Moabot na ang Hari
2022 nga Debosyonal sa Pasko sa Unang Kapangulohan
Dominggo, Disyembre 4, 2022
Ablihan ang Atong mga Kasingkasing aron sa Pagdawat
Ang kalinaw ug kainit sa dinasig nga musika mipuno gayod sa atong mga kalag.
Malipayong Pasko!
Disyembre kadto sa 1943, ug ang Ikaduhang Gubat sa Kalibotan mikaylap sa kalibotan. Ang tanan nahingawa alang sa mga minahal sa kinabuhi nga naa sa layong mga dapit, ug ang mga kabalaka sa panimalay misamot tungod sa kakulang sa kwarta ug pagkaon. Kay ang mga kapanguhaan sa pamilya mainampingon nga gibantayan, nakapahingangha sa akong amahan, si Harold Hillam, nga nianang higayona nuwebe anyos, ang pagkadawat og milagroso nga gasa sa Pasko―nga usa ka set nga tren. Apan kini dili bisan unsa lang nga karaan nga tren; kini nga tren mosubay sa riles sa iyang kaugalingon. Walay pagduso nga gikinahanglan. Mora og imposible nga kadto nga nindot kaayo nga gasa matinuod. Ah, bililhon kaayo kang Harold kadto nga tren.
Pipila ka tuig human niana, samtang nagsingabot ang Pasko, ang kalibotan nagsugod na og bangon gikan sa gubat. Apan ang ekonomikanhong mga kahimtang sa gamay nga St. Anthony, Idaho, wala mouswag, ug sa pamilya sa akong amahan, kini misamot pa gani. Ang amahan ni Harold adunay grabe nga sakit, hapit gani siya mamatay. Walay mahimong gasa alang ni bisan kinsa niana nga Pasko—lakip ni Harold ug sa iyang manghod nga lalaki, si Arnold.
Pipila ka adlaw sa wala pa ang Pasko, ang amahan ni Harold miduol niya ug hinay nga mihangyo, “Harold, andam ka bang mohatag sa imong tren ngadto ni Arnold aron siya adunay gasa sa Pasko karong tuiga?”
Sakto ba ang pagkadungog niya sa iyang amahan? Ang gibahandi niya nga tren? Kini mao ang labing lisod sa tanang hangyo.
Ang kabuntagon sa Pasko miabot, ug si Arnold misiyagit sa kalipay sa dihang siya nakadawat og tren nga parehas gayod sa kang Harold.
Si Arnold sa wala madugay nakabantay nga si Harold wala na magdula sa iyang tren. Sa kataposan si Arnold nakaamgo nga ang iyang gibahandi nga gasa dili lang parehas sa tren ni Harold—kang Harold kadto nga tren! Sa dihang si Arnold nakasabot sa kahulogan nga nagpaluyo sa gasa, kana nga tren nahimong bililhon kaayo.
Alang nako, kini nga istorya sa pamilya usa mismo ka gasa—ug dili lang kay kini nagpahinumdom kanako sa akong pinalanggang amahan ug sa iyang gimahal nga igsoon. Mas importante pa gayod, kini nagpahinumdom kanako sa sakripisyo—ang sakripisyo ug gugma sa Pinalangga nga Anak sa Dios–ang Usa kang kinsang pagkatawo kita nagsaulog.
Si Jesukristo kaniadto ug karon mao ang atong una ug ang hangtod sa hangtod nga gasa sa Pasko. Ako mopamatuod niini nga kamatuoran: Siya natawo, Siya nabuhi ug Siya namatay alang kanato, ug Siya buhi―gihapon!
Pagkabulahan nato nga mahimong mga tigdawat niini nga makalipay nga gasa. Diha sa mga pulong sa kinaham kaayo nga kanta sa Pasko: “Kalipay sa kalibotan, moabot nang Hari!”1
Si Elder Neal A. Maxwell nagtudlo: “Kon hunahunaon ang tanan nga gihatag sa Dios nganha kanato, kita medyo maayo na unta nga modawat, apan dili man. Kita kinsa naghunahuna nga makasangkap sa atong kaugalingon ug wala magsalig kasagaran mobati nga ang pagdawat salikwaot, gani lisod. …
“[Apan] ang mga gasa sa Dios, dili sama sa pang-okasyon nga mga gasa, mahangtoron ug dili mawagtang, nga naglangkob sa nagpadayon nga Pasko nga dili gayod mahuman!”2
Mao nga unsaon nato sa pagdawat kana nga nindot kaayo nga gasa? Unsaon nato sa pagpili kada adlaw ang gasa sa atong Manluluwas, ang Iyang gugma, ug ang Iyang walay kinutoban nga Pag-ula?
