a tatou iloa lava ua ia faalauteleina a tatou taleni, saunia avanoa, ma faailoa atu i tatou i avanoa e sili atu le mamalu nai lo mea sa tatou mafaufauina pe ausiaina e i tatou lava ia.
Ua ou vaaia moni nei mea i lo’u lava ia olaga.
O La’u Malaga o le Olaga Faaletino
E toatele outou ua iloaina a o ou laitiiti, sa faalua ona fosi i matou e sosolaese mai lo matou aiga ma tiai ai mea uma. I solaaga uma e lua, sa iloa manino lava o tagata sa i o matou nofoaga fou sa manatu ia i matou o ni tagata “faatauvaa” i lo i latou. I tamaiti o la’u tupulaga, o la’u gagana tautala sa faailogaina ai au o se tagata mai fafo, ma o se mea tele lea mo latou e faatauemu ma toē i ai.
Sa tauivi o’u matua e tausi mo lo matou aiga. Sa amata e lo’u tina se pisinisi faitagamea ma sa avea a’u, faatasi ma la’u uila vilivae ma le taavaletoso, ma “tagata tiliva faapitoa” mo lena pisinisi pe a tuua le a’oga.
O le le fiafia ma le atuatuvale ona o feoaiga i nofoaga fou na mafua ai ona faaletonu la’u aoga ma maumau ai le tausaga a’oga atoa e tasi.
I Siamani i Sasae, sa ou aoao ai le FaaRusia o se gagana lona lua. Sa faigata, ae sa gafataulimaina lava. Ae, i Siamani Sisifo, sa manaomia ona ou aoaoina le Igilisi.
Sa foliga faigata lea mea ia te au. Sa ou talitonu sa le’i faia tonu lo’u gutu mo le gagana Igilisi.
I le vaitaimi o o’u tausaga talavou, sa ou faananau ai lava i se teineitiiti sili ona ofoofogia ma ona mata eena lapopoa aulelei. Ae paga lea, sa foliga mai sa leai ma sina naunau mai o Harriet ia te a’u. Po o le a lava sa’u taumafaiga, sa lei foliga mai sa maua sina ou avanoa. Ia, ua outou faafofoga i lana itu o le tala.
O lea la, o au o se alii talavou sa le taua ma tauivi sa ola i Siamani i le mavae o le taua ma o le sa lei foliga mai sa tele se avanoa e faamanuiaina ai i le olaga.
Peitai, sa i ai ni nai mea lelei sa gasolo mo au.
Sa ou iloa sa alolofa lo’u aiga ia te a’u. I le aoga ma le lotu sa i ai ni faiaoga sa uunaia au ia seti pea ni a’u sini maualuluga. Ou te manatua pea le taimi na aoao mai ai e se faifeautalai talavou Amerika le mataupu faavae lenei mai tusitusiga paia: “Afai o le Atua e mo [oe], o ai la e faasagatau atu ia te [oe]?”2
Sa i ai se mea e uiga i lea manatu na taiaina au i se mana tele. Ma afai o le tulaga lena, sa ou manatu ai, aisea ea la ou te fefe ai?
O lea sa ou talitonu ai. Ma sa ou faatuatuaina le Atua.
Mo se taimi, sa ou i ai i se polokalama aperenitisi. Sa lu’iina au e se tasi o a’u faiaoga ina ia taulai maualuga atu ma auai i aoga po e suesue le faaenisinia o afi taavale. Sa matua tele se galuega faaopoopo na ou faia ai, ae sa taitai atu ai au e mauaina lo’u fiafia tele i mea tauvaalele! Sa faateia a’u ina ua ou iloaina ina ia avea ma se pailate sa manaomia ona ou malamalama i le Igilisi. Ae sa ou manao ia avea ma se pailate, ma sa pei o se vavega le suia o lo’u gutu, ma sa lei toe avea ai le Igilisi ma se gagana faigata.
Faatasi ai ma se uunaiga fou, o se tautinoga fou e galue malosi, faatasi ai ma le faalagolago i le Tama Faalelagi, sa ou faia ai ni laasaga iti ia na fesoasoani ia te au e atiae le talitonuga e mafai ona ou faia.
Ioe, sa lei faapea la na sologa lelei ai pea mea i taimi uma.
