15nelson

iSolisoli Vakalou

Mai vei Peresitedi Russell M. Nelson

6 ni Tiseba, 2020

Kemuni na taciqu kei na ganequ, oqo edua na yakavi totoka. Na yaloda sa mai laveti cake ena totoka ni sere kei na itukutuku. O Sister Craven sa mai tara na yaloda ena nona vakasama ni veimokoti vakalomalagi kei na isolegi ni veivakacegui. O Elder Nielson e mai uqeti keda ni mai tukuna tiko na bula nei tamana, ni nona tiko ena mataivalu a sega ni marautaka na Siganisucu ena tolu na yabaki veitaravi. O Elder Holland e uqeti keda ena nona veituberi me baleta na bula ni iVakabula kei vuravura.

Meu taura mada na madigi oqo meu kaya vinaka vakalevu na nomuni vakaio ki na noqu veisureti taumada na kena robota na itukutuku raraba na vosa ni vakavinavinaka baleta na vuqa ni noda vakalougatataki. E milioni era vakaitavi. Kau vakavinavinaka vakalevu ena nomuni dau masu tikoga e veisiga vua na Tamada Vakalomalagi, ena vuku ni Nona veidusimaki, veitaqomaki, veivakauqeti, ka vakabibi, na isolisoli ni Luvena Daulomani, o Jisu Karisito.

Na Siganisucu e ibalolo ni ivakananumi totoka. Ena yabaki sa oti ga, O au kei Wendy keirau a marautaka rawa na siganisucu kei dua na goneyalewa lailai talei, o Claire Crosby, a lagata e dua na sere lomani ni Siganisucu. Meu wasea mada e dua na tiki ni neirau ikatoni ki na isevu ni “Vakararamataki Vuravura”¹

Me vaka e vakananumi keda kina o Elder Holland, e dina, na bogi kalougata o ya ena rua na mileniumi sa oti a bogi a vakatabui ena sucu nei Koya sa vakatabui oti tu mai me mai vakacegui vuravura ka vakauqeta na vinaka vei ira na tamata.² O Jisu Karisito a sucu me vakalougatataka na kawa tamata kece, e liu, nikua, kei na mataka.

Ni da dau lagata “Bogi Buto,” eda kila na bula nei Gonelailai kei Peceliema a sega ni tekivu e kea, ka sega ni mai oti e Kalivari. Ena bula taumada, a lumuti Jisu o Tamana me yaco me Mesaia, na Karisito, na iVakabula ka Dauveivueti ni kawatamata kece. A lesi taumada me mai sorovaki keda. A lauvako baleta na noda caka cala ka mavoa ena vuku ni noda malumalumu.³ A tadu mai me yaco na tawamate me ka dina ka rawa na bula tawamudu vei ira kece era mai bula eke.⁴

E kena ibalebale oi keda kece eda na tucaketale—oka kina ira nomuni daulomani era sa takali ena yabaki voravora oqo, kei ira sa bula tiko ena yasa kadua ni ilati. Kena ibalebale oi keda yadua eda rawa ni tubu tikoga. Kena ibalebale eda nuitaka na veika vinaka cake me yaco.

O sa bau taroga mada na vuna a digia na Turaga na vanua a sucu kina? A rawa me sucu ena vanua cava ga e vuravura. Ia a digitaka na vanua sara ga a mai vakatabuya.

O Jisu a sucu mai Peceliema. Na vosa vaka-Iperiu, bet lehem, o ya na “vale ni madrai.” ni sai Koya dina sara, na “madrai ni bula,”⁵ ena qai lako mai na “vale ni madrai.”

Na Nona sucu a yaco vakaloloma ena kedra maliwa na manumanu. E kea na “Lami ni Kalou”⁶a sucu ena gauna ni Lako Sivia vei ira na manumanu me ra na cabori ena Lakosivia. Ena dua na siga, ena tu o Koya me “lami sa tuberi me vakamatei.”⁷ Sai Koya na Lami vakakina Na iVakatawa.

Ni sa sucu o Koya sa vakatokai na “ivakatawa vinaka,”⁸era isevu na ivakatawa ni sipi mera rogoca na itukutuku ni Nona sucu vakalou.⁹

Ni sa sucu o Koya sa vakatokai na “kalokalo i volasiga e serau tu,”¹⁰e dua na kalokalo vou sa qai cila mai lomalagi.¹¹

Ni sa sucu o Koya sa vakatokai Koya na “rarama kei vuravura,”¹²na butobuto sa takali e vuravura taucoko me vakatakila ni Nona sucu vakalou.¹³

O Jisu a papitaiso ena vanua matia ni waidrano e vuravura, e vakatakila tiko na itagede ena lakova o Koya me vakabulai keda rawa, mai kea ena tu me cecere mai na ka kecega—vakadua tale, me vakabulai keda.¹⁴ Ena ivakaraitaki oqo, a vakavulica, ni sa rawa talega meda, tucake mai na itagede ni noda dui ibolebole—ni rarawa, malumalumu, kei na lomaleqa, meda yacova na cecere ni noda gumatua lagilagi kei na icavacava vakalou. Na veika kece oqo e rawa ena kaukauwa ni Nona yalovinaka kei na loloma.

Ena loma ni mamaca kei na kuvu ni lekutu ni vanua dravuisiga, na iVakabula a vakavulica na lesoni era marautaka ga o ira era sa kila vinaka tu, na karamaca ena viagunu.