Talikdan nato ang nagyelo nga mga bintana ug pinintalan nga mga candy cane, ug magkat-on kita gikan sa mapaubsanon nga mga tahas ug nagsandalyas nga mga tiil sa unang mga tigdawat sa masuso nga Manluluwas.
Dawata ang Iyang Kabalaan
Samtang ang pagkatawo sa Manluluwas nagkaduol, si Maria ug si Jose nakigbisog nga makasulod sa kasamok sa Betlehem, apan ang mga balay nga abotanan puno. Wala bay usa nga adunay lawak alang kanila? Wala bay usa nga makahatag kanila og kapahulayan? Si Maria nakahibalo sa gasa nga iyang gidala, apan walay usa nga adunay lawak sa pagdawat niini, sa pagdawat Kaniya.
Dili gayod kita masayod kon unsa ang gibati ni Maria ug ni Jose niining puntoha, apan ako kanunay nga naghunahuna nila nga mipadayon sa unahan inubanan sa hilom nga kalig-on ug pagsalig. Misunod sa pagdapit sa anghel nga “ayaw kamog kahadlok”3 ug karon nag-andam alang sa pagkatawo ni Jesus, sila nakahimo sa pagbiya sa bisan unsang mga gilaoman alang sa usa ka komportable nga puy-anan ug hinuon mipahimutang diha sa hilom, gamay nga kuwadra. Apan ang mora og hawan nga kahimtang dili magpabilin nga ingon niini. Ang Ginoo sa dili madugay mopuno niana nga kahaw-ang ngadto sa kabalaan.
Sama sa mabasa diha sa nabantog nga Lucas 2:7, “Ug nanganak siya sa iyang panganay nga lalaki, ug giputos niya ang bata sa panapton ug gipahiluna sa pasungan; kay wala na may luna alang kanila sa balay nga abotanan.”
Ang atong Manluluwas—kanang mahimayaong gasa sa kinabuhi, paglaom, ug saad—miabot sa kalibotan.
Kita ba makaandam og luna diha sa atong mga kasingkasing aron sa pagdawat ni Kristo ug pagtugot sa iyang kabalaan nga mopuno sa atong haw-ang nga mga dapit? Sama ni Maria ug ni Jose, kita makasalig Kaniya bisan pa taliwala sa usahay makapakutas nga mga sirkumstansiya. Ang paggiya—bisan ang mga milagro—nga moabot sa atong kinabuhi tingali dili diha sa kasikas ug kaguliyang, ni diha sa mga entablado ug mga arena, apan diha sa hilom nga mga dapit diin kita nagpuyo ug nagtrabaho―diin kita moadto alang sa tabang. Bisan asa moabot ang atong mapaubsanon nga panginahanglan, kita pwede ug makadawat og mga tubag sa atong gihagawhaw nga mga pag-ampo.
Dawata ang Iyang Pagdapit sa Paglihok
Dili ba makapatingala nga pipila sa unang mga tigdawat sa Kordero sa Dios mga magbalantay sa karnero?
Ang langit ngitngit sa dihang ang nahingangha nga mga magbalantay sa karnero nagpundok ubos sa siga nga prismo sa kahayag samtang ang langit ug yuta nag-abot diha sa dili hitupngan nga hitabo sa pagkatawo sa Manluluwas.
“Ug ang anghel miingon ngadto kanila, Ayaw kamo kahadlok: ania ako, nagdalag maayong balita alang kaninyo nga makalipay kaayo. …
“Kay alang karong gabhiona, natawo sa lungsod ni David ang inyong Manluluwas, ang Kristo nga Ginoo.”4
Kita ganahan nga kining mahalaron nga mga magbalantay sa karnero wala maglangan sa ilang pagdawat apan nagdali sa pagsugat sa ilang Hari. Gikan nila, atong makat-onan nga ang pagdawat usa ka pulong sa paglihok. Si Lucas misugilon kanato nga ang mga magbalantay sa karnero “midali pag-adto, ug nakit-an … ang bata nga naghigda sa pasungan.”5
Daghang higayon, ang atong hilom, gamay nga mga impresyon gikan sa Ginoo tingali wala madawat tungod kay kini wala mahiangay sa atong mga kalendaryo, atong mga plano, o atong tayming. Ang istorya sa Pasko nagpahinumdom kanato nga mahimong sama niining mahalaron nga mga magbalantay sa karnero kinsa wala maglangay sa paghimo sa kinahanglan nga buhaton aron dawaton ang ilang Hari.
