Mas Tin-aw nga Pagsabut sa Kahulugan sa Pasko
Ganahan ko niini nga panahon sa tuig diin kitang pamilya ug mga minahal magkapundok sa paghinumdom sa pagkatawo sa atong Manluluwas nga si Jesukristo ug magpasalamat sa Iyang kinabuhi ug sa Iyang maulaong sakripisyo. Ganahan ko sa dili maihap nga pahinumdom niining espesyal nga panahon sa tibuok palibut ug mobati gihapon sa kahinam ug pagpaabut sa Kapaskohan sugod sa gamay pa ko, sa bugnaw man nga England o sa init kaayo nga Arabia.
Tingali sama sa uban, sa miaging semana naglisud ko sa pagpangita sa usa ka bombilya nga maoy hinungdan nga dili na mosiga ang tanan. Dihang nakit-an ra ang bombilya sa katapusan ug nailisan, misiga na ang tanang suga, ug namugna ang kalipay gumikan sa gamay nga kalampusan.
Usa sa paborito nakong mga butang nga buhaton kon magkaduol na ang Pasko mao ang paglingkod duol sa among Christmas tree, nga pawong ang tanang laing suga, ug ipahanap ang akong panan-aw samtang magtan-aw ko sa christmas tree nga puno sa gagmayng puti nga mga siga. Kon dili nako i-focus ang akong mga mata, ang sinag sa matag suga mosidlak ug mohinay kon moigo kini sa sinaw mga pula nga dayan-dayan. Makadani kaayo ang epekto. Kasagaran magpatukar mi og musika nga may background nga mag-ingon, “Maglipay ta, Moabut na’ng Hari!!”1 ug ang Iyang ngalan tawgon og Kahibulongan, Magtatambag, Dios nga Makagagahum, Amahan nga walay Katapusan, Prinsipe sa Pakigdait.”2
Samtang ibalhin-balhin nako ang akong focus diha sa mga suga sa christmas tree, mapahinumduman ako sa balaang misyon sa atong Manluluwas, nga mas tin-aw nakong masabtan atol niining mga gutloa. Miingon Siya, “Ako ang kahayag sa kalibutan: siya nga magasunod kanako dili magalakaw sa kangitngit, apan magabaton siya sa kahayag nga magahatag og kinabuhi.”3 Namalandong ako sa balaang kagabhion sa Iyang pagkatawo, nga puno sa pasalamat sa giregalong kalipay, paglaum, ug gugma gikan sa Amahan nga gipadala sa yuta diha sa Iyang Bugtong Anak.4
Kini nga mga matang sa mga gutlo nga mahilom sa pagpamalandong posibling talagsa ra kaayo para nato niining bisi nga pagpangandam sa Kapaskohan. Anaa sa Disyembre ang mga party ug mga konserto, pundok-pundok ug mga regalo. Daghan kaayong mga iskedyul, ug usahay ang atong mga gustong mahitabo sa tinuod mowagtang sa kamaya sa kapaskohan kay sa mopalambo niini.
Mao nga mahinungdanon ang gitudlo ni Presidente Nelson: “Ang kamaya nga atong gibati dili kaayo konektado sa mga sirkumstansya sa atong kinabuhi apan konektado kaayo sa focus sa atong kinabuhi. Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kamaya bisan unsa pay mahitabo—o sa wala manghitabo—sa atong kinabuhi. Ang kamaya moabut gikan ug tungod Kaniya. Siya ang tinubdan sa tanang kalipay.”5
Hingpit kini nga okasyon para makonsiderar nato ang atong focus. Unsay inyong gipangandoy niini nga Kapaskohan? Unsa gayud ang inyong gusto para sa inyong kaugalingon ug sa inyong mga minahal samtang magkapundok kamo niining pinakabalaang adlaw?
Inig labay sa duha ug tunga ka semana, Pasko na. Hunahunaa unsay naa sa inyong iskedyul alang sa sunod nga duha og tunga ka semana. Siguro masubrahan kamo sa daghan kaayong mga komitment ug mga buhatunon. Nanubra ba ang inyong iskedyul? Ang mga kultural nga tradisyon ug mga presyur ba naghatag kaninyo og walay hinungdan nga kaluya ug nagpugong sa inyong pagpamalandong sa kamaya sa pagkatawo ni Kristo? Unsaon man kaha ninyo sa pagpasimple ang inyong iskedyul niining Kapaskohan ug makaplano og mas maayo para sa sunod?
Mag-amping gayud kita nga dili kaayo mabisi ug magluya sa paghimo og sobra kadaghan nga mawala na hinoon kita sa focus sa kapaskohan ug makalimtan na nato ang pagsimba sa bag-ong natawo nga Hari, ug pagdala og personal nga gasa Kaniya.