A o 19 ou tausaga, sa ou malaga atu ai i San Antonio, Texas, e amata la’u a’oga faapailate i le Ea Fosi. I luga o le vaalele, sa ou saofai ai i autafa o se alii sa tautala i se gagana malosi Faa-Texas. Sa ou iloa ai ma lo’u fefe o le Igilisi lea sa ou matua galue malosi e aoao sa le i tutusa ma le Igilisi sa latou tautatala ai i Texas.
I le a’oga faapailate, sa faigata foi. O se polokalama na matua fefeu, faatasi ma tagata uma sa tauva mo le tulaga sili i le faauuga. Sa ou iloaina vave ua ou i ai i se tulaga le lelei ona o le toatele o tagata o la’u vasega o le latou gagana tautala le Igilisi.
Sa lapataia au e a’u faiaoga e uiga i se isi tulaga le lelei e ono tupu—sa ou faaaluina le tele o le taimi i le lotu. Sa talileleia a’u e tagata o le ekalesia i le lotoifale i le latou paranesi ma i o latou aiga, ma sa matou fausiaina faatasi foi se falesa i Big Spring.Sa popole a’u faiaoga i na gaoioiga ina nei faaletonu ai lo’u avanoa i se tulaga maualuga. Sa ou lei manatu i ai. O lea sa ou faatuatuaina ai le Atua ma faia le mea sili na ou mafaia.
Mulimuli ane, sa ou aoaoina le Igilisi (e ui o loo ou galue ai pea i le aso). Sa ou faamaeaina la’u a’oga faapailate (ma tu sili ai i la’u vasega). Sa oo ina avea a’u ma se pailate o vaalele tau ma mulimuli ane o se kapeteni o vaalele laupasese. Ma o lena teineitiiti aulelei mata enaena o a’u miti? O loo i ai iinei ma a’u.
Fai ma le Atoatoa Mea Iti
Pe o i ai se lesona i lenei mea? Ou te manatu o loo i ai!
O le tasi atonu o lenei: Aua nei lofituina i le tele o galuega tetele ma faigata o le olaga. Afai e te tuuto atu e fai ni mea “faigofie”—mea “iti” ia ua talosagaina oe e le Atua e fai—ma e te faia ma le atoatoa i le mea e te mafaia, o le a mulimuli mai mea tetele.
O nisi o nei “mea iti ma faigofie” e mafai ona e faia ma le atoatoa e i ai le tatalo faaleaso, suesueina o tusitusiga paia, ola i le Upu o le Poto, auai i le lotu, tatalo ma le faamoemoega moni, ma le totogiina o sefuluai ma taulaga.
Ia faia nei mea e tusa lava pe e te le fia manao e fai. O nei “osigataulaga” atonu e foliga mai e itiiti, ae e taua tele, aua “o osigataulaga e aumaia faamanuiaga o le lagi.”3
I se lagona, o au osigataulaga “itiiti ma faatauvaa” o togitogi ia o le olaga o aso taitasi ia e maua ai le atavali silisili o lou olaga. Atonu e te le vaaia le auala e fesootai ai togitogi i le taimi nei, ma e te le manaomia ona vaai i ai i le taimi nei. Tau lava ina ia i ai le faatuatua ia lava mo le taimi patino o loo e ola ai i le taimi nei. Faalagolago i le Atua, ma “o mea iti [o le a] tutupu mai ai mea tetele.”4
Faalagolago i le Atua
Ia, atonu tou te manatu, ”Ioe, Peresitene Uchtdorf, ua lelei uma na mea mo oe. Ae o oe o se Aposetolo. Ou te le faapena. E le taua a’u i le Atua. E le o taliina a’u tatalo. E le o taitaia lo’u olaga. Afai o i ai se fuafuaga mo au, ua na o se kopi o lau fuafuaga. O se fuafuaga tuufaasolo mai lalo. O se fuafuaga e iloa ai o loo silafia oe e le Atua ma ia tau lava ina faamalieina i mea ua maua.”
Au uo pele, manatua le mea na saunoa i ai Steve Jobs: “E le mafai ona e malamalama i mea o le a tutupu ia te oe i le lumanai: e faato’a mafai ona e malamalama i ai pe a uma ona tupu ma e manatuaina.”
A o ou pei o outou, sa leai ma so’u iloa i mea o le a ave i ai a’u e lo’u olaga. Sa ou lei vaaia le fesootaiina o togitogi i o’u luma.
