O Se Au Agelu Faaona Po Nei
Talofa, o’u uso e ma tuafafine pele. Ua ou lagonaina le faamanuiaina mo le avanoa e lauga atu ai ia te outou i le po nei a o tatou faamanatuina le mea silisili ona mamalu na tupu i le talafaasolopito o tagata—o le afio mai o le Alo o le Atua i le lalolagi. O le soifua mai o Keriso, le soifuaga, ma le Togiola o meaalofa ia a lo tatou Tama Faalelagi ia i tatou uma.
A o tatou faamanatuina le soifua mai o le Faaola i lenei taimi fiafia o le tausaga, e foliga mai o le alofa faifai pea ma le lē muta o le Atua ua matuā taumasuasua ai o tatou agaga, ua fesoasoani ai ia i tatou e liliu atu o tatou loto i o tatou aiga, uo, ma tuaoi, ma fesoasoani ia i tatou ia nofouta atili ia i latou atonu o loo lagonaina le tuuatoatasi, tuulafoaiina, po o ē o loo manaomia le mafanafana ma le filemu.
E faagaeetia lava a’u i le faamatalaina o mea na tutupu o loo siomia ai le soifua mai o Iesu, ua faasoa mai e le Talalelei a Luka ni faataitaiga o le mafanafana ma le filemu na tuuina atu ia i latou o ē na oo ia i latou lava nei tulaga. O ni faataitaiga faapea e mafai ona vaaia ina ua auina ifo e le Tama Faalelagi alofa Ana agelu e asiasi i leoleo mamoe na fegalegaleai i se nofoaga mamao ese i le po e faasilasila atu i ai le soifua mai o Lona Alo, faapea ma le taimi na asiasi atu ai leoleo mamoe ia Maria ma Iosefa, o ē na tausia se pepe fou na mamao mai lo la aiga i Kalilaia.
O le malaga umi a Iosefa ma Maria mai Nasareta i Peteleema ina ia lesitala i le tusigaigoa sa le o se mea na tupu fua, ona mo le tele o seneturi, sa valoia ai e perofeta anamua o le a fanau mai le Faaola o le lalolagi i Peteleema, le Aai o Tavita.1 Ua tatou vaaia sa matua silafia e lo tatou Tama Faalelagi ma aafia i auiliiliga uma o loo siomia ai le soifua mai o Lona Alo e Toatasi na Fanaua. “Sa i ai i laua, ona oo lea i ona po e fanau ai o ia.”2
A o ou mafaufau i leoleo mamoe ma le ulugalii talavou, o Maria ma Iosefa, ou te tomanatu pe na faapefea ona aumaia e le faaali atu o au agelu i leoleo mamoe i fanua ma le taunuu atu o leoleo mamoe ia Maria ma Iosefa le mafanafana, filemu, ma le olioli i o latou olaga.
Mo leoleo mamoe, atonu na aumai e agelu le mafanafana manaomia e faapea na silafia e le Atua i latou ma silasila i lo latou taua o ni uluai molimau filifilia o le soifua mai o le Tamai Mamoe a le Atua. Mo Maria ma Iosefa, atonu na aumaia e leoleo mamoe le mafanafana na matua manaomia e faapea na iloa e isi le vavega paia lea na avea ai i latou ma se vaega [o lena vavega].3
E mautinoa lava, ua i ai foi ia i tatou ni leoleo mamoe faaona po nei—alii ma tamaitai o loo galulue i le leva o le po ma vaveao ina ia maua mea e ola ai. O nisi o nei leoleo mamoe faaona po nei e ono aofia ai leoleo po, aufaigaluega a le falemai ma faalavelave faafuasei, aufaigaluega o faleoloa 24 itula ma pamu penisini, le vaega au faasalalau o talafou. O nisi taimi o i latou e faigaluega i sifi o le po e ono lagonaina le faiesea mai fegalegaleaiga faaagafesootai ma i latou o ē masani ona faigaluega i itula masani o le aso. E faaopoopo atu i lena, o loo i ai foi ni Iosefa ma ni Maria faaona po nei ua o ese mai i o latou nuu moni o ē o loo taumafai e fetuunai i se olaga fou a o latou faamanatuina ai ni aso taua e pei o le Kerisimasi, aso fanau, faaipoipoga, ma aso maliu.
A o tatou latalata atu i le Kerisimasi, ou te tomanatu pe mata e mafai ona avea atili i tatou e pei o ni au agelu e ala i le asiasi atu i ni leoleo mamoe faaona po nei e avatu i ai talafou a Keriso, filemu ma le mafanafana. Ma ou te tomanatu pe mata e mafai ona avea atili i tatou e pei o ni leoleo mamoe e ala i le tali atu i le valaau e asiasi atu ma auauna atu i ni Iosefa ma ni Maria faaona po nei i o tatou tuaoi ma nuu e avatu i ai le faamautinoaga e alofa le Atua ia i latou ma o loo leoleo mai ma tausia i latou.
