Mau hōro’a ’aita e ’itea-maita’i-hia
Purera’a noera a te Peresidenira’a Mātāmua nō 2021
Sābati 5 nō Tītema 2021
’Ōmuara’a
I tō’u ’āpīra’a, te taime rahi nō te Noera ’o te taera’a mai ïa ’o Māmā’ū ’e ’o Pāpā’ū Lundgren. I te matahiti ato’a, e rātere roa mai rāua nā ni’a i tō rāua pere’o’o tahito nō te fārerei ia mātou. ’Ua here mātou ia rāua, ’e ’ua here mātou i te pai tuete a Māmā’ū—hāmanihia i te ū pa’ari ’āpī a te hō’ē ta’ata fa’a’apu nō tōna iho ’oire, ’o tāna e hōpoi mai. E ti’a ’oia i mua i te umu e rave rahi hora, i te hāmanira’a i te mau pai ē tae roa e’ita mātou e nehenehe fa’ahou e ’amu. I teienei e piti atu ā u’i tamari’i tei pa’ari ma te fana’o i te ’amura’a i teie mau pai tuete. ’E i te mau taime ato’a e hāmani mātou i te reira, e ha’amana’o mātou ia Māmā’ū Lundgren ’e tāna hōro’a nō te here.
Te tahi mau hōro’a maita’i roa a’e, ’o te hōro’a ïa nō tō tātou taime ’e te tārēni. Tē ti’aturi nei au ē teie mau hōro’a, e mau hōro’a mo’a ïa.
Mau hōro’a
E pu’e tau teie nō te tītau i te mau tao’a hōro’a ’āpī. I teie rā pō, e pārahi na tātou nō te hi’o mai i te mau hōro’a tā tātou i fāri’i a’ena—’e nā vai i hōro’a mai ’e nō te aha.
’Ua hōro’a mai te Atua ia tātou tāta’itahi i te tahi hōro’a. Tē mana’o ra paha ’outou ’aita tō ’outou ’aravihi, e mau hōro’a pae vārua rā tō ’outou nō ’ō mai i te Atua ra, ’ia ti’a ia ’outou ’ia ha’amaita’i ia vetahi ’ē ’e ’ia ha’afātata atu iāna. 1
E aha te mau hōro’a tā te Atua i hōro’a mai ia ’outou ?
Fa’a’ite atu vau ia ’outou, ’aita vau e hi’o nei iā’u iho mai te hō’ē ta’ata ’aravihi. E ’ere vau i te ta’ata hīmene, ’e te ta’ata ’ori, ’e te mā’ona ’e te tahu’a ano’ihi ’e te ta’ata nō te nūmera, ’e ’aore rā…’e ’aore… e ta’ata noa mai terā.
I te tahi taime, e hi’o vau i tō vetahi ’ē mau hōro’a rahi ’e e tupu tō’u mana’ofaufa’a ’ore. Te ’ite nei rā vau i te faufa’a ’ore ’e te tū’ino o teie huru fa’aaura’a. Te mea faufa’a a’e, ’oia ho’i, ’ua ti’a iā’u ’ia hi’o i te mana mo’a o te mau hōro’a a te Atua, « te mau hōro’a ’aita e ’itea-maita’i-hia », ’e ’ia ’oa’oa i teie mau fa’a’itera’a nō tōna here ’e tōna ti’aturi iā’u.
’Ua ha’api’i Elder Marvin J. Ashton ē, i roto i te mau hōro’a pae vārua a te Atua, e « mau hōro’a ’aita e ’itea-maita’i-hia », mai « te hōro’a nō te anira’a i te hō’ē mea ; te hōro’a nō te fa’aro’o atu i te ta’ata ; te hōro’a nō te harura’a ’e te fa’a’ohipara’a i te reo iti ha’iha’i ; te hōro’a nō te nehenehera’a e ta’i ; te hōro’a nō te ha’apaera’a i te mārō ; te hōro’a nō te rirora’a ’ei ta’ata au maita’i […] te hōro’a nō te ’imira’a i te mea tano ; te hōro’a nō te ’orera’a e ha’avā ; te hōro’a nō te fāriura’a i ni’a i te Atua nō te arata’ira’a ; te hōro’a nō te rirora’a ’ei pipi ; te hōro’a nō te aupurura’a ia vetahi ’ē ; te hōro’a nō te ferurira’a hōhonu ; te hōro’a nō te pūpūra’a i te pure ». 2
Tē tauturu ra ānei teie tāpura ia ’outou ’ia hi’o ’āpī i tō ’outou mau hōro’a ? ’Ua tauturu te reira iā’u.
