O Le Meaalofa Aupito Sili o le Kerisimasi
Faigalotu o le Kerisimasi a le Au Peresitene Sili 2022
Aso Sa, 4 Tesema, 2022
“Ma ina ua o i le lagi agelu sa ia i latou, ona fetautalatalaa’i ai lea o leoleo mamoe, Ina tatou o ia i Peteleema, tatou te vaavaai i lenei mea ua faia, ua faailoa mai ia te i tatou e le Alii.
“Ua latou faataalise atu, ona maua lea o Maria, ma Iosefa, ma le tama meamea o taoto i le fale povi.”1
O nei fuaiupu faigofie o mau i le Feagaiga Fou na tusia e Luka e fatua’i ai i o tatou mafaufau le ata o le mea paia na tupu o le soifua mai lea o Iesu Keriso lea ua faamanatuina nei i le lalolagi atoa.
I lo matou atunuu o Potukale, o le agaifanua o le toefaaolaolaina o lenei mea paia e ala i le faia o se vaaiga o le Soifua mai o le Faaola, o se agaifanua faapelepele. O le a outou maua i le atunuu atoa i nofoaga eseese i le vaitau o le Kerisimasi—se agaifanua e faaalia i le tele o fale. O le faatuina o se vaaiga o le Soifua Mai o le Faaola, e tele ina aofia ai taumafaiga o le aoina o limulimu fou, vaomago, ma’a, ma isi anomea natura e fatu ai se folatalātua iloga mo le Soifua Mai o le Faaola.
O le agaifanua o le Kerisimasi o le faatuina o se vaaiga o le Soifua Mai o le Faaola, o se gaoioiga taua i lo matou laiti ma i le talavou ona sosoo ai lea ma o matou matua ma mulimuli ane ma a matou fanau. O le faatuina o le vaaiga o le Soifua Mai o le Faaola o se tasi o a’u gaoioiga ou te fiafia i ai i le taimi lenei o le tausaga.
Sa matou teuina i se pusa laupapa ia tamai faatusa uma sa matou faaaogaina e fau ai le vaaiga o le Soifua Mai o le Faaola ma lona siosiomaga. E tele taimi, sa faaalia ai foi se tama’i atafatu o lo matou nuu. O tausaga taitasi, i Kerisimasi taitasi, e faaopoopo ai ni tama’i faatagata po o elemene fou i le faaputuga. Sa i ai atafatu o nuu, fale, faifaatoaga ma manu, meataavili matagi ma vai, ma isi elemene natura e faafoliga mai ai mauga ma vanu, laau, ma laufanua. Sa faaaoga fasi faaata e faafoliga ai i vaitafe tetele ma vaitafe laiti. I nisi taimi, e oo lava i alalaupapa sa faaalia. Ma, ioe, i le totonugalemu o ia mea uma, o faatagata aupito taua, o mea ia o loo faamatala i tusitusiga paia: o se lafu mamoe ma “leoleo mamoe o nonofo i le vao e leoleo a latou lafu”;2 o le agelu lea na fai atu i leoleo mamoe e aua le matatau ma lē na faasilasilaina atu le soifua mai o le Faaola, ma aumaia le “tala lelei e olioli ai … le nuu uma”;3 o faatagata o Maria ma Iosefa e faatutu tumau faataali’o i le falepovi.4 Ona i ai lea o le fetu, lea fai mai tusitusiga paia na avatua le olioli tele i le au makoi ma taialaina ai i latou i la latou malaga ia Iesu.5
Sa faia e tagata uma o le aiga le faatulagaina o le vaaiga o le Soifua Mai o le Faaola. I le gasologa o le tele o aso e oo lava i vaiaso, o sia mea ma sia mea, e fatufatuina ai ma tuufaatasia nai fasimea uma i o latou tulaga e tatau ai.
I le aluga atoa o le vaitau, matou te faamemelo ai i le vaaiga o le Soifua Mai o le Faaola ma manatua ai mea na tutupu o loo faamatalaina i tala a Mataio ma Luka ia e matua’i ‘anoa ai lenei aso faamanatu. Sa faamatalaina tala e uiga i le faatuatua o Maria ma Iosefa; e uiga i le la malaga lea na o ai “mai Kalilaia, mai le aai o Nasareta, i Iutaia, i le aai o Tavita, lea [sa] faaigoa o Peteleema”6; ma le tala e uiga i la la’ua taumafaiga e sue se nofoaga e nonofo ai iina.
Ae na i’u lava ina oo mai le aso Kerisimasi, ma sa tuuina ai le faatagata o Iesu i le falepovi, ma liliu atu ai le talanoaga i le taua o Iesu Keriso i o tatou olaga ma le mea sa Ia faia mo i tatou7 ma uiga ia te Ia o le meaalofa aupito silisili o meaalofa uma.
O le vi’i lea e aotele ai le lagona o le aso faamanatu:
“Se Tamaitiiti i le tausiga alofa a Maria!
