Na Kosipeli ni Sautu
Ena draki ni Siganisucu oqo, ena marautaka tiko kina na lotu Vakarisito e vuravura taucoko na nona sucu o Jisu Karisito, na “Tui ni Sautu.” Eda sa rekitaka na nona vakaraitaka mai na agilosi na sucu o ya:
“Ni sa sucu vei kemudou e na siga oqo ena koro i Tevita, na iVakabula ko Koya na Karisito na Turaga. …
“A ra sa lewe vuqa na kai lomalagi era sa tiko kaya vakasauri na agilosi a ra sa vakavinavinaka vua na Kalou ka kaya,
“Sa nona na Kalou na vakarokoroko ena veiyasana e cake sara, a sa veivinakati rawa ko ira e vuravura a sa lomani ko ira na tamata.”1
E dua na sala vinaka ni nodra dau rokova na iVakabula o ira na bula Vakarisito e tukuni tiko ena nona vola o Charles Dickens baleti iratou na luvena:
“Kemudou na luvequ lomani, e maqusa na lomaqu meu tukuna ni dodonu mo dou kila mada na iTukutuku taumada kei Jisu Karisito. Ni sa dodonu me kila na tamata kecega na veika e baleti Koya. Se bera mada vakadua me dua a bula voli, a tamata vinaka sara, lomavinaka, e yalomalua sara, ka vosoti ira kece sara na tamata a caka cala me vakataki Koya.”
O ya na itekivu ni ivakamacala nei Dicken. A qai tinia vakaoqo o koya:
“Mo nanuma oqo!—Na bula Vakarisito ga me na caka vinaka tiko ena gauna kecega—vei ira mada ga era caka ca vei keda. Na bula Vakarisito sai koya meda lomani ira na wekada me vakataki keda, ka cakava na veika vei ira na tamata kecega me vaka ga era na Cakava vei keda. Na bula Vakarisito sai koya na yalomalua, dauloloma, ka veivosoti, ka maroroya voli na ivakarau oqori e lomada yadua, ka sega ni da boletaki keda kina, ni da sa dau masu se ni da sa lomana na Kalou, ia meda sa vakaraitaka ga ni da sa lomani Koya ena noda sasaga ena yalomalua meda cakava na ka dodonu ena veika kecega. Ni da sa cakava oqo, ka nanuma tiko na bula kei na ivakavuvuli ni Noda Turaga o Jisu Karisito, ka saga voli meda bulataka yani, sa qai rawa meda nuitaka ena yalodei ni Kalou sa vosota na noda ivalavala ca kei na caka cala, ka rawa kina meda sa na bula voli ka mate talega ena Vakacegu.”2
A vola kina o Dicken, ni “bula kei na ivakavuvuli ni Noda Turaga o Jisu Karisito” ena liutaki keda ki na tiko vakacegu. E vakatoka na iApositolo o Paula na veivakavulici nei noda iVakabula me “itukutuku vinaka ni veika vinaka.”3
Na vosa na vakacegu e vuqa tu na kena ibalebale ena ivolanikalou. Ena nona kaya o Jisu, “Dou vakacegu,” a vakaraitaka tiko o Koya na mataqali vakacegu a tukuna na Parofita o Aisea: “Ia mai na cakacaka dodonu ena tubu na sautu, ia na cakacaka dodonu ena vakatubura na vakacegu kei na tiko dei me sega ni mudu.”4 Sa mai vakayacora na iVakabula na parofisai o ya. A vakamacalataka o Koya: “A veika oqo kau sa tukuna vei kemudou, mo dou rawata na vakacegu ena vukuqu.”5
Ena iotioti ni Nona ivakasala, a kaya na Turaga o Jisu Karisito vei iratou na nona iApositolo, “Au sa laiva vei kemudou na vakacegu, au sa solia vei kemudou na noqu vakacegu: au sa sega ni solia vei kemudou me vaka sa solia ko vuravura. Me kakua ni rarawa na yalomudou, se rere.”6
Ni oti toka o ya, ni sa sikovi ira yani na tamata dodonu ena vuravura vou, a kaya kina na iVakabula na vosa oqo nei Aisea: “A luvemu kecega ena vakavulici ira na Turaga; ena ka levu talega na nodra vakacegu na luvemu.”7
Na veika a vakavulica na noda iVakabula me baleta na vakacegu ena bula ni dua na tamata ena yaco talega na vakacegu oqo ki na dua na matavuvale, tiko vakacegu ni dua na matanitu, kei na vakacegu e vuravura.