E mea fa’ateitei teie mau hōro’a māmū i te mau tamari’i a te Atua mai te tahi atu mau hōro’a tā tātou e ’ite rahi nei ’e e fa’ahanahana pinepine a’e 3 —e mau hōro’a māmū ’o tē tauturu ia tātou ’ia fa’atupu i tā tātou mau ’ōpuara’a faufa’a roa a’e i roto i te orara’a nei. Terā rā, te mea pe’ape’a, tē tāpe’ape’a nei tātou i tā tātou mau hōro’a i te tahi taime ’e ’aita tātou e fa’ahiahia nei ’aore rā e fa’a’ite nei i te reira, nō te ri’ari’a ānei ē ’aita te reira i te mea ’ana’ana roa ’e te fāito maita’i roa ’e te mea hāviti, mai tā tātou e hina’aro ra.
Mai te mea ’aita tātou e fa’ahiahia nei i teie mau hōro’a ’aita e ’itea-maita’i-hia, e’ita ïa tātou e fana’o i te rāve’a nō te fa’ateitei i tāna mau tamari’i ’e nō te putapū i te here o te Atua. 4
Ha’uti i te hīmene o tō ’outou mau hōro’a
E fa’a’ite atu vau ia ’outou i te tahi atu hōro’a—e hōro’a nā tō’u Pāpā’ū Lundgren. ’Ua hina’aro noa na ’o Pāpā’u e ha’api’i i te fa’ata’i i te fira. Teie rā, ’ua vai noa teie fīra ’aita i fa’a’ohipahia ’e ’ua hu’a-repo-hia i ni’a i tāna pa’epa’e, ’e i muri iho i ni’a i tā’u pa’epa’e, e rave rahi matahiti—ma te māmū noa tōna mau aho.
’A fa’aau i teienei i te fīra a tā’u mo’otua tamāhine e ono matahiti, ’o Scarlett. E hōro’a tāna e fa’a’ite atu ia ’outou i teie pō.
[Tē ha’uti ra Scarlett i te fira]
Māuruuru, e Scarlett. E mea nehenehe roa. ’Ua here au ia ’oe.
Te mau taea’e ’e te mau tuahine, te mau hōro’a a te Metua i te ao ra nō tātou, nō te fa’a’ite ïa. E ’ere te fīra a Scarlett i te mea moni roa, ’e e haru iho ā tō tātou tari’a i te mau hapehape i roto i te ’upa’upa ’e te fa’ata’ira’a, nō te mea rā ’ua ha’uti Scarlett ma tōna ’ā’au tae, ’ua hōro’a mai ’oia i te hō’ē ō ’e ’ua fa’atupu i te ’oa’oa.
’Eiaha na te mau hōro’a a te Atua nō ’outou, terā ato’a ’aita e ’itea-maita’i-hia, ’ia fa’a’ohipa-’ore-hia ’e ’ia ’itea-’ore-hia. ’A rave mai i te mau hōro’a tāna i hōro’a mai ia ’outou, mai ni’a mai i te pa’epa’e. Mai te mea ’ua fa’aherehere ’outou i te reira nō tō ’outou pāpū ’ore, ’a ueue atu i te hu’a repo ’e ’a tāmata i te reira. ’A pūpū atu i te reira i te Atua ’e i tāna mau tamari’i. ’Ua ’ōpuahia tō tātou mau hōro’a nō ’ō mai i te Metua i te ao ra nō te fa’a’ohipa ’e nō te fa’a’ite. E hōpoi mai tō ’outou mau hōro’a ato’a nō ’ō mai i te Atua i te ’oa’oa, noa atu ’aita i tae i te fāito maita’i roa, ’e ’ia pūpū-ana’e-hia iāna ra, e riro ïa ’ei hīmene ’āruera’a.
’A rave i te hōro’a nō te fa’aro’o atu i te ta’ata ma te here ’e ’a hāhaere i te hō’ē hoa ’ōtahi. E hōro’a nō te ha’apaera’a i te mārō ānei tō ’outou, ’e te hōro’a nō te rirora’a ’ei ta’ata au maita’i ? ’Aita a’enei ïa e tau i hina’aro-mau-hia ai teie mau hōro’a. ’A hōro’a atu i tō ’outou ’utuāfare ’e i te mau hoa ’e i te mau ta’ata tupu. ’A parau i te ta’ata ’ōvere ē, ’ua here ’outou iāna, ’e ’a ani manihini iāna i tā ’outou tāmā’ara’a. ’A ha’api’i i te ha’api’ira’a tei fa’auruhia mai. ’A pāpa’i i te hō’ē parau maita’i. ’A fa’a’ohipa i tō ’outou mau hōro’a, nō te toro i te rima ’e nō te patu ia Ziona ’e nō te fa’arahi i te maita’i o te feiā ’ati a’e ia ’outou. E hina’aro te Atua i te mau huru ta’ata ato’a. ’Ua hōro’a mai ’oia i te mau hōro’a ato’a nō te fa’aitoito i tāna mau tamari’i. ’Eiaha te hīmene i roto ia ’outou ’ia hīmene-’ore-hia, ’e te tauahi ’ia tauahi-’ore-hia, ’e te fa’a’orera’a hapa ’ia pūpū-’ore-hia.