Ae sa ou faalagolago i le Atua. Sa ou faalogo i le fautuaga a se aiga alofa ma uo atamamai, ma faia ni nai laasaga laiti o le faatuatua, sa talitonu afai ou te faia le mea sili ou te mafaia i lea taimi, o le a taulimaina e le Atua le ata tele atu.
Sa Ia faia.
Sa Ia silafia le taunuuga mai le amataga i le taimi sa ou le iloaina ai.
Sa le mafai ona ou vaaia le lumanai, ae sa Ia silafiaina.
E oo lava i na taimi o faigata sa ou manatu ai na tuulafoaiina au, sa i ai o Ia ma a’u—ua ou vaaia nei lena mea.
I le Faataoto, tatou te maua ai le folafolaga maoae lenei: “Faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”5
Ou te le talitonu o loo i ai se faailoga fesili i le faaiuga o lena fuaiupu.
Ou te manatu e tatau ona i ai se faailoga ofo!
E ao la ona e fesili ifo ia te oe lava ia, “O lava ea lo’u faatuatua e talitonu ai i le Atua? O o’u loto ea e faatuatuaina e alofa o Ia ia te a’u ma finagalo e faatonu o’u ala?”
O le mea moni, atonu e loo sologa lelei lou olaga na o oe i le tele o mea. Ae ou te augani atu ia e talitonu o le a lelei atu lou olaga pe a e faalagolago i le Atua e taiala ou laasaga. Na te silafia mea e le mafai ona e iloaina, ma ua ia te Ia se lumanai ua saunia mo oe e le o mafai ona e mafaufauina. Sa molimau mai le Aposetolo maoae o Paulo, “O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou e alofa ia te ia.”6
E te manao i lou Tama Faalelagi e taiala oe, faamanuia oe, ma tausia oe?
Ia talitonu la.
Alofa ia te Ia.
Saili atu ia te Ia ma lou loto atoa.
Savavali i Ona ala—o lona uiga, tausi i poloaiga, faamamalu i au feagaiga, mulimuli i aoaoga a perofeta, ma faalogo i uunaiga a le Agaga.
Ia fai le mea lenei ma o le Atua o le a “[faatoaafeina le faatoateleina o outou ma faamanuia outou e pei ona ia folafola mai!]”7
Tatou te Tali Atu i le Atua
Ou te malamalama mo nisi e foliga mai e faigofie lava ona faalele ae faigata ona faatino. Ou te ioe e te le tau alu mamao i le aganuu o nei aso e faalogo ai i leo feteenai ia e faalotovaivaia pe oo foi ina faifai faalauaitele i talitonuga i le Atua, ma i le tatou tapuaiga patino lava.
O ia leo ua faateteleina i o tatou aso e ala i avanoa tulagaese i fesootaiga.
O le tou lu’itau lena. Ae o le tou manuia foi lea.
Ou te talitonu o le a outou maua ni auala e taulimaina ai i le ala a le Alii!
O le vaega lena o lau malaga o le olaga faaletino. O le auala e te faia ai o le a matua faatosinaina ai lou lumanai ma le vaega e te faia i le galuega a le Atua iinei i le lalolagi.
Ae ui i lea, o mea o loo e oo i ai i le olaga e le o ni mea tulagaese uma. O la outou tupulaga e le na o le pau lea o se tupulaga ua luitauina ma tauemuina lo latou faatuatua i le Atua. O le mea moni, e foliga mai o lenei mea o se vaega lava o le tofotofoga faaletino mo fanau uma a le Atua.
“Afai o ni tagata o le lalolagi outou,” sa fetalai atu ai Iesu i Ona soo, “po ua alofa mai le lalolagi i ona tagata; ae le ni ō le lalolagi outou, a ua ou filifilia outou nai le lalolagi, o le mea lea e inoino ai le lalolagi ia te outou.”8
Pau lava la le mea o lou taliaina lea o le tulaga e faapea, o le taimi lava e te faia ai le tautinoga e mulimuli i le Faaola, o le a le fiafia mai i latou o e nonofo i totonu o le fale tele ma le ateatea—fai lava si leotetele i nisi taimi.9 Atonu latou te taumafai foi e faapalopalo ma faamaasiasi outou.
Ae ia manatua tou te le tali atu ia i latou. Tou te tali atu i le Atua. E i ai le aso o le a e tu ai i Ona luma ma tali atu mo lou olaga.