Vua na marama ena tobu, e vakatavulica o Jisu:

“O koya yadua sa gunuva na wai oqo ena via gunu tale:

“Ia ko koya sa gunuva na wai kau na solia vua ena sega sara ni viagunu ka tawa mudu; ia na wai kau na solia vua, ena tu e lomana me mata-ni-wai sa tovure ki na bula tawamudu.”¹⁵

Na ivolanikalou oqo e vakalesui au ki na dua na gauna vinaka vata kei Elder Mark E. Petersen.¹⁶ A se lewe tiko o koya ni Kuoramu ni iApositolo Le Tinikarua, ka se bera tiko niu kacivi ki na kuoramu o ya, a rawa kina meu tomani koya yani ki Vanua Tabu, a yaco dina e kea me iotioti ni nona veisiko yawa e vuravura.

O Elder Petersen a tauvi koya tiko vakabibi na kenisa. Ena dua na bogi balavu ni nona mosi tiko, au a saga noqu vinaka kece meu vakacegui koya. Au raica ni rawa ga me kana ka gunusaravakalailai. Na siga e tarava ena vosa tiko o koya ena dua na ulutaga bibi.

Sa mataka mai. Ena qaqa, a gole o Elder Petersen ki na baravi vualiku ni Wasawasa o Kaleli, era sa wawa tu mai e dua na ivavakoso lewelevu. A digitaka me veituberi mai na Vunau ni iVakabula ena Ulunivanua. Ni sa cavuta o Elder Petersen na malanivosa, “Sa kalougata ko ira sa via kania ka via gunuva na ivalavala dodonu,”¹⁷ sa tonawanawa na wainimatana. A biuta na nona pepa, rai cake, ka taroga, “O ni kila dina beka na viakana kei na viagunu?” Au kila ni o koya e kiladinasara. A qai kaya, “Ni ko sa viakania ka viagunuva dina na ivalavala dodonu, sa qai rawa mo vakataki Karisito cake.” O Elder Petersen a dua na ivakaraitaki bula ni ka oqo Ni oti ga vakalailai, a mai cava na nona bula eke.¹⁸

Niu dau vakasamataka na viakania kei na viagunuva na ivalavala dodonu, au nanumi koya na iApositolo dokai oqo ni a vakabibitaka ena dua na iotioti ni nona vunau me vakavulica na ibalebalediname vakasaqarai na Turaga o Jisu Karisito, na viakania ka viagunuva na ivalavala dodonu, meda na vakataki Koya cake.

Ena yabaki oqo, keirau sa tekivuna vakatotolo kei Sister Nelson na neirau veisiko ni loloma ni Siganisucu ni neitou matavuvale. Ena itekivu ni Noveba, a vakaraitaka o Wendy ni keirau sa vakarau tu baleta na Siganisucu. A totolo sara noqu kaya, “O, vinaka!! Oqo daru sa vakanamata vua na iVakabula.”

Mai na veika vovou ni yabaki oqo, ni mai yaco ki na tamata yadua e vuravura na revurevu ni mate e vuravura raraba, e sega tale na ka bibi cake meda cakava ena Siganisucu oqo meda sa raica matua ga na iVakabula kei na isolisoli ni ibalebale dina ni Nona bula kivei keda yadua.

Na Tamada Vakalomalagi lomani “sa lomani ira na kai vuravura vakaoqo, me solia kina na Luvena e duabau ga sa vakatubura, me kakua ni rusa ko ira yadua sa vakabauti koya, me ra rawata ga na bula tawamudu.”¹⁹

Na Luve ni Kalou sa yalataka kina vei keda ni “ko koya yadua sa bula ka vakabauti au, ena sega sara ni mate.” ²⁰ E sega ni cavuti rawa, ka tawavakatauvatani na isolisoli mai vua na Tamada kei na Luvena!

Au vakavinavinakataka na Kalou ena isolisoli ni Luvena Lomani. Kau vakavinavinakataka na Noda Turaga o Jisu Karisito ena Nona solibula tawavakatauvatani rawa kei na ilesilesi. Ena imatai ni Nona lako mai o Jisu, a voleka ni sega ni kilai. Ia na iKarua ni Nona Lako Mai, na lagilagi ni Turaga “ena qai vakarairaitaki ka ra na raica vata na tamata kecega.”²¹ Ena yaco me “sa Turaga vei ira na Turaga ko koya kei na nodra Tui na Tui.”²²

Ia, niu sa italai vakadonui ni iVakabula, au gadreva meu vakalougatataki kemuni yadua, na taciqu kei na ganequ lomani. Mo ni vakalougatataki kei na nomuni vuvale ena vakacegu, kei na gugumatua qaqa me rogoci na domo ni Turaga, ka ciqoma na ivakatakila ena igu cecere mo ni kila na levu ni Nona lomani kemuni na Tamada kei na Luvena, karoni kemuni, ka tu vakarau me dusimaki ira era vakasaqarai Rau. Au duavata ena vosa nei Moronai ka “vakauqeti kemudou mo dou vakasaqarai Jisu oqo, o koya era sa volavola kina na parofita kei ira na iapositolo, me nomudou tikoga na loloma soliwale ni Kalou ko Tamada, kei na Turaga ko Jisu Karisito, kei na Yalo Tabu, … me tikoga kei kemudou ka sega ni mudu.”²³ Sa noqu masu oqo ena yaca i Jisu Karisito, emeni.