O Oe Lava o Sō o le Aualofa
Faigalotu a le Aualofa i le Lalolagi Atoa 2024
Aso Sa, 17 Mati, 2024
Peresitene Camille N. Johnson: O’u uso e, ese lo’u alofa ia te outou! Se avanoa ina a matagofie lo tatou faapotopoto ai i le lalolagi atoa i lenei sauniga faaletalafaasolopito, le aso fanau lona 182 o le faalapotopotoga a le Aualofa. O fea lava e te nofo ai, o le a lava le gagana e te tautala ai, o fea lava foi na tofia oe e te galue ai, o oe lava o sō o le sosaiete a tamaitai na faatuina faalelagi e avatu ai le alofa ma le toomaga a Iesu Keriso i isi. Ma ia te outou uma i le lona 18 ai o a outou tausaga ma ua le o toe mamao ona tatou faatasi lea i le Aualofa, maliu mai ia. Matou te manaomia outou; matou te alolofa ia te outou!
O loo matou faatasi ai ma o’u fesoasoani, o Sister Dennis ma Sister Yee, ma Au Peresitene Aoao o le Peraimeri ma Tamaitai Talavou. O loo matou i ai iinei i le Maota o le Aualofa, lea matou te galulue faatasi ai, tatalo faatasi, ma fefautuaa’i faatasi. E tutusa lo matou faamoemoega: ia fesoasoani e fausia ni soo o Iesu Keriso mo le soifuaga atoa, o ni ē e tausia a latou feagaiga ma naunau ma agavaa mo faamanuiaga aupito sili, o le ola e faavavau faatasi ma le Atua ma tagata latou te alolofa i ai. O nisi o outou na valaauina mo sina vaitau e auauna atu i tamaiti o le Peraimeri pe auauna atu foi i o tatou tamaitai talavou. Po o fea lava o e galue ai, o oe lava o sō o le Aualofa.
Peresitene Susan H. Porter: O le avea ai ma se tasi o le Aualofa, na mafai ai ona ou aoao mai tamaitai tuuto i le lalolagi atoa i le uiga o le alofa ma auauna atu e faapei o le Faaola. Ona o lea mafuaaga ua valaauina ai a’u e fesoasoani i fanau a le Ekalesia e o mai ia Keriso. Ou te faafetai lava ona o le a avea pea lava a’u o se tasi o le Aualofa.
Peresitene Emily Belle Freeman: I le tele o tausaga ua mavae, na fai mai ai se uso a auaunaga ia te a’u, “Ou te fiafia lava i le Aualofa! Ua ou fausia lo’u aiga mai mea ou te aoao mai ai; ua avea foi ma taiala o lo’u olaga.” Sa ia totoina i lo’u loto le talitonuga i le toomaga e maua mai se sosaiete e mulimuli ia Iesu Keriso. Sa ia aoao mai a’u e faapea, e le afaina po o fea ou te auauna atu ai i le Ekalesia, o le a avea pea lava le Aualofa ma o’u aiga.
Peresitene Johnson: E maeu le matagofie o foliga o le galuega a le Aualofa—ia aumaia Lana toomaga i le tupulaga faia’e e ala i le fesoasoani e faatu ma faamalosia se sootaga patino ma le tuuto ia Iesu Keriso i a tatou fanau iti ma le autalavou.