O le a Ia fesili atu po o a au me ana fai na faatoilalo ai faaosoosoga o le lalolagi ma mulimuli i le ala o le amiotonu. O le a Ia fesili atu pe na e mulimuli i le Faaola, pe na e alofa i lou tuaoi, pe na e taumafai ma le naunautai e tumau i luga o le ala o le avea ma soo.
Ou uso e ma tuafafine, e le mafai ona e mauaina i ni auala uma se lua. E le mafai ona e mauaina ni faamanuiaga le mafaatusalia o le avea ma soo ae i le taimi lava e tasi o loo i ai ou pepa faamaumau i le Uarota Muamua a Papelonia. Au uo pele, o le taimi lenei e tuuto atu ai ia Keriso ma mulimuli i Ona ala.
E i ai se aso o le a iloa ai e fanau uma a le Atua le mea sa’o—e aofia ai i latou o loo faatauemu nei i le upumoni. O le a latou tootutuli ma tautau atu o Iesu o le Keriso, le Togiola, le Faaola o le lalolagi.10 O le a latou iloa na maliu o Ia mo i latou.
I lena aso, o le a manino lava o Lona siufofoga ua na o le pau lea o le siufofoga e taua moni lava.
O le a e iloa ai ma le mautinoa le faamanuiaina o oe ona sa e tausisi i le faatuatua, tausi i poloaiga a le Atua, auauna atu i uso a tagata, ma fausia le malo o le Atua iinei i le lalolagi. Au uo pele, ia talitonu—ma o le a faatasi le Atua ma outou. Ia ua’i atu o outou loto ia te Ia—ma o le a Ia taiala outou i la outou faigamalaga i lenei malaga maoae ma le faagaeetia o le olaga faaletino.
E Le Afaina
Ia, a tatou talanoa e uiga i le tuu atu i le Atua e taiala o tatou olaga, ou te fia faamaninoina se mea se tasi. Atonu tou te le fiafia i mea o le a ou tau atua ia te outou. A e ole atu i le Atua po o le a le mea e fai e uiga i faaiuga i lou olaga—e oo lava i nisi o faaiuga taua—atonu Na te le avatua ia te oe se tali manino. O le mea moni o nisi taimi e le afaina i le Alii le mea ua e filifilia, pau lava le mea o lou tumau i totonu o feagaiga ma mataupu faavae autu o le talalelei.
I le tele o tulaga, o faaiuga tou te faia atonu e le taua e pei o le mea e te faia pe a uma ona faia le faaiuga.
Mo se faataitaiga, atonu e filifili se ulugalii e faaipoipo e ui e manatu nisi o lo laua lava aiga e le o i laua o se paaga tutusa atoatoa.Peitai, e maoae lo’u faamoemoe mo se ulugalii faapea, pe afai e maea ona faia le faaiuga, la te tumau ona tuuto i le tasi ma le isi ma i le Alii ma o la loto ma mafaufau atoa. E ala i le taulimaina o le tasi ma le isi i le alofa ma le agalelei ma taulai atu i manaoga faalelagona, faaleagaga, ma faaletino o le tasi ma le isi—e ala i le faia pea o mea “iti”—e oo ina avea i laua ma paaga tutusa atoatoa.
I se eseesega ma se ulugalii e manatu na la pikiina le tagata “atoatoa” ona manatu lea ua tuanai atu avega mamafa [o faaiuga]. Afai la te le toe tafafao faamasani ma le tasi ma le isi, le toe fesootai le tasi i le isi, ma see atu i tua i le faamaualuga ma le manatu faapito—o lenei ulugalii ua i ai i luga o se ala e tau atu i le faanoanoa ma le lotofaavauvau.
E faatatau mataupu faavae e tasi i filifiliga o matata eseese. E maoae lo’u faamoemoe mo i latou e pikiina se galuega e itiiti se taua ae latou te faia le mea sili latou te mafaia e saili ai auala e fiafia ai ma luitauina ai le latou galuega.
E itiiti so’u faamoemoe mo i latou e filifilia ni galuega faagaeetia ae i le aluga o le ala e mouese lo latou fiafia e manaomia e faamanuiaina ai i latou i la latou galuega. O le mea moni, o le fetuunai ma le manuia i suiga i falefaigaluega o le a avea lea ma se tasi o uiga autu e ao ona atiaeina e la outou tupulaga.