E sega na parokaramu ni iVakabula kei iratou na Nona iApositolo me baleta na vakacegu e vuravura me vakataka ena ivalavala dodonu ni tamata yadua. E sega ni ratou saqata kina na veiliutaki nei Roma se ena nodra lewa na iliuliu vakatani e kea. E ratou vunautaka mera ivalavala dodonu na tamata yadua ka vakavulica ni dodonu vei ira na luve ni Kalou mera dau lomani ira na kedra meca8 ka “veilomani kei ira na tamata kecega.”9
Na veivaluvaluti kei na veisaqasaqa sa vu mai na ivalavala butobuto; ia na vakacegu sa vua ni ivalavala dodonu. Na veivakalougatataki ni kosipeli sa baleti vuravura taucoko, sa vakakina na kena rawati na vakacegu: o ya me maroroi na ivakaro ni Kalou.
E vakavulica oqo o Peresitedi Howard W. Hunter:
“Na vakacegu e gadreva o vuravura e gauna ni kena tarovi na veilecalecavi; ia era sega tiko ni kila na tamata ni vakacegu e dua na ituvaki ni bula ena qai yaco ga mai vua na tamata ena ivakarau sa virikotora na Kalou, ka sega tale ni dua na sala. …
“…Kevaka eda raica na tamata kei na sala vakavuravura, eda na kunea na bula yavavala kei na veilecayaki. Kevaka walega eda gole vua na Kalou, eda na kunea na vakacegu ki na yalo tawavakacegu. …
“Na vakacegu oqo ena vakarurugi keda mai na tiko yavavala ni vuravura.”10
Ena ivakatakila ena gauna oqo eda wilika kina: “Ia mo dou kila ni ko koya sa vakayacora tiko vakadodonu na nona itavi ena rawata vakaidina na kena isau, io na vakacegu ena vuravura oqo, kei na bula tawamudu ena vuravura sa bera mai.”11
Na vakacegu sai koya na yalayala ni noda iVakabula, ni vakacegu oqo sa noda lalawa. Na vakacegu sa yalataki tiko oqo sai koya na ituvaki vinaka ni bula kei na sautu e yaco mai ni maroroi na Nona ivakaro. A vakamacalataka o Peresitedi Spencer W. Kimball:
“Sai koya na vua ni lewai koya vakavinaka. E sega ni rawa me voli ena ilavo, ka sega ni rawa me veisautaki se veisolisolitaki. Ena cakacakataki ga.”12 “Sa kamica na vakacegu ni kosipeli,”13 vakakina ena dua tale na sere rogolevu eda lagata vata ena masu totoka oqo:
“Me tiko na vakacegu e vuravura
Ka me tekivu vei au.”14
E sega ni rawa me tiko na vakacegu ena veimatanitu ke sega ni rawati mada na ivalavala dodonu vei ira na tamata kecega era sa tiko kina. Ena veiyabaki lomolomora ni iKarua ni Valu Levu kei Vuravura a vakavulica kina vakaoqo o Elder John A. Widstoe:
“Na sala duadua ga me tarai cake kina na vakacegu ena veiitikotiko raraba o ya mera tarai cake na tagane kei na yalewa era sa dau taleitaka ka tara cake na tiko vakacegu. Na tamata yadua, ena vunau i Karisito kei na Nona Lotu, sa taura tu e ligana na vakacegu kei vuravura.
“Sa yaco kina me sa noqu ilesilesi na tiko vakacegu e vuravura, ka sa nomu ilesilesi sara ga mo raica me tiko na vakacegu e vuravura. Na ilesilesi oqo ena sega ni rawa me soli ki vua e dua tale.”15
Ni oti toka e tolusagavulu na yabaki, e dua tale na Vakaitutu Raraba, o Eldred G. Smith a vakavulica na dina vata oqo:
“Kevaka sa tiko na vakacegu ena yalo ni tamata yadua, sa qai tiko na vakacegu ena loma ni matavuvale. Kevaka sa tiko na vakacegu ena matavuvale yadua, sa qai tiko na vakacegu ena vanua. Kevaka sa tiko na vakacegu ena vanua, sa qai tiko na vakacegu e vuravura.
“Me da kakua ni lagata walega, ‘Me sa tiko ga na vakacegu e vuravura ka me sa tekivu vei au,’ ia meda sa qai lomada dina. Me sa noqu lalawa—ka nomu lalawa.”16
Dua vei ira na noqu italanoa taleitaki ni Siganisucu a tabaki ena Deseret News ena 30 na yabaki sa oti. A talanoataki kina e dua na goneyalewa yabaki 11 kei na veika a vulica mai na nona a rarawataka ni a sega ni taura e dua na iloloma a gadreva voli kei na nona a kune vakacegu ni a qai kila rawa na ibalebale ni noda marautaka tiko na iloloma ena gauna ni Siganisucu. Au wasea vakabibi oqo vei ira na gone kei na itabagone era tiko vata kei keda.