Se Tamaitiiti e mama na’ua ma pa’ia!
Le falemanu o vaomago na taoto ai
I lena aso paia o le ulua’i Kerisimasi!
O le faamoemoega o vaitausaga uma ma lanu
E totonugalemu i Ou fofoga susulu!
Le Tamaitiiti o lona mamalu ua tumu ai le lalolagi!
Le Tamaitiiti na fanau maualalo mai!
O leoleo mamoe, na taiala mai le mea mamao,
I lalo o le fetu sa tutu ma tapuai atu ai,
I tulivae ua faapauu ai le au makoi
E faamamalu ma vivii atu ai i Lau Afio!
Le Tamaitiiti e o loo pepese ai agelu!
Le Tama itiiti e, o lo matou Tupu Meamea!
Le pulu pasama ua taoto ai
Le malologa o mafatiaga uma e oo mai!
Le meaalofa taua e mo tagata ola ua tuu mai i ai
Tatou te manumalo ai i se tofi i le Lagi!”8
Na molimauina e le Faaola lava Ia Lana meaalofa ia i tatou: “Ua ou fai atu nei mea ia te outou, ina ia outou maua le manuia ia te a’u. E maua foi outou e le puapuaga i le lalolagi, a ia outou loto tetele, ua ou manumalo i le lalolagi.”9
“Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”10
Se meaalofa ina a uiga ese; se meaalofa ina a paia!
“O le vaitau o le Kerisimasi o se taimi e tomanatu ai i, ma galulue i luga o faamanuiaga ma avanoa ua tatou maua ona o le soifua mai, soifuaga, Togiola, ma le Toetu o lo tatou Faaola, o Iesu Keriso.”11
Ou te manatu i faamanuiaga o le mauaina o le filemu ma le faamoemoe, e ui i luitau ma faigata;12 o faamanuiaga o le taitaiga faalelagi i taimi o le manumalo ma le faaletonu;13 o le faamanuiaga o se vaaiga sili atu ma faamoemoega, o le iloa ma le talitonu o loo i ai isi mea pe a mavae aafiaga o lenei olaga;14 le faamanuiaga o le lotofaafetai tusa lava pe itiiti mea e taulima ai o tatou manaoga; le faamanuiaga o le faamafanafanaina pe a tatou lagona le tuuatoatasi;15 ma le faamanuiaga o le mafai ona foai atu tusa lava pe le tele ni a tatou meatotino.
O nei faamanuiaga ma le tele o isi ua tatou maua ona o Iesu Keriso! Ioe, ona o le pepe o Iesu ou te faatalitali ai ma le naunautai e tuuina i totonu o le falepovi i le aso o le Kerisimasi i la matou vaaiga o le Soifua Mai o le Faaola. O Ia, o lē o la tatou meaalofa aupito silisili, na tuuina mai ia i tatou na faamanuiaga faapelepele ona o Lona soifuaga, faataitaiga, aoaoga, ma le taulaga.
Ona ou fesili ai lea: Pe ua le tatau ea ona tatou faaaogaina nei faamanuiaga e si’i a’e ai avega a isi, fesoasoani ma faamalosiau ia te i latou ia fesootai ma le agaga o lenei vaitau paia, ma faamanatuina le tala lelei na fofogaina i leoleo mamoe i le taimi o le ulua’i Kerisimasi?
E mafai e Keriso ona faaliliu la tatou Kerisimasi i talaatu o lipine o le agalelei ma le nau alofa, ma afīfī lo tatou faamanatuina i le alofa moni, “le alofa mama lea o Keriso [lea] e tumau e faavavau.”16 “E ui ina ō mai ma mou atu o tatou lagona, ae e le liu lava Lona alofa mo i tatou.”17 E faaauau pea Lona alofa i le tausaga atoa ma o tatou olaga atoa.
O le toe-faatotonugalemuina o la tatou taulai ia Keriso i le taimi o le Kerisimasi, o le a tatou maua ai se fuataga tele o Lona alofa i o tatou olaga ma se avanoa tele atu e alolofa ai ma auauna atu i isi o siomia i tatou.
Pe a tatou tausia le agaga o le Kerisiasi, ua tatou tausia le Agaga o Keriso. Inā o tatou taulai atu ia, i lenei vaitau, ia Iesu Keriso, le Malamalama o le Lalolagi, ma ia tatou faasusulu atu lo tatou lava malamalama i lenei vaitau e ala i le faasoa atu i isi o lo tatou alofa, lo tatou agalelei, ma la tatou auaunaga.
Ona sa afio mai o Ia, ua i ai foi le uiga o lo tatou ola ai. Ona sa afio mai o Ia, ua i ai le faamoemoe. O Ia o le Faaola o le lalolagi, ma o Ia o la tatou meaalofa aupito silisili; ma ou te tuu atu ai la’u molimau i lena mea. I le suafa o Iesu Keriso, amene.