E faapefea la ona finagalo le Alii ia te oe e taulima ni faaiuga autu?
O Ana faatonuga ia Oliva Kaotui ma Iosefa ua matua aoga ia te au. Na tau atu e le Alii ia i laua, “E ao ina e suesue i ai i lou mafaufau; ona ao lea ona e ole mai ia te au pe ua sao.”11
Ua tuuina atu e le Tama Faalelagi ia te oe se faiai ma se loto. A e faalagolago ia te Ia, o le a Ia fesoasoani atu ia te oe e faaaoga uma [le faiai ma le loto] ma le tatau i au faaiuga fai.
Mo le tele o faaiuga, e sili atu ma le tasi sau filifiliga lelei e te filifili mai i ai. Ina ua tupu lenei mea ia Iosefa ma ana soa, sa faaaoga e le Alii se fasifuaitau mata’ina a o latou saili atu i Lana taitaiga. O lena fasifuaitau o le, “E le afaina.”12
Ae sa vave ona faaopoopo atu le Alii, “Tau ina ia faamaoni.”13
O lau galuega o le faia lea o faaiuga silisili e te mafaia e fua i faamatalaga o loo e mauaina ma ia faamauaaina i tulaga faatauaina ma mataupu faavae o le talalelei. Ona tauivi lea ma lou malosi ia faamanuiaina i mea o loo e faia—ma ia faamaoni.
Fai le mea lena ona fesootai lea o togitogi.
Masalo e fai si le fiafia i le faalogo atu e le avatua tonu e le Atua ia te oe se faamatalaga auiliili mo lau malaga i le olaga. Ae e te manao moni ea i faatonuga i vaega patino uma o lou olaga?
E te manao moni ea i se tasi e avatu ia te oe ni auala ‘alo i le olaga ae e te lei mauaina se avanoa e fuafua ai mea mo oe lava ia? O le a le ituaiga malaga o le a i ai lena malaga?
Au uo talavou pele, e na o le faatasi lava ona e pasia le malaga o le olaga faaletino. Pe le aveesea ea e se faamalamalamaga ua mamanuina patino ua aofia ai faamatalaga o mea o le a tutupu ma tali i fesili maoae uma o le olaga, lou lagona maoae o le ausiaina o mea ma le faateleina o lou talitonuga14i le Alii ma oe lava ia?
Ona ua foai atu e le Atua ia te oe lou faitalia, e tele itu e mafai ona e filifili e te alu ai ae maua ai pea se olaga faamalieina. O le olaga faaletino o se malaga faifai pea, filifili sau oe lava ia tala o le malaga. Ua ia te oe poloaiga, ua ia te oe feagaiga, ua ia te oe fautuaga musia faaperofeta, ma ua ia te oe le meaalofa o le Agaga Paia. Ua matua lava lea e taitai atu ai oe i le fiafia faaletino ma le olioli e faavavau. E ese mai lena, aua nei e faanoanoa pe a e faia ni faaiuga e le atoatoa. O le auala lena e te aoao ai. O le vaega lena o lau malaga.
Leai, e le sologa lelei pea malaga mai le amataga i le faaiuga, ae afai tatou te faamaoni, e mafai ona faamautinoa mai ia i tatou se taunuuga fiafia. Mafaufau i le faataitaiga a Iosefa o Aikupito. I le tele o ala, sa pagatia ai lona olaga. Sa faatau atu o ia e ona uso e fai ma pologa. Sa lafo o ia i le falepuipui mo se solitulafono na te lei solia. E ui i tulaga pagatia uma sa faifaamalosi ia te ia, ae sa ia tausisi pea i lona faatuatua. Sa ia faalagolago i le Atua. Ma sa ia maua mai ai se mea silisili ona lelei. I lea tausaga ma lea tausaga—e ui lava ina foliga mai sa le amanaiaina o ia ma tuulafoaiina—ae sa ia talitonu [pea]. Sa ua’i atu pea e Iosefa lona loto i le Atua. Ma sa faaali mai ai e le Atua e mafai ona Ia liua mea le lelei i mea lelei.15
I aso nei, pe tusa ma le 4,000 tausaga mulimuli ane, o loo tatou maua pea uunaiga mai le tala a Iosefa.