Fāri’i i tāna hōro’a
I te tau Noera nō 1832, ’ua fa’aruru te feiā mo’a i te ’ārepurepura’a tīvira ’e poritita. Nō tohu iho nei te peropheta Iosepha Semita nō ni’a i te tama’i tīvira. 5 E ’ere ïa i te mea ’oa’oa roa.
I te 27 rā nō Tītema, ’ua fāri’i Iosepha Semita i te tahi atu ā heheura’a—e « parau poro’i a te Fatu nō te hau ». 6 I roto i terā tau fifi, ’ua fa’aha’amana’o te Fatu ia Iosepha i te mau hōro’a ’o tāna i hōro’a i tōna feiā mo’a—te mea faufa’a roa a’e, ’o te hōro’a ïa nō te Fa’aora Iesu Mesia ’e nō te tīa’ira’a i te ora mure ’ore.
Te rāve’a nō te ’oa’oa i terā pu’e tau noera, ’o te hi’ora’a ïa ’e te fāri’ira’a i te mau hōro’a a te Atua ; ’e te mātāmua ’e te rahi roa atu, ’o te « hōro’a fāito ’ore » 7 ïa nō te hō’ē Fa’aora. Mai te reira ato’a nō teie pu’e tau noera.
I roto i te heheura’a tā Iosepha i fāri’i, ’ua ui te Fatu i teie nei uira’a :
« Nō te mea e aha ihora ïa te ta’ata e faufa’ahia ai mai te mea e tu’uhia ma te tao’a hōro’a iāna, ’e ’aita ’oia e fāri’i mai i te reira ? Inaha, e ’ore roa ’oia e ’oa’oa i te reira mea ’o tei hōro’ahia mai iāna ra, ’e e ’ore ato’a e māuruuru iāna ’o tei tu’u mau i te tao’a hōro’a ». 8
Pū’ohura’a
Maita’i ē, e nehenehe tātou tāta’itahi e ’ite ’e e fāri’i i te mau hōro’a tā te Atua i hōro’a mai ia tātou—tā’u rā e tīa’i mau nei, ’oia ho’i, ’ia ti’a ia tātou tāta’itahi ’ia fa’a’oa’oa i te Atua, ’oia tei tu’u mai i teie mau hōro’a.
Tē māuruuru nei au nō te hōro’a fāito ’ore nō tāna tamaiti—e tamaiti tei haere mai i te fenua nei ’ei ’aiū, vehihia e te hō’ē metua vāhine ’āpī ’e fa’ata’otohia i roto i te vaira’a mā’a a te ’ānimara. E ’aiū ’o tei ha’api’i i te a’o ’e ’ua nā ni’a i te a’o ’e ’ua pa’ari te maita’i nā ni’a i te maita’i ē tae roa i te hōro’ara’a mai i tōna ora ’ei tūsia nō tā’u mau hara. Nō tā ’outou mau hara. Nō te mau hara a te mau ta’ata ato’a i ora na ’e ’o tē ora mai i ni’a i te fenua nei.
Tē hīmene nei tātou i te mau parau o te hō’ē hīmene herehia :
« ’Ua tae mai te Mesia, ’oa’oa tātou, ’a fāri’i iāna ma te reo hīmene, e te ao nei ! » 9
’Ua tu’uhia mai te hōro’a nō Iesu te Mesia, ma te ho’o rahi ho’i ! Teie te uira’a : E fāri’i ānei tātou iāna ? E vaiiho ānei tātou iāna ’ia tomo mai ’e ’ia upo’oti’a i ni’a ia tātou ? Nāhea ?
Tē parau pāpū nei au ē, e hōpoi mai te fāri’ira’a i tō tātou Ari’i ’e tāna mau hōro’a i te ’oa’oa mau : te ’oa’oa i te ao nei ’e te ’oa’oa i roto i te ao nei.
« ’Ia ha’amaita’ihia te Atua i [te] hōro’a e’ita e ti’a ’ia parau ra » 10 nō tāna Tamaiti, i te i’oa mo’a o Iesu Mesia, ’āmene.