Karon, nakabantay ba kamo nga si Lucas milakip ngadto sa saysay og usa ka malipayon nga pag-aghat nga ang pagdawat Kaniya mao ang pagpakigbahin Kaniya, nagpasabot, “Sa diha nga sila nakakita ni [Jesus], gisugilon nila ang gisulti sa anghel mahitungod sa bata”?6 Kini nga mga magbalantay sa karnero nakadawat niini nga mensahe gikan sa langit, nagdali nga miadto, ug dihadiha dayon ug human niana nahimong mga mensahero sa langit, nagpadayag sa ilang “kalipay sa kalibotan,” ug midapit sa tanan sa “pagdawat sa [ilang] Hari!”7
Dawata uban sa Malahutayon nga Hugot nga Pagtuo
Karon atong ibalhin ang atong atensiyon ngadto sa Maalamon nga mga Tawo. Sila mipatigbabaw taliwala sa bantogan nga mga tigpangita ni Jesukristo. Sila makugihon nga migahin sa ilang kinabuhi nga nagbantay alang sa langitnong timailhan, ug sa dihang miabot kini, ilang gibiyaan ang mga kaharuhay sa panimalay, mga trabaho, mga pamilya, ug kahigalaan aron sa pagsunod sa bitoon ug pagpangita sa ilang Hari.
Dili sama sa mga magbalantay sa karnero, ang ilaha usa ka nagpadayon nga panaw nga migahin og panahon. Sila kinahanglan nga mangita, mangutana, maghulat ug moadto, ug dayon mobuhat na usab, hangtod nga sila nakakita sa gamayng bata uban ni Maria, ang Iyang inahan. Sila mihalad og mga gasa nga labing bililhon ug miyukbo ug misimba Kaniya.8
Ako kanunay nga naghunahuna: Sa atong pagdawat ni Kristo, kita ba makugihon nga nangita Kaniya ug dayon mitugot Kaniya sa paggiya sa atong panaw ngadto sa mga dapit ug katawhan nga wala mailhi? Unsaon nato sa pagpahayag sa atong pagpasalamat pinaagi sa mga gasa ug pagsimba nga atong gihalad?
Bulahan ang mga Tigdawat
Mao nga, anaa kana—ang katingalahan nga istorya sa Pasko.
Akong minahal nga kahigalaan, bulahan ang mga tigdawat. Sama ka pinangga sa gasa sa akong amahan nga tren, ug ang malumo nga mga gasa sa oras ug bahandi nga gihimo sa mga pamilya bisan asa, kadto nga mga gasa layo ra kaayo kon itandi sa pagdawat sa tinuod nga gasa sa Pasko—ang kang Jesukristo.
“Kay unsa ang makuha sa usa ka tawo kon ang gasa itugyan diha kaniya, ug siya wala modawat sa gasa?”9
Ikonsiderar kana nga kasulatan aron masabtan kini nga mahangtorong kamatuoran: “Kay gihigugma pag-ayo sa Dios ang kalibotan, ug tungod niani gihatag niya ang iyang bugtong Anak, aron ang tanan nga motuo kaniya dili malaglag, kondili makabaton hinuon sa kinabuhing dayon.”10
Ako ganahan sa saad nga si bisan kinsa ang tinud-anay nga modawat sa gasa ni Kristo nga gihatag nianang balaan nga gabii makabaton og kinabuhing walay kataposan!
Mao nga atong makita nga pinaagi sa atong inadlaw-adlaw nga mga pagpaningkamot aron sa mas bug-os nga pagdawat ni Kristo, kita mahimong sama sa gidapit sa atong propeta, si Presidente Russell M. Nelson: “usa ka katawhan kinsa makahimo, andam, ug takos sa pagdawat sa Ginoo kon Siya moabot pag-usab, usa ka katawhan kinsa mipili na ni Jesukristo.”11
Unsa ka mahimayaon ang paghanduraw niana nga adlaw diin kita magdungan na usab sa pagpahayag, “Kalipay sa kalibotan, miabot na ang [Ginoo]; Tugoti ang kalibotan [ug matag usa kanato] sa pagdawat sa iyang Hari!“12 Sa ngalan ni Jesukristo, amen.