A rarawa voli na goneyalewa yabaki 11 baleta ni a sega ni soli vua na matakau vou a dau vinakata tu mai vakadede.
Ni saga me vakacegui koya, a kaya vua o tinana, “O iko sa goneyalewa levu cake mai na ka o ya.” Sa goneyalewa levu cake beka o koya mai na Siganisucu? a lomatarotaka o luvena. A vakamacalataka o tamana:
“Noqu goneyalewa lomani, dina sara. Sa dau vakamosi yalo, ka ka rekitaki na tubu cake tiko. Sega, luvequ, o sega ni levu cake mai na Siganisucu. E dua tale na ka bibi cake sa yaco tiko vei iko. O sa tubu cake tiko mo kila kina ni vuqa na ka e titobu ka bibi sara na kedra ibalebale mai na nomu se gone mo rawa ni kila vinaka kina. … O sa rogoca ni sa tukuni tiko ni da soli iloloma ena Siganisucu baleta ni ra a kauta na ivakatawa ni sipi kei na tamata vuku na iloloma kivua na Gonelailai o Karisito, ia meu tukuna mada vei iko na imatai ni loloma dina ni Siganisucu.
A qai vakamacalataka na loloma cecere nei Tamada Vakalomalagi vua na Luvena ulumatua, “sa dau dina Vua ena gauna ca kei na veisaqasaqa ka a vukei Koya talega me bulia na vuravura eda tiko kina ena gauna oqo.” A qai kaya vua na nona solia na Tamada Vakalomalagi na Luvena o ya, o Jisu Karisito, me sa noda iVakabula.
A wilika mai na iVola i Momani ni yaco na Luvena me “lako sobu mai lomalagi ena kaukauwa ena kedra maliwa na luve ni tamata ka na mai tiko ena vale qele. … Ka raica, ena sotava ko Koya na veitemaki, kei na mosi ni yago, na via kana, na via gunu, kei na oca, ka levu cake mai na kena e vosota rawa na tamata, ka tarava ga kina na mate; ia raica, sa tuturu mai kina na dra mai na veiqara ni yagona, ni sa rui levu sara na nona yaluma ena vuku ni nodra caka ca kei na nodra itovo vakasisila na nona tamata. Ia ena vakatokai na yacana ko Jisu Karisito, na Luve ni Kalou, na Tama ni lomalagi kei na vuravura.” (Mosaia 3:5, 7–8).
A sogota na ivola, ka tukuna o tamana:
“E dina ga ni sa kila tu na Tamada mai Lomalagi ni na yaco na veika oqo vua na Luvena lomani, o Koya, ena Nona loloma kei na vuku tawayalani, a soli Koya mai ki vuravura. Kei na ikarua ni tiki ni iloloma veivakurabuitaki oqo o ya ni Karisito, na Luvena, sa kila tale tikoga, na veika kece oqo, a soli Koya yani ena lomana dina me rawa ni da rawata na bula tawamudu.”
Ena veiyabaki e muri, na goneyalewa lailai sa mai marama oqo a vola:
“O ya na imatai ni bogi ni Siganisucu au nanuma rawa niu a sega ni moce vata kina kei na noqu matakau ni Siganisucu ena noqu lokoloko. A noqu e dua na ka a vinaka cake sara. Ena vu ni lomaqu sa tu kina e dua na vakacegu e vou ka veivakurabuitaki. Au sa mai kunea e dua na iloloma ena sega ni madra se me yali, na iloloma au na sega ni rawa meu tubu tani mai kina, ia e dua, ena veivuke ni Kalou, meu na laki tubu yani kina. … Au sa qai masu … me yaco na siga meu vakaluveni dina kina, ka yaco meu kila na vo ni iSolisoli ni Loloma.”17
Meu tinia ena veivakavulici nei Peresitedi Russell M. Nelson ena Lotu ni Siganisucu ni Mataveiliutaki Taumada ni yabaki sa oti: “O Jisu Karisito na iloloma cecere duadua ni Kalou—na iloloma nei Tamada kivei ira kece na Luvena.”18
“Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”19
Sa noqu masu ni na yaco na dina tawamudu me teteva yani na veika kece eda cakava ena gauna ni Siganisucu oqo, ena yaca i Jisu Karisito, emeni.