Batan-ong mga inahan, ug kitang tanan, nabug-atan ba kamo? Asa ang inyong focus? Tingali nining tuiga dili mo magpadala og mga Christmas card, o kaha kalimtan lang una ang naandan ninyong dagko og gasto nga kalingawan. Ang gidak-on sa gigahin ninyong panahon o kwarta mowagtang sa uban ninyong abilidad nga maka-focus sa Manluluwas ug sa kamaya sa Iyang Pagkatawo.
Batan-ong mga amahan, ug kitang tanan, asa ang inyong focus? Niining tuiga tingali pinasimple ang inyong Pasko uban sa daghang inato nga mga regalo ug mga regalo sa pagserbisyo tungod kay ang presyur ug gasto sa pagpamalit dagko kaayo og gasto—ug dili kinahanglanon—ug mowagtang kini sa inyong katakus nga mag-focus sa Manluluwas ug mobati sa kalinaw sa Pasko.
Ang pagserbisyo sa templo atol sa Kapaskohan makahuluganon kaayo. Ang templo motarung sa atong focus, modugang sa atong kalipay, ug mohiusa sa mga pamilya dinhi ug sa pikas kilid sa tabil. Ikonsiderar ang pagserbisyo sa templo imbis sa kalihokan nga walay ikatabang sa gihandom ninyong Pasko nga malinawon. Kana nga balaang mga ordinansa—ang kalinaw ug gahum sa pagkapari nga ilang gihuptan alang sa tanan nga nagmanggad niini—mahimo lamang tungod sa Bugtong Anak sa Amahan, niining “Kordero nga gipatay gikan sa katukuran sa kalibutan,”6 kansang pagkatawo karon atong gisaulog.
Samtang magkaduol kini nga Pasko, dugangan nato ang pagbuhat sa mga importante ug minusan ang dili kaayo importante. Paningkamutan nato nga mabuhat ang mga buluhaton ni Jesus nga Nazaretnon—bayawon ang nagsubo, hupayon ang nasakitan, bisitahan ang nabilanggo, pakan-on ang gigutom, sininaan ang hubo, patingugon ang walay tingog, naglisud, nahikalimtan, ug ang mga tinamay.7
Kamong naglisud karong Pasko, unta makaplagan ninyo ang gasa nga gugma sa Manluluwas nga gilahi para kaninyo. Daghan, karong mga gutloa, ang naghinumdom sa pagkawala sa mga minahal tungod sa sakit, katigulangon, o sa ubang grabe nga aksidente. Daghan ang naghinumdom sa dili maayong panghitabo sa nangagi atol sa Kapaskohan, ug sakit kini nga anibersaryo para kaninyo. Ang uban nagbangutan sa gihimong mga pagpili sa ilang mga minahal sa pagkakaron. Ang uban nag-inusara, walay pamilya, anaa sa kasamok, o sa bisan unsang rason lahi kaayo ang Pasko kay sa ilang pagsaulog sa una.
Tuohi nga dunay pihong gasa niini nga kapaskohan alang kanimo. Pangita og hilum, nga mag-inusarang makapamalandong, makaampo, ug mobati sa gugma sa Usa kansang pagkahimugso naghimong posible sa bisan unsang kalipay. Ang saad mao nga ugma damlag, “ang kamatayon wala na; ug wala na usab unyay pagminatay, ni paghilak, ni aduna pay kasakit.”8 “Sila dili na gutomon, ug dili na usab pagauhawon. … Kay ang Kordero nga anaa sa kinatung-an nga trono mamahimong ilang magbalantay, ug siya magatultol kanila ngadto sa mga tuburan sa mga tubig nga nagahatag og kinabuhi; ug pagapahiran sa Dios ang tanang luha sa ilang mga mata.”9
Gahini og panahon ang pagmalinawon, paghanggap og hangin, pagkatingala. Hangad. Mag-focus sa Iyang talagsaon nga gasa—sa kahibalo kon kinsa gayud ikaw, ug ang pagsabut nga ang mga pagsulay dinhi molabay ra ug ang kalipay dinhi sinugdanan lamang sa kalipay nga moabut. Hinumdumi, “ang kamaya nga atong gibati gamay ra og koneksyon sa mga sirkumstansya sa atong kinabuhi apan konektado kaayo sa gitutokan sa atong kinabuhi.”
“Ug karon, ako modasig kaninyo sa pagpangita niini nga Jesus diin ang mga propeta ug mga apostoles misulat, nga ang grasya sa Dios nga Amahan, ug usab ang Ginoong Jesukristo, ug ang Espiritu Santo, nga nagpamatuod kanila, mag-uban kaninyo sa kahangturan.”10 Aron kita makaingon nga, “Kami moyukbo, sa pagkatawo mo. … Dali, simbahon Siya,”11
Sa ngalan ni Jesukristo, amen.