平安夜，神子愛，光皎潔
我想分享兩個發生喺我身上，咁多年嚟我一直記憶猶新嘅故事。直到而家，呢啲故事仍然教導我需要學習嘅事情。
第一個故事喺我6歲嘅時候發生。碧佛利·惠尼姊妹係我哋洪德第5支會嘅音樂指揮。我而家先知佢當時都未夠40歲，但佢啲仔女已經踏入青春期。喺我哋呢啲初級會細個嘅小朋友眼中，佢好成熟同有智慧。佢個人好有趣，會當我哋好似迷你嘅大人咁，我哋好中意佢咁做。我哋欣賞佢，好想取悅佢。佢會話我哋可以唱得好大聲，令我哋喺隔離房嘅父母都聽到。唔係嗌喎——係真係唱歌！我哋都用心去唱。佢教我哋唱咗一首大人唱嘅詩歌，佢話我哋係成熟嘅音樂家，可以記得嗰啲好深嘅歌詞。然後佢同我哋解釋晒所有歌詞，等我哋明白。佢教我哋，每首歌都有一個只係為我哋而設嘅特別信息。如果我哋思考嗰啲歌詞，我哋就會搵到為我哋而設嘅信息。
嗰個聖誕節，當我學晒《平安夜》每節嘅歌詞之後，我嘗試實踐惠尼姊妹教導我哋嘅事。嗱，而家我預先同所有翻譯員道歉，因為呢度會比較難翻譯。作為一個6歲嘅細路，我諗咗第三節嘅歌詞好耐，因為我唔明白個標點符號。原文係「神子愛，光皎潔」，英文歌詞「愛」字後面有個撇號，意思係耶穌散發嘅光係源自純正嘅愛。但係我唔明白個撇號，就以為係「神子愛皎潔嘅光」，即係耶穌中意全部有純正嘅光嘅嘢。就好似惠尼姊妹咁講，我想試吓點樣好似耶穌咁「愛皎潔嘅光」。
第二個故事喺我9歲嘅時候發生。就好似其他小朋友咁，我當時學緊彈琴。我唔係特別有天分，但可能主教想鼓勵我，佢邀請我喺平安夜嘅聖餐時間演奏一首聖誕歌。我想演奏「平安夜」。我嘅鋼琴老師幫我預備。我父母聽我，用放喺屋企地牢嗰個黑色直立式鋼琴，彈咗呢首歌超過100次。有人話可能我記得晒隻歌，唔使睇譜喇，但係要喺全支會嘅人面前演奏，令我緊張到背唔到譜。但我諗到個方法。我會照攞歌譜，但就唔放喺琴上面，而係放喺我嘅大腿上面。當我耷低頭望住對手彈琴嗰陣，我就睇到歌譜，咁睇起嚟我就好似背咗個譜咁喇。呢個計劃喺演奏嘅頭20秒都進行得好順利。我將個譜放喺我條好光滑嘅絲質裙上面。當我開始演奏，條裙嘅布料好滑，去到第一節中段嘅時候，個歌譜就線咗落琴底度喇。我完全呆咗喺度。我冇辦法執返個譜，個腦一片空白。我硬住頭皮咁盡力彈。結果我彈到一塌糊塗。
我彈錯晒啲音，我留意到會眾入面有啲人表情好難睇。我跌跌撞撞咁彈完第二節。我好聰明咁唔再彈第三節喇。我塊面紅晒，急步走去通道返埋位，盡力忍住唔好喊。我父母細細聲問：「發生咩事呀？你明明彈得好熟㗎？」我好想快啲離開教會。我唔想見人或者同任何人講嘢。我好丟面好尷尬。到聚會完咗，我嘅主日學教師阿爾瑪·希頓姊妹走埋嚟，佢係個老人家嚟嘅。我想避開佢，但佢捉住我隻手。。佢冇讚我彈得好好，係人都知咁講係呃人嘅。佢講咗一啲我呢世都記得嘅說話。佢話：「雪倫，結果係點唔重要。大家都睇得出你付出咗好大努力，無論你識唔識彈琴，大家都愛你。」
事實就係咁。但係我冇想像中咁難受。事實我真係努力過，就算我唔識彈琴佢哋都愛我。我輕輕咁微笑，然後希頓姊妹俾我一個老婆婆式嘅擁抱，突然間乜事都冇晒喇。
碧佛利·惠尼同阿爾瑪·希頓並冇做一啲好突出嘅事。佢哋冇喺日記度寫低。佢哋冇屋企人知道呢啲事。佢哋只係教小朋友唱歌同明白福音。仲有咩嘢事比呢啲事更平凡呢？其實呢啲事並唔平凡。如果你問我有咩人「愛皎潔嘅光」呢？我會話就好似碧佛利·惠尼咁。好似阿爾瑪·希頓咁。佢哋都察覺到，小朋友盡力去做嘅時候，所散發「皎潔嘅光」，然後因為小朋友嘅努力而愛佢，雖然個結果並唔完美。
我哋嘅天父就係咁樣喇。佢睇到佢年輕嘅孩子好努力。我哋嘅努力唔一定帶嚟成功。但係天父知道我哋有幾努力工作——有時硬住頭皮同跌跌撞撞咁搞到一塌糊塗——而佢因為我哋努力而愛我哋。正因為我哋嘅唔和諧、走音同埋唔悅耳嘅音樂，天父差遣佢最美麗嘅獨生子嚟到，佢就係愛嘅皎潔之光。如果我哋肯轉向耶穌基督，求佢幫助，佢就會修復我哋每個變質嘅音符，救贖每個唔和諧嘅音調。因為耶穌基督嘅降生、救贖同復活，我哋所有人都可以「靜享天賜安眠」。1
可以喺聖誕節為嗰啲受傷痛苦嘅人，唱出包含世界救主所帶嚟特別信息嘅歌曲，真係令我好快樂。好似初級會嘅惠尼姊妹一樣，我俾你哋相同嘅應許。如果呢個聖誕節你會思考一下你唱嘅歌詞，你就會發現為你特別度身訂造嘅神聖信息，佢會提升同安慰你。以下係我喺呢個聖誕發現嘅歌。我正擔心緊嗰啲人道救濟基金未幫助到嘅人，同埋世界各國有時做嘅嘢令我哋好難去救助受苦嘅弟兄姊妹。今朝就喺慈助會，我留意到我哋唱嘅嗰首歌﹕
更看顧眾孩童，保佑都安康；
使我們同蒙恩，隨主到天堂。2
我見證神子「愛皎潔嘅光」；而神子嘅愛，光皎潔。奉耶穌基督嘅名，阿們。