Na matou lagonaina ma lo’u aiga i ni mea eseese na tutupu ia lagona o le mafanafana ma le filemu lea e mafai ona aumaia e se agelu faaona po nei. O le po nei ou te fia manatunatu i se tasi o na mea na tupu. I le 2003, sa matou masii ese ai mai le matou atunuu moni i Iuta. O lena taumalulu, sa taia ai i matou i se tasi o āfa kiona sili ona malosi na tupu i Iuta mo le tele o tausaga. Matou te le i vaai muamua lava i se mea faapea i o matou olaga, ona sa matou ola a’e faatasi ma niu ma matafaga oneone. Sa tu le matou fale i se tulimanu i luga o se maupuepue i Bountiful lea sa i ai se ala savali umi lava. Ina ua amata le kiona, sa amata ma le lototele e lo’u toalua ona feulaese le kiona i le masini mai le auala taavale ma ala savali ona sa ou see i luga o le aisa ma gau ai lo’u tapulima i ni nai aso na muamua ai a o ou savali atu i se auala taavale e asiasi i se tasi o o matou tuaoi. O lena faalavelave na faia ai se taotoga ma se sima tele i lo’u lima mo ni masina se lua. A o amata ona ia feulaese le kiona i le masini, sa le iloa e si o’u toalua pele e ao ona ia suia le itu o le gutu e feula i ai pe a uma ona faamamaina le tasi itu o le auala taavale. O lea, ina ua ia alu i le isi itu e faamama, o iina lea sa faasaga atu i ai le gutu o le masini feula kiona. Sa ia fefo’ifo’ia’i ai lava e aunoa ma se mea na ausia. Oka se faaletonu! Ona o le umi na i ai i le malulu, sa aafia ai ona taliga e lua ma sa toeitiiti lava a tutuli atoa ai mo le lua masina. I le taimi lava e tasi sa faamanu’alia ai lo’u atalii sefuluono tausaga le matua i lona tua a o faasee ma sa ao ai ona taoto i le moega seia oo ina manuia mai le manu’aga. Ia o matou la lena, tasi na faataotolia i le moega, tasi na tutuli, tasi na sima le lima, ma sa maalilili uma. Ou te mautinoa sa ese se vaaiga a o matou tuaoi ia i matou. I se tasi o na taeao po malulu tele pe tusa o le 5:00 i le vaveao, sa ou ala a’e ai i luga i le leo o se masini feula kiona i fafo o lo’u faamalama. Sa ou tilotilo atu i fafo i le faamalama ma ou vaaia ai i le auala lo’u tuaoi, o Uso Blain Williams. I le fitusefulu ma ona tupu tausaga, sa ia tuua ai lona fale mafanafana ma toafimalie ma sau filemu ma faamama le matou auala taavale ma auala savali, ma le iloaina sa le mafai ona matou faia e i matou lava. Ma e pei ona ia sau i lana ala filemu ma faigofie, sa sau foi se isi uso, Uso Daniel Almeida, i lo matou fale e ave a’u i Sate Leki mo le galuega, ona sa le mafai ona ou aveave i le mamafa o le sima o lo’u lima. Sa la i ai iina ma le agalelei ma le filemu mo a’u i taeao uma seia oo ina faamaloloina lo’u aiga ma toe mafai ai ona matou faia mea e i matou lava. I le taimi o lena vaitau malulu o le Kerisimasi o le 2003, sa auina mai ai nei uso ā agelu ia i matou, e pei lava o agelu o auaunaga sa auina atu i leoleo mamoe faatauvaa o anamua. Na mulimuli nei uso e toalua i le faataitaiga a lo tatou Faaola ma mafaufau i o matou manaoga a o le i mafaufau i o laua lava manaoga.
Uso e ma tuafafine pele, o le soifuaga o le Faaola o se faataitaiga atoatoa o le alofa ma le agalelei i tagata. E faagalo lava e Ia o Ia lava e fai ma sui o isi tagata. O Ana galuega le manatu faapitoa na faailoa mai i mea uma na Ia faia i aso uma o Lona soifuaga ma sa le tapulaa i se vaitau faapitoa po o se aso malolo. A o tatou liliu atu o tatou loto i fafo e pei ona faia e le Faaola, ou te folafola atu e mafai ona sili atu ona tatou lagonaina le uiga o le Kerisimasi. A o tatou faia, ou te faamautinoa atu ia te outou o le a tatou maua avanoa e le tapulaa e tuu lemu atu ai i tatou lava ma le agalelei i tagata e manaomia i tatou. O le a fesoasoani lenei mea ia i tatou ia iloa atili ai le Faaola ma maua ai mo i tatou lava le filemu i luga o le lalolagi ma le manuia i tagata, lea o le a iloa ai i se fuataga sili le alofa, filemu, ma le malosi faafouina e mafai ona tatou lagonaina ma faasoa atu i isi. A o tatou mulimuli i tulagaaao o le Faaola, tau ina ia tatou faalogo mo le leo o aao o loo se’eina seevae pa’u ma aapa atu mo le lima tumau o le Kamuta. A o tatou saili atu mo le Faaola i mea uma tatou te faia, o le a le avea le Kerisimasi e tau na o se aso po o se vaitau ae o le a avea ma se tulaga o le loto ma le mafaufau, ma o le olioli ma le alofa e lagonaina i le Kerisimasi o le a latalata mai pea e le aunoa. Ou te molimau atu o Iesu Keriso, le pepe na fanau i Peteleema, e moni lava o le Faaola ma le Togiola o le lalolagi.
Manuia le Kerisimasi ia te outou uma. Ou te fai atu ai nei mea i le suafa o Iesu Keriso, amene.