O lau malaga atonu e le fai si pagatia, ae o le a i ai pea lugā ma lalō. O lea, manatua le faataitaiga a Iosefa: Tumau i le faamaoni. Talitonu. Ia faamaoni. Aua le lotoita. Aua le faapalopalo i isi. Alofa i le Atua, alofa i ou uso a tagata. Faalagolago i le Alii, e tusa lava pe foliga mai e faavaivailoto.
Atonu e le mafai ona e vaai i ai seia oo i se taimi mulimuli ane, ae o le a e tepa i tua ma iloa, e moni sa faatonu ma taitaia lava e le Alii lou ala.
Sa fesootai lava togitogi.
O Mea e Lima ia Manatua
O le a la le mea ua ou faamoemoe o le a outou manatuaina mai le tatou faatasiga i lenei aso?
Muamua, ia iloa o tali a le Atua i au fesili aupito sili ona loloto e ono umi se taimi e faatali ai ma e oo mai i ni auala e te lei faamoemoeina. O tali a le Atua e i ai le taua e faavavau. E taua le faatalitali i ai.
Lua, ia i ai sina faatuatua. Ua’i atu o outou loto i le Atua. Ia talitonu e taua oe i le Atua, ma faalagolago o le a Ia faalauteleina oe nai lo le mea e mafai ona e faia mo oe lava ia. Aoao e uiga ia te Ia. Alofa ia te Ia. Talitonu ia te Ia. Talanoa ma le naunautai ia te Ia e le aunoa. Faalogo mo Lona siufofoga.
Tolu, savali i le mea sili e te mafaia i luga o le ala o le avea ma soo. Aua nei lofituina. Tau lava o le fai o mea iti i le atoatoa e te mafaia ai, ma o le a tulaga lelei ai mea tetele.
Fa, aua nei faatagaina leo faalotovaivai e faavaivaia oe mai lau malaga o le faatuatua. Manatua, e te le tali atu i e faitio mai ia te oe. E te tali atu i lou Tama Faalelagi. O Ana tulaga faatauaina e taulia.
Lima, fai le faaiuga sili ona lelei e te mafaia e ala i le mulimuli i musumusuga e oo mai i lou loto ma le mafaufau. Ia tuu i ai au taumafaiga silisili e mulimulitaia ai. Ia faatuatua, ma o le a faapaiaina e le Atua au taumafaiga faamaoni mo lou lelei e faavavau.16
Fai le mea lenei, i le faaiuga, o le a lelei mea uma.
Ou te tuua ia te outou a’u faamanuiaga i lenei aso, i le amataga o lenei tausaga fou, a o outou tauivi ma le naunautai e iloa lo outou Atua, o le a faateleina lo outou faatuatua. A outou saili e mulimuli i lo outou Faaola, o le a faatuputeleina lo outou talitonuga.17 Ma a outou savavali i le faatuatua ma tatala atu o outou loto i le Malamalama o Keriso, o le a faamatuaina lo outou alofa mo le Atua ma o le a faaleleia lo outou tomai e alolofa ai i o outou tuaoi.
Ma o nei mea uma o le a aumaia ia te outou le fiafia ma le olioli.
O le a aumaia ia te outou le filemu.
I se aso, o le a aumaia ia te outou le mamalu e faavavau.
I lena aso i le lumanai, o le a outou toe tepa ai i tua i lenei malaga faapelepele ma faafiafiaina o le olaga faaletino, ma o le a outou malamalama ai. O le a outou vaaia ai sa fesootai moni lava togitogi i se mamanu matagofie, sili atu ona matagofie nai lo se mea sa e mafaufauina. Faatasi ai ma se lotofaafetai lemafaamatalaina, o le a outou vaaia o le Atua lava Ia, i Lona alofa, alofatunoa, ma le alofa mutimutivale naua, sa i ai pea iina i taimi uma e leoleo outou, faamanuia outou, ma taiala o outou laasaga a o outou savavali ai agai atu ia te Ia.
Ou te molimau atu ai ma tuuina atu lou faamanuiaga o se Aposetolo a le Alii, i le suafa paia o lo tatou Matai, i le suafa o lo tatou Togiola ma le Faaola, o Iesu Keriso, amene.
© 2018 Puletaofia e le Intellectual Reserve, Inc. Ua taofia aia tatau uma. Faamaonia le faaperetania: 9/17. Faamaonia le faaliliuga: 9/17. Faaliliuga o le “The Adventure of Mortality.” Samoan. PD60005038 890